ལྷ་ས་འབྲིང་རིམ་མི་མང་ཁྲིམས་ཁང་གིས་རྩོམ་པ་པོ་གྲགས་ཅན་སྒོ ཤེས་རབ་རྒྱ་མཚོ་ལགས་སུ་ཁྲིམས་བཤེར་བྱས་ཡོད་འདུག
རྒྱ་ནག་གཞུང་གིས་རྒྱལ་ཚོགས་ཀྱི་འབྲེལ་ཡོད་ལས་ཁུངས་ཀྱི་རྩད་ཞིབ་ལ་ལན་འདེབས་བྱས་པའི་ཡིག་ཆའི་ནང་། འདས་ལོར་གར་སོར་ཆ་མེད་དུ་གྱུར་བའི་བོད་ཕྱི་ནང་གཉིས་སུ་གྲགས་ཆེ་བའི་རྩོམ་པ་པོ་སྒོ་ཤེས་རབ་རྒྱ་མཚོ་ལགས་སུ། ཁ་བྲལ་སྐུལ་སློང་བྱས་པའི་དོགས་གཞིའི་འོག ལྷ་ས་འབྲིང་རིམ་མི་མང་ཁྲིམས་ཁང་ཟེར་བས་ཁྲིམས་བཤེར་བྱས་ཡོད་ལུགས་དང་། དེ་བཞིན་ཕྱི་ལོ་ ༢༠༡༩ ལོར་འཛིན་བཟུང་བྱས་ཏེ། ཁ་བྲལ་ལ་ངན་སྐུལ་བྱས་པའི་ནག་ཉེས་འོག་ལོ་ ༤ དང་ཕྱེད་ཀ་བཙོན་འཇུག་བྱས་པའི་རྔ་བ་སྣང་ཞིག་དགོན་པའི་གྲྭ་རིན་ཆེན་ཚུལ་ཁྲིམས་ལགས་ཀྱི་འཛིན་བཟུང་བཙོན་འཇུག་གི་གནས་ཚུལ་རྣམས་ཁོང་གི་ནང་མིར་གསང་བ་བྱས་མེད་ལུགས་བཤད་འདུག་ཀྱང་། ཁོང་གི་ནང་མི་ཚོས་རྒྱ་ནག་གཞུང་ཕྱོགས་ནས་ཕྱི་ལོ་ ༢༠༡༩ ནས་བཟུང་ད་བར་ཁོང་གི་གནས་ཚུལ་ཙམ་ཡང་བཤད་མེད་པ་མ་ཟད། ད་བར་ཐུག་འཕྲད་བྱེད་མ་ཐུབ་པར་ལྷག་ཡོད་འདུག
རྒྱ་ནག་གཞུང་གི་ལན་འདེབས་དེའི་ནང་། ཕྱི་ལོ་ ༢༠༢༠ ཟླ་ ༡༠ ཚེས་ ༢༦ ཉིན་རྒྱ་ནག་གཞུང་གི་ཉེན་རྟོག་པས་རྩོམ་པ་པོ་སྒོ་ཤེས་རབ་རྒྱ་མཚོ་ལགས་ཁ་བྲལ་ལ་ངན་སྐུལ་བྱས་པའི་དོགས་གཞིའི་འོག་འཛིན་བཟུང་བྱས་ཡོད་པ་དང་། འདི་ལོའི་ཕྱི་ཟླ་ ༢ ཚེས་ ༣ ཉིན་ལྷ་སའི་ཉེས་དོན་རྩད་ཞིབ་ལས་ཁུངས་ཀྱིས་ཁོང་ལ་ནག་ཉེས་བཙུགས་ཏེ། ལྷ་སའི་འབྲིང་རིམ་མི་མང་ཁྲིམས་ཁང་ཟེར་བས་ཁོང་གི་ཉེས་དོན་ལ་ཁྲིམས་བཤེར་བྱས་ཏེ། ད་ལྟའི་ཆར་ཁྲིམས་ཆད་གསལ་བསྒྲགས་བྱས་མེད་ལུགས་དང་། དེ་བཞིན་སྒོ་ཤེས་རབ་རྒྱ་མཚོ་ལགས་ལ་ཁྲིམས་བཤེར་བྱས་ཡོད་པ་མ་ཟད། ཁོང་གི་ནང་མི་རྣམས་ལ་ཁོང་གི་འཛིན་བཟུང་སྐོར་གྱི་གནས་ཚུལ་རྣམས་བཤད་ཡོད་ཚུལ་བརྗོད་འདུག འོན་ཀྱང་ད་བར་སྒོ་ཤེས་རབ་རྒྱ་མཚོ་ལགས་ཀྱི་ནང་མི་དང་ཉེ་འབྲེལ་གཅིག་ལའང་ཁོང་གང་དུ་བཀག་ཉར་བྱས་ཡོད་མེད་སོགས་ཀྱི་གནས་ཚུལ་ཤེས་རྟོགས་བྱུང་མེད་པ་རེད།
དེ་བཞིན་རྒྱ་ནག་གཞུང་གི་ཉེན་རྟོག་པས་གྲྭ་རིན་ཆེན་ཚུལ་ཁྲིམས་ལགས་ཕྱི་ལོ་ ༢༠༡༩ ཟླ་ ༨ ཚེས་ ༢ ཉིན་ཁ་བྲལ་ལ་སྐུལ་སློང་བྱས་པའི་དོགས་གཞིའི་འོག་འཛིན་བཟུང་བཀག་ཉར་བྱས་ཡོད་པ་དང་། ཕྱི་ལོ་ ༢༠༢༠ ཟླ་ ༡༡ ཚེས་ ༢༧ ཉིན་རྔ་བ་ཁུལ་གྱི་འབྲིང་རིམ་མི་མང་ཁྲིམས་ཁང་ཟེར་བས་གྲྭ་རིན་ཆེན་ཚུལ་ཁྲིམས་ལ་རྒྱལ་ཁབ་ཁ་བྲལ་ལ་ངན་སྐུལ་བྱས་པའི་ནག་ཉེས་འོག་ལོ་ ༤ དང་ཕྱེད་ཀའི་བཙོན་འཇུག་ཁྲིམས་ཐག་ཐོག ལོ་ ༣ རིང་ཆབ་སྲིད་ཀྱི་ཐོབ་ཐང་རྣམས་བཀག་སྐྱིལ་བྱས་ཡོད་ལུགས་བཤད་ཡོད། དེ་ཡང་གྲྭ་རིན་ཆེན་ཚུལ་ཁྲིམས་ཀྱིས་རྒྱལ་ཁབ་ཁ་བྲལ་ལ་དམིགས་ཏེ། སྐད་འཕྲིན་ནང་བརྙན་པར་དང་ཡིག་ངག་བཅས་ཀྱི་ཐོག་ནས་རྒྱལ་ཁབ་ཀྱི་བདེ་འཇགས་དང་ས་ཁོངས་བདག་དབང་ལ་གནོད་པའི་བྱ་འགུལ་སྤེལ་ཡོད་པ་མ་ཟད། སྤྱི་ཚོགས་བརྟན་བརླིང་ལ་གནོད་པའི་བྱ་སྤྱོད་སྤེལ་ཡོད་ཚུལ་བཤད་འདུག
ད་དུང་རྒྱ་ནག་གཞུང་གི་ལན་འདེབས་ནང་། གྲྭ་རིན་ཆེན་ཚུལ་ཁྲིམས་ལགས་ཀྱིས་རང་གི་ནག་ཉེས་ངོས་ལེན་ཞུས་ཡོད་པ་དང་། ད་ལྟའི་ཆར་ཁོང་རྔ་བ་ཁུལ་གྱི་བཙོན་ཁང་ཞིག་ནང་བཙོན་འཇུག་ཁྲིམས་ཆད་མྱོང་བཞིན་ཡོད་ལུགས་དང་། གྲྭ་རིན་ཆེན་ཚུལ་ཁྲིམས་ལགས་ཀྱི་འཛིན་བཟུང་བཀག་ཉར་གྱི་གནས་ཚུལ་རྣམས་ཁོང་གི་ནང་མིར་གསང་བ་བྱས་མེད་ལུགས་བཤད་འདུག་ཀྱང་། འདི་གའི་གསར་འགོད་པས་གྲྭ་རིན་ཆེན་ཚུལ་ཁྲིམས་ལགས་ཀྱི་འབྲེལ་ཡོད་མི་སྣ་བརྒྱུད་ཤེས་རྟོགས་བྱུང་བ་ལྟར་ན། ཕྱི་ལོ་ ༢༠༡༩ ནས་བཟུང་ད་བར་རྒྱ་ནག་གཞུང་གིས་ཁོང་དང་ཁོང་གི་ཕ་མ་གཉིས་ཐུག་འཕྲད་བྱ་རུ་བཅུག་མེད་པ་དང་། འདི་ལོའི་ཕྱི་ཟླ་ ༣ པའི་ནང་རྔ་བའི་ཉེན་རྟོག་ལས་ཁུངས་ཀྱིས་ཁོང་གི་ནང་མིར་འབྲེལ་བ་བྱས་ཏེ་ཁོང་དང་ཐུག་འཕྲད་བྱ་རྒྱུའི་དུས་ཚོད་སྤྲད་རྒྱུ་ཡིན་ལུགས་བརྗོད་འདུག་ཀྱང་ད་བར་ཐུག་འཕྲད་བྱུང་ཐུབ་མེད་པ་དང་། ད་ལྟའི་ཆར་ཁོང་གི་ནང་མི་རྣམས་ཀྱིས་ཁོང་འཚོ་བཞུགས་ཡིན་མིན་དང་ཁོང་གི་གཟུགས་པོའི་གནས་སྟངས་ཇི་འདྲ་ཡིན་མིན་ཐད་བློ་འཚབ་ཆེན་པོ་བྱེད་ཀྱི་ཡོད་འདུག
ད་ལན་གྱི་གནས་ཚུལ་དེ་ནི་འདི་ལོའི་ཕྱི་ཟླ་ ༧ ཚེས་ ༡༦ ཉིན། འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་གར་སོང་ཆ་མེད་ཀྱི་ལས་དོན་ཚན་པ་ (Working Group on Enforced or Involuntary Disappeatances) དང་། གང་བྱུང་འཛིན་བཟུང་བཙན་འཁྲིད་ལས་དོན་ཚན་པ་ (Working Group on Arbitrary Detention)། གྲངས་ཉུང་མི་རིགས་ལས་དོན་གྱི་དམིགས་བསལ་སྐུ་ཚབ་ (Special Rapporteur on Minority Issues)། ཆོས་ལུགས་དང་ཆོས་དད་རང་དབང་གི་དམིགས་བསལ་སྐུ་ཚབ་ (Special Rapporteur on Freedom of Religion or Belief) བཅས་ཚན་པ་བཞིའི་ངོས་ནས་རྒྱ་ནག་གཞུང་ལ་བོད་ནང་གི་ཆབ་སྲིད་བཙོན་པ་རྣམས་ཀྱི་གནས་སྟངས་སྐོར་རྩད་ཞིབ་བྱས་ཏེ། འདི་ལོའི་ཕྱི་ཟླ་ ༨ ཚེས་ ༢༧ ཉིན་རྒྱ་ནག་གཞུང་གིས་དེར་ལན་འདེབས་བྱས་པ་ཞིག་ཡིན་འདུག
གསར་འགོད་པ། པ་སངས་ཚེ་རིང་།
