མེས་པོ་དམ་པ་གྷན་དྷི་མཆོག་གི་འཁྲུངས་སྐར་ཐེངས་ ༡༥༢ པ་གཞུང་འབྲེལ་སྲུང་གཙི་ཞུས།

སྲིད་སྐྱོང་མཆོག་ནས་བོད་པའི་འཐབ་རྩོད་འདི་ཡང་མེས་པོ་དམ་པ་གྷན་དྷི་མཆོག་གི་ཐབས་ལམ་ཐོག་ནས་སྐྱོད་སྡོད་ཀྱི་ཡོད་པ་རེད། ཅེས་གསུངས་སོང་།

དེ་རིང་སྔ་དྲོའི་ཆུ་ཚོད་ ༩།༣༠ ཐོག་བོད་མིའི་སྒྲིག་འཛུགས་ཀྱི་བཀའ་ཤག་ཚོགས་ཁང་དུ་། སྲིད་སྐྱོང་སྤེན་པ་ཚེ་རིང་མཆོག་གིས་གཙོས་བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་དྲུང་ཆེ་རྣམ་པ་སོགས་ལྷན་འཛོམས་ཐོག རྒྱ་གར་གྱི་རང་བཙན་འཐབ་རྩོད་པ་དང་མེས་པོ་དམ་པ་གྷན་དྷི་མཆོག་གི་འཁྲུངས་སྐར་ཐེངས་ ༡༥༢ པ་སྲུང་གཙིའི་གཞུང་འབྲེལ་མཛད་སྒོ་ཞིག་ཚོགས་ཏེ། སྲིད་སྐྱོང་མཆོག་ནས་རྒྱ་ནག་ཙམ་དུ་མ་ཟད་འཛམ་གླིང་ཡོངས་ཀྱིས་བདག་ཉིད་ཆེན་པོ་གྷན་དྷི་མཆོག་གི་འཚེ་མེད་ཞི་བའི་ལས་འགུལ་ནས་བསླབ་བྱ་བླང་དགོས་སྐོར་གསུངས་སོང་།

གཞུང་འབྲེལ་གྱི་མཛད་སྒོའི་ཐོག་མར་སྲིད་སྐྱོང་སྤེན་པ་ཚེ་རིང་མཆོག་ནས་བདག་ཉིད་ཆེན་པོ་གྷན་དྷི་མཆོག་གི་སྐུ་པར་མདུན་དུ་མར་མེ་བསྒྲོན་ཏེ་གསར་འགོད་པར། གྷན་དྷི་མཆོག་ལ་སེམས་པ་ཆེན་པོ་ཞེས་ཆེ་མཐོང་གིས་འབོད་ཀྱི་ཡོད་པ་རེད། དེ་ལྟར་འབོད་དགོས་དོན་ནི། ཁོང་གིས་འཚེ་བ་མེད་པའི་ཐོག་ནས་རྒྱ་གར་མི་མང་གི་མགོ་ཁྲིད་དེ་དབྱིན་ཇིའི་གཞུང་ནས་རྒྱ་གར་རང་བཙན་རག་ཐུབ་པའི་གནས་བབ་བྱུང་བ་རེད། འཚེ་བ་མེད་པའི་ལས་འགུལ་སྤེལ་བ་དེས་འཛམ་གླིང་ནང་དཀའ་རྙོག་གང་འདྲ་ཞིག་ཡིན་ནའང་སེལ་ཐུབ་ཀྱི་ཡོད་པའི་རྣམ་པ་དང་མིག་དཔེ་ཤུགས་ཆེན་པོ་ཞིག་བསྟན་ཡོད་ལ། དེ་ལ་བརྟེན་ནས་ཨ་རིིའི་ནང་གི་མར་ཊིན་ལུ་ཐར་ཀིངྒ་གིས་མི་རིགས་དཀར་ནག་དབྱེ་འབྱེད་ཀྱི་འཐབ་རྩོད་ལ་སྣེ་ཁྲིད་པ་དང་། ལྷོ་ཨ་ཧྥེ་རི་ཀའི་ནང་ནལ་སན་མན་དྷ་ལ་མཆོག་གིས་མི་རིགས་དབྱེ་འབྱེད་ཀྱི་འཐབ་རྩོད་ལ་སྣེ་ཁྲིད་པ། དེ་བཞིན་ཅེག་སྤྱི་མཐུན་རྒྱལ་ཁབ་ནང་ཝ་སི་ལབ་ཧ་ཝལ་ (Vaclav Havel) གྱིས་སྣེ་ཁྲིད་པ་སོགས་འཛམ་གླིང་ཁྱོན་ཡོངས་སུ་འཚེ་བ་མེད་པའི་ལས་འགུལ་ཐོག་ནས་འཛམ་གླིང་གི་དཀའ་རྙོག་སེལ་ཐུབ་པའི་གནས་བབ་དེ་གྲུབ་ཐུབ་པ་རེད། ད་ལྟ་གཙོ་བོ་༸གོང་ས་མཆོག་གིས་དབུས་ཁྲིད་པའི་ཐོག ང་ཚོ་ནང་པ་ཡིན་པའི་ཆ་ནས་འཚེ་བ་མེད་པ་དང་བྱམས་བརྩེའི་ལྟ་གྲུབ་གཉིས་ལ་བརྟེན་ནས་འགྲོ་ཡི་ཡོད་པ་རེད། འཚེ་བ་མེད་པའི་ཐོག་ནས་འགྲོ་རྒྱུ་དེ་བོད་པའི་འཐབ་རྩོད་ཀྱི་འགན་ལྟ་བུ་ཞིག་ཆགས་བསྡད་ཡོད་པ་རེད། ང་ཚོས་རེ་བ་ལ་དུས་ཀྱི་འགྱུར་བ་འགྲོ་ཡི་ཡོད་ནའང་བོད་པའི་འཐབ་རྩོད་དེ་འཚེ་མེད་ཞི་བའི་ཐོག་ནས་སེལ་ཐུབ་པ་ཡིན་ན། འཛམ་གླིང་ལ་མིག་དཔེ་ཡང་བསྐྱར་འཇོག་ཐུབ་ཀྱི་ཡོད་རེད། ལྷག་པར་དུ་བོད་པའི་གནས་སྟངས་དེ་ཕྲན་བུ་མི་འདྲ་བ་རེད། རྒྱ་གར་ལྟ་བུ་ཡིན་ན་སྐབས་དེ་དུས་མི་འབོར་ཆེན་པོ་རེད་ལ། སྐུ་དབང་འཛིན་མཁན་དེ་དབྱིན་ཇི་ལུང་པ་རེད། དབྱིན་ཇི་ལུང་པ་དེ་ཐུག་རིན་པོ་ཡིན་པ་མ་ཟད་མི་འབོར་ཡང་ཉུང་བ་རེད། འོན་ཀྱང་ད་ལྟ་བོད་ཀྱི་གནས་སྟངས་ལྟ་བུ་ཡིན་ན་བོད་ཀྱི་ས་ཆ་རྒྱ་ཆེན་པོ་ཡིན་ནའང་མི་འབོར་ཆུང་ཆུང་ཡིན་པ་དང་། རྒྱ་ནག་གི་མི་འབོར་ཧ་ཅང་ཆེན་པོ་ཡིན་དུས། གནས་སྟངས་རྩ་བའི་ཆ་ནས་མི་འདྲ་བ་ཡིན་ནའང་། འཚེ་བ་མེད་པ་དང་དྲང་བདེན་ཟེར་བའི་ནུས་པ་དང་སྟོབས་དེ་ཡལ་འགྲོ་རྒྱུ་ཞིག་ཡོད་པ་མ་རེད། དེར་བརྟེན་བོད་པའི་འཐབ་རྩོད་འདི་ཡང་མེས་པོ་དམ་པ་གྷན་དྷི་མཆོག་གི་ཐབས་ལམ་ཐོག་ནས་སྐྱོད་སྡོད་ཀྱི་ཡོད་པ་རེད། ཅེས་གསུངས་སོང་།

གསར་འགོད་པ། པ་སངས་ཚེ་རིང་།