སྲིད་སྐྱོང་སྤེན་པ་ཚེ་རིང་མཆོག་གིས་སྐབས་ ༡༧ གྲོས་ཚོགས་ཚོགས་དུས་དང་པོ་ལམ་ལྷོང་ཡོང་བ་དང་རྟེན་འབྲེལ་མི་འཕྱུག་པའི་ཆེད་དུ། བཀའ་བློན་འོས་འདེམས་ཀྱི་ལས་འཕྲོ་མཚམས་འཇོག་གིས། མ་འོངས་པའི་གྲོས་ཚོགས་ཐོག་ད་རེས་ནང་བཞིན་གྱི་གནང་སྟངས་མི་ཡོང་བའི་འབོད་སྐུལ་ཞུས།
དེ་རིང་ཕྱི་དྲོ་ཆུ་ཚོད་ ༤ པའི་ཐོག་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་ཉིན་གཉིས་རིང་གི་གྲོས་ཚོགས་ཚོགས་དུས་ཐེངས་པོའི་མཇུག་བསྡོམས་སྐབས། མཁན་པོ་བསོད་ནམས་བསྟན་འཕེལ་མཆོག་གིས་སྤྱི་འཐུས་ཚོགས་གཙོའི་གསུང་བཤད་གནང་སྐབས། གྲོས་ཚོགས་རྗེས་མའི་ནང་ཁྲིམས་བཟོ་བསྐྱར་བཅོས་ཚོགས་ཆུང་འཛུགས་ཐུབ་པ་བྱ་རྒྱུ་དང་། ལོ་རྗེས་མའི་ཕྱི་ཟླ་ ༣ པའི་གྲོས་ཚོགས་དེ་ཉིད་ལས་བསྡོམས་དང་སྔོན་རྩིས་གཉིས་ཀའི་ཐོག་འཚོགས་དགོས་ཁེལ་གྱི་ཡོད་པ་དང་། ད་ལན་གྲོས་ཚོགས་ནང་སྤྱི་མོས་བྱུང་བའི་བཀའ་དྲིན་རྗེས་དྲན་གྱི་གྲོས་ཆོད་ལ་མཇུག་སྐྱོང་དང་། མ་འོངས་པར་སྤྱི་འཐུས་ཙམ་དུ་མ་ཟད་གནད་ཡོད་མི་སྣ་དང་། རྒྱ་ཆེའི་མང་ཚོགས་ཀུན་གྱིས་འགན་འཁུར་ལེན་དགོས་སྐོར་གསུངས་སོང་།
ཚོགས་གཙོ་མཆོག་གི་མཇུག་བསྡོམས་གསུང་བཤད་ནང་། གྲོས་ཚོགས་ཚོགས་དུས་ལས་ཉིན་དང་པོའི་སྐབས་གསུམ་ཆ་གཉིས་ཀྱི་མང་མོས་མ་ཐོབ་པའི་རྐྱེན་གྱིས་གཏན་འབེབས་མ་བྱུང་བའི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་བསྐོ་གཞག་གི་འོས་ཆོས་སྐོར་གྱི་བཅའ་ཁྲིམས་བསྐྱར་བཅོས་ཁྲིམས་འཆར་དང་འབྲེལ་བའི་ཐོག་ལ། བཅའ་ཁྲིམས་ནང་གསལ་བའི་འོས་ཆོས་གཞིར་བཟུང་འགྲོ་ཐུབ་ཀྱི་མེད་པ་གསལ་པོ་རེད། དཀའ་ངལ་ཞིག་འཕྲད་བསྡད་ཡོད་པ་རེད། དེ་དུས་སྲིད་སྐྱོང་སྤེན་པ་ཚེ་རིང་མཆོག་གྲོས་ཚོགས་ཀྱི་ཚོགས་གཙོ་གཉིས་ཀྱི་ལས་ཁུངས་ལ་ཕེབས་ནས། དེ་དུས་ལོ་བཅུ་གསུངས་མེད་པ་གསལ་པོ་རེད་དེ། ལོ་ལྔ་དྲུག་འདྲ་གསུངས་སོང་། ང་ཚོས་འདི་ནང་(གྲོས་ཚོགས་)ཁྲིམས་ཞིབ་པའི་འོས་མི་ཞིག་འཁུར་ཡོང་བ་ཡིན་ན། མི་གཉིས་ལས་མ་ཉུང་བའམ་ཉིས་ལྡབ་ལས་མ་ཉུང་བ་དགོས་ཀྱི་ཡོད་པ་རེད། དེ་འདྲའི་ཐོག་ནས་ཚོགས་གཙོ་གཉིས་ཀྱིས་ལོ་ ༡༠ ཙམ་བཞག་ན། ལོ་ ༡༠ ནང་མི་མང་པོ་མེད་ནའང་གང་ལ་གང་འཚམ་གྱིས་ཐོན་ཐུབ་པའི་དམིགས་ཚད་ལྟ་བུ་བཟུང་བ་རེད། འོན་ཀྱང་ང་ཚོའི་གནས་སྟངས་ཀྱི་ཐོག་ནས་འོས་ཆོས་ཚང་མཁན་རག་རྒྱུ་ཁག་པོ་རེད། དེར་བརྟེན་ཁ་སང་དཔལ་ལྡན་སྲིད་སྐྱོང་མཆོག་གིས་གསུངས་བ་ཇི་བཞིན། ང་ཚོས་འཆར་འབུལ་ཚོགས་ཆུང་ཞིག་བཙུགས་རྗེས། འཆར་འབུལ་ཚོགས་ཆུང་ལ་མི་འགྲོ་རག་གི་མེད་ཚེ། དེ་གསལ་པོ་ཆགས་བསྡད་པ་རེད། དེའི་ཐོག་ནས་གྲོས་ཚོགས་ངོས་ནས་བཅའ་ཁྲིམས་ལ་བསྐྱར་བཅོས་བྱེད་དགོས་པ་རེད། དེ་བཞིན་ལོ་ཚད་དེ་ཕར་འགྱངས་བྱེད་དགོས་མིན་དང་། ཡང་ན་ཆ་རྐྱེན་དེ་རང་ལ་ཤར་བསྐྱོད་བྱས་ཏེ་ཡོངས་གྲགས་ཐོག་འགྲོ་ཐུབ་མིན་ཐད་བཀུར་འོས་སྤྱི་འཐུས་རྣམས་དང་རྒྱུན་ལས། ལྷག་པར་དུ་ཚོགས་གཙོ་གཉིས་ཀྱིས་དེའི་ཐད་བསམ་བློའི་ནང་བང་བསྒྲིག་རྒྱུ་ཡིན། ཞེས་གསུངས་སོང་།
ཡང་ཚོགས་གཙོ་མཆོག་གིས། འདས་པའི་ཟླ་བ་བཞི་རིང་གྲོས་ཚོགས་ཚོགས་མ་ཐུབ་པའི་རྐྱེན་གྱིས་སྐབས་བཅུ་བདུན་པའི་བོད་མི་མང་སྤྱི་འཐུས་ཀྱི་ལས་ཡུན་ཐོག་གླེང་སློང་ཡོང་བཞིན་པར་བརྟེན། བཅའ་ཁྲིམས་དོན་ཚན་ ༣༩ ནང་སྤྱི་འཐུས་ལྷན་ཚོགས་ཀྱི་སྐབས་རེའི་ཡུན་ཚད་ལོ་ལྔ་རེ་ཡིན་ཞེས་མ་གཏོགས་འཁོད་མེད་ཀྱང་། འོས་བསྡུའི་སྒྲིག་གཞི་དོན་ཚན་ ༣༨ པའི་ནང་། བོད་མི་མང་སྤྱི་འཐུས་སྐབས་རེའི་ཡུན་ཚད་དམ་བཅའ་ཕུལ་ཉིན་ནས་བཟུང་ལོ་ལྔ་རེ་ཡིན། ཞེས་གསལ་འཁོད་ལྟར། གྲོས་ཚོགས་སྐབས་བཅུ་བདུན་གྱི་ཡུན་ཚད་དེ་ཕྱི་ལོ་ ༢༠༢༡ ཟླ་ ༡༠ ཚེས་ ༨ ནས་ཕྱི་ལོ་ ༢༠༢༦ ཟླ་ ༡༠ ཚེས་ ༧ བར་ཆགས་ཀྱི་ཡོད་སྐོར་དང་། བཀའ་ཤག་གི་གསལ་བཤད་ནང་འཁོད་པའི་ཁྲིམས་སྒྲིག་བསྐྱར་ཞིབ་ཚོགས་ཆུང་སྐོར་ནས། གྲོས་ཚོགས་འཐུས་མིའི་ཁྲོད་ཁྲིམས་སྒྲིག་ཁ་ཇེ་གསལ་དུ་གཏོང་དགོས་པའི་དགོངས་ཚུལ་ཡོད་མཁན་མང་པོ་ཡོད་སྟབས། ཚོགས་གཙོ་གཉིས་ཀྱིས་འདས་པའི་དཀའ་ངལ་དང་ཉམས་མྱོང་ལ་བརྟེན་ནས་མ་འོངས་པར་ཁྲིམས་སྒྲིག་ཁག་ཇེ་ཕྱུག་དང་ཁ་ཇེ་གསལ་གཏོང་ཐུབ་ཆེད། གྲོས་ཚོགས་རྗེས་མའི་ནང་སྤྱི་འཐུས་དང་། ཁྲིམས་སྒྲིག་ལ་རྒྱུས་ཡོད་པའི་གནད་ཡོད་མི་སྣ། འཛིན་སྐྱོང་གི་གནད་ཡོད་མི་སྣ་སོགས་ལས་གྲུབ་པའི་ཚོགས་ཆུང་ཞིག་འཛུགས་ཐུབ་རྒྱུའི་འབད་བརྩོན་ཞུ་རྒྱུ་ཡིན་སྐོར་དང་། མ་འོངས་པར་གྲོས་ཚོགས་ར་བའི་ནང་སྤྱི་འཐུས་རྣམ་པའི་ལུས་ངག་གི་ཀུན་སྤྱོད་རྣམས་གྲོས་ཚོགས་ཀྱི་སྐད་ཡིག་དང་མཐུན་ཞིང་ཆེ་མཐོང་ལྡན་པ་ཞིག་ཡོང་ཐུབ་ཐབས་སུ་འབད་བརྩོན་གནང་དགོས་སྐོར་ཡང་གསུངས་སོང་།
སྤྱིར་གྲོས་ཚོགས་ཀྱི་ལས་རིམ་གཞིར་བཟུང་། དེ་རིང་ཉིན་རྒྱབ་ཀྱི་ཚོགས་ཐུན་དང་པོའི་སྟེང་ཁ་སང་ལྷག་འཕྲོར་ལུས་པའི་བཀའ་བློན་འོས་འདེམས་བྱ་གཏན་འཁེལ་ཡོད་ནའང་། ཁ་སང་སྲིད་སྐྱོང་སྤེན་པ་ཚེ་རིང་མཆོག་ནས་སྤྱི་འཐུས་ལས་ཐོག་སོག་སྟོད་དངོས་གྲུབ་རྡོ་རྗེ་ལགས་བཀའ་བློན་གྱི་འོས་མིར་མཚན་འདོན་གནང་སྐབས། སྤྱི་འཐུས་གསེར་རྟ་ཚུལ་ཁྲིམས་གཙོས་པའི་སྤྱི་འཐུས་གྲངས་ ༡༩ ཡིས་དགག་བྱ་གནང་བ་དང་བསྟུན། སྲིད་སྐྱོང་མཆོག་ནས་བཀའ་བློན་འོས་མི་དེ་ཉིད་ཕྱིར་འཐེན་མ་བྱས་ཚེ་གྲོས་ཚོགས་ཀྱི་ལས་རིམ་ནང་མཉམ་ཞུགས་བྱ་རྒྱུ་མིན་སྐོར་བརྗོད་དེ་གྲོས་ཚོགས་ནས་ཕྱིར་ཐོན་ཡོད་པ་ལྟར། དེ་རིང་སྲིད་སྐྱོང་སྤེན་པ་ཚེ་རིང་མཆོག་ནས། སྐབས་བཅུ་བདུན་པའི་གྲོས་ཚོགས་ཚོགས་དུས་དང་པོ་འདི་བཞིན་ལམ་ལྷོངས་ཡོང་རྒྱུ་དང་རྟེན་འབྲེལ་མ་འཕྱུག་པའི་ཆེད་དུ་བཀའ་བློན་འོས་མི་མཚན་འདོན་གནང་རྒྱུ་ཕྱིར་འཐེན་གནང་སྟེ། བཀའ་བློན་འོས་མི་རྣམས་གྲོས་ཚོགས་རྗེས་མའི་ནང་བསྣམ་རྒྱུ་དང་། སྐབས་དེར་སྤྱི་འཐུས་རྣམ་པས་ཁ་སང་ལྟར་མི་གནང་རྒྱུའི་འབོད་སྐུལ་གནང་སོང་། འདི་གའི་གསར་འགོད་པར་ཤེས་རྟོགས་བྱུང་བ་ལྟར་ན། སྲིད་སྐྱོང་སྤེན་པ་ཚེ་རིང་མཆོག་གིས་མཚན་འདོན་གནང་འཆར་ཡོད་པའི་བཀའ་བློན་འོས་མི་བདུན་པ་ནི་སྤྱི་འཐུས་ལས་ཐོག་ཟླ་བ་ཕུན་སྐྱིད་ལགས་ཡིན་འདུག
ཐེངས་འདིའི་སྐབས་བཅུ་བདུན་པའི་གྲོས་ཚོགས་ཚོགས་དུས་དང་པོའི་སྟེང་། གཞུང་འབྲེལ་མྱ་ངན་གུས་འདད་ཀྱི་རྗེས་དྲན་གྲོས་ཆོད་ ༨ དང་། བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་དོན་ཚན་ ༥ ཅན་བཅས་སྤྱི་མོས་ཀྱིས་གཏན་འབེབས་གནང་ཐུབ་ཡོད་ལ། དེ་བཞིན་སྲིད་སྐྱོང་སྤེན་པ་ཚེ་རིང་མཆོག་གིས་སྣེ་ཁྲིད་པའི་བཀའ་ཤག་སྐབས་ ༡༦ པའི་བཀའ་བློན་བུད་མེད་གསུམ་འོས་འདེམས་གནང་ཐུབ་ཡོད་པ་རེད།
གསར་འགོད་པ། པ་སངས་ཚེ་རིང་།
སྲིད་སྐྱོང་ནས་བཀའ་བློན་འོས་མི་འདོན་རྒྱུུའི་ཐོབ་ཐང་ཡོད་པ་ལྟར་སྟོན་གནང་རེད། ་དེར་རྣམས་སུ་གྲོས་ཚོགས་ནས་དམའ་མཐའི་འོས་ཐོབ་དགོས་ངེས་ཆེད་གྲོས་ཚོགས་སུ་ཕུལ་རེད། འོས་མིར་འདོད་བློ་མེད་ན་འོས་མི་གནང་བའི་ལམ་ནས་ཐག་གཅོད་རྒྱུ་ལས་གཞན་གྲོག་ཚོགས་ར་བ་ནས་ཕྱིར་ཐོན་ཞུ་དགོས་གནད་མིན་འདུག སེར་རྟ་ཚུལ་ཁྲིམས་ལགས་ནས་དེ་ལྟར་གནང་དགོས་དོན་མིན་འདུག་པ་མ་ཟད་སླར་ཡང་བོད་སྤྱི་བའི་ལས་དོན་ལ་གནོད་ཚེ་ཞིག་འབུལ་གནང་སོང་བས་བློ་ཕམ།