ཀེ་རི་ལ་མངའ་སྡེའི་ནང་རང་བྱུང་གོད་ཆག་བྱུང་བར་ཐུགས་གསོ་མཛད།

རྒྱ་གར་གྱི་ཀེ་རི་ལ་མངའ་སྡེའི་ནང་ཆུ་ལོག་གི་གནོད་སྐྱོན་བྱུང་སྟེ་ཉུང་མཐར་མི་གྲངས་ ༢༢ རྐྱེན་འདས་དང་མི་ཁག་ཅིག་གར་སོང་ཆ་མེད་དུ་གྱུར་ནས་མི་རྒྱུ་གཉིས་ལ་གོད་ཆག་བྱུང་བར་༧གོང་ས་རྒྱལ་བ་རིན་པོ་ཆེ་མཆོག་ནས་ཐུགས་གསོའི་གསུང་འཕྲིན་སྩལ་འདུག

དེ་རིང་ ༧གོང་ས་རྒྱལ་བ་རིན་པོ་ཆེ་མཆོག་ནས་རྒྱ་གར་ལྷོ་ཕྱོགས་ཀྱི་ཀེ་རི་ལ་མངའ་སྡེའི་སྤྱི་ཁྱབ་བློན་ཆེན་ཝེ་ཇེ་ཡན་ (Shri Pinarayi Vijayan ) མཆོག་གི་མཚན་ཐོག་ཏུ། མངའ་སྡེ་དེའི་ནང་ཆུ་ལོག་དང་ས་ཉིལ་གྱི་གནོད་སྐྱོན་བྱུང་བར་ཐུགས་གསོའི་གསུང་འཕྲིན་སྩལ་བའི་ནང་། ངོས་ནས་རང་བྱུང་གོད་ཆག་གི་ཁྲོད་རྐྱེན་འདས་སུ་གྱུར་བ་རྣམས་ཀྱི་ནང་མི་དང་གནོད་འཚེ་ཕོག་མཁན་ཡོངས་ལ་སེམས་གསོ་ཞུ་ཡི་ཡོད། ངོས་ནས་མངའ་སྡེ་གཞུང་དང་འབྲེལ་ཡོད་ལས་ཁུངས་ཁག་གིས། རོགས་སྐྱོར་མཁོ་བའི་མི་རྣམས་ལ་ངལ་སེལ་གྱི་མཐུན་འགྱུར་རོགས་རམ་གང་ཐུབ་ཅི་ཐུབ་གནང་གི་ཡོད་པ་ཤེས་རྟོགས་བྱུང་། ངོས་ནས་གདུང་སེམས་མཉམ་སྐྱེད་མཚོན་སླད། ཏཱ་ལའི་བླ་མའི་དགེ་རྩ་ནས་ངལ་སེལ་དང་མྱུར་སྐྱོབ་ཀྱི་ལས་དོན་ཆེད་ཞལ་འདེབས་ཤིག་འབུལ་འདོད་ཡོད། ཅེས་གསུངས་འདུག

རང་བྱུང་གོད་ཆག་བྱུང་རྗེས་རྒྱ་གར་གྱི་སྲིད་བློན་མུ་དྷི་མཆོག་ནས་ཐུགས་གསོ་གནང་བའི་ནང་རང་བྱུང་གོད་ཆག་གི་གནད་དོན་དེའི་ཁྲོད་རྐྱེན་འདས་སུ་ཕྱིན་པའི་ཤུལ་ལུས་ནང་མི་རྣམས་ལ་གདུང་སེམས་མཉམ་སྐྱེད་ཞུ་བ་དང་སྦྲགས། འབྲེལ་ཡོད་ལས་བྱེད་ཚོས་མྱུར་སྐྱོབ་ཀྱི་ལས་དོན་ཧུར་ཐག་སྒྲུབ་བཞིན་ཡོད་སྐོར་གསུངས་འདུག

རྒྱ་གར་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཟླ་འདིའི་ཕྱི་ཚེས་ ༡༥ ནས་བསྟུད་མར་ཆར་པ་ཤུགས་ཆེན་བབས་པའི་རྐྱེན་གྱིས་ཁུལ་དེར་ཆུ་ལོག་དང་།  ས་ཉིལ་སོགས་བྱུང་སྟེ་མི་རྒྱུ་གཉིས་ལ་གོད་ཆག་ཆེན་པོ་བྱུང་། མི་གྲངས་ ༦༤༥༥ གནས་སྤོར་དགོས་བྱུང་ཡོད་པ་མ་ཟད། དེ་རིང་བར་ཉུང་མཐར་མི་གྲངས་ ༢༢ རྐྱེན་འདས་སུ་ཕྱིན་ཡོད་པ་དང་། མི་གྲངས་ ༥ ཙམ་གར་སོང་ཆ་མེད་དུ་གྱུར་ཡོད་སྟབས། མངའ་སྡེ་གཞུང་ནས་མཁའ་དམག་དང་མཚོ་དམག སྐམ་དམག་ཆེད་གཏོང་གིས་མྱུར་སྐྱོབ་གནང་མུས་ཡིན་འདུག

ཕྱི་ལོ་ ༢༠༡༨ ལོར་མངའ་སྡེ་དེའི་ནང་ཆུ་ལོག་རྒྱུགས་ཏེ་མི་ ༣༢༤ རྐྱེན་འདས་དང་། མི་གྲངས་ཁྲི་ ༣༠ ལྷག་གནས་སྤོར་བྱེད་དགོས་བྱུང་ཡོད་འདུག

 གསར་འགོད་པ། དཔལ་ལྡན།