ཨུ་ཏར་ཁན་ཌིའི་ནང་རང་བྱུང་གོད་ཆག་བྱུང་བར་ཐུགས་གསོའི་གསུང་འཕྲིན་སྩལ།

དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་འདས་པའི་ཉིན་ཤས་རིང་རྒྱ་གར་གྱི་བྱང་ཕྱོགས་མངའ་སྡེ་ཨུ་ཏར་ཁན་ཌིའི་ནང་ཆར་བ་ཤུགས་ཆེར་བབས་པའི་རྐྱེན་གྱིས་ཆུ་ལོག་རྒྱུག་ཏེ་མི་རྒྱུ་གཉིས་ལ་གནོད་འཚེ་ཚབས་ཆེན་ཕོག་པར་ཐུགས་གསོའི་གསུང་འཕྲིན་སྩལ་གནང་འདུག

Representational Image of His Holiness the Dalai Lama expresses sympathy for the People of Uttarakhand.

ཨུ་ཏར་ཁན་ཌི་མངའ་སྡེའི་སྤྱི་ཁྱབ་བློན་ཆེན་པུ་ཤི་ཀར་སིངྒ་དྷ་མི་ (Pushkar Singh Dhami) མཆོག་གི་མཚན་ཐོག་ཏུ་ཕུལ་བའི་ཐུགས་གསོའི་གསུང་འཕྲིན་ནང་། ངོས་ཀྱིས་ཆུ་ལོག་གོད་ཆག་ཁྲོད་འདས་གྲོངས་ཕྱིན་པ་རྣམས་ལ་བསྔོ་སྨོན་དང་ཁོང་ཚོའི་ཤུལ་ལུས་ནང་མི་རྣམས་ལ་སེམས་གསོ་ཞུ་ཡི་ཡོད། ཅེས་དང་། ངོས་ནས་ད་ལྟ་ཆུ་ལོག་རྒྱུག་ཡུལ་དང་ཞིག་རོའི་ནང་ལྷག་བསྡད་པའི་མི་རྣམས་བདེ་འཇགས་དང་བདེ་ཐང་ཡོང་རྒྱུར་སྨོན་ལམ་འདེབས་ཀྱི་ཡོད། ཅེས་དང་། མངའ་སྡེ་གཞུང་ངོས་ནས་མྱུར་སྐྱོབ་ཀྱི་བྱ་འགུལ་རྣམས་སྤེལ་བཞིན་པ་མ་ཟད། གང་ཐུབ་ཅི་ཐུབ་ཀྱིས་གོད་ཆག་གི་གནོད་འཚེ་ཕོག་པ་རྣམས་ངལ་སེལ་རོགས་རམ་གནང་བཞིན་པར་བསྔགས་བརྗོད་ཞུ་ཡི་ཡོད་ལ། ངོས་ནས་ཨུ་ཏར་ཁན་ཌིའི་མི་མང་རྣམས་ལ་གདུང་སེམས་མཉམ་བསྐྱེད་མཚོན་ཆེད། ཏཱ་ལའི་བླ་མ་ཐེབས་རྩ་བརྒྱུད་མངའ་སྡེ་གཞུང་གི་ངལ་སེལ་དང་མྱུར་སྐྱོབ་ཀྱི་ལས་གཞིའི་ཆེད་ཞལ་འདེབས་འབུལ་རྒྱུ་ཡིན། ཞེས་གསུངས་འདུག

རྒྱ་གར་གྱི་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། འདས་པའི་བདུན་ཕྲག་གཅིག་ནང་ཨུ་ཏར་ཁན་ཌིའི་ས་ཁུལ་ཕལ་ཆེ་བའི་ནང་ཆར་ཤུགས་ཆེན་པོ་བབས་པའི་རྐྱེན་གྱིས་ཆུ་ལོག་དང་ས་རུད་བརྒྱབ་སྟེ་མི་རྒྱུ་གཉིས་ལ་གནོད་འཚེ་ཆེན་པོ་ཐེབས་ཡོད་པ་རེད། དེ་ཡང་མངའ་སྡེ་གཞུང་གི་གྲངས་ཐོ་ལྟར་ན། དེ་རིང་ཉིན་གུང་བར་ད་ལན་གྱི་གོད་ཆག་རྐྱེན་པས་ཉུང་མཐར་མི་གྲངས་ ༤༦ འདས་གྲོངས་དང་། མི་གྲངས་ ༡༡ གར་སོང་ཆ་མེད་དུ་གྱུར་འདུག་ལ། མངའ་སྡེ་གཞུང་ངོས་ནས་རྫོང་རེ་རེར་ངལ་སེལ་ཆེད་མ་དངུལ་ཧིན་སྒོར་བྱེ་བ་ ༡༠ རེ་བགོ་འགྲེམ་དང་། གོད་ཆག་ཁྲོད་འདས་གྲོངས་སུ་ཕྱིན་པ་རྣམས་ཀྱི་ནང་མིར་གུན་གསབ་ཧིན་སྒོར་འབུམ་ ༤ རེ་གནང་རྒྱུ་ཡིན་སྐོར་བསྒྲགས་འདུག

At least 46 dead In Uttarakhand due to heavy rains.

རྒྱ་གར་གྱི་དབུས་གནམ་གཤིས་བརྟག་དཔྱད་ཁང་གིས་དེ་རིང་ནས་བཟུང་ཆར་ཤུགས་ཆུང་དུ་འགྲོ་སྲིད་པའི་ཚོད་དཔག་བྱས་འདུག་ལ། སྤྱིར་བཏང་ཨུ་ཏར་ཁན་ཌི་ནི་རྒྱ་གར་གྱི་མངའ་སྡེའི་ཁྲོད་ནས་ཆར་ཞོད་ཆེ་ཤོས་འབབ་སའི་མངའ་སྡེ་ཞིག་ཡིན་ཞིང་། ཕྱི་ལོ་ ༢༠༡༣ ལོའི་ཟླ་ ༦ པའི་ནང་དྲག་ཆར་དང་ཆུ་ལོག་གི་གོད་ཆག་ཚབས་ཆེན་བྱུང་བའི་ཁྲོད་དུ་ཉུང་མཐར་མི་གྲངས་ ༥༧༠༠ ལྷག་འདས་གྲོངས་སུ་ཕྱིན་ཡོད་ཅིང་། ལོ་དེའི་རང་བྱུང་གོད་ཆག་ནི་ཕྱི་ལོ་ ༢༠༠༤ ལོའི་རྒྱ་གར་ཤར་ཕྱོགས་ཀྱི་མཚོ་རླུང་གོད་ཆག་ (2004 Tsunami) རྗེས་ཀྱི་རང་བྱུང་གནོད་སྐྱོན་ཆེ་ཤོས་དེར་ངོས་འཛིན་བྱེད་ཀྱི་ཡོད་པ་རེད།

གསར་འགོད་པ། པ་སངས་ཚེ་རིང་།