བོད་ཀྱི་སྙིང་ནད་ཚོགས་པས་སྙིང་ནད་སོགས་ལ་རིན་མེད་བརྟག་དཔྱད་བྱེད་ཀྱི་འདུག

བོད་ཀྱི་སྙིང་ནད་ཚོགས་པས་རྒྱ་གར་ལྷོ་ཕྱོགས་ཀྱི་ལུགས་བསམ་གཞིས་ཆགས་ནང་ཉིན་གྲངས་ ༣ རིང་སྙིང་ནད་གཙོ་བོར་གྱུར་བའི་ཕོ་བ་དང་གཅིན་སྙིའི་ནད་སོགས་ནད་རིགས་འདྲ་མིན་ལ་རིན་མེད་ཐོག་བརྟག་དཔྱད་གནང་གི་ཡོད་པ་མ་ཟད་ནད་མནར་ཅན་ལ་སྨན་བཅོས་ཐད་ལམ་སྟོན་རོགས་རམ་གནང་གི་ཡོད་འདུག

དེ་རིང་ནས་ཉིན་གྲངས་གསུམ་རིང་སྔ་དྲོའི་ཆུ་ཚོད་ ༡༠ ནས་ཕྱི་དྲོའི་ཆུ་ཚོད་ ༤ བར་རྒྱ་གར་ལྷོ་ཕྱོགས་ལུགས་བསམ་མཉམ་འབྲེལ་ཚོགས་ཁང་དུ། བོད་ཀྱི་སྙིང་ནད་ཚོགས་པ་ (Tibetan Heart Foundation) དང་མེ་སོར་ (Mysore) དུ་རྟེན་གཞི་བྱས་ཡོད་པའི་ (Columbia Asia Hospital Dr. Agarwal’s Eye Hospital) གཉིས་ཀྱི་མཉམ་སྦྲེལ་ཐོག་རིན་མེད་སྨན་སྒར་ (Free Health Camp) ཞིག་ཆེད་འཛུགས་ཀྱིས། གཅིན་སྙིའི་ནད་དང་མིག་ནད། ཕོ་བའི་ནད། སྙིང་ནད། མཁལ་མ་དང་རུས་པའི་ནད་སོགས་ལ་རིན་མེད་བརྟག་དཔྱད་བྱེད་ཀྱི་འདུག

འདི་གའི་གསར་འགོད་པར་བོད་ཀྱི་སྙིང་ནད་ཚོགས་པའི་ཚོགས་གཙོ་དང་སྦྱིན་བདག་སྨན་ཞབས་པ་བསྟན་འཛིན་ཆོས་ཉིད་ལགས་ཀྱིས། རིན་མེད་སྨན་སྒར་ནས་སྙིང་ནད་ཡོད་རིགས་ལ་བརྟག་དཔྱད་བྱེད་མུས་ཡིན་ལ། སྤྱིར་སྙིང་ནད་ཚོགས་པས་སྙིང་ནད་གཅིག་པུ་མིན་པར་ཕོ་བ་དང་། མིག གཅིན་སྙིའི་ནད་སོགས་བརྟག་དཔྱད་བྱེད་མུས་ཡིན་པ་དང་། འདི་ལོའི་ཕྱི་ཟླ་ ༣ ཚེས་ ༥ ཉིན་ནས་བློ་གསལ་གླིང་དང་བྱང་རྩེ་སྨན་ཁང་ནས་བརྟག་དཔྱད་བྱས་པ་བརྒྱུད། མི་གཅིག་ལ་སྙིང་ནད་ཀྱི་གཤག་བཅོས་བྱེད་པར་རོགས་རམ་བྱས་ནས་དྲག་སྐྱེད་བྱུང་ཡོད་པ་དང་། ལྷོ་ཕྱོགས་ཀྱི་ས་གནས་ཁག་གི་སྙིང་ནད་ཅན་རྣམས་ཀྱིས་སྙིང་ནད་ཚོགས་པ་དེར་འབྲེལ་བ་བྱས་ཏེ། སྨན་ཁང་ཆེ་ཁག་ལ་བསྐྱོད་ཚེ། སྨན་ཁང་ཆེ་ཁག་གིས་གཤག་བཅོས་དང་ལྟ་སྐྱོང་སོགས་ཀྱི་ཐད་ནས་མཐུན་འགྱུར་གང་ལེགས་བསྐྲུན་གྱི་ཡོད་སྐོར་དང་། ད་ཐེངས་སྙིང་ནད་ཚོགས་པས་རིན་མེད་བརྟག་དཔྱད་དེར་བདེ་སྐྱིད་སླར་གསོ་དང་། ལུགས་བསམ་གཞིས་ཆགས་ཀྱི་ས་གནས་མགོ་འཛིན། དེ་བཞིན་ས་གནས་བུད་མེད་ལྷན་ཚོགས་དང་། ས་གནས་གཞོན་ནུ་ལྷན་ཚོགས་སོགས་ཀྱིས་རོགས་རམ་གནང་བཞིན་ཡོད་སྐོར་སོགས་འགྲེལ་བརྗོད་གནང་བྱུང་།

ཁ་སང་ལུགས་བསམ་ས་གནས་མགོ་འཛིན་སྤྱི་ཟུར་བློ་བཟང་ཡེ་ཤེས་ལགས་ཀྱིས། མོན་གྷོར་ཡོད་པའི་བོད་ཀྱི་སྙིང་ནད་ཚོགས་པས་མོན་གྷོ་ཡི་ས་གནས་མགོ་འཛིན་དང་དགོན་སྡེ་ཁག སྨན་ཁང་ཐུན་མོང་གིས་ཕྱག་ལས་ཧང་སངས་བ་གནང་འདུག དེ་བཞིན་ས་ཁུལ་དེར་བརྟག་དཔྱད་བྱས་པ་དང་སྨན་སྒར་ (Medical Camp) བཙུགས་ཤིང་། གཤག་བཅོས་བྱེད་དགོས་ཀྱི་ཡོད་ན་གོང་ཁེ་པོའི་ཐོག་ནས་སྐད་ཆ་བཤད་རོགས་བྱེད་པ་དང་སྦྱིན་བདག་འཚོལ་བ། ད་དུང་མོན་གྷོ་ཡི་ས་གནས་སུ་འགོག་ཁབ་ཀྱི་མཐུན་རྐྱེན་སྦྱོར་བ་དང་སྨན་ཁང་ལྷན་དུ་སྐད་ཆ་བཤད་པ་སོགས་ཕྱག་ལས་ཧ་ཅང་ཡག་པོ་གནང་འདུག  ཁ་སང་ང་ཚོའི་ལས་ཁུངས་སུ་བཅར་ཏེ་གཞོན་ནུ་ལྷན་ཚོགས་དང་བུད་མེད་ལྷན་ཚོགས་བཅས་ཆ་ཚང་གི་རྒྱབ་སྐྱོར་ཐོག་ནས་ལུགས་བསམ་དང་བདེ་སླར་གཉིས་ཀྱི་ས་གནས་མགོ་འཛིན་གྱི་ལས་ཁུངས་སུ་བཅར་སོང་། ང་ཚོའི་ངོས་ནས་གང་ཐུབ་ཐུབ་རྒྱབ་སྐྱོར་ཞུ་ཡི་ཡིན་ཞུས་ཏེ་གོ་སྒྲིག་སླད་གང་ཐུབ་ཐུབ་ཀྱིས་རོགས་པ་བྱས་ཡོད། ལུགས་བསམ་གྱི་རིན་མེད་སྨན་སྒར་དེས་ཉིན་གསུམ་རིང་བརྟག་དཔྱད་གནང་གི་ཡོད་སྟབས། སྤྱི་མི་རྣམ་པས་སོ་སོའི་གཞིས་གྲོང་ནང་ཁྱབ་བསྒྲགས་བྱས་ཏེ་མང་ཚོགས་ནས་ཆ་ཤས་ལེན་ཐུབ་པའི་འབད་བརྩོན་གནང་ན། འཕྲོད་བསྟེན་ཐོག་ལ་ཡག་པོ་ཡོད་པ་དང་ཁེ་ཕན་ཆེན་པོ་ཡོད་རེད་བསམ་གྱི་འདུག ཁྱེད་རང་ཚོས་བརྟག་དཔྱད་བྱས་ཏེ་སོ་སོར་སྨན་བཅོས་བྱེད་དགོས་ཚེ་སོ་སོའི་ངོས་ནས་སྨན་ཁང་ག་པར་འགྲོ་ནའང་འགྲིག་གི་རེད། ཅེས་གསལ་བསྒྲགས་གནང་འདུག

གསར་འགོད་པ། དོན་འགྲུབ་བཀྲ་ཤིས། དཔལ་ལྡན། བསྟན་འཛིན་ཕུར་བུ།