བོད་ཀྱི་སྐད་ཡིག་ཐོབ་ཐང་དོན་གཉེར་བ་བཀྲ་ཤིས་དབང་ཕྱུག་ལགས་ཀློད་གྲོལ་བཏང་སྟེ་ཟླ་དགུ་ལྷག་འགྲོ་ཡི་ཡོད་ཀྱང་། ད་དུང་ཁོང་ལ་འགྲོ་འདུག་སྤྱོད་གསུམ་གྱི་གཞི་རྩའི་རང་དབང་མེད་པ་རེད།
ཉེ་ལམ་བོད་ཀྱི་སྐད་ཡིག་སློབ་གསོའི་ཐོབ་ཐང་དོན་གཉེར་བ་བཀྲ་ཤིས་དབང་ཕྱུག་ལགས་གནས་སྐོར་དུ་འགྲོ་ཡི་ཡོད་པའི་པར་རིས་གནས་ཚུལ་ཞིག་སྤྱི་ཚོགས་བརྒྱུད་ལམ་ཁག་ཏུ་ཁྱབ་བརྡལ་ཕྱིན་རྗེས། ཕྱི་ཚེས་ ༡༦ ཉིན་བཀྲ་ཤིས་དབང་ཕྱུག་ལགས་ཀྱི་ཁྲིམས་རྩོད་པ་ལིན་ཞའོ་ཅིན་(梁小军) གྱིས་སྒེར་གྱི་ཊུ་ཝེ་ཊར་དྲ་རྒྱའི་སྟེང་གནས་ཚུལ་ཞིག་བཀོད་དེ་བཀྲ་ཤིས་དབང་ཕྱུག་ལགས་ཀྱི་སྐུ་གཟུགས་གནས་སྟངས་སྔར་ལྷག་གི་བདེ་ཐང་ཡིན་པ་དང་མ་འོངས་པར་ཁོང་གིས་རིག་གཞུང་དང་འབྲེལ་བའི་བཟོ་ལས་ཁང་ཞིག་གཉེར་འདོད་ཡོད་སྐོར་བསྒྲགས་ཡོད།
དེ་རིང་འདི་གའི་གསར་འགོད་པར་གནས་ཚུལ་འབྱོར་བར་གཞིགས་ན། བཀྲ་ཤིས་དབང་ཕྱུག་ལགས་འདི་ལོའི་ཕྱི་ཟླ་ ༡ ཚེས་ ༡༨ ཉིན་བཙོན་འཇུག་གི་དུས་ཡུན་ཚང་སྟེ་ཀློད་གྲོལ་ཐོབ་པ་ནས་བཟུང་ད་བར་དུས་ཡུན་ཟླ་ ༩ ལྷག་འགྲོ་བཞིན་ཡོད་ཀྱང་། ད་ལྟ་ད་དུང་ཡང་བཀྲ་ཤིས་དབང་ཕྱུག་ལགས་སུ་འགྲོ་འདུག་གི་རང་དབང་མེད་པ་དང་། ཉེ་ལམ་ཁོང་གནས་སྐོར་དུ་ཕྱིན་པའི་གནས་ཚུལ་དེ་ནི། ཁོས་ས་གནས་གཞུང་ལ་སྙན་ཞུ་སྤྲད་པ་དང་ས་གནས་གཞུང་གི་ཆོག་མཆན་ཐོབ་པ་བརྒྱུད་བོད་ཀྱི་ས་ཁུལ་ཁག་ཅིག་ལ་གནས་མཇལ་བྱེད་པར་སོང་བ་ཞིག་ཡིན་འདུག
འདི་ལོའི་ལོ་མགོར་བཀྲ་ཤིས་དབང་ཕྱུག་ལགས་ཀློད་གྲོལ་ཐོབ་རྗེས། ཁྲིམས་རྩོད་པ་ལིན་ཞའོ་ཅིན་གྱིས་བཀྲ་ཤིས་དབང་ཕྱུག་ལ་འགྲོ་འདུག་སོགས་ཀྱི་གཞི་རྩའི་རང་དབང་ཐོབ་ཡོད་མེད་ཤེས་རྟོགས་མེད་སྐོར་བརྗོད་ཡོད་པ་དང་། དེ་རྗེས་བཀྲ་ཤིས་དབང་ཕྱུག་ལགས་ཀྱི་ལོ་ལྔའི་ཆབ་སྲིད་ཀྱི་ཐོབ་ཐང་འཕྲོག་པ་དང་། འགྲོ་འདུག་སྤྱོད་གསུམ་གྱི་རང་དབང་མེད་པའི་གནས་ཚུལ་ཕྱིར་ཐོན་ཡོད་སྟབས། དེ་རིང་གསར་འགོད་པས་བཀྲ་ཤིས་དབང་ཕྱུག་ལགས་སུ་གཞི་རྩའི་རང་དབང་ཆ་ཚང་ཐོབ་ཡོད་མེད་དྲིས་པར་གནས་ཚུལ་མཁོ་སྤྲོད་པས། རང་དབང་མེད། ཁ་སྔོན་བཀྲ་ཤིས་དབང་ཕྱུག་གིས་ས་གནས་ཉེན་རྟོག་པར་ཆོག་མཆན་ཞུས་རྗེས་གནས་སྐོར་དུ་སོང་བ་རེད། ཅེས་བརྗོད་བྱུང་།
ཉེ་སྔོན་ཕྱི་ཚེས་ ༡༤ ཉིན་བཀྲ་ཤིས་དབང་ཕྱུག་ལགས་ཀྱིས་ཝེ་པོ་དྲ་རྒྱའི་སྟེང་། དད་པ་ནི་མིའི་རིགས་ཀྱི་བསམ་བློའི་འཚོ་བཅུད་ཡིན། རྒྱ་ནག་གི་ལས་བྱེད་གཅིག་གིས་ཀྱང་ནང་ཆོས་དར་སྤེལ་དང་ཆོས་ལུགས་དད་མོས་ཀྱི་རང་དབང་རྡོག་རོལ་གཏོང་མི་ཐུབ་ལ། ངོ་ལྐོག་རྒྱབ་མདུན་གང་ནས་ཀྱང་བོད་ཀྱི་རིག་གཞུང་དར་འཕེལ་བཀག་འགོག་བྱ་མི་ཐུབ་སྐོར་སོགས་བྲིས་ཡོད་འདུག ཕྱི་ཚེས་ ༡༦ ཉིན་ཁྲིམས་རྩོད་པ་ལིན་ཞའོ་ཅིན་གྱིས། བཀྲ་ཤིས་དབང་ཕྱུག་གིས་ཁོ་ལ་ཁ་པར་འབྱོར་བའི་གནས་ཚུལ་ཞིག་ཊུ་ཝེ་ཊར་སྟེང་བཀོད་པའི་ནང་། བཀྲ་ཤིས་དབང་ཕྱུག་རང་ཉིད་བདེ་ཐང་ངང་གནས་ཡོད་པ་དང་ཝེ་པོ་དྲ་རྒྱ་ཞིག་ཀྱང་གསར་དུ་བཟོས་ཡོད་པ། དེ་བཞིན་བོད་ཀྱི་ས་ཁུལ་ཁག་ཅིག་ལ་གནས་མཇལ་དུ་ཕྱིན་པ་སོགས་ཀྱི་སྐོར་འགྲེལ་བརྗོད་གནང་ཡོད་པ་བཀོད་འདུག
སྤྱིར་བཏང་བོད་ཀྱི་སྐད་ཡིག་སློབ་གསོའི་ཐོབ་ཐང་དོན་གཉེར་བ་བཀྲ་ཤིས་དབང་ཕྱུག་ལགས་ཀྱིས། ཕྱི་ལོ་ ༢༠༡༥ ཙམ་ནས་པེ་ཅིན་དུ་གནས་སྡོད་ནེའུ་ཡོག་དུས་བབ་ཡན་ལག་གི་གསར་འགོད་པར་རྒྱ་ནག་གཞུང་གི་སྲིད་བྱུས་འོག་བོད་ཁུལ་གྱི་སློབ་གྲྭ་ཁག་ཏུ་བོད་སྐད་ཡིག་སློབ་གསོ་རྩ་མེད་བཟོ་ཡི་ཡོད་པ་དང་། བོད་ཕྲུག་བྱིས་པའི་བོད་སྐད་ཡིག་གི་གནས་ཚད་ཉེན་ཚབས་ཅན་དུ་གྱུར་ཡོད་སྟབས། ངེས་པར་དུ་རྒྱ་ནག་གཞུང་གི་མི་རིགས་རང་སྐྱོང་ཁུལ་གྱི་བཅའ་ཁྲིམས་ནང་གསལ་ལྟར་བོད་སྐད་ཡིག་སྲུང་སྐྱོབ་དགོས་པའི་འབོད་སྐུལ་བྱས་ཡོད་པ་མ་ཟད། གསར་ཁང་དང་ཁྲིམས་རྩོད་པ་སོགས་ལ་འབྲེལ་བ་བྱས་ཏེ་བོད་ཁུལ་གྱི་སློབ་གསོའི་དཀའ་ངལ་དྲིལ་བསྒྲགས་བྱེད་ཐབས་གནང་ཡོད་པར་བརྟེན། ཕྱི་ལོ་ ༢༠༡༦ ཟླ་ ༡ ཚེས་ ༢༧ ཉིན་ཡུལ་ཤུལ་ཉེན་རྟོག་པས་གསང་བའི་ཐོག་ནས་ཁོང་འཛིན་བཟུང་བྱས་ཏེ། ལོ་དེའི་ཕྱི་ཟླ་ ༣ ཚེས་ ༢༤ བར་ནང་མིར་ཤེས་རྟོགས་བྱུང་བཅུག་མེད་པ་མ་ཟད། ནང་མི་སྤུན་མཆེད་སོགས་ལ་ཐུག་ཏུ་མ་བཅུག་པར་བཀག་ཉར་བྱས་ཏེ་ལོ་ ༢ ལྷག་བཞག་ཡོད་པ་རེད། ཕྱི་ལོ་ ༢༠༡༨ ཟླ་ ༥ ཚེས་ ༢༢ ཉིན་ཡུལ་ཤུལ་འབྲིང་རིམ་མི་དམངས་ཁྲིམས་ཁང་ཟེར་བ་དེས། རྒྱལ་ཁབ་ཁ་བྲལ་གཏོང་ཐབས་ཀྱི་བྱ་སྤྱོད་སྤེལ་བའི་ཉེས་མིང་འོག བཀྲ་ཤིས་དབང་ཕྱུག་ལགས་སུ་ལོ་ ༥ བཙོན་འཇུག་ཁྲིམས་བཅད་ཡོད།
གསར་འགོད་པ། སྐལ་བཟང་སྦྱིན་པ།
