ཨ་རིའི་གྲོས་ཚོགས་གོང་མའི་འཐུས་མི་མར་ཁོ་རུ་བྷིའོ་ལགས་དང་གྲོས་ཚོགས་འོག་མའི་འཐུས་མི་སྐུ་ཞབས་ཁིར་སི་སི་མིཌ་ལགས་རྣམ་གཉིས་མཉམ་འབྲེལ་ཐོག་བསྐྱར་དུ་རྒྱལ་སྤྱིའི་ཨོ་རྩལ་ལྷན་ཚོགས་ལ་པེ་ཅིན་ཨོ་རྩལ་འགྲན་ཚོགས་ཕྱིར་འཐེན་དགོས་པའི་འབོད་སྐུལ་ཞུ་ཡིག་བཏང་གནང་འདུག
ཁ་སང་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་མར་ཁོ་རུ་བྷིའོ་ (Marco Rubio) ལགས་དང་གྲོས་ཚོགས་འོག་མའི་འཐུས་མི་སྐུ་ཞབས་ཁིར་སི་སི་མིཌ་ (Chris Smith) ལགས་གཉིས་ནས། ཨོ་ལིམ་ཕིག་གི་རྩ་འཛིན་རིན་ཐང་དང་རྒྱལ་ཚོགས་ཀྱི་ཡོངས་ཁྱབ་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་འབོད་སྐུལ་འོག རྒྱ་ནག་གིས་བོད་དང་ཡུ་གུར། ཧོང་ཀོང་། སོག་པོ་དང་ཀོ་རི་ཡ། དེ་བཞིན་རྒྱ་རིགས་བཅས་ཀྱི་འགྲོ་བ་མིའི་གཞི་རྩའི་ཐོབ་ཐང་རྡོག་རོལ་གཏོང་གི་ཡོད་པའི་སྐྱོན་བརྗོད་དང་འབྲེལ། རྒྱལ་སྤྱིའི་ཨོ་རྩལ་ལྷན་ཚོགས་ནས་རྒྱ་ནག་ཏུ་ཕྱི་ལོ་ ༢༠༢༢ ལོའི་དགུན་ཁའི་ཨོ་རྩལ་རྩེད་འགྲན་འཚོག་རྒྱུ་ཕྱིར་འཐེན་དགོས་པ་མ་ཟད། རྒྱ་ནག་གི་རུ་ཁག་རྩེད་འགྲན་ནང་ཞུགས་མི་ཆོག་པར་བཟོ་དགོས་པ་སོགས་ཀྱི་འབོད་སྐུལ་གནང་ཡོད་འདུག
གྲོས་ཚོགས་འཐུས་མི་རྣམ་པ་གཉིས་ཀྱི་མཉམ་འབྲེལ་འབོད་སྐུལ་ཞུ་ཡིག་ནང་། རིགས་རྒྱུད་རྩ་གཏོར་གྱི་བྱ་སྤྱོད་ལ་ངོ་རྒོལ་བྱེད་པ་ནི་ཆབ་སྲིད་མ་ཡིན་པར་བཟང་སྤྱོད་ཀྱི་ཐག་གཅོད་ཅིག་ཡིན་པས། རྒྱལ་སྤྱིའི་ཨོ་རྩལ་ལྷན་ཚོགས་ཀྱི་དབུས་རྒྱུན་རྣམས་ལ་གཡོལ་དུ་མེད་པའི་དེའི་འགན་འཁྲི་ཡོད། བཟང་སྤྱོད་ཀྱི་སྟངས་སྙོམས་ཟེར་བ་ནི་དོན་དག་ཐོག་ནས་འགལ་ཟླར་གྱུར་ཡོད་པས། ཁྱེད་ལ་ཞུ་འདོད་པ་ནི་རིགས་རྒྱུད་རྩ་གཏོར་གྱི་བྱ་སྤྱོད་སྤེལ་མཁན་རྒྱ་ནག་གི་གཞུང་འཛིན་པ་ཚོར་ཨོ་རྩལ་འགྲན་ཚོགས་བསྡུ་སྐོང་བྱེད་པའི་ཆེད་མཐོང་དེ་སྤྲོད་མི་ཉན། ཞེས་དང་། གལ་སྲིད་རྒྱལ་སྤྱིའི་འགྲན་ཚོགས་ཀྱི་དབུས་རྒྱུན་དག་གིས། རྩེད་འགྲན་གྱི་རྩ་འཛིན་ལ་ཁ་ཞེ་གཉིས་མེད་ཀྱིས་སྲུང་སྐྱོབ་བྱེད་ཀྱི་ཡོད་ཚེ། རྒྱ་ནག་གིས་ཨོ་རྩལ་འགྲན་ཚོགས་ཀྱི་རྩ་འཛིན་ལ་རྡོག་རོལ་གཏོང་གི་ཡོད་པའི་དངོས་ཡོད་གནས་སྟངས་འོག རྒྱ་ནག་རྩེད་འགྲན་ནང་མཉམ་ཞུགས་བྱ་རྒྱུ་བཀག་སྡོམ་དགོས་སྐོར་གསུངས་འདུག
ཡང་ཞུ་ཡིག་ནང་། ཨོ་རྩལ་ལྷན་ཚོགས་ཀྱི་གཞི་རྩའི་རྩ་འཛིན་ནི་འགྲོ་བ་མིའི་རིན་ཐང་སྲུང་སྐྱོབ་ཀྱི་གཙོས་ཞི་བདེ་ལྡན་པའི་སྤྱི་ཚོགས་ཤིག་བསྐྲུན་རྒྱུ་དེ་ཡིན་ཞིང་། སྐབས་འདིར་འགྲོ་བ་མིའི་རིན་ཐང་ཟེར་བ་ནི་མཉམ་འབྲེལ་རྒྱལ་ཚོགས་ཀྱི་ཡོངས་ཁྱབ་འགྲོ་བ་མིའི་ཐོབ་ཐང་དང་རྒྱལ་སྤྱིའི་སྤྱི་དམངས་དང་ཆབ་སྲིད་ཀྱི་ཐོབ་ཐང་སྲུང་སྐྱོབ་ལ་གོ་དགོས་སྐོར་དང་། རྒྱ་ནག་གཞུང་གིས་བོད་དང་ཧོང་ཀོང་། ཡུ་གུར། རྒྱ་རིགས་ཡི་ཤུ་ཆོས་ལུགས་པ་དང་ཧྥ་ལོན་སྒོམ་སྒྲུབ་ཉམས་ལེན་པ། དེ་བཞིན། སྤྱི་དམངས་ཐོབ་ཐང་སྲུང་སྐྱོབ་མཁན་གྱི་ཁྲིམས་རྩོད་པ་དང་གསར་འགོད་པ། སྤྱི་ཚོགས་དང་མང་གཙོའི་ལས་འགུལ་བ་སོགས་ཀྱི་གཞི་རྩའི་ཐོབ་ཐང་ལ་དྲག་གནོན་དང་རྡོག་རོལ་གཏོང་གི་ཡོད་པ་མ་ཟད། ཐ་ན་དམར་ཤོག་ཚོགས་པ་རང་གི་ལས་བྱེད་ཚོ་ལའང་དོགས་གཞིའི་འོག་གཞི་རྩའི་ཐོབ་ཐང་སྤྲོད་ཀྱི་མེད་སྟབས། རྒྱལ་སྤྱིའི་ཨོ་རྩལ་འགྲན་ཚོགས་ཀྱི་དབུས་རྒྱུན་ཚོས་རྩེད་འགྲན་གྱི་རྩ་འཛིན་དང་རྒྱལ་ཚོགས་ཀྱི་ཡོངས་ཁྱབ་འགྲོ་བ་མིའི་ཐོབ་ཐང་གཞིར་བཞག་འོག་རྒྱ་ནག་ལ་རྩེད་འགྲན་བསྡུ་སྐོང་བྱེད་དུ་འཇུག་པའི་ངེས་ཤེས་གང་ནས་རྙེད་ཡོད་དམ། ཞེས་དྲི་རྟགས་བཀོད་པ་དང་སྦྲགས། རྒྱ་ནག་ནང་གི་འགྲོ་བ་མིའི་ཐོབ་ཐང་གི་དངོས་ཡོད་གནས་སྟངས་ཁག་གཞིར་བཞག་སྟེ་ཨོ་རྩལ་འགྲན་ཚོགས་རྒྱ་ནག་ནང་འཚོག་རྒྱུ་ཕྱིར་འཐེན་དགོས་པའི་འབོད་སྐུལ་གནང་འདུག
ད་དུང་། རྒྱ་ནག་ལ་ཕྱོགས་གང་ཐད་ནས་ཨོ་རྩལ་འགྲན་ཚོགས་བསྡུ་སྐོང་བྱེད་པའི་འོས་བབ་མེད་སྐོར་བརྗོད་པའི་ནང་། རྒྱལ་སྤྱིའི་ཨོ་རྩལ་ལྷན་ཚོགས་ཀྱི་དབུས་རྒྱུན་དག་གིས། གལ་སྲིད་རྒྱ་ནག་གིས་རང་གི་བྱ་སྤྱོད་ལ་འགྱུར་བ་མ་གཏང་ཚེ། ཕྱི་ལོ་ ༢༠༢༢ ཟླ་ ༢ པའི་ནང་འཚོགས་གཏན་འཁེལ་བའི་རྒྱ་ནག་གི་དགུན་ཁའི་ཨོ་རྩལ་རྩེད་འགྲན་རྩིས་མེད་དུ་བཏང་སྟེ། རྒྱལ་ཁབ་གཞན་གྱི་ནང་རྩེད་འགྲན་བསྡུ་སྐོང་བྱ་དགོས་པ་རེད། རིགས་རྒྱུད་རྩ་གཏོར་བྱེད་མཁན་གྱི་རྒྱལ་ཁབ་གཅིག་ལའང་ཨོ་རྩལ་འགྲན་ཚོགས་བསྡུ་སྐོང་བྱེད་པའི་འོས་འབབ་དེ་མེད་སྐོར་དང་། ཨ་རིའི་གཞུང་འཛིན་སྐྱོང་གཉིས་ཀྱི་གཙོས་ཁེ་ན་ཌ་དང་དབྱིན་ཇི། ནེ་ཐཱར་ལན་ཌི་དང་ལི་ཐོ་ནེ་ཡ། དེ་བཞིན། རྫད་ཆི་སྤྱི་མཐུན་རྒྱལ་ཁབ་དང་སྦེལ་འཇམ་བཅས་ཀྱིས།་རྒྱ་ནག་གིས་གྲངས་ཉུང་མི་རིགས་ཀྱི་རིགས་རྒྱུད་རྩ་གཏོར་གྱི་བྱ་སྤྱོད་སྤེལ་བཞིན་ཡོད་པའི་བདེན་དཔང་ར་འཕྲོད་བྱུང་ཡོད་པ་མ་ཟད། ད་ལྟ་འཇར་མན་གཞུང་གིས་རྒྱ་ནག་ལ་རྟོག་ཞིབ་བྱེད་མུས་ཡིན་པ་དང་། འདི་ལོའི་ཕྱི་ཟླ་ ༣ པའི་ནང་རྒྱལ་སྤྱིའི་ཁྲིམས་ལུགས་མཁས་དབང་ ༣༠ ལྷག་གིས། རྒྱ་ནག་རྒྱལ་ཚོགས་ཀྱི་རིགས་རྒྱུད་རྩ་གཏོར་གྱི་གྲོས་མཐུན་དང་འགལ་ཡོད་པ་ཡོངས་བསྒྲགས་བྱས་ཡོད་སྐོར་སོགས་བརྗོད་འདུག
ཉེ་སྔོན་ཕྱི་ཟླ་ ༧ ཚེས་ ༢༣ ཉིན་ཨ་རིའི་གྲོས་ཚོགས་འཐུས་མི་དེ་རྣམ་གཉིས་ནས་རྒྱ་ནག་ཏུ་དགུན་ཁའི་ཨོ་རྩལ་འགྲན་ཚོགས་འཚོག་རྒྱུ་ཕྱིར་འཐེན་དགོས་པའི་ཞུ་ཡིག་ཐོག་མ་དེ་བཏང་གནང་ཡོད་པ་དང་། ད་ལན་གྱི་འབོད་སྐུལ་ཞུ་ཡིག་དེ་ནི་ཨ་རིའི་གྲོས་ཚོགས་འཐུས་མི་རྣམ་གཉིས་ནས་རྒྱལ་སྤྱིའི་ཨོ་རྩལ་ལྷན་ཚོགས་ཀྱི་དབུས་རྒྱུན་ཚོར་རྒྱ་ནག་ནང་རྩེད་འགྲན་ཕྱིར་འཐེན་དགོས་པའི་འབོད་སྐུལ་བསྐྱར་དུ་ཞུས་པ་ཞིག་ཆགས་ཀྱི་ཡོད་ཅིང་། དམིགས་བསལ་ཨོ་རྩལ་ལྷན་ཚོགས་ཀྱི་དབུས་རྒྱུན་དག་ལ་ལན་འདེབས་གནང་བའི་འབོད་སྐུལ་ཞིག་ཀྱང་ཆགས་ཀྱི་ཡོད་འདུག
གསར་འགོད་པ། སྐལ་བཟང་སྦྱིན་པ།
