ལོ་རྒྱུས་ནང་པཎ་ཆེན་སྐུ་ཕྲེང་གཅིག་ཀྱང་གསེར་བུམ་དཀྲུགས་ཏེ་རྒྱ་ནག་གིས་ངོས་འཛིན་བྱས་མེད།

སྐུ་ཞབས་ཀའེ་མོ་ལར་ལགས་ཀྱིས་རྒྱ་ནག་གིས་ཀུན་གཟིགས་པཎ་ཆེན་རིན་པོ་ཆེའི་སྐུ་འཁོར་དང་བཅས་པ་བཙན་འཁྲིད་བྱས་པ་ནི་རྒྱལ་ཚོགས་ཀྱི་བཙན་དབང་འོག་གར་སོང་ཆ་མེད་དུ་གྱུར་བའི་ཁྲིམས་དང་འགལ་གྱི་ཡོད་པས། རྒྱ་ནག་གི་མགོ་ཁྲིད་ཚོ་རྒྱལ་སྤྱིའི་ཁྲིམས་ཀྱི་ཉེས་ཅན་པ་ཡིན་སྐོར་གསུངས་སོང་།

ཁ་སང་སུད་སིར་ཇི་ནེ་ཝ་བོད་དོན་གླེང་སྟེགས་སྐབས་བཞི་བའི་ཉིན་རྒྱབ་ཀྱི་ཚོགས་ཐུན་སྟེང་། བོར་བརླག་ཏུ་ཕྱིན་པའི་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་རིན་པོ་ཆེ་མཆོག་ཅེས་པའི་བརྗོད་གཞིའི་སྟེང་། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་འགྲོ་བ་མིའི་ཐོབ་ཐང་ཚན་པའི་འགན་འཛིན་འབྲུག་ལྡན་སྐྱིད་ལགས་ཀྱི་གཙོ་སྐྱོང་འོག བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གི་གཙོས་བཀྲ་ཤིས་ལྷུན་པོ་དགོན་པའི་མཁན་པོ་བསྟན་འཛིན་ཐུབ་བསྟན་རབ་རྒྱས་ལགས་དང་། ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས། རྒྱལ་སྤྱིའི་བོད་དོན་ལས་འགུལ་ཁང་གི་འཇར་མར་ཚན་པའི་འགན་འཛིན་(Kai Mueller) ལགས་བཅས་ནས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་དགུང་ལོ་ ༦ སྟེང་ནས་ནང་མི་དང་ལྷན་དུ་གར་སོང་ཆ་མེད་དུ་གྱུར་བའི་ཡ་ང་བའི་བརྒྱུད་རིམ་དང་འབྲེལ་པཎ་ཆེན་སྐུ་ཕྲེང་བཅུ་བ་མཆོག་གི་སྐུ་ཚེའི་སྨད་ཀྱི་དཀའ་སྡུག་གི་མཛད་པ་སོགས་ཀྱི་སྐོར་ནས་གསུང་བཤད་གནང་ཡོད།

སྐབས་དེར་ཐོག་མར་བོད་མིའི་སྒྲིག་འཛུགས་ཀྱི་ཕྱི་དྲིལ་དྲུང་ཆེ་ཀརྨ་ཆོས་དབྱིབས་ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་གིས། ཕྱི་ལོ་ ༡༩༩༥ ཟླ་ ༥ ཚེས་ ༡༤ ཉིན་དགེ་འདུན་ཆོས་ཀྱི་ཉི་མ་མཆོག་པཎ་ཆེན་སྐུ་ཕྲེང་བཅུ་གཅིག་པའི་ཡང་སྲིད་དུ་ངོས་འཛིན་གནང་སྟེ་ཉིན་གསུམ་ལས་མ་འགོར་བར། རྒྱ་ནག་གཞུང་གིས་པཎ་ཆེན་དགེ་འདུན་ཆོས་ཀྱི་ཉི་མ་རིན་པོ་ཆེ་དང་ནང་མི་འཁོར་བཅས་བཙན་འཁྲིད་ཀྱིས་གར་སོང་ཆ་མེད་དུ་གྱུར་ཏེ། ད་ལྟའང་ཁོང་དང་ཁོང་གི་ནང་མིའི་གནས་སྟངས་ལ་གསལ་ཁ་མེད་པའི་གནས་བབ་འགྲེལ་བརྗོད་གནང་བ་དང་འབྲེལ། བོད་མིའི་སྒྲིག་འཛུགས་ནས་འཛམ་གླིང་རྒྱལ་ཁབ་ ༤༠ ལྷག་དང་མཉམ་འབྲེལ་རྒྱལ་ཚོགས་ཀྱི་འཐུས་མི་ ༡༩༢ ལྷག་ལ་འབྲེལ་བ་ཞུས་ཏེ། པཎ་ཆེན་དགེ་འདུན་ཆོས་ཀྱི་ཉི་མ་རིན་པོ་ཆེ་མཆོག་བཙན་འཁྲིད་ཀྱིས་གར་སོང་ཆ་མེད་དུ་གྱུར་བའི་གནད་དོན་ཐད་རྒྱ་ནག་གཞུང་ལ་གནོད་ཤུགས་སྤྲོད་དགོས་པའི་འབོད་སྐུལ་ཞུས་ཡོད།

དེ་ལ་བརྟེན་ནས་འཛམ་གླིང་རྒྱལ་ཁབ་ ༡༨ དང་རྒྱལ་སྤྱིའི་ཚོགས་སྡེ་ཁག་ ༨ ཀྱི་གནད་ཡོད་མི་སྣ་དང་གྲོས་ཚོགས་འཐུས་མི་ ༡༤༠ ལྷག་དང་། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དང་འགྲོ་བ་མིའི་ཐོབ་ཐང་ལྟ་ཞིབ་ཁང་། འགྲོ་བ་མིའི་ཐོབ་ཐང་གི་གླེང་སྟེགས་སོགས་ཀྱིས་བསྒྲགས་གཏམ་སྤེལ་ཏེ། རྒྱལ་སྤྱིའི་གཞུང་སོ་སོས་རྒྱ་ནག་གཞུང་ལ་གནོད་ཤུགས་སྤྲད་དེ་པཎ་ཆེན་རིན་དགེ་འདུན་ཆོས་ཀྱི་ཉི་མ་རིན་པོ་ཆེ་དང་ནང་མི་ཡོངས་ཀློད་གྲོལ་གཏོང་དགོས་པའི་རེ་སྐུལ་ཞུས་ཡོད། ད་དུང་མཉམ་འབྲེལ་རྒྱལ་ཚོགས་ཀྱི་ཁོངས་གཏོགས་ས་ཁུལ་ལྔ་ཡི་འཛམ་གླིང་གི་ཚོགས་སྡེ་ཁག་ ༡༥༩ ལྷག་གིས་རྒྱལ་ཚོགས་ནང་མཉམ་འབྲེལ་བསྒྲགས་གཏམ་སྤེལ་ཏེ་པཎ་ཆེན་རིན་པོ་ཆེ་དང་ཁོང་གི་ནང་མི་ཡོངས་འཕྲལ་དུ་ཀློད་གྲོལ་གཏོང་དགོས་པ་ནན་སྐུལ་ཞུས་ཡོད། ཅེས་དང་། བོད་མིའི་སྒྲིག་འཛུགས་ཀྱི་ཕྱི་དྲིལ་འགྲོ་བ་མིའི་ཐོབ་ཐང་ཚན་པས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་གནས་སྟངས་དྲིལ་བསྒྲགས་ཀྱི་མཚོན་པའི་དཔེ་དེབ་ཅིག་དཔར་སྐྲུན་གནང་ཡོད་པའི་ནང་། རྒྱལ་སྤྱིའི་ངོས་ནས་རྒྱ་ནག་གིས་ལོ་ངོ་ཉེར་དྲུག་གི་ཡར་སྔོན་དུ་པཎ་ཆེན་རིན་པོ་ཆེ་འཛིན་བཟུང་བཙན་འཁྲིད་བྱས་པར་འགན་འཁུར་དང་མནོ་བསམ་གཏོང་དགོས་པའི་དྲན་སྐུལ་ཞུས་ཡོད་སྐོར་གསུངས་སོང་།

དེ་རྗེས་རྒྱལ་སྤྱིའི་བོད་དོན་ལས་འགུལ་ཁང་གི་འཇར་མན་གྱི་འགན་འཛིན་ཁཱེ་མོ་ལར་ལགས་ཀྱིས། ཕྱི་ལོ་ ༡༩༩༢ ལོར་གཏན་འབེབས་བྱས་པའི་བཙན་དབང་འོག་གར་སོང་ཆ་མེད་དུ་གྱུར་བའི་རྒྱལ་ཚོགས་ཀྱི་གྲོས་ཆོད་ཅིག་ལུང་འདྲེན་གནང་བ་དང་འབྲེལ། བཙན་དབང་འོག་གར་སོང་ཆ་མེད་དུ་བཏང་བའི་པཎ་ཆེན་དགེ་འདུན་ཆོས་ཀྱི་ཉི་མ་མཆོག་འཚོ་བཞུགས་དང་ག་བར་ཡོད་མེད་ཀྱི་གནས་ཚུལ་མ་ཤེས་པར་དུ། རྒྱལ་ཚོགས་ཀྱི་གྲོད་ཆོད་གཞིར་བཞག་ལྟར་རྒྱ་ནག་གིས་མུ་མཐུད་ཁྲིམས་འགལ་གྱི་ཉེས་ནག་བསགས་ཡོད་སྐོར་དང་། ཕྱི་ལོ་ ༡༩༩༥ ལོར་པཎ་ཆེན་རིན་པོ་ཆེ་དང་ཁོང་གི་ནང་མི་ཡོངས་བཙན་འཁྲིད་བྱེད་མཁན་དང་དེ་འབྲེལ་གྱི་ལས་བྱེད། དེ་བཞིན། མུ་མཐུད་ཁོང་དང་ཁོང་གི་ནང་མི་ཡོངས་གར་ཡོད་ཆ་མེད་ཀྱི་གནས་སྟངས་འོག་འཇོག་མཁན་དང་ད་ལྟའི་རྒྱ་ནག་གི་དམར་ཤོག་མགོ་ཁྲིད་ཚོར་ནག་ཉེས་ཡོད་སྐོར། འདས་པའི་ལོ་ངོ་བསྟུད་མར་མཉམ་འབྲེལ་རྒྱལ་ཚོགས་ཀྱི་ཚོགས་མི་དང་རང་དབང་ལྡན་པའི་ལས་ཁུངས་ཁག་ནས་རྒྱ་ནག་གཞུང་གིས་རྒྱལ་སྤྱིའི་ཁྲིམས་རྩིས་མེད་རྡོག་རོལ་གཏོང་གི་ཡོད་པའི་གནད་དོན་གླེང་སློང་བྱས་ཡོད་པ་དང་། འདས་ལོའི་ཕྱི་ཟླ་ ༦ པའི་ནང་མཉམ་འབྲེལ་རྒྱལ་ཚོགས་ཀྱི་བྱིས་པའི་ཐོབ་ཐང་སྲུང་སྐྱོབ་དང་། བཙན་དབང་འོག་གར་སོང་ཆ་མེད་དུ་གྱུར་བའི་ཚོགས་པ། གྲང་ཉུང་དང་ཆོས་ལུགས་ཀྱི་རང་དབང་སྲུང་སྐྱོབ་ཚོགས་པ། དེ་བཞིན་འགྲོ་བ་མིའི་ཐོབ་ཐང་གི་ལྷན་ཁང་སོགས་ནས་རྒྱ་ནག་གཞུང་ལ་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་གནས་སྟངས་གླེང་སློང་བྱས་ཡོད་སྐོར་སོགས་གསུངས་སོང་།

བཀྲ་ཤིས་ལྷུན་པོ་དགོན་པའི་མཁན་པོ་བསྟན་འཛིན་ཐུབ་བསྟན་རབ་རྒྱས་ལགས་ཀྱིས། སྐུ་གཟིགས་པཎ་ཆེན་རིན་པོ་ཆེ་མཆོག་ནི་བོད་བརྒྱུད་ནང་བསྟན་གྱི་ཆོས་ལུགས་ལོ་རྒྱུས་ནང་། སངས་རྒྱས་འོད་དཔག་མེད་ཀྱི་རྣམ་སྤྲུལ་དུ་ཡིད་ཆེས་ཞུས་ཤིང་། འདས་པའི་ལོ་ངོ་བརྒྱ་ཕྲག་ཁ་ཤས་ནང་སྐུ་གཟིགས་པཎ་ཆེན་སྐུ་ཕྲེང་རིམ་བྱོན་རྣམས་ཀྱིས་འགྲོ་བའི་དོན་དུ་རྣམ་དཀར་ཆོས་ཕྱོགས་དང་འབྲེལ་བའི་རླབས་ཆེན་གྱི་མཛད་པ་བསྐྱངས་གནང་བས། བོད་དང་ཧི་མ་ལ་ཡ་རི་རྒྱུད་ཀྱི་མི་དམངས་རྣམས་དང་། དེ་བཞིན་སོག་པོ་དང་། ཉི་འོང་། རྒྱ་རིགས་སོགས་ཨེ་ཤ་ཡའི་གླིང་ཕྲན་དང་འཛམ་གླིང་ཁྱོན་ཡོངས་ནས་དད་ལྡན་ས་ཡ་མང་པོས་སེམས་གཏིང་ནས་དད་གུས་བླ་ན་མེད་པ་ཞུ་བཞིན་ཡོད་པ་དང་། ཕྱི་ལོ་ ༡༩༥༩ ལོར་རྒྱ་ནག་གཞུང་གིས་བོད་ནང་ཚད་ལས་བརྒལ་དབང་བསྒྱུར་བྱས་སྟབས། བོད་ཀྱི་ཆོས་སྲིད་གཉིས་ཀྱི་བླ་ན་མེད་པའི་དབུ་འཁྲིད་སྤྱི་ནོར་ ༧ གོང་ས་སྐྱབས་མགོན་ཆེན་པོ་མཆོག་བཙན་བྱོལ་དུ་ཕེབས་དགོས་བྱུང་བ་དང་། དེའི་རྗེས་སྐུ་གཟིགས་པཎ་ཆེན་རིན་པོ་ཆེས་བསྟན་འགྲོའི་ཐུགས་འགན་བདག་གིར་བཞེས་ཏེ། བོད་མི་དམངས་རྣམས་སྡུག་བསྔལ་གྱི་རྒྱ་མཚོར་ལྷུང་བཞིན་ཡོད་པར་རྩ་བ་ནས་མ་བཟོད་པར། རྒྱ་ནག་གཞུང་ལ་བོད་འབངས་སྐྱོབ་ཐབས་ཀྱི་སྙན་ཞུ་ཡིག་འབྲུ་ཁྲི་བདུན་བཅས་འཛེམ་གཟོན་མེད་པར་ཕུལ། དེར་བརྟེན། རིམ་བཞིན་ཁོང་ལ་ཉེས་མེད་ཉེས་འཛུགས་བྱས་ཏེ། འཐབ་འཛིང་མནར་གཅོད་བཏང་བ་དང་། མི་ལོ་བཅུ་གྲངས་ལྷག་བཙོན་ཁང་དུ་བཅུག་ནས་མནར་གཅོད་ཚད་མེད་བཏང་ཡོད། ཕྱི་ལོ ༡༩༧༧ ལོར་སྐུ་གཟིགས་པཎ་ཆེན་སྐུ་ཕྲེང་བཅུ་པ་མཆོག་བཙོན་གྲོལ་ཐོབ་པ་དང་། ལོ་རབས་བརྒྱད་ཅུ་ནང་བོད་ས་སྟོད་སྨད་བར་གསུམ་དུ་ཐེངས་མང་ཕེབས་ནས། བོད་མི་དམངས་ཀྱི་བདེ་སྡུག་ལ་གཟིགས་ཞིབ་གནང་སྟེ། བོད་ཀྱི་སྐད་ཡིག་དང་ཁོར་ཡུག ཆོས་ལུགས་བཅས་ཉམས་པ་སླར་གསོ་དང་མི་ཉམས་གོང་འཕེལ་གཏོང་ཐབས་སུ་སྐུ་ལས་ཚད་མེད་བསྐྱོན་ཡོད་པ་དང་།  བོད་མི་རིགས་ཀྱི་སྐད་ཡིག་སྦྱོང་སྤྱོད་སྤེལ་གསུམ་དང་། མི་རིགས་རང་སྐྱོང་གི་ཐོབ་ཐང་བརྩད་གནང་བས། རྒྱ་ནག་གཞུང་གིས་ཁོང་ལ་མི་དགའ་བའི་རྣམ་འགྱུར་ཤུགས་ཆེན་བསྟན་ཡོད།  ཅེས་གསུངས་སོང་།

ཡང་ཁོང་གིས།  ཕྱི་ལོ་༡༩༩༥ ཟླ་ ༥ ཚེས་ ༡༧ ཉིན་རྒྱ་ནག་གཞུང་གིས་དགུང་ལོ་དྲུག་ལས་མ་སོན་པའི་པཎ་ཆེན་དགེ་འདུན་ཆོས་ཀྱི་ཉི་མ་དང་། ཁོང་གི་སྐུ་འཁོར། ཡང་སྲིད་ངོས་འཛིན་གནང་མཁན་བྱ་བྲལ་རིན་པོ་ཆེ་སོགས་བཙན་འཁྲིད་བྱས་ཏེ། ད་བར་མི་ལོ་ ༢༦ ལྷག་འགྲོ་མུས་ཡིན་ཡང་། ཁོང་ཅག་གི་གནས་སྟངས་སོགས་གང་ཡང་ཤེས་རྟོགས་བྱུང་མེད་སྟབས། བོད་ཀྱི་གདན་ས་བཀྲིས་ལྷུན་པོའི་དགེ་འདུན་པ་མང་པོས་རྒྱ་ནག་གཞུང་ལ་ངོ་རྒོལ་སྐད་འབོད་ལན་མང་བྱས་མཐར། རྒྱ་ནག་གཞུང་གིས་བཀྲིས་ལྷུན་པོའི་བླ་སྤྲུལ་མཁན་གསུམ་དང་། དགེ་འདུན་པ་མང་པོ་ཞིག་གང་བྱུང་བཙན་འཁྲིད་བྱས་དང་བྱེད་མུས་ཡིན་པ་དང་། རྒྱ་ནག་གཞུང་གིས་བོད་ནང་དུ་པཎ་ཆེན་རིན་པོ་ཆེའི་སྐོར་གླེང་བྱེད་པར་དམ་དྲག་ཤུགས་ཆེན་བྱེད་ཀྱི་ཡོད་པས། བོད་མིའི་སྒྲིག་འཛུགས་སོགས་ཀྱིས་རྒྱལ་སྤྱིའི་མཉམ་འབྲེལ་རྒྱལ་ཚོགས་དང་། ཨ་རི། ཡོ་རོབ། ཁེ་ན་ཊ། ཤར་ཨེ་ཤ་ཡའི་གཞུང་འབྲེལ་དང་། གྲོས་ཚོགས་སོགས་སུ་ཞུ་གཏུགས་ལན་མང་བྱས་ཡོད་ཀྱང་། རྒྱ་ནག་གཞུང་གིས་མུ་མཐུད་དུ་པཎ་ཆེན་རིན་པོ་ཆེ་བཙོན་འཇུག་བྱེད་མུས་ཡིན་པ་ལས། དངོས་ཡོད་དང་མཐུན་པའི་ལན་འདེབས་བྱས་མྱོང་མེད་སྐོར་དང་། ད་ལྟ་པཎ་ཆེན་རིན་པོ་མཆོག་དགུང་ལོ་ ༣༢ ལ་ཕེབས་ཡོད་ཀྱང་། ཁོང་ལ་འགྲོ་འདུག་གི་རང་དབང་མེད་པའི་ཁར། རང་དབང་གི་ཐོག་ནས་བོད་ཀྱི་ཆོས་དང་རིག་གཞུང་། གཞུང་ཆེན་སོགས་སྦྱང་རྒྱུའི་ཐོབ་ཐང་མེད་པ་དང་། ཁོང་གི་སྐུ་གཟུགས་གནས་སྟངས་སོགས་གང་ཡང་ཤེས་རྟོགས་མ་བྱུང་བ་དང་།  ལྷག་པར་བྱ་བྲལ་རིན་པོ་མཆོག་དགུང་ལོ་ ༨༠ ལྷག་ཟིན་ཡོད་ཀྱང་། ཁོང་གི་སྐུ་གཟུགས་ཀྱི་གནས་སྟངས་དང་སྐུ་འཚོ་བཞུགས་ཡིན་མིན་སོགས་ཤེས་རྟོགས་གང་ཡང་མ་བྱུང་སྟབས། གཞིས་བྱེས་གཉིས་ཀྱི་བོད་མི་ཡོངས་ཀྱི་སེམས་འཚབ་ཆེན་པོ་བྱེད་བཞིན་ཡོད་པ་དང་། རྒྱ་ནག་གཞུང་གིས་བོད་ཁུལ་དུ་དྲག་གནོན་ཤུགས་ཆེན་བགྱིས་ཏེ་བོད་ཀྱི་སྐད་ཡིག་དང་། ཆོས་རིག ཡུལ་སྲོལ་གོམས་གཤིས།  རང་བྱུང་ཁོར་ཡུག་སོགས་རྩ་གཏོར་གཏོང་མུས་ཡིན་པ་མ་ཟད།  རྒྱ་ནག་གཞུང་གིས་བོད་ནང་དུ་སྲིད་ཇུས་མང་པོ་བཏིང་ནས་བོད་ཀྱི་ངོ་བོ་རྩ་གཏོར་གཏོང་ཐབས་བྱེད་མུས་ཡིན་པས། རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱིས་རྒྱ་ནག་གཞུང་ལ་གནོན་ཤུགས་དང་བརྡ་ལན་སྤྲད་དགོས་སྐོར་རེ་སྐུལ་ཡང་གནང་སོང་།

མཇུག་ཏུ་སྲིད་སྐྱོང་སྤེན་པ་ཚེ་རིང་མཆོག་གིས། ལོ་ན་དྲུག་ལ་སོན་པའི་བྱིས་པ་ཞིག་ཇི་ལྟར་རྒྱ་ནག་གཞུང་ལ་ཉེན་ཁ་ཆགས་པ་དང་རྒྱ་ནག་གིས་ལོ་དྲུག་ཅན་གྱི་བྱིས་པ་གཞན་ཞིག་པཎ་ཆེན་བླ་མར་བསྐོ་གཞག་བྱེད་དོན་ཅི་ཡིན་ནམ། རྒྱ་ནག་གིས་བྱིས་པ་དེ་པཎ་ཆེན་བླ་མར་བསྐོས་སྐབས། ཆོས་ལུགས་ཀྱི་བྱེད་སྒོ་ཏག་ཏག་སྤེལ་ཡོད་མེད་སོགས་ནི་གནད་དོན་རེད། ང་ཚོས་རང་ཉིད་ལ་དེའི་སྐོར་གྱི་དོགས་འདྲི་བྱ་དགོས་པ་དང་མ་འོངས་པའི་ལོ་ཟླའི་ནང་དེ་འབྲེལ་གྱི་ཤུགས་རྐྱེན་མང་པོ་ཡོང་གི་རེད། རྒྱུ་མཚན་ནི་དེ་ནི་རྒྱ་ནག་གིས་འཆར་གཞི་སྒྲིག་སྟེ། མ་འོངས་པར་༧གོང་ས་སྐུ་ཕྲེང་བཅོ་ལྔ་བ་འདེམས་ཐུབ་པར་བྱ་དགོས་བསམ་གྱི་ཡོད། ཡང་སྲིད་ཀྱི་གནད་དོན་འདི་ནི་འདས་པའི་ལོ་ངོ་མང་པོའི་རིང་གླེང་སློང་བྱས་ཡོད་པ་དང་ད་ལྟ་༧གོང་ས་སྐུ་ཕྲེང་བཅུ་བཞི་བ་མཆོག་དགུང་ལོ་༨༦ ལ་ཕེབས་ཡོད་པས་དགུང་ལོ་བགྲེས་པོ་ཆགས་ཡོད། ཨ་རི་ནས་མགོ་བཙུགས་པའི་འཛམ་གླིང་རྒྱལ་ཁབ་མང་པོས་ཡང་སྲིད་ཀྱི་སྐོར་ལ་གླེང་སློང་བྱས་ཡོད། ཨ་རིས་ཕྱི་ལོ་ ༢༠༠༢ ལོའི་བོད་དོན་རྒྱབ་སྐྱོར་གྱི་ཁྲིམས་ནང་༧གོང་ས་སྐུ་ཕྲེང་བཅོ་ལྔ་བ་ངོས་འཛིན་བྱེད་ཕྱོགས་ཐད་སེམས་འཚབ་བསྟན་ཡོད། དེ་ནི་རྒྱ་ནག་གིས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་བཙན་འཁྲིད་བྱས་པའི་གནད་དོན་དང་ཧ་ཅང་འབྲེལ་བ་ཡོད།

རྒྱ་ནག་གཞུང་ལ་ཡང་སྲིད་ཀྱི་གནད་དོན་ཐད་ཐེ་གཏོགས་བྱེད་པའི་འདུན་པ་ཇི་ལྟར་སྐྱེས་པ་རེད། ༧གོང་ས་མཆོག་གིས་རྒྱ་ནག་གཞུང་ཡང་སྲིད་ཀྱི་དོན་དག་ལ་མོས་པ་ཡོད་ཚེ། ཐོག་མར་དམར་ཤོག་གི་མགོ་ཁྲིད་ཚོས་ནང་ཆོས་སྦྱངས་དགོས་པ་རེད། ཁོ་ཚོས་མའོ་ཙེ་ཏུང་གི་ཡང་སྲིད་དང་ཏུན་ཞའོ་ཕིའི་ཡང་སྲིད་འཚོལ་དགོས་ཀྱི་རེད་ཅེས་གསུངས་ཡོད། དེ་ནི་དངོས་བདེན་རེད། ལྷ་མེད་སྨྲ་བའི་རྒྱ་ནག་དམར་ཤོག་གཞུང་གིས་ཆོས་ལུགས་ལ་ཡིད་ཆེས་བྱེད་ཀྱི་མེད་ལ། ཡང་སྲིད་ཀྱི་གནད་དོན་ནི་ཆོས་ལུགས་ཀྱི་བྱེད་སྒོ་ཞིག་ཡིན་པས། རྒྱ་ནག་གཞུང་གིས་རྒྱལ་མཚན་ནོར་བུ་པཎ་ཆེན་རིན་པོ་ཆེའི་ཡང་སྲིད་དུ་ངོས་འཛིན་བྱས་སྐབས། ནང་ཆོས་ནང་གསུང་བ་ནང་ལྟར་ཆོས་ལུགས་ཀྱི་བྱེད་སྒོ་ཁག་སྤེལ་ཡོད་ཡོད་དམ། ཞེས་དང་། འདས་པའི་པཎ་ཆེན་སྐུ་ཕྲེང་རིམ་བྱོན་གྱི་ལོ་རྒྱུས་ནང་རྒྱ་ནག་གིས་གསེར་བུམ་དཀྲུགས་པའི་མཛད་སྒོ་གཅིག་ཀྱང་མེད་པ་དང་གསེར་བུམ་དཀྲུགས་ཏེ་པཎ་ཆེན་སྐུ་ཕྲེང་གཅིག་པ་འདེམས་པ་ཁོ་ན་ནོར་འཁྲུལ་ཡིན་སྐོར་དང་། པཎ་ཆེན་སྐུ་ཕྲེང་བཅུ་བ་མཆོག་སྐུ་ཞིང་ལ་མ་ཕེབས་སྔོན་སྐུ་གཟུགས་ཧ་ཅང་གསལ་ཐང་ཡིན་པ་དང་ཁོང་གློ་བུར་དུ་སྐུ་གཤེགས་པའི་ཐད། རྒྱ་ནག་གིས་ཁོང་ལ་དུག་དྲངས་ཡོད་སྐོར་བཤད་ཀྱིན་ཡོད་ནའང་། ཁོང་གི་སྐུ་ཕུང་ལ་བརྟག་དཔྱད་གནང་ཐུབ་མེད་སྐོར། སྐུ་འབུམ་དགོན་པའི་མཁན་པོ་ཨ་ཀྱཱ་རིན་པོ་ཆེས་པཎ་ཆེན་རིན་པོ་ཆེའི་ཡང་སྲིད་འདེམས་སྒྲུག་སྐོར་ལ་དེབ་ཅིག་བརྩམས་པའི་ནང་། པཎ་ཆེན་རིན་པོ་ཆེའི་ཡང་སྲིད་འདེམས་སྐབས། རྒྱ་ནག་གིས་བསྐོ་གཞག་བྱས་པའི་རྒྱལ་མཚན་ནོར་བུའི་མིང་། བུ་གསུམ་གྱི་མིང་ཡོད་པ་ལས་འོག་ཏུ་བཅུག་སྟེ་འཆར་གཞི་ལྡན་པའི་སྒོ་ནས་འདེམས་ཡོད་སྐོར་སོགས་གསུངས་སོང་།

གསར་འགོད་པ། དཔལ་ལྡན། སྐལ་བཟང་སྦྱིན་པ།