རྒྱལ་སྤྱིའི་ཁོར་ཡུག་ཚོགས་ཆེན་སྟེང་བོད་ཀྱི་ཁོར་ཡུག་སྐོར་གླེང་སློང་བྱས་ཡོད་འདུག

མཉམ་འབྲེལ་རྒྱལ་ཚོགས་ཀྱི་གོ་ལའི་གནམ་གཤིས་འགྱུར་ལྡོག་གི་ཚོགས་ཆེན་སྟེང་། བོད་ནང་གི་ཁོར་ཡུག་གི་གནས་བབ་སྐོར་གྱི་ཡིག་ཆ་བཀྲམ་ཏེ། བོད་ཀྱི་ཁོར་ཡུག་སྐོར་ལ་གླེང་སློང་བྱས་ཡོད་འདུག

ཕྱི་ཟླ་ ༡༠ ཚེས་ ༣༡ ནས་ཉིན་གྲངས་ ༡༣ རིང་དབྱིན་ཡུལ་གྱི་སི་ཁོ་ཊི་ལན་ཌིའི་གྲོང་ཁྱེར་གྷ་ལ་སི་ཁོ་ (Glasgow) རུ། འཛམ་གླིང་མཉམ་འབྲེལ་རྒྱལ་ཚོགས་ཀྱི་གོ་ལའི་གནམ་གཤིས་འགྱུར་ལྡོག་གི་ཚོགས་ཆེན་ (COP26) ཞེས་པ་འཚོག་བཞིན་ཡོད་པ་ལྟར། རྒྱལ་སྤྱི་རང་བཞིན་ཅན་གྱི་ཚོགས་ཆེན་དེའི་ཐོག་རྒྱལ་ཁབ་ ༡༩༠ ལྷག་གི་འཐུས་མིས་མཉམ་ཞུགས་བྱས་ཡོད་ལ།  ཚོགས་ཆེན་དེར་བོད་ཀྱི་ཁོར་ཡུག་ཉམས་ཞིབ་པ་རྣམས་ཀྱིས་ཀྱང་མཉམ་ཞུགས་བྱས་ཏེ། བོད་ཀྱི་འཁྱགས་རོམ་དང་ཁོར་ཡུག དེ་བཞིན་རྒྱ་ནག་གཞུང་གིས་བོད་ནང་གི་ཁོར་ཡུག་རྩ་གཏོར་གཏོང་མུས་ཡིན་པའི་གནས་སྟངས་བཅས་ཀྱི་སྐོར་ལ་གླེང་སློང་བྱས་ཡོད་པ་དང་། དེ་རིང་ཁོར་ཡུག་དོན་གཉེར་བ་དང་། སློབ་མ་སོགས་ཀྱིས་ཁོར་ཡུག་དང་འབྲེལ་བའི་ཞི་རྒོལ་སྐད་འབོད་ཀྱི་ལས་འགུལ་ཞིག་སྤེལ་འཆར་ཡོད་པ་ལྟར། བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཁག་དང་། བོད་མི་ཚོས་ཀྱང་མཉམ་ཞུགས་ཀྱིས་ཞི་བའི་ངོ་རྒོལ་བྱ་རྒྱུ་ཡིན་པ་རེད་འདུག

ཚོགས་ཆེན་ལ་མཉམ་ཞུགས་མཁན་བོད་ཀྱི་ཁོར་ཡུག་ཉམས་ཞིབ་པ་བློ་བཟང་དབྱངས་མཚོ་ལགས་ཀྱིས་འདི་གའི་གསར་འགོད་པར། ཕྱི་ཚེས་ ༢  ཉིན་ཁོང་ཅག་གིས་གཞུང་འབྲེལ་གྱི་ཚོགས་འདུ་ཁག་ལ་ཞུགས་ཏེ། བོད་དང་ཐད་ཀར་འབྲེལ་འདྲིས་ཡོད་པའི་ཁྱིམ་མཚེས་རྒྱལ་ཁབ་ཁག་དང་། ཆབ་སྲིད་ཀྱི་ཐོག་ནས་བོད་དང་འབྲེལ་ལམ་ཡོད་པའི་རྒྱལ་ཁབ་ཁག་གི་འཐུས་མིར་མཇལ་འཕྲད་བགྱིས་ཏེ། བོད་ཀྱི་ཁོར་ཡུག་གི་གནས་བབ་སོགས་ཀྱི་སྐོར་ལ་གླེང་སློང་དང་། རྒྱ་ནག་གཞུང་གིས་བོད་ཀྱི་ཁོར་ཡུག་སྦག་བཙོག་བཟོ་མུས་ཡིན་པའི་སྐོར་གྱི་ཡིག་ཆ་སོགས་བཀྲམ་ཡོད་པ་རེད། དེ་བཞིན་རྒྱ་ནག་གཞུང་གིས་ཡར་ཀླུང་གཙང་པོའི་བཞུར་རྒྱུན་དུ་ཆུ་རགས་སོགས་འཛུགས་སྐྲུན་བྱེད་མུས་ཡིན་སྟབས། བྷང་ལ་དྷེ་ཤི་སོགས་སུ་དཀའ་ངལ་འཕྲད་མུས་ཡིན་པ་ལྟར། ཡར་ལུང་གཙང་པོ་བདག་གཅེས་དང་འབྲེལ་ཏེ། བོད་མི་དང་ཡར་ཀླུང་གཙང་པོའི་བཞུར་རྒྱུན་དུ་ཆགས་པའི་རྒྱལ་ཁབ་ཁག་གི་འཐུས་མི་བར་གླེང་སློང་ཤུགས་ཆེན་བྱུང་། ཞེས་འགྲེལ་བརྗོད་བྱས་བྱུང་།

ཡང་ཁོང་མོས། ད་ཐེངས་ཀྱི་ཚོགས་ཆེན་སྟེང་ཁོང་མོས། བོད་ཀྱི་སྣོད་བཅུད་ཆགས་ཚུལ་དང་འབྲེལ་ཏེ། བོད་ཀྱི་ཁོར་ཡུག་གི་གནས་བབ་དང་། རྒྱ་ནག་གཞུང་གིས་བོད་ནང་གི་ཁོར་ཡུག་གཏོར་བཤིག་གཏོང་མུས་ཡིན་སྟབས། བོད་ནང་དུ་གནམ་གཤིས་འགྱུར་ལྡོག་འགྲོ་བ་སོགས་ཀྱི་གནད་དོན་དེ་དག་ལ། རྒྱལ་སྤྱིའི་ཁོར་ཡུག་ཚན་པ་སོགས་ཀྱིས། བོད་ནང་གི་ཁོར་ཡུག་གི་གནད་དོན་ཐད་གླེང་སློང་བྱ་དགོས་སྐོར་ལ་གཏམ་བཤད་བྱས་ཡོད་པ་དང་། ཚོགས་འདུ་དེར་རྒྱལ་སྤྱིའི་གནད་ཡོད་མི་སྣ་མང་པོ་ཞིག་མཉམ་ཞུགས་བྱས་ཡོད་པ་ལྟར། ཁོང་ཚོས་ཨ་རིའི་གློག་བརྙན་འཁྲབ་སྟོན་པ་གྲགས་ཅན་སྐུ་ཞབས་ ( Leonardo DiCaprio ) སོགས་སུ་ཐུག་འཕྲད་ཀྱིས། བོད་ནང་གི་ཁོར་ཡུག་གི་གནས་བབ་སྐོར་གྱི་ཡིག་ཆ་དང་བོད་དོན་གླེང་སློང་བྱས་ཡོད་སྐོར་བརྗོད་བྱུང་།

རྒྱལ་སྤྱི་རང་བཞིན་ཅན་གྱི་ཚོགས་ཆེན་དེར་རྒྱལ་ཁབ་ཁག་གི་འཐུས་མི་དང་། རྒྱལ་སྤྱིའི་ཁོར་ཡུག་ཉམས་ཞིབ་པ་སོགས་ཚང་འཛོམས་ཀྱིས། འཛམ་གླིང་གི་ཁོར་ཡུག་གི་གནས་བབ་དང་། གནམ་གཤིས་འགྱུར་ལྡོག་སོགས་ཀྱི་སྐོར་ལ་གླེང་སློང་བྱེད་ཀྱི་ཡོད་པ་རེད།  རྒྱ་ནག་དང་ཨུ་རུ་སུ་ཡིས་འཛམ་གླིང་ནང་ནག་རྫས་མང་པོ་ཞིག་བཟོ་སྐྲུན་དང་ཕྱིར་འདོན་བྱེད་ཀྱི་ཡོད་ཀྱང་། འཛམ་གླིང་མཉམ་འབྲེལ་རྒྱལ་ཚོགས་ཀྱི་གོ་ལའི་གནམ་གཤིས་འགྱུར་ལྡོག་གི་ཚོགས་ཆེན་ COP26 ཐོག་རྒྱ་ནག་གི་སྲིད་འཛིན་ཞི་ཅིན་ཕིན་ ( Xi Jinping) དང་ཨུ་རུ་སུའི་སྲིད་འཛིན་པུ་ཊྲིན་ ( Vladimir Putin) གཉིས་མཉམ་ཞུགས་བྱས་མེད་པའི་ཁར། རྒྱལ་ཁབ་ཀྱི་འཐུས་མི་ཡང་མངགས་གཏོང་བྱས་མེད་སྟབས།  ཨ་རི་སྲིད་འཛིན་བྷའེ་ཌན་གྱིས་ཞི་ཅིན་ཕིན་དང་ཨུ་རུ་སུའི་སྲིད་འཛིན་པུ་ཊྲིན་གཉིས་ལ་སྐྱོན་བརྗོད་ནན་མོ་བྱས་ཡོད་འདུག

གསར་འགོད་པ། དཔལ་ལྡན།