རྒྱ་ནག་གི་རྩ་བའི་རྩ་དོན་བཞིར་འགྱུར་བ་མ་ཐེབས་བར་དུ་སྨྲ་བརྗོད་རང་དབང་དང་རྩོམ་འབྲིའི་རང་དབང་འཐོབ་མི་སྲིད།

རྒྱལ་སྤྱིའི་བཙོན་འོག་གི་རྩོམ་པ་པོའི་ཉིན་མོ་སྲུང་གཙིའི་སྐབས་བོད་ཀྱི་དཔེ་མཛོད་ཁང་གི་དབུ་འཛིན་དགེ་བཤེས་ལྷག་རྡོར་ལགས་ནས་མི་ཞིག་ལ་མཚོན་ན་སྨྲ་བརྗོད་ཀྱི་རང་དབང་དང་འགྲོ་འདུག་གི་རང་དབང་སོགས་མེད་ཚེ དེ་ནི་དུད་འགྲོ་དང་ཁྱད་པར་གང་ཡང་མེད་སྐོར་གསུངས་བྱུང་།

དེ་རིང་སྔ་དྲོ་ཆུ་ཚོད་ ༡༠ སྟེང་བོད་ཀྱི་དཔེ་མཛོད་ཁང་གི་ཚོགས་ཁང་དུ།  པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་གོ་སྒྲིག་འོག ཕྱི་ལོ་ ༢༠༢༡ ལོའི་རྒྱལ་སྤྱིའི་བཙོན་འོག་རྩོམ་པ་པོའི་ཉིན་མོ་སྲུང་གཙི་གནང་སོང་ལ། མཛད་སྒོའི་ཐོག་སྐུ་མགྲོན་གཙོ་བོ་བོད་ཀྱི་དཔེ་མཛོད་ཁང་གི་དབུ་དགེ་བཤེས་ལྷག་རྡོར་ལགས་ནས་བོད་ཀྱི་བཙོན་འོག་རྩོམ་པ་པོའི་དམིགས་བསལ་སྙན་ཐོ་ཤོག་ངོས་ ༦༦ ཅན་ཞིག་དབུ་འབྱེད་གནང་སོང་། འདི་ལོ་ནི་རྒྱལ་སྤྱིའི་པེན་རྩོམ་པ་པོའི་མཐུན་ཚོགས་བཙུགས་ཏེ་ལོ་བརྒྱ་འཁོར་བ་དང་རྒྱ་ནག་དམར་གཞུང་གིས་བོད་ལ་བཙན་འཛུལ་དྲག་གནོན་བྱས་ཏེ་ལོ་ངོ་ ༧༠ འཁོར་བའི་ལོའང་ཆགས་ཡོད་པ་རེད།

མཛད་སྒོའི་ཐོག་མར་པེན་རྩོམ་པ་པོའི་མཐུན་ཚོགས་ཀྱི་དྲུང་ཆེ་བུད་མེད་རྩོམ་པ་པོ་ཉི་མ་འཚོ་ལགས་ནས་འདི་ལོའི་རྒྱལ་སྤྱིའི་པེན་གྱི་ཚབ་མཚོན་རྩོམ་པ་པོ་ལྔ་དང་བོད་ནང་གི་ཚབ་མཚོན་རྩོམ་པ་པོ་ལྔ་ཡི་ལོ་རྒྱུས་སྙིང་བསྡུས་ངོ་སྤྲོད་དང་སྦྲགས། དེ་རིང་རྒྱལ་སྤྱིའི་བཙོན་འོག་རྩོམ་པ་པོའི་ཉིན་མོ་འདི་གཏན་འཁེལ་ནས་ད་བར་ལོ་ངོ་ ༤༠ འགྲོ་ཡི་ཡོད་པ་རེད། ང་ཚོས་སྲུང་གཙི་བྱེད་བཞིན་པའི་ཉིན་མོ་འདིར། རྒྱལ་སྤྱིའི་པེན་རྩོམ་པ་པོའི་མཐུན་ཚོགས་ཀྱི་ངོས་ནས་བཙོན་འོག་རྩོམ་པ་པོའི་ཉིན་མོའི་ཆེད་དུ་ཚབ་མཚོན་གྱི་རྩོམ་པ་པོ་ལྔ་གཏན་འཁེལ་གྱི་ཡོད་པ་དང་། དེ་བཞིན་ང་ཚོ་པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་ངོས་ནས། ང་ཚོ་ཚང་མ་སྐྱབས་བཅོལ་བ་ཞིག་ཡིན་ཞིང་སོ་སོའི་ཕ་ཡུལ་ཤོར་ནས་ལོ་ ༧༠ ཙམ་ཕྱིན་ཡོད་པ་རེད། ང་ཚོའི་ཤ་ཁྲག་གཅིག་པའི་སྤུན་ཟླ་མང་པོ་ཞིག་གིས་བློས་གཏོང་བྱས་ཏེ་རང་དབང་འཐབ་རྩོད་དང་སྨྲ་བརྗོད་རང་དབང་འཐབ་རྩོད། རྩོམ་འབྲིའི་རང་དབང་འཐབ་རྩོད་བྱས་ཏེ་མང་པོ་ཞིག་བཙོན་འོག་ཏུ་ཡོད་པ་སོགས་ཀྱི་ཚབ་མཚོན་རྩོམ་པ་པོ་ལྔ་སྟེ། རྩོམ་པ་པོ་དྷཱི་ལྷ་ལྡན་དང་། སྒོ་ཤེས་རབ་རྒྱ་མཚོ། རོང་བོ་དགེ་འདུན་ལྷུན་འགྲུབ། གངས་སྐྱེས་སྒྲུབ་པ་སྐྱབས། གྲྭ་རིན་ཆེན་ཚུལ་ཁྲིམས་བཅས་བདམས་ཡོད་སྐོར་དང་། ཉིན་མོ་འདི་སྲུང་གཙི་བྱས་པའི་རྒྱུ་མཚན་ནི། རིན་ཆེན་ཚུལ་ཁྲིམས་ལགས་དང་རྒྱལ་སྤྱིའི་རྩོམ་པ་པོ་འདི་ལྔ་ལ་སོགས་པ་རྩོམ་པ་པོ་སྐད་ཡིག་སྲུང་སྐྱོབ་པ་དང་སྐད་ཡིག་ལས་འགུལ་བ། དགེ་རྒན། དེ་བཞིན་བོད་ཡུལ་གྱི་གནས་ཚུལ་ཕྱིར་བསྒྲགས་བྱེད་མཁན་མང་པོ་ཞིག་འཛིན་བཟུང་བཀག་ཉར་དང་། འགྲོ་འདུག་རང་དབང་གཅིག་ཀྱང་མེད་པ་འདི་དག་སྟོན་ཆེད་དང་། ཁོང་ཚོ་དང་ཁོང་ཚོ་ལྟ་བུའི་རྩོམ་པ་པོ། སྐད་ཡིག་སྲུང་སྐྱོབ་པ། གསར་འགོད་པ། བུད་མེད་ཀྱི་ཐོབ་ཐང་རྩོད་ལེན་པ། སྙན་ངག་པ། སྒྱུ་རྩལ་པ། དགེ་རྒན་ལ་སོགས་པ་དུས་ཚོད་ངེས་མེད་དང་གནས་ངེས་མེད་ཀྱི་སྒོ་ནས་བཙོན་འཇུག་བྱས་པ་རྣམས་ལ་ང་ཚོས་ངོ་རྒོལ་ཡོད་པའི་རྣམ་འགྱུར་སྟོན་རྒྱུ་དང་། ཁོང་ཚོ་དང་ཁོང་ཚོ་ལྟ་བུ་འགྲོ་བ་མིའི་གཞི་རྩའི་ཐོབ་ཐང་། སྨྲ་བརྗོད་རང་དབང་དེ་ཚོ་ལ་ང་ཚོའི་ངོས་ནས་གུས་ཞབས་དང་གུས་བརྩི་བྱེད་དགོས་པའི་རྣམ་འགྱུར་སྟོན་པའི་ཆེད་དུ་ཡིན་སྐོར་བརྗོད་སོང་།

དེའི་རྗེས་འདི་ག་བོད་ཀྱི་དུས་བབ་གསར་ཁང་གི་རྩོམ་སྒྲིག་པ་པདྨ་མཚོ་ལགས་ཀྱིས།  བཙན་བྱོལ་ནང་ནས་བོད་ཀྱི་ལོ་རྒྱུས་དང་རྩོམ་རིག ཆབ་སྲིད་དང་དཔལ་འབྱོར་སོགས་གང་ཞིག་གླེང་དགོས་ནའང་། བོད་ནང་གི་གནས་བབ་ལ་བསམ་ཞིབ་དགོས་པ་ཞིག་རང་བཞིན་གྱིས་ཆགས་ཀྱི་ཡོད་པ་རེད། འོན་ཀྱང་། རྒྱ་ནག་གཞུང་གི་བཀག་སྡོམ་གྱི་རྐྱེན་གྱིས་དེ་རིང་གི་བརྗོད་བྱར་གྱུར་བའི་བོད་ཀྱི་བུད་མེད་རྩོམ་པ་པོ་རྣམས་ཀྱི་གནས་བབ་ཅིག་ཕྱི་ཕྱོགས་ནས་གླེང་དགོས་ན་གླེང་འོས་པའི་རྒྱུ་ཆ་འདང་ངེས་ཤིག་མེད་ལ། ད་ལྟ་བོད་ཀྱི་བུད་མེད་རྩོམ་པ་པོའི་གནས་བབ་ལ་ལྟ་སྐབས། བོད་ནང་གི་བུད་མེད་རྩོམ་པ་པོ་རྒན་པ་ཁག་ཅིག་གི་དེབ་རྙིང་པ་ཁག་ཅིག་དང་། དྲ་ལམ་འཕྲིན་སྟེགས་ནས་བུད་མེད་རྩོམ་པ་པོ་གཞོན་སྐྱེས་ཁག་ཅིག་གི་རྩོམ་ཡིག་ལས་མཐོང་དཀོན་དུ་སོང་ཡོད་སྐོར་དང་། ཕྱི་ལོ་ ༢༠༡༦ ལོར་བོད་ནང་གི་བུད་མེད་རྩོམ་པ་པོ་རྒན་དཔལ་མོ་ལགས་ནས་སྐབས་དེར་འདས་པའི་ལོ་དྲུག་ནང་བུད་མེད་ཀྱི་བརྩམས་ཆོས་དེབ་ ༢༤ ཡོད་སྐོར་བརྗོད་ཡོད་པ་ལྟར། བོད་ནང་དུ་དེང་རབས་བོད་ཀྱི་བུད་མེད་རྩོམ་པ་པོའི་དཔེ་ཚོགས་སོགས་བཙུགས་ནས་བུད་མེད་རྩོམ་པ་པོ་སྐྱེད་སྲིང་གི་ལས་དོན་གང་ལེགས་གནང་གི་ཡོད་ཀྱང་། རང་དབང་ལུང་པའི་ནང་དུ་ཡོད་པའི་བོད་མིའི་སྤྱི་ཚོགས་ནང་འདས་པའི་ལོ་གསུམ་ཙམ་ནང་དཔེ་དེབ་ཀྱི་བརྩམས་ཆོས་མང་ཤོས་ནི་བོད་ཀྱི་དཔེ་མཛོད་ཁང་དང་ཀིརྟིའི་བྱེས་པ་གྲྭ་ཚང་། ལྷོ་ཕྱོགས་ཀྱི་གདན་ས་ཁག་བཅས་ཡིན་ལ། སྐབས་དོན་གྱི་བརྗོད་གཞིར་གྱུར་བའི་བུད་མེད་རྩོམ་པ་པོའི་བརྩམས་ཆོས་ཀྱི་ཐོག་ནས་བཤད་ན། དཔེར་ན། བོད་ཀྱི་དཔེ་མཛོད་ཁང་ནས་འདས་པའི་ལོ་གསུམ་ནང་ཁྱོན་བསྡོམས་དཔེ་དེབ་ ༡༣༠ ལྷག་པར་སྐྲུན་འགྲེམས་སྤེལ་གནང་ཡོད་པའི་ཁྲོད། བུད་མེད་ཀྱི་བརྩམས་ཆོས་ ༧ ཡས་མས་ལས་མེད་པ་དེའི་ཐོག་ནས། སྤྱིའི་ཆ་ནས་བོད་པའི་བུད་མེད་ཀྱི་རྩོམ་རིག་གི་རྨང་གཞི་བརྟན་པོ་ཡོད་ཀྱང་། སྤྱི་ཚོགས་ཀྱི་དགོས་མཁོ་དང་དུས་ཀྱི་འགྱུར་འགྲོས་དང་བསྟུན་པའི་བརྩམས་ཆོས་འབྲི་སྤེལ་མ་ཐུབ་པའི་སྟོང་ཆ་ཆེན་པོ་ཞིག་ལྷག་བསྡད་ཡོད་སྐོར་བརྗོད་སོང་།

དེ་ནས་པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་གཞོན་དང་ནོར་གླིང་མཐོ་སློབ་ཀྱི་སློབ་སྤྱི་སྨན་ཤེར་བློ་གྲོས་ལགས་ཀྱིས་པེན་བོད་ཀྱི་རྩོམ་པ་པོའི་མཐུན་ཚོགས་ཀྱིས་འགྲེམས་སྤེལ་བྱས་པའི་བོད་ཀྱི་བཙོན་འོག་རྩོམ་པ་པོའི་དམིགས་བསལ་སྙན་ཐོ་ངོ་སྤྲོད་དང་སྦྲགས།  སྙན་ཐོ་དང་འབྲེལ་བའི་བསྒྲགས་གཏམ་ཞིག་སྒྲོགས་སྦྱང་གནང་བའི་ནང་། རྒྱ་ནག་གཞུང་གིས་བཙན་གནོན་དང་དམ་དྲག་གི་འོག་ནས། བོད་མི་ཤེས་ཡོན་པ་རྣམས་གང་བྱུང་བཙན་འཁྲིད་བཀག་འགོག་བྱས་པ་དང་། ལྷག་པར་རྒྱ་ནག་གཞུང་གིས་རྒྱལ་སྤྱིའི་ཁྲིམས་སྒྲིག་དང་འགྲོ་བ་མིའི་རིགས་ཀྱི་གཞི་རྩའི་ཐོབ་ཐང་སོགས་ལས་འགལ་ནས། བོད་ནང་གི་རྩོམ་པ་པོ་རྣམས་ལ་རྒྱལ་ཁབ་མགོ་རྟིང་སློག་པ་དང་། རྒྱལ་ཁབ་ཀྱི་བརྟན་རླིང་ལ་གནོད་པའི་ལས་ཀ་བྱས་པའི་ནག་ཉེས་བཀལ་ཏེ། ཚད་ལས་འདས་པའི་མནར་གཅོད་གཏོང་མུས་ཡིན་པ་དང་། དེ་བཞིན་རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་། སྐད་ཡིག་སོགས་རྩ་མེད་གཏོང་མུས་དང་། བོད་ནང་དུ་དམ་དྲག་ཤུགས་ཆེན་བྱས་ནས་གནས་སྟངས་ཇེ་སྡུག་ཏུ་འགྲོ་མུས་ཡིན་པས། རྒྱ་ནག་གཞུང་གིས་ཁྲིམས་མཐུན་པའི་བྱ་སྤྱོད་ལ་མཐའ་གཅིག་ཏུ་ངོ་རྒོལ་ཡོད་ཅིང་། རྒྱལ་སྤྱིའི་གཞུང་སྒེར་གྱི་ཚོགས་སྡེ་ཚང་མས་རྒྱ་ནག་གཞུང་གིས་ཁྲིམས་མཐུན་མིན་པའི་བྱ་སྤྱོད་ལ་སྐྱོན་བརྗོད་དང་ཐེར་འདོན་བྱ་དགོས་པའི་རེ་སྐུལ་ཞུས་སོང་།

དེའི་རྗེས་པེན་བོད་ཀྱི་རྩོམ་པ་པོ་མཐུན་ཚོགས་ཀྱི་ཚོགས་གཙོ་རྒན་བསོད་ནམས་རྒྱལ་མཚན་ལགས་ཀྱིས་རྩོམ་འབྲི་རང་དབང་སྐོར་ལ་གསུང་བཤད་གནང་སྐབས། འགྲོ་བ་མིའི་རང་དབང་སྲུང་སྐྱོབ་ཀྱི་ཁྲོད་ནས་སྨྲ་བརྗོད་རང་དབང་སྲུང་སྐྱོབ་བྱ་རྒྱུ་དེ་གནད་འགག་ཆེ་ཤོས་ཡིན་ཡང་། བོད་ནང་དུ་རྩོམ་འབྲིའི་རང་དབང་དང་སྨྲ་བརྗོད་རང་དབང་ཡོང་གི་མེད་ལ། རྒྱ་ནག་གཞུང་གིས་རང་དབང་དེ་ག་རེ་བྱས་ནས་འགོག་གི་ཡོད་པ་རེད། འགོག་རྐྱེན་ག་རེ་རེད་ཟེར་དུས། རྒྱ་ནག་དམར་ཤོག་གཞུང་གིས་རྒྱུན་འཁྱོངས་དགོས་པའི་རྩ་བའི་རྩ་དོན་བཞི་དེ་རང་དབང་འགོག་རྐྱེན་ཆགས་བསྡད་ཡོད་སྟབས། རྩ་བའི་རྩ་དོན་བཞི་དེར་འགྱུར་བ་མ་ཕྱིན་པ་ཡིན་ན་ཁྲིམས་ག་རེ་འགྱུར་བ་ཕྱིན་པ་ནའང་གང་ཡང་ཕན་ཐོགས་ཀྱི་མ་རེད་ཅེས་དེ་རིང་ཚིག་ཐག་ཆོད་པོའི་ཐོག་ནས་བཤད་རྒྱུ་ཡིན་ལ། རྩ་བའི་རྩ་དོན་དང་པོ་སྤྱི་ཚོགས་རིང་ལུགས་ཀྱི་ལམ་བུ་རྒྱུན་འཁྱོངས་བྱེད་པ་དང་། གཉིས་པ་མི་མང་དམངས་གཙོའི་སྲིད་དབང་སྒེར་འཛིན་རྒྱུན་འཁྱོངས་བྱེད་དགོས་ཟེར་བ་དེ་འགོག་རྐྱེན་གཙོ་བོ་ཆགས་ཡོད་ལ། སྲིད་དབང་སྒེར་འཛིན་བྱེད་དགོས་ཟེར་དུས་འཛམ་བུ་གླིང་འདིའི་སྒང་གི་བྱེད་ཐབས་སྡུག་ཤོས་དེ་ཡིན་པ་རེད། རྩ་བའི་རྩ་དོན་གསུམ་པ་ག་དུས་ཡིན་ནའང་ཀྲུང་གོ་གུང་ཁྲན་ཏང་གི་མགོ་འཁྲིད་རྒྱུན་འཁྱོངས་བྱེད་དགོས་པ་དང་བཞི་པ་མགོ་འཁྲིད་རིམ་པའི་བསམ་བློ་རྒྱུན་འཁྱོངས་བྱེད་དགོས་པ་བཅས་ལ་བརྟེན་ནས། རྒྱ་ནག་ནང་གི་སྨྲ་བརྗོད་རང་དབང་དང་རྩོམ་འབྲིའི་རང་དབང་སོགས་འགོག་རྐྱེན་དེ་ཚོ་ཆགས་ཡོད་ལ། རྒྱ་ནག་གི་ཁྲིམས་བཤེར་གྱི་བརྒྱུད་རིམ་ཁྲོད་གོང་གི་རྩ་བའི་རྩ་དོན་བཞིར་འགལ་གྱི་ཡོད་མེད་རང་ལ་བལྟས་ནས་ཐག་གཅོད་ཀྱི་ཡོད་པ་དང་། བོད་ནང་གི་རྩོམ་འབྲིའི་རང་དབང་དང་སྨྲ་བརྗོད་རང་དབང་རྣམས་འགག་བསྡད་པ་དེ་རྒྱ་ནག་དམར་གཞུང་གི་རྩ་བའི་རྩ་དོན་བཞིར་ཐུག་ཡོད་སྐོར་བརྗོད་སོང་།

མཇུག་ཏུ་བོད་ཀྱི་དཔེ་མཛོད་ཁང་གི་དབུ་འཛིན་དགེ་བཤེས་ལྷག་རྡོར་ལགས་ཀྱིས། རྒྱལ་སྤྱིའི་པེན་རྩོམ་པ་པོའི་མཐུན་ཚོགས་ནི་འདི་ནས་རྩིས་པའི་མི་ལོ་བརྒྱ་ཡི་གོང་དུ་གསར་འཛུགས་བྱས་ཤིང་། དམག་ཆེན་དང་པོ་དང་གཉིས་པའི་སྐབས་སུ་ཚོགས་པ་དེར་དཀའ་ཁག་ཆེན་པོ་བྱུང་ཡོད། སྐབས་དེར་གཞུང་སྒེར་མང་པོ་ཞིག་གིས་ཐེར་འདོན་དང་སྐྱོན་བརྗོད་ནན་མོ་བྱུང་། རྒྱལ་སྤྱིའི་རྩོམ་པ་པོའི་མཐུན་ཚོགས་ནི་འཛམ་གླིང་ཞི་བདེ་དང་འཆམ་མཐུན། སྨྲ་བརྗོད་རང་དབང་གི་ཁེ་ཕན་སྲུང་སྐྱོབ། དམག་འཁྲུག་སོགས་ཀྱི་སྐབས་སུའང་སྒྱུ་རྩལ་གྱི་ལས་རིགས་ལ་གཏོར་བཤིག་བྱས་ཚེ། དེར་རྒོལ་ལན་སློག་པ་དང་སྲུང་སྐྱོབ་བྱེད་པར་གདོང་མཆོང་བྱེད་ཕོད་མཁན་ཞིག་ཡིན་པ་རེད། ཚོགས་པ་དེས་སྒེར་གྱི་ཁེ་ཕན་གཙོ་འདོན་བྱས་པ་ཞིག་མིན་པར། འཛམ་གླིང་སྤྱི་ཡོངས་ཀྱི་རང་དབང་དང་། ཞི་བདེ། འཆམ་མཐུན་ཚོགས་ཀྱི་སླད་དུ། འཐེན་འཁྱེར་དང་ཕྱོགས་ཞེན་གྱི་འདུ་ཤེས་དོར་ནས། འཛམ་གླིང་སྤྱིའི་ཁེ་ཕན་གྱི་སླད་དུ་ཞབས་འདེགས་སྒྲུབ་ཀྱིན་ཡོད་པས། དེ་ལྟ་བུའི་ཚོགས་པ་ཁག་ལ་ཡི་རང་བྱ་དགོས་པ་ཞིག་རེད། མི་ཞིག་ལ་མཚོན་ན་སྨྲ་བརྗོད་ཀྱི་རང་དབང་དང་། འགྲོ་འདུག་གི་རང་དབང་སོགས་མེད་ཚེ། དེ་ནི་དུད་འགྲོ་དང་ཁྱད་པར་ཅི་ཡང་མེད། དུད་འགྲོ་ལ་མཚོན་ན་འདུ་འཛོམས་ཀྱི་རང་དབང་དང་། རྩོམ་སྒྲིག་གི་རང་དབང་སོགས་དགོས་ཟེར་མི་ཤེས་ཀྱང་། མིའི་རིགས་ལ་རང་དབང་སོགས་བཀག་སྡོམ་བྱས་པ་ནི། དུད་འགྲོ་དང་དངོས་གནས་ཁྱད་པར་མེད་པས། པེན་རྩོམ་པ་པོ་མཐུན་ཚོགས་ཀྱིས་གཞུང་སྒེར་གང་གིས་བཙན་གནོན་དང་། འཁྱོག་བརྗོད་སོགས་བྱས་ཚེ། དེར་དྲང་བདེན་གྱི་གནས་ལུགས་བཤད་དགོས་པ་དང་། དྲན་བདེན་གྱི་སྒོ་ནས་རྩོམ་ཡིག་འབྲི་དགོས་གལ་ཆེན་པོ་རེད། བོད་དང་རྒྱ་ནག་ཏུ་སྨྲ་བརྗོད་ཀྱི་རང་དབང་སོགས་མེད་ཅིང་། མཐའ་ན་ཨ་རི་སོགས་ནས་མངགས་པའི་གསར་འགོད་པ་སོགས་ལ་དམ་དྲག་ནན་མོ་བྱས་པ་དང་ཁ་ཤས་བཙོན་འཇུག་བྱེད་ཀྱི་ཡོད། དེང་གི་ཆར་རྒྱལ་སྤྱིའི་ཉམས་ཞིབ་པ་དང་རྩོམ་པ་པོ་མང་པོ་ཞིག་གིས། བོད་དང་རྒྱ་ནག་ནང་གི་དངོས་ཡོད་ཀྱི་གནས་སྟངས་ལ་རྩོམ་ཡིག་སོགས་འབྲི་མུས་ཡིན་ཡང་། དེ་ནི་ཕྱི་རྒྱལ་ཁག་ཏུ་བྲོས་བྱོལ་དུ་ཡོང་བ་དག་ནས་གོ་ཐོས་བྱུང་བ་ལས། ཉིན་རེའི་དངོས་ཡོད་ཀྱི་གནས་སྟངས་སོགས་མི་ཤེས་པར། རྒྱ་ནག་གཞུང་གིས་བོད་མི་དང་རྒྱ་མི་སོགས་ལ་བཙན་གནོན་བྱེད་མུས་ཡིན་ལ། དེང་གི་ཆར་མི་རྣམས་དཔལ་འབྱོར་གྱི་འགྲན་རྩོད་ལ་ཁ་ཕྱོགས་པ་དང་། དཔལ་འབྱོར་བསྡུ་རུབ་ཀྱི་ལས་ལ་བྲེལ་མུས་ཡིན་ཡང་།  ཚང་མས་མི་རིགས་ཤིག་གི་འགན་འཁྲི་དང་དུ་བླངས་ཏེ་བོད་ནང་གི་དངོས་ཡོད་ཀྱི་གནས་སྟངས་སོགས་ལ་རྒྱུས་ལོན་ནན་མོ་བྱས་ཏེ། རྩོམ་ཡིག་སོགས་འབྲི་སྤེལ་བྱ་དགོས་སྐོར་སོགས་གསུངས་སོང་།

བོད་ཀྱི་པེན་རྩོམ་པ་པོའི་མཐུན་ཚོགས་ནི་ཕྱི་ལོ་ ༡༩༩༩ ཟླ་ ༣ ཚེས་ ༡༩ ཉིན་བཞུགས་སྒར་རྡ་རམ་ས་ལར་ཐོག་མར་གསར་འཛུགས་གནང་། ཚོགས་པ་དེས་བོད་ཀྱི་སྐད་ཡིག་དང་འབྲེལ་བའི་ལས་འགུལ་རིམ་པ་སྤེལ་ཡོད་པ་དང་། དམིགས་བསལ་བོད་ནང་གི་བཙོན་འོག་ཏུ་ལུས་པའི་རྩོམ་པ་པོ་དག་གི་གསུང་རྩོམ་དཔར་བསྐྲུན་དང་། ཁྲིམས་འགལ་ཐོག་བཙོན་འཇུག་བྱས་པའི་བོད་ཀྱི་རྩོམ་པ་པོ་རྣམས་ཀྱི་སྐོར་ལ་སྙན་ཐོ་བཏོན་ནས་རྒྱལ་སྤྱིའི་སྟེང་དུ་འགྲེམས་སྤེལ། དེ་བཞིན་བོད་མི་རྣམས་ལ་རྩོམ་རིག་ཟབ་སྦྱོང་དང་།  བོད་ནང་དུ་རྒྱ་ནག་གིས་སྤེལ་མུས་ཡིན་པའི་སྐད་གཉིས་སློབ་གསོའི་ལས་འགུལ་ལ་མཐའ་གཅིག་ཏུ་ངོ་རྒོལ་གནང་ཡོད། འདས་པའིལོ་ཤས་རིང་རྒྱལ་སྤྱིའི་པེན་རྩོམ་པ་པོའི་ཚོགས་འདུ་ཁག་ལའང་མཉམ་ཞུགས་བྱས་ཏེ་བོད་ནང་གི་རྩོམ་པ་པོའི་གནས་བབ་དང་སྐད་ཡིག་རང་དབང་སོགས་ཀྱི་གནས་སྟངས་ངོ་སྤྲོད་གནང་ཡོད་པ་རེད།

གསར་འགོད་པ། དཔལ་ལྡན།