ཧི་མ་ཅལ་གྱི་སློབ་གྲྭ་ཁག་ཏུ་ཏོག་ནད་ཕོག་མཁན་ཇེ་མང་དུ་འགྲོ་ཡི་ཡོད་པའི་གནས་སྟངས་འོག་དྷ་སྟེང་བོད་ཁྱིམ་སློབ་གྲྭའི་སློབ་མ་ ༢༠ ལ་ཏོག་དབྱིབས་ནད་འགོས་ཁྱབ་བྱུང་སྟེ། ས་གནས་རྫོང་གིས་དྷ་སྟེང་བོད་ཁྱིམ་སློབ་གྲྭ་བཀག་སྐྱིལ་གྱི་ས་ཚིགས་ལ་ངོས་འཛིན་བྱས་ཡོད་པ་རེད།
ཧི་མ་ཅལ་མངའ་སྡེ་གཞུང་གི་བཀོད་ཁྱབ་གཞིར་བཟུང་ད་ལྟ་བཙན་བྱོལ་བོད་མིའི་ཉིན་སློབ་དང་གཏན་སློབ་ཁག་ཕལ་ཆེ་བས་སློབ་འགོ་ཚུགས་ཟིན་པ་ལྟར། འཛིན་རིམ་དང་པོ་ནས་མགོ་བཙུགས་པའི་སློབ་མ་རྣམས་དངོས་སུ་སློབ་གྲྭར་ཞུགས་ཏེ་ཡུན་རིང་མ་འགོར་བའི་སྐབས་འདིར། དྷ་སྟེང་བོད་ཁྱིམ་སློབ་གྲྭའི་སློབ་མ་ཁག་ཅིག་ལ་ཏོག་དབྱིབས་གཉན་རིམས་འགོས་ཁྱབ་བྱུང་བ་ལ་བརྟེན་ནས། ཁ་སང་ཀང་ར་རྫོང་གིས་བཀོད་ཁྱབ་ཅིག་བཏང་སྟེ་བོད་ཁྱིམ་སློབ་གྲྭའི་དགེ་ལས་ཡོངས་ཕྱིར་སྐྱོད་སོགས་མི་ཆོག་པར་ཏོག་དབྱིབས་དོ་དམ་གྱི་ས་ཚིགས་ཤིག་ལ་ངོས་འཛིན་གནང་ཡོད་པ་རེད།
འདི་གའི་གསར་འགོད་པས་དྷ་སྟེང་བོད་ཁྱིམ་གྱི་འགན་འཛིན་ཚུལ་ཁྲིམས་རྡོ་རྗེ་ལགས་སུ་ཏོག་དབྱིབས་དང་འབྲེལ་བའི་སྐོར་བཀའ་འདྲི་ཞུས་སྐབས། ཁོང་གིས། ནད་པ་བཅུ་གཅིག་ཐོན་པ་དེ་དངོས་འབྲེལ་རེད། དེར་ཉེན་ཁ་གཟིགས་ནས་རྒྱ་གར་གྱིས་བཀའ་ཁྱབ་བཏང་ཡོད་པ་རེད། བཀའ་ཁྱབ་བཏང་བ་ལ་བརྟེན་ནས་ང་ཚོ་ཉིན་ ༡༠ རིང་ཕྱིར་ཐོན་པ་དང་ནང་ལ་ཡོང་རྒྱུ་མེད་པར་བཟོས་ཡོད། ཅེས་གསུངས་བྱུང་བ་དང་། ནད་རིམས་ཕོག་པའི་སློབ་ཕྲུག་དེ་དག་དང་འབྲེལ་ནས་གཞན་ཡང་སློབ་མ་ ༩ ལ་ཏོག་ནད་འགོས་ཁྱབ་སྟེ་ཁྱོན་སློབ་ཕྲུག་ ༢༠ ལ་ནད་ཕོག་ཡོད་འདུག
ཚུལ་ཁྲིམས་རྡོ་རྗེ་ལགས་ཀྱིས་གསུངས་པ་ལྟར་ན། ད་ལྟ་དྷ་སྟེང་བོད་ཁྱིམ་དུ་འཛིན་རིམ་བཅུ་གཅིག་དང་ཕ་མའི་མངགས་གཏོང་བྱས་མེད་པའི་སློབ་མ་རྣམས་ཕུད་པའི་འཛིན་རིམ་དང་པོ་བཅུ་གཉིས་བར་གྱི་རྒྱ་བལ་འབྲུག་གསུམ་གྱི་སློབ་ཕྲུག་ཚང་མ་འཛོམས་ཡོད་འདུག་ལ། ད་སྔ་བར་ཏོག་དབྱིབས་འགོས་ཁྱབ་བྱུང་བའི་སློབ་མ་དེ་དག་དང་འབྲེལ་འདྲིས་བྱུང་བའི་ཁྱིམ་ཚང་དང་ལས་བྱེད། དགེ་རྒན་བཅས་ལ་ཏོག་དབྱིབས་ཀྱི་བརྟག་དཔྱད་གནང་ཟིན་ཡོད་པ་མ་ཟད། སློབ་གྲྭའི་ངོས་ནས་ཏོག་ནད་ཕོག་པའི་སློབ་མ་རྣམས་དང་དགེ་སློབ་སྤྱི་ཡོངས་ཀྱི་གནས་སྟངས་ལ་གཟིགས་རྟོག་གནང་མུས་ཡིན་པ་རེད།
གཞན་ཡང་ད་ལྟའི་ཆར་རྒྱ་གར་རྒྱལ་ཡོངས་སུ་སློབ་འགོ་ཚུགས་པ་དང་བསྟུན། འགྲོ་འོང་སོགས་མི་མང་འདུ་འཛོམས་ཀྱི་རིགས་རྒྱ་ཆེར་ཕྱིན་པའི་རྐྱེན་གྱིས། ཧི་མ་ཅལ་མངའ་སྡེའི་རྒྱ་གར་གྱི་ཉིན་སློབ་ཁག་ཏུ་ཏོག་ནད་ཕོག་པའི་མི་འབོར་ཇེ་མང་དུ་འགྲོ་ཡི་ཡོད་པ་དང་། བོད་མིའི་སྒྲིག་འཛུགས་ཀྱི་ཏོག་དབྱིབས་ཛ་དྲག་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༨༣ པའི་གནས་ཚུལ་ལྟར་ན། ད་སྔ་དབར་རྒྱ་བལ་གཉིས་ནང་ཏོག་དབྱིབས་ནད་གཞི་ཕོག་པའི་བོད་མི་ཁྱོན་ ༦༧༣༦ དང་། དྲག་སྐྱེད་བྱུང་བའི་མི་གྲངས་ ༦༥༢༨། འདས་གྲོངས་སུ་གྱུར་བའི་མི་གྲངས་ ༡༥༥། ད་ལྟ་གསོ་བཅོས་བྱེད་བཞིན་པའི་མི་གྲངས་ ༧༣ བཅས་ཆགས་ཀྱི་ཡོད་འདུག
གསར་འགོད་པ། སྐལ་བཟང་སྦྱིན་པ།
