བོད་ཀྱི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་ཀྱིས་དེ་རིང་ཕྱི་ཚེས་ ༡༨ ནས་བཟུང་ཟླ་ ༣ ལྷག་རིང་ཡུ་རོབ་ཀྱི་རྒྱལ་ཁབ་ ༡༤ ནང་བོད་དོན་ཞུ་གཏུག་དང་དྲིལ་བསྒྲགས་ལས་འགུལ་སྤེལ་བཞིན་འདུག
ཕྱི་ལོ་ ༢༠༢༢ ལོའི་ཟླ་ ༢ ནང་རྒྱ་ནག་ནང་རྒྱལ་སྤྱིའི་ཨོ་རྩལ་འགྲན་ཚོགས་འཚོག་གཏན་འཁེལ་ཡོད་པ་དང་། རྒྱ་ནག་གཞུང་གིས་བོད་ནང་གི་བོད་མི་ཚོའི་གཞི་རྩའི་འགྲོ་བ་མིའི་ཐོབ་ཐང་སོགས་དྲག་གནོན་བྱེད་བཞིན་པའི་གནས་སྟངས་དངོས་དྲིལ་བསྒྲགས་ཆེད། དེ་རིང་བོད་ཀྱི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་ཀྱིས་ཡུ་རོབ་ཀྱི་རྒྱལ་ཁབ་ཧྥ་རན་སི་ནས་མགོ་བཙུགས་ཏེ། ཡུ་རོབ་རྒྱལ་ཁབ་ ༡༤ ལྷག་གི་ནང་དུ་འཆར་ལོའི་ཕྱི་ཟླ་ ༢ པའི་ནང་བར་དུ་བོད་དོན་དྲིལ་བསྒྲགས་དང་ཞུ་གཏུག་གི་ལས་འགུལ་ཞིག་སྤེལ་བཞིན་ཡོད་པ་དང་། མ་འོངས་ཟླ་བ་གསུམ་ལྷག་རིང་ཧྥ་རན་སི་དང་འཇར་མན། ནེའུ་ཌར་ལན་ཌི། སྦེལ་ཇམ། དབྱིན་ཇི། ཨི་ཊ་ལི། ཌན་མག སི་ཝེ་ཌན་ (Sweden)། ནོར་ཝེ། ཨོ་སི་ཏེ་རི་ཡ་ (Austria)། ཅེག་སྤྱི་མཐུན་རྒྱལ་ཁབ། ལི་ཐའོ་ནེ་ཡ་ (Lithaunia)། ལ་ཏི་ཝི་ཡ་ (Latvia) སོགས་སུ་བོད་དོན་སྐོར་སྐྱོད་གནང་རྒྱུ་ཡིན་འདུག
བོད་ཀྱི་ཆབ་སྲིད་བཙོན་ཟུར་དང་གློག་བརྙན་འཁྲབ་འཁྲིད་པ་དོན་གྲུབ་དབང་ཆེན་ལགས་ཀྱིས་འདི་གའི་གསར་འགོད་པར། ད་ལྟའི་ལས་འཆར་ལྟར་ན། དེ་རིང་ནས་ཕྱི་ལོའི་ཟླ ༢ པ་བར་ཡོ་རོབ་ཀྱི་རྒྱལ་ཁབ་མི་འདྲ་བ་བཅུ་བཞི་ལྷག་གི་གྲོས་ཚོགས་འཐུས་མི་དང་། གནད་དོན་མི་སྣ། མི་མང་སོགས་སུ་ཐུག་འཕྲད་ཀྱིས་བོད་དོན་ཞུ་གཏུགས་དང་དྲིལ་བསྒྲགས་བྱས་ཏེ། རྒྱ་ནག་ཏུ་འཚོག་འཆར་ཡོད་པའི་དགུན་དུས་ཀྱི་ཨོ་རྩལ་འགྲན་སྡུར་ལ་ངོ་རྒོལ་གྱི་ལས་འགུལ་སྤེལ་གྱི་ཡོད་པ་དང་། བོད་དོན་ཞུ་གཏུག་གི་ལས་འགུལ་དེ་ཕྱི་ལོ་ ༢༠༢༢ ལོའི་ཟླ ༢ ཚེས་ ༡༠ ཉིན་སུད་སིའི་གྲོང་ཁྱེར་ཇི་ནི་ཝ་ནས་མཇུག་བསྡུ་འཆར་ཡོད། འོན་ཀྱང་། ད་ལྟའི་ལས་རིམ་ལྟར་ཆུ་ཚོད་ཏག་ཏག་ནང་འགྲོ་ཐུབ་རྒྱུ་ཅུང་དཀའ་ལས་ཁག་པོ་ཆགས་ཡོད་སྐོར་བརྗོད་བྱུང་།
ལས་རིམ་ནང་ཧྤ་རན་སི་བོད་རིགས་ཚོགས་པའི་གོ་སྒྲིག་འོག ས་གནས་བོད་མི་རྣམས་ལ་ཕྱི་ལོ་ ༢༠༠༨ ལོར་རྒྱ་ནག་ཏུ་འཚོགས་པའི་ཨོ་རྩལ་འགྲན་ཚོགས་སྐབས། བོད་ནང་གི་བོད་མི་ཚོའི་བསམ་ཚུལ་ཕྱོགས་བསྡུས་བྱས་པའི་དངོས་བྱུང་གློག་བརྙན་འཇིགས་བྲལ་གཟིགས་འབུལ་གནང་རྒྱུ་དང་། དེ་བཞིན་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་ཀྱིས་ཁོང་རང་གི་མི་ཚེའི་ལོ་རྒྱུས་དང་འབྲེལ་ཏེ། བཙོན་འོག་ནས་མནར་གཅོད་མྱངས་བའི་བརྒྱུད་རིམ་སོགས་ཀྱི་སྐོར་ལ་གཏམ་བཤད་དང་དྲི་བ་དྲིས་ལན་སོགས་གནང་རྒྱུ་ཡིན་པ་རེད་འདུག
དོན་གྲུབ་དབང་ཆེན་ལགས་དང་མགོ་ལོག་འཇིགས་མེད་ལགས་རྣམས་གཉིས་ཀྱིས་འཇིགས་བྲལ་ཞེས་པའི་དངོས་བྱུང་གློག་བརྙན་ཕབ་སྐྲུན་བྱས་པར་བརྟེན། རྒྱ་ནག་གཞུང་གིས་ཕྱི་ལོ་ ༢༠༠༨ ཟླ་ ༣ ནང་ཟིང་སློང་རྒྱུད་སྐུལ་བྱེད་པའི་ནག་ཉེས་གཡོགས་ཏེ་དོན་གྲུབ་དབང་ཆེན་ལགས་ལ་ལོ་ ༦ བཙོན་འཇུག་ཁྲིམས་ཐག་བཅད་ཡོད་པ་དང་། ཕྱི་ལོ་ ༢༠༡༤ ཟླ་ ༦ ཚེས་ ༥ ཉིན་མཚོ་སྔོན་ཞིང་ཆེན་ཟི་ལིང་བཙོན་ཁང་ནས་ཀློད་གྲོལ་བཏང་ཡོད་ཀྱང་། རྒྱ་གཞུང་ཉེན་རྟོག་པས་ཁོང་གི་འགྲོ་འདུག་སྤྱོད་གསུམ་ལ་དམ་དྲག་ཆེན་པོ་བྱས། ༢༠༡༧ ཟླ ༡༢ པའི་ནང་ཁོང་ཨ་རིའི་ནང་བཙན་བྱོལ་དུ་བསླེབས་ཏེ་ཁ་ལི་ཧྥོར་ནེ་ཡའི་གྲོང་ཁྱེར་སན་ཧྥི་རན་སི་ཁོ་ ( San Francisco ) ནང་ཡོད་པའི་ནང་མི་དང་ལྷན་འཛོམས་བྱུང་། ཕྱི་ལོ་ ༢༠༡༢ ལོར་ཁོང་ལ་རྒྱལ་སྤྱིའི་རང་དབང་གསར་འགྱུར་གྱི་གཟེངས་རྟགས་ཐོབ་ཡོད་པ་དང་། དེ་བཞིན། ཕྱི་ལོ་ ༢༠༡༤ ལོར་ཨ་རིའི་ནེའུ་ཡོག་གྲོང་ཁྱེར་ནང་རྟེན་གཞི་བྱས་པའི་འགྲོ་བ་མིའི་ཐོབ་ཐང་ཐེབས་རྩ་ཁང་གིས་རྣམ་དཔྱོད་ལྡན་པའི་བརྩམས་ཆོས་སྒྱུ་རྩལ་གྱི་རྒྱལ་སྤྱིའི་ཧ་ཝེལ་གཟེངས་རྟགས་ (Havel Prize) སོགས་ཐོབ་མྱོང་ཡོད་པ་རེད།
ཁོང་གི་གློག་བརྙན་བཟོ་རོགས་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་སྔ་གཞུག་ཏུ་ཐེངས་གསུམ་ལ་འཛིན་བཟུང་བཙོན་འཇུག་བྱས་ཏེ་ཡ་ང་བའི་སྡུག་སྦྱོང་མནར་གཅོད་མྱངས་མཐར། ཕྱི་ལོ་ ༢༠༡༤ ལོར་རྒྱ་གར་དྷ་རམ་ས་ལར་འབྱོར་ཐུབ་པ་བྱུང་ཞིང་། ད་ལྟ་སུད་སིའི་ནང་གནས་སྡོད་ཀྱིས་རྒྱལ་སྤྱིའི་ཐོག་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་དངོས་དྲིལ་བསྒྲགས་དང་བོད་ཀྱི་ཆབ་སྲིད་བཙོན་ཟུར་ཞིག་གིས་དངོས་སུ་མྱངས་བའི་དཀའ་སྡུག་རྣམས་རྒྱལ་སྤྱིའི་ཐོག་ཁྱབ་བསྒྲགས་གནང་བཞིན་ཡོད་པ་རེད།
གསར་འགོད་པ། དཔལ་ལྡན།
