ཐའེ་ཝན་ནང་སློབ་སྦྱོང་གནང་མཁན་ཚེ་རིང་མཐར་ཕྱིན་ལགས་འདི་ལོའི་ཐའེ་ཝན་གྱི་སུན་ཀྲུང་ཧྲན་དྲན་རྟེན་ཚོགས་ཁང་གི་རྒྱ་སྐད་གཏམ་བཤད་ཀྱི་འགྲན་བསྡུར་ནང་ཞུགས་ཏེ་ཨང་གཉིས་པ་ཐོབ་ཡོད་པ་རེད།
ཟླ་འདིའི་ཕྱི་ཚེས་ ༡༦ ཉིན་ཨ་རི་དང་དབྱིན་ཇི། ཉི་ཧོང་དང་ཀོ་རི་ཡ་སོགས་འཛམ་གླིང་རྒྱལ་ཁབ་ ༡༥ ལྷག་གི་སློབ་མ་ཁྱོན་ ༣༣ འདི་ལོའི་ཐའེ་ཝན་གྱི་ཕྱི་རྒྱལ་སློབ་ཕྲུག་གི་རྒྱ་སྐད་གཏམ་བཤད་འགྲན་བསྡུར་སྐབས་ ༤༩ བའི་ནང་མཉམ་ཞུགས་བྱས་ཡོད་པ་དང་། རྒྱ་སྐད་གཏམ་བཤད་ཀྱི་ལས་འགུལ་དེའི་ཁྲོད་བོད་པའི་སློབ་མ་ཚེ་རིང་མཐར་ཕྱིན་ལགས་ཀྱིས་ཀྱང་མཉམ་ཞུགས་གནང་སྟེ། ཁོང་ལ་འགྲན་བསྡུར་ཁྲོད་ཆེས་རྒྱ་སྐད་ཀྱི་གཏམ་བཤད་ལ་མཁས་པའི་ཨང་རིམ་གཉིས་པ་ཐོབ་ཡོད་པ་དང་། ཁོང་ནི་ད་སྔ་བར་བོད་པའི་སློབ་མ་ཞིག་ལོ་རྟག་པར་འཚོགས་སྲོལ་ཡོད་པའི་ཐའེ་ཝན་རིག་གཞུང་ལྷན་ཁང་གི་ཁྱབ་ཁོངས་སུན་ཀྲུང་ཧྲན་དྲན་རྟེན་ཚོགས་ཁང་གིས་ (Dr. Sun Yat-Sen Memorial Hall) གོ་སྒྲིག་བྱས་པའི་རྒྱ་སྐད་གཏམ་བཤད་ཀྱི་ལས་འགུལ་ནང་ཞུགས་མཁན་བོད་རིགས་སློབ་མ་ཐོག་མ་དེ་ཆགས་ཀྱི་ཡོད་འདུག
དེ་རིང་འདི་གའི་གསར་འགོད་པས་ཚེ་རིང་མཐར་ཕྱིན་ལགས་སུ་འགྲན་བསྡུར་ཁྲོད་ཨང་རིམ་གཉིས་པ་ལོན་པར་མྱོང་ཚོར་ག་རེ་བྱུང་སྐོར་དྲིས་པར་ཁོང་གིས། ང་རང་འཛུལ་ཞུགས་བྱེད་ས་དེ་ཐའེ་ཝན་ནང་ལོ་རྟག་པར་འཚོགས་སྲོལ་ཡོད་པའི་སུན་ཀྲུང་ཧྲན་དྲན་རྟེན་ཚོགས་ཁང་གི་ཕྱི་རྒྱལ་གྱི་རྒྱ་སྐད་གཏམ་བཤད་འགྲན་བསྡུར་ནང་ཡིན། དེ་ལ་རྒྱ་སྐད་ཤེས་དགོས་ཀྱི་ཡོད་པ་རེད། ལས་འགུལ་འདིའི་ནང་ད་བར་བོད་པའི་སློབ་མ་འཛུལ་ཞུགས་གནང་མཁན་བྱུང་མེད། ད་རེས་ཀྱི་སྡིངས་ཆ་དེ་ངས་གོ་སྐབས་གལ་ཆེན་པོ་ཞིག་ལ་ངོས་འཛིན་བྱེད་ཀྱི་ཡོད། གཅིག་ནས་གལ་སྲིད་ཡག་པོ་བྱུང་བ་ཡིན་ན་བོད་པའི་ཆབ་སྲིད་ཀྱི་གནས་སྟངས་གླེང་སློང་ཡོང་གི་རེད་བསམ་ནས་འཛུལ་ཞུགས་བྱས་པ་ཡིན། ཞེས་བརྗོད་བྱུང་བ་དང་། ཐའེ་ཝན་ནང་སུན་ཀྲུང་ཧྲན་དྲན་རྟེན་ཚོགས་ཁང་གི་རྒྱ་སྐད་གཏམ་བཤད་འགྲན་བསྡུར་དེ་འགྲན་བསྡུར་གལ་ཆེན་ཞིག་ལ་ངོས་འཛིན་བྱེད་ཀྱི་ཡོད་ཅིང་། ལོ་རྗེས་མར་རྒྱ་སྐད་གཏམ་བཤད་ཀྱི་འགྲན་བསྡུར་ཐེངས་ ༥༠ པ་དེ་རྒྱས་འཚོག་གནང་རྒྱུ་ཡིན་འདུག
ཡང་ཚེ་རིང་མཐར་ཕྱིན་ལགས་ཀྱིས་རང་ཉིད་ལ་འགྲན་བསྡུར་ཁྲོད་ཨང་གཉིས་པའི་རྒྱལ་ཁ་ལོན་པར་དགའ་ཚོར་བྱུང་ནའང་། དོན་དངོས་ཐོག་རང་ཉིད་བོད་མི་སྐྱབས་བཅོལ་བ་ཞིག་ཡིན་པའི་སེམས་ཚོར་སྟོན་ས་མེད་སྐོར་འགྲེལ་བརྗོད་གནང་དོན། ངའི་སེམས་ཀྱི་ཚོར་བ་དངོས་ནི་རང་ཉིད་བོད་པ་ཞིག་ཡིན་ནའང་། བོད་པའི་མིང་ཐོག་ནས་འཛུལ་ཞུགས་བྱེད་དུ་འགྲོ་ཆོག་གི་མེད། ང་ཡང་རྒྱ་གར་གྱི་དར་ཆ་དང་ཡིག་ཆའི་འོག་ནས་འགྲོ་དགོས་ཀྱི་འདུག ད་རེས་གསར་འགྱུར་བརྒྱུད་ལམ་ཁག་མང་པོའི་ནང་ང་རྒྱ་གར་བ་ཞིག་ཡིན་པ་ལས་བོད་པ་རེད་ཅེས་བྲིས་མི་འདུག འོན་ཀྱང་། དབྱིན་ཇིའི་གསར་ཁང་གཅིག་གིས་ང་ལ་བཅར་འདྲི་བྱས་སྐབས། རང་ཉིད་བོད་པ་ཡིན་པ་དང་བོད་ནས་རྒྱ་གར་དུ་ཡོང་བ། དེ་བཞིན་རྒྱ་ཡིག་སྦྱོང་དགོས་དོན་སོགས་ངོ་སྤྲོད་བྱ་རྒྱུ་བྱུང་། དེར་བརྟེན། དེའི་ཐད་ང་ལ་སེམས་ཚོར་རྣོན་པོ་སྐྱེས་བྱུང་། ཞེས་དང་། གཞན་ཡང་ཐའེ་ཝན་ནང་སྲིད་ཇུས་ཀྱི་ཐོག་ནས་བོད་མི་རྣམས་ལ་དཀའ་ངལ་ཤུགས་ཆེན་ཡོད་པ་དང་ཐའེ་ཝན་གྱི་རྩ་ཁྲིམས་ནང་བོད་དང་སོག་པོ། ཤིན་ཅང་བཅས་རྒྱ་ནག་གི་ཆ་ཤས་ཡིན་པ་གསལ་ཡོད་སྐོར་དང་། དམིགས་བསལ་ཐའེ་ཝན་ནང་གི་བོད་པའི་ཆོས་ཚོགས་ཁག་དང་སློབ་ཕྲུག་རྣམས་ལ་ཡིག་ཆ་ཚད་ལྡན་མེད་པ་དང་ངོས་འཛིན་མེད་པའི་དཀའ་ངལ། ད་དུང་སློབ་མ་ཚོས་ལས་ཀ་བྱས་མི་ཆོག་སྐོར་སོགས་བརྗོད་བྱུང་།
གཞན་ཡང་ད་རེས་ཚེ་རིང་མཐར་ཕྱིན་ལགས་ཀྱིས་རྒྱ་སྐད་གཏམ་བཤད་ཁྲོད་གཟེངས་སུ་ཐོན་པའི་གྲུབ་འབྲས་བླངས་པར། ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ནས་འཚམས་འདྲི་ཡི་གེ་བཏང་ཡོད་པ་དང་དེའི་ནང་། ཉིད་རང་ཕྱི་ཟླ་ ༡༡ ཚེས་ ༡༦ ཉིན་ཐའེ་ཝན་སུན་ཀྲུང་ཧྲན་དྲན་རྟེན་ཚོགས་ཁང་དུ་ཕྱི་རྒྱལ་སློབ་ཕྲུག་གི་རྒྱ་སྐད་གསུང་བཤད་འགྲན་བསྡུར་ཁྲོད་ཨང་རིམ་གཉིས་པའི་བྱ་དགའ་ཐོབ་པར་འཚམས་འདྲི་དང་། མུ་མཐུད་སློབ་སྦྱོང་ལ་རྩོལ་བ་ཆེ་བསྐྱེད་གནང་སྟེ་མ་འོངས་བོད་རང་དབང་གི་འཐབ་རྩོད་ལ་སྲི་ཞུ་རྒྱ་ཆེན་སྒྲུབ་ཐུབ་པའི་མི་སྣ་ཞིག་ཡོང་བའི་རེ་སྨོན་དང་བཅས། ཞེས་བརྗོད་འདུག
ཚེ་རིང་མཐར་ཕྱིན་ལགས་རང་ལོ་ ༡༢ སྟེང་བོད་ནས་རྒྱ་གར་དུ་འབྱོར་རྗེས་བོད་ཁྱིམ་སུ་ཇཱ་སློབ་གྲྭར་འཛིན་རིམ་ ༡༠ བར་སློབ་སྦྱོང་གནང་ཞིང་། དེ་རྗེས་བོད་ཁྱིམ་ཀོ་པལ་པུར་དང་ལྡི་ལི་རུ་མཐོ་སློབ་སོགས་འགྲེམས་རྗེས། ཕྱི་ལོ་ ༢༠༡༩ ཟླ་ ༩ ནང་ཐའེ་ཝན་དུ་འབྱོར་ཏེ། ད་ལྟ་ཐའེ་ཝན་གྱི་ (taiwan normal university) གཙུག་ལག་སློབ་གྲྭ་ཆེན་མོ་རུ་སློབ་སྦྱོང་གནང་མུས་ཡིན་པ་རེད།
གསར་འགོད་པ། སྐལ་བཟང་སྦྱིན་པ།
