བཀའ་ཟུར་དངོས་གྲུབ་ཚེ་རིང་མཆོག་གིས་བྱང་ཨ་རིའི་དོན་གཅོད་ཀྱི་ལས་འཁུར་ཞུས་ཏེ་ལོ་བཞི་ཟིན་གྱི་ཡོད་པའི་སྐབས་འདིར། བཀའ་ཤག་གིས་འབུམ་རམས་པ་རྣམ་རྒྱལ་ཆོས་སྒྲུབ་ལགས་བྱང་ཨ་རིའི་དོན་གཅོད་གསར་བར་བསྐོ་གཞག་གནང་གཏན་འཁེལ་ཡོད་འདུག
དེ་རིང་འདི་གའི་གསར་འགོད་པས་རྒྱུས་ལོན་བྱས་ཏེ་ཤེས་རྟོགས་བྱུང་བ་ལྟར་ན། བྱང་ཨ་རིའི་སྐུ་དོན་གཅོད་ཀྱི་ལས་ཡུན་རྫོགས་ལ་ཉེ་བ་དང་བསྟུན། སྐབས་བཅུ་དྲུག་པའི་བཀའ་ཤག་གིས་ཨ་རིར་གནས་བཞུགས་འབུམ་རམས་པ་རྣམ་རྒྱལ་ཆོས་སྒྲུབ་ལགས་བྱང་ཨ་རིའི་སྐུ་ཚབ་དོན་གཅོད་དུ་བསྐོ་གཞག་གནང་གཏན་འཁེལ་ཡོད་པ་དང་། བཀའ་ཟུར་དངོས་གྲུབ་ཚེ་རིང་མཆོག་ནས་ཕྱི་ལོ་ ༢༠༡༧ ཟླ་ ༡༢ ཚེས་ ༡ ནས་དོན་གཅོད་ཀྱི་ལས་འཁུར་ཞུས་ཏེ་ལོ་བཞི་ཟིན་གྱི་ཡོད་འདུག
གསར་དུ་བསྐོ་གཞག་བྱུང་བའི་འབུམ་རམས་པ་རྣམ་རྒྱལ་ཆོས་སྒྲུབ་ལགས། དེ་སྔ་བོད་མིའི་སྒྲིག་འཛུགས་ཀྱི་དཔལ་འབྱོར་དང་བོད་ཀྱི་སྲིད་ཇུས་ཉམས་ཞིབ་ཁང་སོགས་སུ་ལོ་འགའི་རིང་སྲི་ཞུ་སྒྲུབ་མྱོང་བ་ཡོད་པ་རེད་ལ། རྒྱ་གར་ལྷོ་ཕྱོགས་ཀྱི་མའེ་སོར་གཙུག་ལག་སློབ་གཉེར་ཁང་དང་དེ་རྗེས་ཨ་རིའི་མངའ་སྡེ་མོ་སཱ་ཆོ་སེ་ཊིའི་ (Brandeis) གཙུག་ལག་སློབ་གྲྭ་ཆེན་མོ་ནས་རྒྱལ་སྤྱིའི་ཡུན་གནས་འཕེལ་རྒྱས་ཐོག་ལ་གཙུག་ལག་རབ་འབྱམས་པའི་སློབ་གཉེར་གནང་། ཨ་རིའི་ཝ་ཤིན་ཏོན་གཙུག་ལག་སློབ་གྲྭ་ཆེན་མོ་ནས་མི་རྒྱུད་བྱུང་རབས་དཔྱད་རིག་ཐོག་འབུམ་རམས་པའི་སློབ་གཉེར་གནང་ཡོད། ད་ལྟ་ཨ་རིའི་གྲོང་ཁྱེར་ལའུ་སིའི་( St. Louis) ཁུལ་གྱི་ཝ་ཤིན་ཏོན་གཙུག་ལག་སློབ་གྲྭ་ཆེན་མོ་རུ་མི་རྒྱུད་དཔྱད་རིག་ཚན་པར་ཕྱག་ལས་གནང་མུས་ཡིན་པ་རེད།
གསར་འགོད་པ། སྐལ་བཟང་སྦྱིན་པ།
