རྒྱ་ནག་སྲིད་བློན་གཞོན་པ་ཟུར་བ་ཞིག་ལ་འཁྲིག་སྤྱོད་ཀྱི་ཉེས་འཛུགས་བྱས་རྗེས། གར་སོང་ཆ་མེད་དུ་གྱུར་བའི་རྒྱ་ནག་གི་ཊེ་ནེ་སི་རྩེད་མཁན་གྲགས་ཅན་པཱང་ཧྲའེ་ཡི་གནད་དོན་ཕྱི་གསལ་ནང་གསལ་མ་བཟོས་པར་དུ། རྒྱ་ནག་ནང་རྒྱལ་སྤྱིའི་ཊེ་ནེ་སིའི་རྩེད་རིགས་གཅིག་ཀྱང་སྡུད་རྒྱུ་མིན་པའི་ཐག་བཅད།
རྒྱ་ནག་གི་ཊེ་ནེ་སི་རྩེད་མཁན་པཱང་ཧྲའེ་གར་སོང་ཆ་མེད་དུ་གྱུར་བའི་གནས་སྟངས་འོག ཁོ་མོའི་བདེ་འཇགས་དང་བུད་མེད་ལ་རྩུབ་སྤྱོད་ཀྱི་བྱ་སྤྱོད་མཚམས་འཇོག་ཡོང་ཐབས་སོགས་ལ་དམིགས་ཏེ། དེ་རིང་རྒྱལ་སྤྱིའི་བུད་མེད་ཀྱི་ཊེ་ནེ་སི་རྩེད་འགྲན་ཚོགས་པས། རྒྱ་ནག་དང་ཧོང་ཀོང་ནང་ཊེ་ནེ་སིའི་རྩེད་རིགས་ཡོངས་མཚམས་འཇོག་བྱ་རྒྱུ་ཡིན་པའི་ཐག་གཅོད་བླངས་ཡོད་པ་ཡོངས་བསྒྲགས་བྱས་འདུག
དེ་འབྲེལ་བྷི་བྷི་སིའི་གནས་ཚུལ་ནང་། རྒྱལ་སྤྱིའི་བུད་མེད་ཀྱི་ཊེ་ནེ་སི་རྩེད་འགྲན་ཚོགས་པས། པཱང་ཧྲའེ་ལ་ད་དུང་རང་དབང་མེད་པ་དང་། བདེ་འཇགས་མིན་པ། འཇིགས་སྐྲག་འོག་གནས་ཡོད་པ་སོགས་ཀྱི་དོགས་གཞི་བྱེད་ཀྱིན་ཡོད་པ་མ་ཟད། པཱང་ཧྲའེ་ཡི་གནད་དོན་ལ་ཁ་ཡག་མི་བྱེད་པ་ནི་ཊེ་ནེ་སི་རྩེད་མཁན་ཡོངས་ཀྱི་བདེ་འཇགས་སྣང་མེད་དུ་བཞག་པ་དང་དམིགས་བསལ་བུད་མེད་ལ་རྩུབ་སྤྱོད་དོན་རྐྱེན་རིགས་བྱུང་བར་འགན་མ་འཁུར་བའི་གནས་སྟངས་ཤིག་ལ་ངོས་འཛིན་བྱས་ཏེ། ད་ལྟ་རྒྱ་ནག་དང་ཧོང་ཀོང་ནང་གི་ཊེ་ནེ་སིའི་རྩེད་འགྲན་ཡོངས་མཚམས་འཇོག་བྱ་རྒྱུའི་ཐག་གཅོད་དེ་བླངས་ཡོད་སྐོར་བརྗོད་འདུག
རྒྱལ་སྤྱིའི་བུད་མེད་ཀྱི་ཊེ་ནེ་སིའི་ཚོགས་གཙོ་སི་ཊེ་ཝི་སེ་མོན་ (Steve Simon) ལགས་ཀྱིས། གལ་སྲིད་དབང་ཆེན་མི་སྣས་བུད་མེད་ཀྱི་འབོད་པ་དང་རེ་བར་དྲག་གནོན་དང་འཁྲིག་སྤྱོད་ཀྱི་ནག་ཉེས་སྦས་སྐུང་བྱེད་ཐུབ་ཀྱི་ཡོད་ཚེ། དེས་རྒྱལ་སྤྱིའི་ཊེ་ནེ་སིའི་ཚོགས་པ་འཛུགས་དགོས་པའི་གནས་ལུགས་སྟེ། བུད་མེད་ལ་འདྲ་མཉམ་དགོས་པའི་ཡ་སྙིང་ལ་ཁྱད་གསོད་གཏོང་གི་ཡོད་པས། རྒྱ་ནག་གཞུང་གི་བྱེད་བབ་དེ་དག་ངོས་ལེན་བྱེད་ཐབས་མེད། ཅེས་བརྗོད་པ་དང་འབྲེལ། རྒྱལ་སྤྱིའི་ཊེ་ནེ་སི་རྩེད་འགྲན་ཚོགས་པས། པཱང་ཧྲའེ་ཡི་རྩུབ་སྤྱོད་ཀྱི་དོན་རྐྱེན་ལ་བཀག་སྡོམ་མེད་པར་ཕྱི་གསལ་ནང་གསལ་གྱིས་རང་དབང་ལྡན་པའི་ཞིབ་འཇུག་བྱ་དགོས་པ་ནན་སྐུལ་བྱས་འདུག
ཡང་ཊེ་ནེ་སིའི་ཚོགས་གཙོ་སི་ཊེ་ཝི་སེ་མོན་ལགས་ཀྱི་བསྒྲགས་གཏམ་ནང་། དེ་སྔ་པཱང་ཧྲའེ་ཡིས་རྒྱ་ནག་གི་དཔོན་ཆེན་ཞིག་ལ་ཉེས་འཛུགས་བྱ་རྒྱུ་ནི་སྒོ་ང་བྲག་ལ་བརྡབ་པ་དང་སྲིན་འབུ་མེར་ལྕེབས་པ་ལྟ་བུ་ཡིན་པའི་ལུང་དྲངས་པ་དང་སྦྲགས། རང་ཉིད་ནས་བདེན་པ་ཤོད་པར་འཇིགས་སྐྲག་གང་ཡང་མེད་པའི་སྙིང་སྟོབས་ལ་ཡི་རངས་དང་འབྲེལ། རྒྱལ་སྤྱིའི་ཊེ་ནེ་སི་རྩེད་འགྲན་ཚོགས་པས། པཱང་ཧྲའེ་ཡི་རྩུབ་སྤྱོད་ཀྱི་གནད་དོན་དེ་ཚབས་ཆེན་ཞིག་ལ་ངོས་འཛིན་གྱིས། དོན་རྐྱེན་ཕྱི་གསལ་ནང་གསལ་མ་ཆགས་པར་དུ་མུ་མཐུད་ཚོགས་པའི་ལངས་ཕྱོགས་འགྱུར་བ་གཏོང་རྒྱུ་མིན་པ་དང་། འབྱུང་འགྱུར་རྒྱ་ནག་ནང་ཊེ་ནེ་སིའི་རྩེད་རིགས་ཚོགས་རྒྱུར་ཉེན་ཁ་ཡོད་སྐོར་སོགས་བརྗོད་འདུག
ཕྱི་ཟླ་ ༡༡ ཚེས་ ༢ ཉིན་པཱང་ཧྲའེ་ཡིས་རང་ཉིད་ལ་རྒྱ་ནག་གི་སྲིད་བློན་གཞོན་པ་ཟུར་བ་ཀྲང་ཀོ་ལི་ (Zhang Gaoli) ཡིས་བཙན་གྱིས་འཁྲིག་སྤྱོད་བྱས་པའི་ཉེས་འཛུགས་ཡོངས་བསྒྲགས་བྱས་པ་དང་། ཕྱི་ཚེས་ ༣ ཉིན་ནས་པཱང་ཧྲའེ་གར་སོང་ཆ་མེད་དུ་གྱུར་ཡོད། དེར་བརྟེན། རྒྱལ་སྤྱིའི་ཊེ་ནེ་སི་ཚོགས་པ་དང་རྩེད་འགྲན་པ། བུད་མེད་ཀྱི་ཐོབ་ཐང་སྲུང་སྐྱོབ་ཚོགས་པ་སོགས་ཀྱི་ལས་འགུལ་བ་དག་གིས། པཱང་ཧྲའེ་ག་བར་ཡོད། རྩུབ་སྤྱོད་ཀྱི་བྱ་སྤྱོད་ཐེར་འདོན་དགོས། རྒྱ་ནག་ནང་ཨོ་ལིམ་ཕིག་གི་རྩེད་འགྲན་བསྡུ་མི་ཆོག་ཟེར་བ་སོགས་ཀྱི་འབོད་ཚིག་དང་ལས་འགུལ་བསྟུད་མར་སྤེལ་བའི་ཤུགས་རྐྱེན་འོག རྒྱ་ནག་གཞུང་གིས་པཱང་ཧྲའེ་ཡི་གནད་དོན་དེ་མི་སྒེར་གྱི་གནད་དོན་ཞིག་ནས། ཕྱི་ལོ་ ༢༠༢༢ ལོའི་དགུན་ཁའི་ཨོ་རྩལ་དང་འབྲེལ་བ་ཆགས་པའི་གནད་དོན་ཞིག་ཏུ་འགྱུར་བར་བརྟེན། རྒྱ་ནག་གཞུང་འབྲེལ་གྱི་གོ་ལའི་དུས་བབ་སོགས་ཀྱིས་པཱང་ཧྲའེ་བདེ་འཇགས་ཡིན་ལུགས་དང་འབྲེལ་བའི་ཡི་གེ་དང་པར་རིས་རིམ་པ་ཕྱིར་བསྒྲགས་ཡོད་ཀྱང་། རྒྱལ་སྤྱིའི་ངོས་ནས་རྒྱ་ནག་གཞུང་ལ་ཡིད་ཆེས་བྱས་མེད།
ཟླ་སྔོན་མའི་ཕྱི་ཚེས་ ༢༢ ཉིན་རྒྱ་ནག་གཞུང་གིས་པཱང་ཧྲའེ་དང་རྒྱལ་སྤྱིའི་ཨོ་ལིམ་ཕིག་རྩེད་འགྲན་གྱི་ཚོགས་གཙོ་ཐཱོ་མ་སི་བྷ་ཆི་ (Thomas Bach) གཉིས་བརྙན་ལམ་ནས་འཕྲད་དུ་བཅུག་སྟེ། རྒྱལ་སྤྱིའི་སྤྱི་ཚོགས་ལ་པཱང་ཧྲའེ་བདེ་འཇགས་ཡིན་ཚུལ་སྟོན་ཐབས་བྱས་ཀྱང་། རྒྱལ་སྤྱིའི་ཊེ་ནེ་སི་རྩེད་འགྲན་ཚོགས་པ་དང་ཊེ་ནེ་སི་རྩེད་མཁན། བུད་མེད་ཀྱི་ཐོབ་ཐང་སྲུང་སྐྱོབ་ཚོགས་པ་སོགས་ནས་རྒྱ་ནག་གཞུང་ལ་ཡིད་ཆེས་བློ་འཁེལ་བྱུང་མེད་པ་མ་ཟད། ད་ལྟ་རྒྱལ་སྤྱིའི་ཚོགས་སྡེ་ཁག་མང་པོས་པཱང་ཧྲའེ་ལ་རྩུབ་སྤྱོད་བྱེད་མཁན་རྒྱ་ནག་གི་སྲིད་བློན་གཞོན་པ་ཟུར་བ་ཀྲང་ཀོ་ལི་ཡིས་དེ་འབྲེལ་ཐད་གསལ་བཤད་གཅིག་ཀྱང་བྱས་མེད་སྐོར་ལ་སྐྱོན་བརྗོད་བྱེད་མུས་ཡིན་པ་རེད།
ཡང་ཉེ་ལམ་སི་ཨན་ཨན་གྱི་གནས་ཚུལ་ཞིག་གི་ནང་། རྒྱ་ནག་དམར་ཤོག་ཚོགས་པའི་དབུས་ཆབ་སྲིད་རྒྱུན་ལས་དང་སྲིད་བློན་གཞོན་པ་ཟུར་བ་ཀྲང་ཀོ་ལི་ཟེར་བ་ཁོ་ངོ་སྤྲོད་དང་འབྲེལ་ནས། ད་ཆར་ཁོ་པ་གར་སོང་ཆ་མེད་དུ་གྱུར་བའི་གནས་ཚུལ་ཞིག་སྤེལ་ཡོད་ལ། དཔྱད་བརྗོད་པས། ཀྲང་ཀོ་ལི་ནི་ཕྱི་ལོ་ ༢༠༡༦ ལོར་རྒྱལ་སྤྱིའི་ཨོ་རྩལ་འགྲན་ཚོགས་ཀྱི་ཚོགས་གཙོ་དང་འཕྲད་དེ། སྐབས་དེར་རྒྱ་ནག་ངོས་ནས་ཨོ་རྩལ་འགྲན་ཚོགས་དཔེ་དག་ཅིག་གོ་སྒྲིག་བྱ་རྒྱུའི་ཁས་ལེན་གྱི་མཚོན་པའི་ཀྲང་ཀོ་ལི་ནི། ཕྱི་ལོ་ ༢༠༢༢ ལོའི་རྒྱ་ནག་གི་དགུན་ཁའི་ཨོ་རྩལ་གྱི་ངོ་གདོང་ལྟ་བུ་གྱུར་ཡོད་སྟབས། ཀྲང་ཀོ་ལི་དང་པཱང་ཧྲའེ་གཉིས་ཀྱི་གྱོད་དོན་གྱིས་ཨོ་རྩལ་འགྲན་ཚོགས་ལ་ཤུགས་རྐྱེན་ཐེབས་ཀྱི་ཡོད་སྐོར་བརྗོད་འདུག
གསར་འགོད་པ། སྐལ་བཟང་སྦྱིན་པ།
