ཕྱི་ལོ་ ༢༠༡༨ ལོར་རྒྱ་ནག་གི་འཛིན་བཟུང་འོག་གར་སོང་ཆ་མེད་དུ་གྱུར་བའི་བོད་ཀྱི་ཁོར་ཡུག་སྲུང་སྐྱོབ་པ་དོན་རྒྱལ་ལགས་སུ། རྒྱ་གཞུང་ཉེན་རྟོག་པས་བཙོན་ཁང་དུ་ཉེས་རྡུང་དྲག་པོ་བཏང་རྐྱེན་འོག་ཚེ་སྲོག་ལའང་ཉེན་ཁ་ཡོད་པའི་གནས་སུ་གྱུར་ཡོད་འདུག
བོད་མིའི་སྒྲིག་འཛུགས་ཀྱི་དྲ་རྒྱའི་སྟེང་སྤེལ་བའི་གནས་ཚུལ་ལྟར་ན། ཕྱི་ལོ་ ༢༠༡༨ ལོར་རྒྱ་ནག་གཞུང་གིསབོད་འབྲི་རུ་རྫོང་ཤག་ཆུ་གྲོང་རྡལ་གྱི་སེབ་ཁྲ་ཟེར་བའི་གནས་རིར་ལམ་ཁ་བཟོ་རྒྱུ་ཡིན་སྐོར་ལ་ཁ་གཡར་ཏེ་གཏེར་ཁ་སྔོག་འདོན་བྱས་པ་དང་། སྐབས་དེར་ས་གནས་ཡུལ་མི་རྣམས་དང་ལྷན་དུ་རྒྱ་གཞུང་ལ་ཞི་རྒོལ་གནང་མཁན་གྱི་གྲས་ཡིན་པའི་བོད་མི་དོན་རྒྱལ་ལགས་གར་སོང་ཆ་མེད་དུ་གྱུར་ཡོད་ཀྱང་། ད་ལྟ་ཁོང་འབྲི་རུ་རྫོང་གི་བཙོན་ཁང་ཞིག་ཏུ་བཙོན་འཇུག་བྱས་ཡོད་པ་མ་ཟད། བཙོན་ཁང་དུ་རྡུང་རྡེག་དྲག་པོ་བཏང་རྐྱེན་འོག ད་ལྟ་ཁོང་གི་སྐུ་གཟུགས་ཀྱི་གནས་སྟངས་ཛ་དྲག་དང་ཚེ་སྲོག་ལའང་ཉེན་ཁ་ཡོད་པའི་གནས་སུ་གཡུགས་ཡོད་འདུག
དེ་འབྲེལ་ཐད་འདི་གའི་གསར་འགོད་པས་བོད་མིའི་སྒྲིག་འཛུགས་ཀྱི་འབྲེལ་ཡོད་ལས་བྱེད་ཁག་ཅིག་ལ་བཀའ་འདྲི་ཞུས་སྐབས། བོད་མི་དོན་རྒྱལ་ལགས་ཀྱི་གནས་ཚུལ་དེ་བདེན་པ་དང་། ཁོང་གི་འཕྲོད་བསྟེན་གྱི་གནས་སྟངས་ཧ་ཅང་ཛ་དྲག་པོ་ཡིན་སྐོར་གསུངས་བྱུང་། ཕྱི་ལོ་ ༢༠༡༨ ལོར་འབྲི་རུ་རྫོང་ཤག་ཆུ་ཁའི་སེབ་ཁྲ་ཟེར་བའི་གནས་རིར་རྒྱ་གཞུང་གིས་གཞུང་ལམ་འཛུགས་སྐྲུན་བྱ་རྒྱུ་ཡིན་ཚུལ་བརྗོད་དེ། གཏེར་ཁ་སྔོག་འདོན་བྱས་པར་ས་གནས་ཡུལ་མི་ཚོས་ཞི་བའི་ངོ་རྒོལ་གནང་ཡོད་པ་དང་། སྐབས་དེར་ཤག་ཆུ་ཁའི་བོད་ཁག་ཅིག་འཛིན་བཟུང་བྱས་ཡོད་པའི་ཁྲོད། བོད་མི་དོན་རྒྱལ་ལགས་ཀྱིས་སྐབས་དེའི་གནས་ཚུལ་ཁག་ཕྱི་བསྒྲགས་བྱས་པའི་ཉེས་མིང་འོག་འཛིན་བཟུང་བྱས་ཏེ། འབྲི་རུའི་ཕྱོགས་སུ་དམ་དྲག་ཤུགས་ཆེན་ཡོད་པའི་རྐྱེན་གྱིས། ད་བར་ཁོང་གི་གང་དུ་བཙོན་འཇུག་བྱས་ཡོད་པ་སོགས་ཀྱི་གནས་ཚུལ་གོ་ཐོས་བྱུང་མེད་པ་རེད།
བོད་ཀྱི་ཁོར་ཡུག་སྲུང་སྐྱོབ་ལས་འགུལ་བ་དོན་རྒྱལ་ལགས་ནི་ཤག་ཆུ་གྲོང་རྡལ་བྲག་ར་གྲོང་ཚོ་ནས་ཡིན་པ་དང་། འཛིན་བཟུང་མ་བྱས་གོང་འབྲི་རུ་རྫོང་དུ་ཚོང་ལས་དང་ལྷན་དུ། ས་གནས་ཀྱི་ཁོར་ཡུག་སྲུང་སྐྱོབ་དང་འབྲེལ་བའི་ལས་དོན་རིམ་པ་སྤེལ་བར། ས་གནས་སྲིད་གཞུང་གིས། དོན་རྒྱལ་ལགས་སུ་ཁོར་ཡུག་སྲུང་སྐྱོབ་ཀྱི་གཟེངས་རྟགས་ཀྱང་ཕུལ་མྱོང་ཡོད་འདུག
གསར་འགོད་པ། སྐལ་བཟང་སྦྱིན་པ།
