༧གོང་ས་རྒྱལ་བ་རིན་པོ་ཆེ་མཆོག་གིས་རྒྱ་གར་རྒྱལ་ཡོངས་དང་བླངས་སྤྱི་ཚོགས་ཞབས་ཞུ་ཚོགས་པའི་མགོ་ཁྲིད་མི་སྣ་གསུམ་ལ་དམིགས་བསལ་མཇལ་ཁ་དང་བཀའ་སློབ་བསྩལ་ཡོད་འདུག
དེ་རིང་སྔ་དྲོར་༧གོང་ས་རྒྱལ་བ་རིན་པོ་ཆེ་མཆོག་གིས་རྒྱ་གར་རྒྱལ་ཡོངས་དང་བླངས་སྤྱི་ཚོགས་ཞབས་ཞུ་ཚོགས་པའི་(RSS)ཚོགས་གཙོ་མོ་ཧན་བྷག་ཝ་ཊི་(Mohan Bhagwat) མཆོག་དང་མགོ་འཁྲིད་རྒན་གྲས་ཨིན་དྷི་རེ་ཤི་ཀོ་མར་(Indresh Kumar)མཆོག དེ་བཞིན་ཚོགས་པའི་བྱང་ཕྱོགས་སྤྱི་ཁྱབ་པ་བཅས་ལ་དམིགས་བསལ་གཟིམ་ཆུང་མཇལ་ཁ་དང་བཀའ་སློབ་བཅས་བསྩལ་གནང་འདུག
གསར་འགོད་པས་སྐུ་ཞབས་ཨིན་དྷི་རེ་ཤི་ཀོ་མར་མཆོག་ལ་མཇལ་ཁའི་བཀའ་སློབ་ཅི་སྩལ་སྐོར་བཀའ་འདྲི་ཞུས་སྐབས་ཁོང་གིས། ༧གོང་ས་མཆོག་གིས་རྒྱ་གར་ནི་འཛམ་གླིང་ཡོངས་ཀྱི་ཆོས་ལུགས་མཐུན་སྒྲིལ་གྱི་མིག་དཔེ་ལྟ་བུ་ཞིག་ཆགས་ཡོད་པ་ལྟར། རྒྱ་གར་གཞུང་མང་གཉིས་ཀྱིས། རང་ཉིད་ཀྱི་དམིགས་བསལ་ཁྱད་ཆོས་དེ་ཉིད་གོང་འཕེལ་གཏོང་རྒྱུ་གལ་ཆེན་པོ་ཡིན་པའི་བཀའ་སློབ་སྩལ་ཡོད་སྐོར་གསུངས་བྱུང་བ་དང་། མཇའ་ཁའི་སྐབས་སུ་སྐུ་ཞབས་ཨིན་དྷི་རེ་ཤི་ཀོ་མར་མཆོག་གིས་ཀྱང་༧གོང་ས་མཆོག་ལ། རྒྱ་གར་གྱིས་མུ་མཐུད་བོད་མི་རྣམས་ལ་རྒྱབ་སྐྱོར་བྱ་རྒྱུ་ཡིན་པ་སྙན་གསེང་ཞུས་ཡོད་འདུག
ཡང་གཟུང་ཆུང་མཇལ་ཁ་དེ་དང་འབྲེལ་བའི་སྐོར་ལ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་གསུང་དོན། ད་རེས་རྒྱ་གར་དཔོན་རིགས་ཀྱི་མཇལ་ཁ་དེ་རྒྱ་གར་ནང་གི་ཚོགས་པ་ཆེ་ཤོས་གྲས་ཏེ། རྒྱ་གར་རྒྱལ་ཡོངས་དང་བླངས་སྤྱི་ཚོགས་ཞབས་ཞུ་ཚོགས་པའི་མགོ་འཁྲིད་རྣམས་ལ་རེད། ཁོང་རང་ཚོའི་ཕྱག་ལས་མང་ཆེ་བ་དེ་རྒྱ་གར་ནང་ལོགས་དང་རྒྱ་གར་མི་མང་གི་བདེ་སྡུག་དང་འབྲེལ་བ་ཡིན་པར་སོང་། ད་རེས་༧རྒྱལ་བ་རིན་པོ་ཆེའི་མཇའ་ཁའི་སྐབས་སྲིད་སྐྱོང་བཅར་མི་དགོས་པ་བཟོས་པ་རེད། ལྷག་པར་དུ་༧སྐུ་མདུན་ནས་གནད་ཡོད་མི་སྣ་ཁ་ཤས་ལ་མཇལ་ཁ་གནང་གི་ཡོད་པ་རེད། མ་གཏོགས་ཚང་མར་མཇལ་ཁ་གནང་རྒྱུ་ཁག་པོ་རེད། གང་ཡིན་ཟེར་ན། ད་ལྟ་ནད་ཡམས་འཇགས་མེད་པ་རེད། དེར་བརྟེན། ད་རེས་དམིགས་བསལ་བྱས་ནས་ཁོང་རྣམ་པ་གསུམ་ལ་མཇལ་ཁ་གནང་བ་རེད། ནམ་རྒྱུན་མི་གཉིས་རེར་མ་གཏོགས་མཇལ་ཁ་གནང་གི་མེད། ཅེས་གསུངས་བྱུང་།
གཞན་ཡང་། ད་རེས་དམིགས་བསལ་མཇལ་ཁའི་སྐབས་དང་བསྟུན། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གི་དབུས་བཀའ་བློན་རྣམ་པ་བཅས་ནས་རྒྱ་གར་རྒྱལ་ཡོངས་དང་བླངས་སྤྱི་ཚོགས་ཞབས་ཞུ་ཚོགས་པའི་མགོ་ཁྲིད་དེ་དག་ལ་ཐུག་འཕྲད་ཀྱིས་བཀའ་མོལ་གནང་ཡོད་འདུག
གསར་འགོད་པ། སྐལ་བཟང་སྦྱིན་པ།
