༧གོང་ས་མཆོག་གི་འཕགས་བོད་ས་མཚམས་ཀྱི་སྐུ་སྲུང་ནཱ་རིན་ཅན་ཌིར་ཌཱ་སི་ལགས་འདས་གྲོངས་སུ་ཕྱིན།

དེ་རིང་ཞོགས་པ་༧གོང་ས་རྒྱལ་བ་རིན་པོ་ཆེ་མཆོག་ཕྱི་ལོ་ ༡༩༥༩ ལོར་རྒྱ་གར་ནང་ཐོག་མར་བཙན་བྱོལ་དུ་ཕེབས་སྐབས། བོད་དང་རྒྱ་གར་གྱི་ས་མཚམས་ནས་སྐུ་སྲུང་ཕེབས་བསུ་ཞུ་མཁན་ཨ་སམ་གྱི་དམག་མི་ནཱ་རིན་ཅན་ཌིར་ཌཱ་སི་(Naren Chandra Das)ལགས་དགུང་གྲངས་ ༨༢ འདས་གྲོངས་སུ་ཕྱིན་ཡོད་འདུག

The Dalai Lama who has lived in exile ever since fleeing Tibet in 1959, was visibly emotional as he embraced Naren Chandra Das Photograph: Biju Boro/AFP/Getty Images

ཕྱི་ལོ་ ༢༠༡༧ ཟླ་ ༤ ཚེས་ ༢ ཉིན་༧གོང་ས་རྒྱལ་བ་རིན་པོ་ཆེ་མཆོག་གིས་རྒྱ་གར་བྱང་ཤར་ཁུལ་དུ་མཛད་འཕྲིན་སྐྱོང་བཞིན་པ་དང་བསྟུན། ཉིན་དེར་༧གོང་ས་མཆོག་གིས་ཨ་སམ་གྱི་དམག་མི་ནཱ་རིན་ཅན་ཌིར་ཌཱ་སི་(Naren Chandra Das)ལགས་ལ་ཐུགས་དགྱེས་ཚོར་ཆེན་པོས་མཇལ་ཁ་དང་སྦྲགས། ལོ་ངོ་ ༥༨ ཀྱི་ཡར་སྔོན་དུ་ངོས་ལ་ཉེན་སྲུང་དང་བསུ་མ་གནང་མཁན་ཨ་སམ་གྱི་ཉེན་སྲུང་དམག་མི་འདི་འདྲ་རྒན་པ་ཞིག་ལ་མཇལ་རྒྱུ་བྱུང་བར་ཧ་ཅང་དགའ་བོ་བྱུང་། ཞེས་གསུངས་ཡོད་འདུག

ཡང་སྐབས་དེར་སྐུ་སྲུང་དམག་མི་ཁོང་གིས་གསར་འགོད་པར། ལོ་ངོ་ཧ་ཅང་མང་པོའི་རྗེས་སུ་༧གོང་ས་མཆོག་ལ་མཇལ་ཁ་ཞུ་རྒྱུ་བྱུང་བར་ཧ་ཅང་དགའ་བོ་བྱུང་སྐོར་བརྗོད་པ་དང་འབྲེལ། ཕྱི་ལོ་ ༡༩༥༩ ལོར་ཁོང་ཨ་རུ་ནཱ་ཅལ་གྱི་གྲོང་སྡེ་ལུམ་ལཱ་(Lumla )རུ་བཞུགས་ཡོད་པ་དང་། ཉིན་ཞིག་གི་མཚན་མོའི་ཆུ་ཚོད་ ༣ པ་ཡས་མས་སུ། དམག་དཔོན་གྱིས་གློ་བུར་དུ་ཁོང་ཚོ་གཉིད་ལས་བསླངས་ཏེ། མགྱོགས་པོར་ཞོགས་ཟས་ཟ་དགོས་པ་དང་། ཉིན་གུང་གི་ཟ་མ་ཐུམ་བུར་རྒྱག་དགོས་པའི་བཀའ་བརྡ་བསྒྲགས་ཡོད་པ་དང་། དེ་ནས་དམག་སྡེའི་བཀོད་འདོམས་པ་ནག་ཌེ་བྷ་སིན་གུ་རུང་(Naik Debu Singh Gurung)ལགས་ཀྱིས་སྣེ་འཁྲིད་དེ། ཁོང་ཚོ་ཉེན་སྲུང་དམག་མི་དྲུག་གིས་མེ་མདའ་འཁུར་ཏེ་ཤཱག་ཊི་( Shakti )རུ་ལམ་ལ་ཆས་ཤིང་། ལམ་བར་དུ་འགྲོ་ལམ་དང་འཕྲུལ་འཁོར་རིགས་མེད་ལ། ཐ་ན་སྒྲ་སྡུད་ཀྱི་བརྡ་རྟགས་ཀྱང་མེད་པ་དང་། ཤཱག་ཊི་རུ་རྐང་པ་བརྒྱབ་སྟེ་ཕྱིན་ན་ཉིན་གཉིས་འགོར་གྱི་ཡོད་ཀྱང་ཁོང་ཚོ་ཉིན་གཅིག་གི་ནང་ཤཱག་ཊི་རུ་བདེ་འབྱོར་བྱུང་ཞིང་། ཕྱི་ལོ་ ༡༩༥༩ ཟླ་ ༣ ཚེས་ ༣༡ ཉིན་གྱི་ཐོ་རངས་ཆུ་ཚོད་ ༦ པ་ཡས་མས་སུ། ༧གོང་ས་མཆོག་དང་ཁོང་གི་སྐུ་སྲུང་བ་ ༢༠ ལ་སྲུང་བྱ་ཕེབས་བསུ་ཞུས་ཏེ་ཕྱིར་ལོག་ཡོད་པ་དང་། ཉིན་དེའི་ཕྱི་དྲོའི་ཆུ་ཚོད་ ༤ པ་ཙམ་ལ་ལུམ་ལཱ་རུ་བདེ་འབྱོར་བྱུང་། སྐབས་དེར་ཁོང་ཚོ་ལོ་ན་གཞོན་པས་ལམ་བར་ཧྲིལ་པོར་རྒྱུགས་འདུར་གྱིས་༧གོང་ས་མཆོག་གི་ཆིབས་རྟའི་རྗེས་ཆོད་ཐུབ་པ་ཞུས་ཡོད་སྐོར་སོགས་བརྗོད་འདུག

དེ་བཞིན། ཕྱི་ལོ་ ༢༠༡༨ ལོར་ཐེག་ཆེན་གཙུག་ལག་ཁང་དུ་བོད་མིའི་སྒྲིག་འཛུགས་ཀྱིས་གོ་སྒྲིག་འོག རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུའི་མཛད་སྒོའི་སྟེང་འདས་པོ་དམ་པ་ནཱ་རིན་ཅན་ཌིར་ཌཱ་སི་ལགས་སྐུ་མགྲོན་དུ་བསུས་ཏེ། སྐབས་དེར་༧གོང་ས་མཆོག་གིས་ཁོང་ལ་མཇལ་ཁ་དང་ཐུགས་རྗེ་ཆེ་ཞུའི་གཟེངས་རྟགས་ཤིག་ཀྱང་གནང་ཡོད་པ་རེད།

ཕྱི་ལོ་ ༢༠༡༧ ལོར་དམག་ཟུར་དམ་པ་ནཱ་རིན་ཅན་ཌིར་ཌཱ་སི་ལགས་༧གོང་ས་མཆོག་དང་མཇལ་འཕྲད་བྱུང་སྐབས། རྒྱ་གར་གྱི་གཙོ་བྱས་པའི་རྒྱལ་སྤྱིའི་གསར་འགྱུར་བརྒྱུད་ལམ་ཁག་མང་པོས་༧གོང་ས་མཆོག་དང་ཁོང་གཉིས་ཀྱི་འབྲེལ་ལམ་དང་མྱོང་ཚོར་སོགས་ཀྱི་སྐོར་ལ་བཅར་འདྲི་བྱས་མྱོང་ཡོད་པ་ལས། ད་ལྟ་དམིགས་བསལ་འདས་པོ་ཁོང་གི་མི་སྒེར་གྱི་ལོ་རྒྱུས་སོགས་བརྒྱུད་ལམ་ཁག་དང་དམིགས་ཨ་སམ་གྱི་བརྒྱུད་ལམ་ཁག་ཏུ་གསལ་གྱི་མི་འདུག

གསར་འགོད་པ། སྐལ་བཟང་སྦྱིན་པ།