བོད་ལྷོ་ཁ་གྲོང་ཁྱེར་ལས་རིགས་ལག་རྩལ་སློབ་གྲྭའི་འགན་འཛིན་བོད་རིགས་ལས་བྱེད་བཀྲ་ཤིས་ཞེས་པ་ཞིག་ལ་རྒྱ་ནག་གི་གཏན་འབེབ་དོན་ཚན་བརྒྱད་ཟེར་བ་དང་འགལ་ཡོད་པའི་ཉེས་མིང་འོག་ལས་གནས་ནས་གནས་དབྱུང་བཏང་སྟེ་ཞིབ་བཤེར་བྱ་རྒྱུ་ཐག་གཅོད་བྱས་ཡོད་འདུག
ཞི་ཅིན་ཕིན་གྱིས་སྲིད་དབང་བཟུང་བ་ནས་སྟག་དང་སྦྲང་མ་མཉམ་རྡུང་གི་སྲིད་ཇུས་འོག དཔོན་རིགས་དང་ལས་བྱེད་སྟོང་ཕྲག་མང་པོ་འཛིན་བཟུང་བཙོན་འཇུག་དང་ཉེས་ཆད་བཅད་དང་གཅོད་ཀྱི་ཡོད་པ་དང་། ཉེ་བའི་ལོ་ཤས་ནང་བོད་ཁུལ་གྱི་བོད་རིགས་ལས་བྱེད་མང་པོ་ཞིག་ཀྱང་དབུས་གཞུང་གི་གཏན་འབེབས་དོན་ཚན་བརྒྱད་དང་འགལ་བའི་ཉེས་མིང་འོག ལས་གནས་ནས་གནས་དབྱུང་དང་དམར་ཤོག་ཚོགས་པའི་སྐྱིད་སྡུག་ཟེར་བ་ནས་ཕྱིར་འབུད་གཏོང་གི་ཡོད་པ་ལྟར། ཁ་སང་རྒྱ་ནག་གཞུང་ཕྱོགས་ཀྱི་གནས་ཚུལ་ལྟར་ན། ལྷོ་ཁ་གྲོང་ཁྱེར་གྱི་ལས་རིགས་ལག་རྩལ་སློབ་གྲྭའི་གཙོ་འཛིན་བཀྲ་ཤིས་ཞེས་པའི་བོད་རིགས་ལས་བྱེད་ཅིག་གིས། ལས་རིགས་སློབ་གྲྭ་དེའི་སློབ་མ་རྣམས་ཀྱི་གཟུགས་པོ་བརྟག་དཔྱད་ཀྱི་དངུལ་དང་ཡིག་རྒྱུགས་ལས་དོན་གྱི་དངུལ་སོགས་ལྐོག་ཟ་བྱས་ཡོད་པའི་དོགས་གཞིའི་འོག ཁོ་ལས་གནས་ནས་གནས་དབྱུང་བཏང་བ་དང་དམར་ཤོག་ཚོགས་པའི་སྐྱིད་སྡུག་ནས་ཕྱིར་འབུད་བཏང་བ་དང་། སྒེར་གྱི་འབྲེལ་ཡོད་རྒྱུ་ནོར་བཅས་ཞིབ་དཔྱོད་ལས་ཁུངས་ལ་ཞིབ་བཤེར་ཆེད་རྩིས་སྤྲོད་བྱ་རྒྱུ་ཐག་གཅོད་བྱས་ཡོད་སྐོར་བསྒྲགས་འདུག
གནས་ཚུལ་དེའི་ནང་། ལྷོ་ཁ་གྲོང་ཁྱེར་གྱི་ལས་རིགས་སློབ་གྲྭའི་གཙོ་འཛིན་བཀྲ་ཤིས་ཐོག་མའི་བསམ་འདུན་ལས་འགལ་བ་དང་། ཕུགས་བསམ་དང་དད་སེམས་ཉམས་ཤིང་། རང་འདོད་ཆེ་རུ་སོང་སྟེ། དྲང་གཞག་ངང་གཞུང་དོན་བསྒྲུབ་པར་ཤུགས་རྐྱེན་ཐེབས་སྲིད་པའི་གསོལ་སྟོན་དང་ལག་རྟགས་དང་ལེན་བྱས་པ། མ་རབས་ཐ་ཤལ་གྱི་དགའ་ཕྱོགས་གཉེར་ཡོད་ཚུལ་དང་། རྒྱན་འགྱེད་རྣམ་པའི་རོལ་རྩེད་བྱེད་སྒོར་ཞུགས་པ་དང་། གཞན་གྱིས་མ་ཚོར་བའམ་མགོ་སྐོར་བཏང་ནས་ཐམ་ག་རྒྱག་པའི་ཐབས་ལམ་བརྒྱུད་མཐར་ཕྱིན་འཛིན་ཡིག་རྫུན་བཟོ་བྱས་པ། ལས་གནས་ཀྱི་སྟབས་བདེ་སྤྱད་དེ་སློབ་མའི་གཟུགས་པོ་བརྟག་དཔྱད་ཀྱི་གྲོན་དངུལ་དང་ཡིག་རྒྱུགས་ལས་དོན་གྱི་གྲོན་དངུལ་སོགས་འབྲེལ་ཡོད་གྲོན་དངུལ་ལྐོག་ཟ་བྱས་ཏེ་བྱ་ངན་སྤྱོད་ངན་སྤེལ་ཡོད་ལུགས་སོགས་ཀྱིས་ཉེས་མིང་གཡོགས་འདུག
ཕྱི་ལོ་ ༢༠༡༤ ཟླ ༡ ཚེས་ ༢༤ ཉིན་རྒྱ་ནག་དམར་ཤོག་ཚོགས་པའི་སྲིད་འཛིན་ཞི་ཅིན་ཕིང་གི་གཙོ་སྐྱོང་འོག དབུས་ཆབ་སྲིད་ལྷན་ཁང་གིས་གྲོས་ཚོགས་ཚོགས་ཏེ་རྒྱལ་ཁབ་བདེ་འཇཊ་ཨུ་ཡོན་ལྷན་ཁང་ཟེར་བ་ཞིག་གསར་འཛུགས་ཀྱིས། མུ་མཐུད་རྒྱ་ནག་ནང་ལོག་དང་བོད་སོགས་གྲངས་ཉུང་མི་རིགས་ས་ཁུལ་དུ་ལྐོག་ས་རུལ་སུངས་དང་གཞུང་དངུལ་ལོག་སྤྱོད་སོགས་ཀྱི་ཉེས་མིང་འོག་དཔོན་རིགས་དང་ལས་བྱེད་མང་པོར་ཞིབ་བཤེར་ཁྲིམས་ཆད་གཅོད་བཞིན་ཡོད་པ་རེད། སྤྱི་ཡོངས་ནས་མང་ཚོགས་ཁྲོད་འཐབ་རྩོད་དེ་ལ་དགའ་མོས་བྱེད་མཁན་མང་པོ་ཡོང་གི་ཡོད་ཀྱང་། གནད་དོན་དབྱེ་ཞིབ་པ་ཚོས་དེ་ནི་ཞི་ཅིན་ཕིང་གི་ཕུལ་དུ་བྱུང་བའི་དབང་ཆ་བརྟན་སྲུང་གི་ཐབས་ཇུས་རྩེ་གཉིས་མ་ཞིག་ཡིན་པའི་ངོས་འཛིན་བྱེད་བཞིན་ཡོད་པ་མ་ཟད། བོད་དང་ཡུ་གུར་སོགས་གྲངས་ཉུང་མི་རིགས་ས་ཁུལ་དུ་འཐབ་རྩོད་དེ་ནི་རྒྱལ་ཁབ་ལ་བློ་མི་དཀར་བ་དང་ཏང་ལ་དྲིན་ལན་ལོག་འཇལ་ཟེར་བ་དང་། སྤྱི་ཚོགས་ལྷིང་འཇགས་ལ་གནོད་སྐྱོན་བཟོས་པ་སོགས་ཀྱི་ཉེས་མིང་འོག་ཆབ་སྲིད་ཀྱི་ཚོར་བ་སྐྱེན་པའི་གནད་དོན་ཁག་ཐག་གཅོད་བྱེད་པའི་ཐབས་ལམ་ལྟ་བུ་ཞིག་ཏུ་གྱུར་ཡོད་པའི་ངོས་འཛིན་ཡོང་གི་ཡོད་པ་རེད།
གསར་འགོད་པ། དཔལ་ལྡན།
