ཨ་རིའི་སིལ་སྤོལ་རྩེད་མཁན་གྲགས་ཅན་ཨེ་ནི་སི་ཁན་ཊར་ལགས་སུ་འདི་ལོའི་ཕྱི་ཟླ་ ༤ བའི་ནང་ཇི་ནེ་ཝའི་འགྲོ་བ་མིའི་ཐོབ་ཐང་དང་དམངས་གཙོའི་ལྷན་ཚོགས་སྐབས་བཅུ་བཞི་བའི་སྟེང་འགྲོ་བ་མིའི་ཐོབ་ཐང་གི་སྙིང་སྟོབས་གཟེངས་རྟགས་ཕུལ་གཏན་འཁེལ་ཡོད་འདུག
ཟླ་འདིའི་ཕྱི་ཚེས་ ༢༢ ཉིན་རྒྱལ་སྤྱིའི་འགྲོ་བ་མིའི་ཐོབ་ཐང་གི་མཉམ་འདུས་ཚོགས་སྡེ་ཁག་ ༢༥ ཡིས། ཨ་རིའི་སིལ་སྤོལ་རྩེད་མཁན་གྲགས་ཅན་ཨེ་ནེ་ཁན་ཊར་ལགས་སུ། ཇི་ནི་ཝའི་འགྲོ་བ་མིའི་ཐོབ་ཐང་དང་དམངས་གཙོའི་ལྷན་ཚོགས་ཀྱི་ཕྱི་ལོ་ ༢༠༢༢ ལོའི་འགྲོ་བ་མིའི་ཐོབ་ཐང་གི་སྙིང་སྟོབས་གཟེངས་རྟགས་ཐོབ་པ་ཡོངས་བསྒྲགས་བྱས་འདུག
འགྲོ་བ་མིའི་ཐོབ་ཐང་གི་མཉམ་འདུས་ཚོགས་སྡེ་ཁག་དེ་དག་གིས། སིལ་སྤོལ་རྩེད་མཁན་གྲགས་ཅན་ཨེ་ནི་ཁན་ཊར་ལགས་ཀྱིས་རང་ཉིད་ཀྱི་མི་ཚེའི་ཕུགས་འདུན་ལ་ཉེན་ཁ་ཡོད་པར་འཛེམས་བཟོད་མ་བྱས་པར་རྒྱ་ནག་གཞུང་གིས་ཡུ་གུར་གྲངས་ཉུང་མི་རིགས་རྩ་གཏོར་བྱེད་བཞིན་པའི་ཐད་སྐད་ཆ་བཤད་ཡོད་པར་ངོས་འཛིན་གྱིས། སྙིང་སྟོབས་གཟེངས་དེ་ཕུལ་བ་ཞིག་ཡིན་པ་དང་། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྟ་ཞིབ་ཁང་གི་སྤྱི་ཁྱབ་འགན་འཛིན་ (Hillel Neuer) ལགས་ཀྱིས། ཨེ་ནི་སི་ཁན་ཊར་ལགས་སུ་སྙིང་སྟོབས་གཟེངས་རྟགས་འབུལ་དོན་ནི། ཁོང་གིས་སྙིང་སྟོབས་ཆེན་པོས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནས་སྟངས་ཕྱི་བསྒྲགས་གནང་བ་ལ་བརྟེན་ནས་བྱུང་བ་ཡིན། ཞེས་བརྗོད་ཡོད་པ་རེད།
འདི་ལོའི་ཕྱི་ཟླ་ ༤ བའི་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དང་དམངས་གཙོའི་ལྷན་ཚོགས་འཚོག་གི་ཡོད་པ་ལྟར། ཟླ་དེའི་ཕྱི་ཚེས་ ༦ ཉིན་འཚོགས་གཏན་འཁེལ་བའི་ཇི་ནེ་ཝའི་འགྲོ་བ་མིའི་ཐོབ་ཐང་དང་དམངས་གཙོའི་ལྷན་ཚོགས་ཐེངས་ ༡༤ སྟེང་། སྐུ་ཞབས་ཨེ་ནི་སི་ཁན་ཊར་ལགས་སུ་ཕྱི་ལོ་ ༢༠༢༢ ལོའི་སྙིང་སྟོབས་གཟེངས་དེ་ཉིད་ཕུལ་འཆར་ཡོད་པ་རེད་ལ། སྙིང་སྟོབས་གཟེངས་རྟགས་ཐོབ་པའི་གནས་ཚུལ་དང་འབྲེལ་ནས་ཨི་ནེ་སི་ཁན་ཊར་ལགས་ཀྱིས། ངས་ཇི་ནེ་ཝའི་འགྲོ་བ་མིའི་ཐོབ་ཐང་གི་ལྷན་ཚོགས་ཀྱིས་ང་ལ་རྒྱབ་སྐྱོར་དང་རྒྱ་ནག་གི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནས་སྟངས་རྒྱལ་སྤྱིའི་སྟེང་ཡོངས་གྲགས་བཟོས་པར་ཐུགས་རྗེ་ཆེ་ཞུ་རྒྱུ་ཡིན། ཞེས་བརྗོད་ཡོད་པ་རེད།
ཇི་ནེ་ཝའི་འགྲོ་བ་མིའི་ཐོབ་ཐང་དང་དམངས་གཙོའི་ལྷན་ཚོགས་ཀྱིས། ལོ་ལྟར་བུད་མེད་ཀྱི་ཐོབ་ཐང་རྩོད་ལེན་དང་འབྲེལ་བའི་བུད་མེད་ཀྱི་གཟེངས་རྟགས་དང་འགྲོ་བ་མིའི་ཐོབ་ཐང་དང་སྒེར་གཅོད་རིང་ལུགས་ཀྱི་དྲག་གནོན་སོགས་ལ་ཁ་གཏད་གཅོག་མཁན་གསར་འགོད་པ་དང་མང་གཙོ་དོན་གཉེར་བ། རྩོམ་པ་པོ་དང་ལས་འགུལ་བ་སོགས་ལ་སྙིང་སྟོབས་གཟེངས་བཅས་ཕུལ་སྲོལ་ཡོད་པ་ལྟར། ཕྱི་ལོ་ ༢༠༡༩ ལོར་འཇིགས་བྲལ་གློག་བརྙན་ཕབ་སྐྲུན་པ་དང་བོད་ཀྱི་ཆབ་སྲིད་བཙོན་ཟུར་དོན་འགྲུབ་དབང་ཆེན་ལགས་སུ། སྙིང་སྟོབས་གཟེངས་རྟགས་དེ་ཕུལ་མྱོང་བ་རེད།
འདས་ལོའི་ཕྱི་ཟླ་ ༡༠ ནང་རྒྱལ་སྤྱིའི་སིལ་སྤོལ་རྩེད་འགྲན་པ་གྲགས་ཅན་ཨེ་ནེ་སི་ཀན་ཊར་ (Enes Kanter) ལགས་ཀྱིས་སྒེར་གྱི་སྤྱི་ཚོགས་དྲ་ལམ་སོགས་སུ་རྒྱ་ནག་གཞུང་གིས་བོད་ནང་གི་འགྲོ་བ་མིའི་ཐོབ་ཐང་ལ་རྡོག་རོལ་བཏང་སྟེ། བོད་མི་རྣམས་ལ་འགྲོ་འདུག་གི་རང་དབང་དང་། བོད་ཀྱི་སྐད་ཡིག་སོགས་ལ་སློབ་སྦྱོང་བྱེད་པའི་ཐོབ་ཐང་མེད་པར་དྲག་གནོན་དང་མནར་གཅོད་གཏོང་མུས་ཡིན་པར་བརྟེན། བོད་མི་ ༡༥༠ ལྷག་གིས་སྐུ་ལུས་མེར་སྲེག་གནང་ཡོད་སྐོར་དང་། ཁོང་གིས་བོད་མི་ཚོའི་རང་དབང་གི་རེ་འབོད་ལ་རྒྱབ་སྐྱོར་གནང་གི་ཡོད་ཅེས་བརྙན་ཐུང་གི་ལམ་ནས་བསྒྲགས་གཏམ་ཞིག་སྤེལ་ཡོད་པ་དང་འབྲེལ། ཁོང་གིས། རང་ཉིད་ཆུང་དུས་ནས་༧ གོང་ས་སྐྱབས་མགོན་ཆེན་པོ་མཆོག་ལ་དད་གུས་དང་ཡིད་སྨོན་འཆོར་མཁན་ཞིག་ཡིན་པ་དང་། འཛམ་གླིང་གི་མགོ་ཁྲིད་ཚོས་ ༧གོང་ས་སྐྱབས་མགོན་ཆེན་པོ་མཆོག་གི་བཀའ་སློབ་ལ་མཉན་ཚེ། ང་ཚོའི་དུས་སྐབས་འདིར་འཛམ་གླིང་དུ་ཁྱོད་ཤི་ང་གསོན་གྱི་དམག་འཁྲུག་མི་འབྱུང་། ཞེས་བརྗོད་ཡོད་པ་མ་ཟད། མ་འོངས་པར་བཞུགས་སྒར་དྷ་རམ་ས་ལར་༧གོང་ས་རྒྱལ་བ་རིན་པོ་ཆེར་ཆེད་བཅར་ཞུ་འདོད་ཡོད་སྐོར་སོགས་བརྗོད་ཡོད་པ་རེད་འདུག
ད་ལྟ་རང་ལོ་ ༢༩ ཡིན་པའི་སིལ་སྤོལ་རྩེད་མོ་བ་གྲགས་ཅན་ཨེ་ནེ་སི་ཀན་ཊར་སུད་སི་གྲོང་ཁྱེར་གྱི་ཛྷཱུ་རིག( Zurich ) ཏུ་སྐྱེས་པའི་ཊོར་ཀེའི་མི་རིགས་ཀྱི་རྒྱུད་པ་ཞིག་ཡིན་ཞིང་། ཁོང་ནི་ཨ་རིའི་རྒྱལ་སྤྱིའི་ཨེན་བྷི་ཨེ་ (NBA) ཡི་རྩེད་མོ་བ་གྲགས་ཅན་ཞིག་ཡིན་པ་འདུག་ལ། ཁོང་གི་ Instragram ནང་རྗེས་འབྲངས་བ་མི་གྲངས་ས་ཡ་ ༡།༥ ལྷག་དང་། ཊི་ཝེ་ཊར་ལ་རྗེས་འབྲངས་བ་མི་གྲངས་འབུམ ༦ ལྷག དེ་བཞིན་ངོ་དེབ་ལ་རྗེས་འབྲངས་བ་མི་གྲངས་འབུམ་ ༢ ལྷག་ཡོད་འདུག
གསར་འགོད་པ། སྐལ་བཟང་སྦྱིན་པ།
