བྲག་མགོ་ཆ་ནང་དགོན་གྱི་གུ་རུའི་སྐུ་བརྙན་ཆེན་པོ་ཞིག་གཏོར་བཤིག་བཏང་།

རྒྱ་ནག་གཞུང་གིས་འདས་ལོའི་ཕྱི་ཟླ་ ༡༡ པའི་ནང་བྲག་མགོ་རྫོང་ཁོངས་སུ་ཡོད་པའི་ཆ་ནང་དགོན་པའི་གུ་རུ་རིན་པོ་ཆེའི་སྐུ་བརྙན་ཆེན་པོ་ཞིག་རྩ་གཏོར་བཏང་ཡོད་འདུགགནས་ཚུལ་དེར་རྒྱུས་མངའ་ཡོད་པའི་འབྲེལ་ཡོད་མི་སྣ་ཞིག་གིས་འདི་གའི་གསར་འགོད་པར་བརྗོད་དོན། ཆ་ནང་དགོན་པའི་གུ་རུའི་སྐུ་བརྙན་ཆེན་པོ་དེ་རྩ་གཏོར་བཏང་བ་དངོས་བདེན་རེད། ཆ་ནང་དགོན་པ་ལ་ཁྲིམས་མཐུན་གྱི་ཡིག་ཆ་ཡོད་པར་བརྟེན་དགོན་པ་གཏོར་བཤིག་བཏང་མེད་ནའང་། འདས་ལོའི་ཕྱི་ཟླ་ ༡༠ པའི་ནང་བྲག་མགོ་དགོན་པའི་ཐུབ་པའི་སྐུ་བརྙན་གཏོར་བཤིག་བཏང་རྗེས། སླར་ཡང་ཟླ་ ༡༡ པའི་ནང་རྒྱ་ནག་གི་མགོ་འཁྲིད་ཚོས་ཆ་ནང་དགོན་པའི་དགེ་འདུན་པ་རྣམས་ལ་བཀའ་བཏང་སྟེ་གུ་རུ་རིན་པོ་ཆེའི་སྐུ་བརྙན་གཏོར་བཤིག་གཏོང་དུ་བཅུག་ཡོད་པ་རེད། གུ་རུའི་སྐུ་བརྙན་དེ་གསེར་དངུལ་གྱིས་གྲུབ་ཅིང་མཐོ་ཚད་ལ་ཧྥུ་ཊི་ ༤༦ ལྷག་ཡོད་པ་རེད། ཅེས་བརྗོད་བྱུང་།

ད་ལྟའི་ཆར་རྒྱ་ནག་གཞུང་གིས་བོད་ཕྱི་ནང་གཉིས་ཀྱི་འབྲེལ་ལམ་ལ་དམ་དྲག་དང་དོགས་ཟོན་ནན་པོ་བྱེད་བཞིན་པའི་རྐྱེན་གྱིས། རྒྱ་ནག་གཞུང་གིས་ག་རེ་ལ་ཁ་གཡར་ཏེ་ཆ་ནང་དགོན་པའི་གུ་རུའི་སྐུ་བརྙན་དེ་ཉིད་གཏོར་བཤིག་བཏང་ཡོད་དང་། ད་ལྟའི་ཆར་ཆ་ནང་དགོན་པའི་གནས་སྟངས་ག་འདྲ་ཡོད་སོགས་ཤེས་རྟོགས་ཐུབ་ཀྱི་མི་འདུག

དེ་བཞིན་འདི་ག་བོད་ཀྱི་དུས་བབ་གསར་ཁང་གིས་ཤེས་རྟོགས་བྱུང་བ་ལྟར་ན། འདས་ལོའི་ཕྱི་ཟླ་ ༡༠ པའི་ནང་རྒྱ་ནག་གཞུང་གིས་བྲག་མགོའི་མི་མང་སྟོང་ཕྲག་མང་པོས་རྒྱ་སྒོར་ཁྲི་ ༤༠༠༠ ལྷག་གི་འགྲོ་གྲོན་བཏང་སྟེ་གསར་བཞེངས་བྱས་པའི་མཐོ་ཚད་སྨིད་ ༩༩ ལྷག་ཅན་གྱི་སྟོན་པའི་སྐུ་བརྙན་གཏོར་བཤིག་བཏང་ཡོད་པ་ལྟར། འདི་ལོའི་ཕྱི་ཟླ ༡ ཚེས་མགོར་བྲག་མགོར་སྟོན་པའི་སྐུ་བརྙན་གཏོར་བཤིག་བཏང་པའི་པར་དང་བརྙན་སོགས་དྲིལ་བསྒྲགས་བྱས་པ་དང་། ཕྱི་ལོགས་སུ་ཡོད་པའི་བོད་མིར་གནས་ཚུལ་མཁོ་སྤྲོད་བྱས་པའི་ཉེས་མིང་འོག བྲག་མགོ་རྫོང་གི་ཉེན་རྟོག་པས་བྲག་མགོ་དགོན་པའི་གྲྭ་བསྟན་འཛིན་ཉི་མ་དང་བཀྲིས་རྡོ་རྗེ། ལྷ་མོ་དབྱངས་ཅན། ཚེ་རིང་བསམ་སྒྲུབ་གཙོས་མི་གྲངས་བཅུ་གྲངས་ཤིག་འཛིན་བཟུང་གིས། ཕལ་ཆེ་བ་བྲག་མགོ་རྫོང་ནས་བར་ཐག་སྤྱི་ལེ་ ༥ ཙམ་གྱི་སར་ཡོད་པའི་བྲོ་པ་གྲོང་ཚོའི་ཉེ་འགྲམ་ཐང་ནག་མ་ཞེས་པའི་ས་གནས་ཀྱི་སློབ་གསོ་སྒྱུར་བཀོད་ཁང་ཞིག་ཏུ་བཀག་ཉར་བྱས་ཡོད་འདུག འོན་ཀྱང་ཁོང་ཚོའི་གཟུགས་གཞིའི་གནས་སྟངས་དང་གང་དུ་ཡོད་མེད་སོགས་ད་ལྟའང་གསལ་ཁ་གང་ཡང་མེད་པ་རེད་འདུག

བྲག་མགོ་ཁུལ་གྱི་དགོན་སྡེའི་དཀར་ཆག་ནང་དུ་གསལ་བ་ལྟར་ན། ཆ་ནང་དགོན་པ་ནི་བྲག་མགོ་དགོན་པ་ནས་སྤྱི་ལེ་ ༢༤ མཚམས་ཀྱི་ཤ་ར་ཐང་ས་གནས་ཀྱི་རྙིང་མའི་དགོན་པ་ཞིག་ཡིན་ཞིང་། དགོན་པ་དེ་ཉིད་བོད་ཀྱི་རབ་བྱུང་བཅུ་གཅིག་པའི་མཇུག་དང་བཅུ་གཉིས་པའི་མགོ་ཡས་མས་སུ་མཆོག་སྤྲུལ་སྟག་བླ་པདྨ་དབང་ཕྱུག་རིན་པོ་ཆེ་མཆོག་གིས་ཆ་ནང་ཚང་གི་སྦྱིན་བདག་བྱས་ཏེ་ཕྱག་བཏབ་ཡིན་འདུག དེ་སྔ་ཆ་ནང་དགོན་པར་དགེ་འདུན་པ་ ༥༠༠ ལྷག་ཡོད་འདུག་ཀྱང་། ད་ལྟའི་ཆར་དགེ་འདུན་པ་ ༥༠ མ་གཏོགས་མེད་པ་རེད་འདུག

གསར་འགོད་པ། དཔལ་ལྡན། པ་སངས་ཚེ་རིང་།