བོད་ཀྱི་བུད་མེད་སྒེར་ལངས་ཉིན་མོ་བོད་ཕྱི་ནང་གཉིས་སུ་གནས་པའི་བུད་མེད་ཙམ་མ་ཡིན་པར་བོད་མི་ཡོད་དོ་ཅོག་གིས་བརྗེད་ཐབས་མེད་པའི་ལོ་རྒྱུས་རང་བཞིན་ལྡན་པའི་ཉིན་མོ་ཞིག་ཡིན་སྟབས། གནད་དོན་འདི་ལ་གཞུང་སྒེར་སུས་ཀྱང་སྣང་མེད་བྱེད་རུང་བ་ཞིག་གཏན་ནས་མིན་སྐོར་བསྒྲགས།
དེ་རིང་ཕྱི་ཟླ་ ༣ ཚེས་ ༡༢ ཉིན་གྱི་སྔ་དྲོའི་ཆུ་ཚོད་ ༩།༣༠ སྟེང་བོད་ཀྱི་བུད་མེད་ལྷནད་ཚོགས་ཀྱི་གོ་སྒྲིག་འོག་བཞུགས་སྒར་ཐེག་ཆེན་ཆོས་གླིང་གཙུག་ལག་གི་ཁང་གི་ཉེ་འཁྲིས་ནས་དྷ་ཤོད་ཀ་ཅ་རི་བར་གོམ་བགྲོད་ཀྱི་ལམ་ནས་བོད་ཀྱི་བུད་མེད་སྒེར་ལངས་ཐེངས་ ༦༣ པ་སྲུང་གཙི་ཞུས་གནང་སོང་བ་དང་། བུད་མེད་སྒེར་ལངས་ཐེངས་རེ་གསུམ་པའི་མཛད་སྒོའི་སྐུ་མགྲོན་གཙོ་བོར་དྷ་ས་གྲོང་སྡེ་ལས་ཁུངས་ཀྱི་སྤྱི་ཁྱབ་པ་མཆོག་གི་དབུས་པའི་ཕྱོགས་མཐའ་ཁག་ནས་ཕེབས་པའི་བོད་མི་དང་བོད་དོན་རྒྱབ་སྐྱོར་བ། དེ་བཞིན་བཞུགས་སྒར་ཁུལ་གྱི་སེར་སྐྱ་མི་མང་ ༢༠༠ ཡས་མས་བཅས་འཛོམས་གནང་འདུག
སྐབས་དེར་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་བསྟན་འཛིན་སྒྲོལ་མ་ལགས་ཀྱིས་བུད་མེད་ལྷན་ཚོགས་ཀྱི་བསྒྲགས་གཏམ་སྒྲོག་སྐབས། དེ་རིང་གི་ཉིན་མོ་ནི་༡༩༥༩ལོར་བོད་ས་ཡོངས་རྫོགས་རྒྱ་གཞུང་གིས་ཁྲིམས་འགལ་ཐོག་བཙན་འཛུལ་བྱས་རྗེས་བོད་རྒྱལ་ཁབ་ཆག་འཇིག་ལ་ཐུགས་སྐབས་གཞུང་མང་གཉིས་ནས་ཕོ་ཟད་མོ་ལ་ཐུག་པ་དང་། ལག་ཟད་དཔུང་ལ་ཐུག་ཀྱང་ཆོལ་གསུམ་བུད་མེད་རྣམས་ཀྱིས་ཕྱི་ལོ་༡༩༥༩ ཟླ་ ༣ ཚེས་༡༢ ཉིན ་སྙིང་སྟོབས་ཞུམ་མེད་ཀྱི་ཐོག་ནས་རྒྱལ་བསྟན་ཆབ་སྲིད་དོན་དུ་མ་གྲོས་བསམ་པ་གཅིག་མཐུན་གྱིས་བོད་ཀྱི་རྒྱལ་ས་ལྷ་སར་པོ་ཏཱ་ལའི་མདུན་ཐང་འབྲས་བུ་གཡུལ་ཀའི་ཐང་ཆེན་སྟེང་དུ་དཔའ་མོ་དམ་པ་ཀུན་བཟང་གཙོས་པའི་བུད་མེད་སྟོང་ཕྲག་ལྷག་ཙམ་འདུ་འཛོམས་ཀྱིས་རྒྱ་ནག་དམར་གཞུང་གིས་ཁྲིམས་འགལ་ཐོག་བོད་སར་དབང་བསྒྱུར་བྱས་པར་གཞི་རྒྱ་ཆེ་བའི་ཞི་རྒོལ་རྔམ་སྟོན་ཁྲོམ་སྐོར་བྱས་པ་དང་། སྐབས་དེ་དུས་ལས་འགུལ་ནང་བུད་མེད་བརྒྱ་ཕྲག་ལྷག་ཙམ་སྐུ་སྲོག་ཤོར་ཡོད་པ་དང་། འགོ་ཁྲིད་བུད་མེད་རྣམས་འཛིན་བཟུང་བཙོན་འཇུག་བྱས་པ། མཐར་ཕྱི་ལོ་༡༩༧༠ ལོར་དཔའ་མོ་ཀུང་བཟང་དང་། དཔའ་མོ་གསང་བསྔགས་ཆོས་སྒྲོན། དཔའ་མོ་རྟ་མཆོག་བུ་འཁྲིད། གཞན་དཔའ་མོ་བཞི་བཅས་ལྷ་ས་གྲུ་བཞིའི་བཙོན་ཁང་གི་བྱང་ངོས་བཙོན་ཁང་དུ་རྒྱ་དམར་གྱིས་མེ་མདའ་འཕངས་ནས་དམར་གསོད་བཏང་རྗེས་དབུགས་ཀྱི་རྒྱུ་བ་མ་ཆད་གོང་ནས་ས་དོང་ནང་དུ་གསོན་སྦས་བཏང་བའི་ཡིད་སྐྱོའི་བྱུང་རིམ་རྣམས་རྡོ་བཀོད་རི་མོ་བཞིན་ལོ་རྒྱུས་ཀྱི་ཐོག་འཁོད་ཡོད། ཕྱི་ལོ་༡༩༥༩ ཟླ་༣ ཚེས་༡༢ ཉིན་བུད་མེད་སྒེར་ལངས་བྱས་ཏེ་ད་བར་ལོ་ངོ་༦༣ ཧྲིལ་བོ་འཁོར་གྱི་ཡོད། སྒེར་ལངས་ཉིན་མོ་དེ་ནས་བཟུང་སྟེ་ལོ་ལྟར་བཙན་བྱོལ་དུ་དབུས་ས་གཉིས་ཀྱི་བོད་ཀྱི་བུད་མེད་ལྷན་ཚོགས་ཀྱི་འགན་འཁུར་ཐོག་དུས་དྲན་སྲུང་བརྩི་ཞུ་རྒྱུ་དེ་བོད་ཀྱི་ལོ་རྒྱུས་ནང་ཤིན་ཏུ་གལ་ཆེའི་ཉིན་མོ་ཞིག་ཡིན། དེ་ནི་བོད་ཕྱི་ནང་གཉིས་སུ་གནས་པའི་བུད་མེད་ཙམ་མ་ཡིན་པར་བོད་མི་ཡོད་དོ་ཅོག་གིས་བརྗེད་ཐབས་མེད་པའི་ལོ་རྒྱུས་རང་བཞིན་ལྡན་པའི་ཉིན་མོ་ཞིག་ཀྱང་ཆགས་ཀྱི་ཡོད། གནད་དོན་འདི་ལ་གཞུང་སྒེར་སུས་ཀྱང་སྣང་མེད་བྱེད་རུང་བ་ཞིག་གཏན་ནས་མིན། དེ་རིང་གི་གོ་སྐབས་འདི་བརྒྱུད་བོད་བསྟན་སྲིད་མི་རིགས་ཀྱི་ཆེད་དུ་གཅེས་པའི་ལུས་སྲོག་ཚུན་ཆད་བློས་གཏོང་གནང་མཁན་རྒྱལ་གཅེས་དཔའ་མོ་རྣམས་ཀྱི་དཔའ་མཛངས་སྙིང་སྟོབས་ཀྱི་མཛད་རྗེས་ལ་སྙིང་ནས་གུས་འདུད་ཐོག་ཡིད་རང་བསྔགས་བརྗོད་དང་བཀའ་དྲིན་རྗེས་དྲན་ཞུ་རྒྱུ་ཡིན། དུས་ད་ལྟའང་རྒྱ་དམར་གཞུང་གི་དམ་དྲག་གི་འོག་དཀའ་སྡུག་མྱོང་དང་མྱོང་བཞིན་པ་རྣམས་ལ་གདུང་སེམས་མཉམ་སྐྱེད་ཞུ་བཞིན་ཡོད། ཅེས་གསུངས་སོང་།
ཡང་བུད་མེད་ལྷན་ཚོགས་ཀྱི་བསྒྲགས་གཏམ་ནང་རྒྱ་ནག་དམར་གཞུང་གིས་བོད་དུ་བཙན་འཛུལ་བྱས་པ་ནས་བཟུང་ད་བར་བཙན་གནོན་ཐོག་བོད་མི་རིགས་རྩ་མེད་བཟོ་བའི་སྲིད་ཇུས་རབ་དང་རིམ་པ་ཞིག་ལག་ལེན་བྱས་དང་བྱེད་མུས་ཡིན་པ་དང་། བོད་ནང་འགྲོ་བ་མིའི་ཐོབ་ཐང་དང་། ཆོས་དད་རང་དབང་། སྐད་ཡིག་དང་རིག་གཞུང་གི་རང་དབང་། ཁོར་ཡུག་དང་བཅས་པའི་གནས་སྟངས་ཉིན་རེ་ནས་ཇེ་ཞན་ཇེ་སྡུག་ཏུ་འགྲོ་བཞིན་པ་དང་། བོད་མི་གྲངས་༡༥༢ ཙམ་གྱིས་རང་ལུས་མེར་བསྲེགས་བཏང་ནས་རྒྱ་ནག་དམར་གཞུང་གིས་བོད་ལ་འཛིན་པའི་སྲིད་ཇུས་ལ་ངོ་རྒོལ་གྱིས་བོད་མིའི་འཚེ་མེད་ཞི་བའི་ལས་འགུལ་གྱི་འཐབ་རྩོད་མུ་མཐུད་ནས་རྒྱུན་འཁྱོངས་བྱས་ཡོད། བོད་ནང་གི་བོད་མི་ལ་རྒྱ་ནག་དམར་གཞུང་གིས་བཙན་གནོན་དང་དམ་དྲག་ཆེ་བའི་འོག་ཉིན་མཚན་མི་འཁྱོལ་བའི་དཀའ་ངལ་གྱི་འོག་གནས་ཡོད། ལྷག་པར་དུ་བོད་མིའི་བལྟ་བའི་མིག་དང་ཁོག་པའི་སྙིང་ལྟ་བུ་༧སྤྱི་ནོར་༧ ང་ས་ྋསྐྱབས་མགོན་ཆེན་པོ་མཆོག་གི་སྐུ་པར་ཉར་ཚགས་བྱས་ཚེ་འཇུ་བཟུང་བྱེད་པ། ལྷག་པར་དུ་གཞུང་དང་ལྟ་སྤྱོད་མི་མཐུན་པའི་མི་སྣ་མང་པོ་ཞིག་དོན་མེད་འཇུ་བཟུང་བྱེད་པ། གར་སོང་ཆ་མེད་དུ་འགྱུར་བའི་གནས་ཚུལ་རྒྱུན་ཆད་མེད་པར་ཐོན་གྱི་ཡོད། དམིགས་གསལ་གྱི་བོད་མི་རིགས་རྩ་མེད་བཟོ་ཆེད་བོད་མིའི་ངོ་བོ་མཚོན་བྱེད་ཆོས་དང་རིགས་གཞུང་། སྐད་ཡིག་སོགས་རྩ་མེད་གཏོང་རྒྱུའི་སྲིད་བྱུས་རྒྱུན་ཆད་མེད་པར་ལག་ལེན་བྱེད་པ་དང་། བུད་མེད་བྲུ་མ་ཅན་ལ་སྐྱེད་སྒོ་བཀག་པ།བཙུན་དགོན་སྒོ་རྒྱག་པ་དང་བཙུན་མ་རྣམས་རང་དབང་མེད་པར་སྐྱ་ཕབས་བཅུག་པ། ཉེས་མེད་བཙོན་པ་རྣམས་ལ་ཚད་ལས་འདས་པའི་མནར་གཅོད་གཏོང་བ། བཙོན་ནས་གློད་གྲོལ་ཐོབ་ཀྱང་མུ་མཐུད་ནས་སོ་ལྟ་བྱེད་པ། ཞིང་འབྲོག་མང་ཚོགས་གྲོང་རྡལ་ཅན་ལ་བསྒྱུར་ནས་བོད་མིའི་སྲོལ་རྒྱུན་གྱི་འཚོ་བའི་ལམ་སྲོལ་དང་སྤྱི་ཚོགས་ཀྱི་ལམ་སྲོལ་རྩ་མེད་བཟོ་བ་སོགས་གནས་སྟངས་ཧ་ཅང་གི་ཛ་དྲག་ཆགས་ཡོད། རྒྱ་དཀར་ནག་གི་ས་མཚམས་རྩོད་རྙོགས། ཉེ་ཆར་ཕྱི་ལོ་༢༠༢༡ ལོར་ཁམས་བྲག་འགོར་ཐུབ་པའི་སྐུ་བརྙན་མཐོ་ཚད་ཕི་ཊི་དགུ་བཅུ་གོ་དགུ་ལྷག་ཅན་ཞིག་གཏོར་ཡོད་པ་མ་ཟད་ལོ་འདིའི་ཟླ་༢ པའི་ནང་སླར་ཡང་བྲག་མགོ་སྔ་འགྱུར་རྙིང་མའི་ཆ་ནང་དགོན་དུ་གུ་རུའི་སྐུ་བརྙན་སོགས་གཏོར་བཤིག་བཏང་ཡོད། ཕྱི་ལོ་༢༠༢༠ ལོར་འཛམ་གླིང་ཡོངས་ལ་ཏོག་དབྱིབས་རིམས་ནད་ཀྱིས་ཚབས་ཆེའི་གོད་ཆགས་ཕོགས་པ་དང༌། འདི་ལོ་ཨོ་རྩལ་འགྲན་ཚོགས་དེའང་རྒྱ་ནག་པེ་ཅིང་དུ་སྐོང་འཚོགས་བྱ་རྒྱུར་རྒྱབ་སྐྱོར་བྱེད་མཁན་གྱི་རྒྱལ་ཁབ་ཚོས་འགན་འཁུར་ཡོད་པའི་ཐོག་ནས་རྒྱ་ནག་གཞུང་ལ་དུས་དང་རྣམ་པ་ཀུན་དུ་གནོན་ཤུགས་སྤྲོད་དགོས་པའི་དུས་ལ་སླེབས་ཡོད།
བོད་ནང་གི་གནས་སྟངས་མུ་མཐུད་ནས་རྒྱལ་སྤྱིའི་ཐོག་ཁྱབ་བསྒྲགས་དང༌། རྒྱལ་སྤྱིའི་འགྲོ་བ་མིའི་ཐོབ་ཐང་དང་མཉམ་འབྲེལ་རྒྱལ་ཚོགས་ཀྱི་ལས་ཁུངས་ཁག་ལ་ཞུ་གཏུགས་ཀྱི་ལས་འགུལ་དབུས་ས་གཉིས་ནས་སྤེལ་མུས་ཡིན། བོད་ནང་གི་གནས་སྟངས་མུ་མཐུད་ནས་རྒྱལ་སྤྱིའི་ཐོག་ཁྱབ་བསྒྲགས་དང་། གནད་ཡོད་ལ། མི་སྣ་མཇལ་འཕྲད་ཀྱིས་བོད་ནང་གི་གནས་སྟངས་འགྲེལ་བརྗོད་བྱེད་པ། སྐབས་དུས་ཀྱི་གོ་རྟོགས་ལས་འགུལ་སྤེལ་བ། རེས་གཟའ་པ་སངས་འཆར་ཅན་བོད་ཀྱི་ཁོར་ཡུག་ཐོག་དྲིལ་བསྒྲགས་ལ་སོགས་པ་བྱེད་མུས་ཡིན། ཕྱི་ལོ་༢༠༡༧ ལོར་བཙན་བྱོལ་བོད་མི་སྒྲིག་འཛུགས་ཀྱི་བཀའ་ཤག་སྐབས་བཅོ་ལྔས་གསུམ་པའི་བཅུ་གཉིས་ཉིན་བོད་ཀྱི་བུད་མེད་ཉིན་མོ་ཞེས་རྩའཛིན་བཀོད་ཁྱབ་གནང་ཟིན་པ་དེར། འདི་ལོ་བོད་ཀྱི་བུད་མེད་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་ནས་བཙན་བྱོལ་བོད་མི་སྒྲིག་འཛུགས་ཀྱི་བཀའ་ཤག་སྐབས་བཅུ་དྲུག་ལ་འབོད་སྐུལ་ཞུས་པ་བཞིན་བཀའ་ཤག་སྐབས་བཅུ་དྲུག་ནས་དགོངས་པ་ཆེ་བཞེས་ཀྱི་ཕྱི་ལོ་༢༠༢༢ ཟླ་༢ ཚེས་༥ ཉིན་བོད་ཀྱི་བུད་མེད་ཉིན་མོ་རྩ་འཛིན་ཕྱིར་བསྡུ་གནང་བ་ལ་བོད་ཀྱི་བུད་མེད་ལྷན་ཚོགས་ཀྱི་དབུས་ས་གཉིས་ནས་བཀའ་དྲིན་བླ་མེད་དུ་ཆེ་ཞུ་རྒྱུ་ཡིན། ཕྱི་ལོ་༡༩༥༩ ཟླ་༣ ཚེས་༡༢ ཀྱི་བོད་ཀྱི་བུད་མེད་སྒེར་ལངས་ཀྱི་ཉི་མོ་འདི་ནི་ང་ཚོའི་མི་རབས་ནས་མི་རབས་བར་བོད་དོན་ཐབས་རྩོད་ཐད་མུ་མཐུད་དེ་རྒྱུན་སྐྱོང་བྱ་རྒྱུའི་དམ་བཅའ་ཞིག་ཀྱང་ཆགས་ཀྱི་ཡོད། ཅེས་འཁོད་འདུག
ཡང་བུད་མེད་སྒེར་ལངས་ཐེངས་ ༦༣ དུས་དྲན་སྲུང་གཙི་དང་འབྲེལ། བོད་ཀྱི་བུད་མེད་ལྷན་ཚོགས་ཀྱི་དབུས་ས་གཉིས་ཀྱིས་མཉམ་འབྲེལ་རྒྱལ་ཚོགས་དང་། འཛམ་གླིང་གི་མགོ་འཁྲིད་རྣམ་པ་དང་གྲོས་ཚོགས་འཐུས་མི། དེ་བཞིན་བོད་དོན་རྒྱབ་སྐྱོར་ཚོགས་པ་བཅས་ནས་བོད་དོན་ལ་མུ་མཐུད་རྒྱབ་སྐྱོར་གནང་སླད་དགོས་འདུན་དོན་ཚན་གསུམ་བཏོན་པ་དག་ནི། གཅིག་ྋགོང་ས་རྒྱལ་བ་རིན་པོ་ཆེ་མཆོག་གི་སྐུ་ཚབ་དང་ལྷན་དུ་གྲོལ་མོལ་ཡོང་བར་རྒྱ་ནག་ལ་གནོན་ཤུགས་སྤྲོད་གནང་ཡོང་བ་དང་། གཉིས་གར་སོང་ཆ་མེད་དུ་གྱུར་བའི་ྋཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་རིན་པོ་ཆེ་མཆོག་གཙོས་པའི་བོད་ཀྱི་ཆབ་སྲིད་བཙོན་པ་ཡོངས་ཆ་རྐྱེན་གང་ཡང་མེད་པའི་ཐོག་གློད་གྲོལ་དགོས་པས་རྒྱ་ནག་ལ་གནོན་ཤུགས་སྤྲོད་རྒྱུ། བོད་ནང་འགྲོ་བ་མིའི་ཐོབ་ཐང་གི་གནས་སྟངས་གོང་མཐོར་དགོས་པ་བཅས་རྒྱ་ནག་གཞུང་ལ་དངོས་ཤུགས་བརྒྱུད་གསུམ་གྱི་ཐོག་ནས་གནོན་ཤུགས་སྤྲོད་པའི་འབོད་སྐུལ་ཞུས་གནང་འདུག
གསར་འགོད་པ། སྐལ་བཟང་སྦྱིན་པ།
