བོད་གཞིས་ཀ་རྩེ་གམ་པ་རྫོང་གི་བོད་མི་ཡུལ་སྐོར་སྣེ་ཤན་པ་པ་སངས་ནོར་བུ་ལགས་སུ་རྒྱ་གཞུང་ཉེན་རྟོག་པས་རྐང་འཁོར་ཡུལ་སྐོར་སྣེ་འཁྲིད་བྱེད་པ་ནི་ཁྲིམས་འགལ་དང་བདེ་འཇགས་མིན་པར་བསྙད་ནས་འཛིན་བཟུང་བཙན་འཁྲིད་བྱས་ཡོད་འདུག
དེ་རིང་འདི་གར་བོད་གནས་ཤིག་འབྱོར་བ་ལྟར་ན། ཟླ་འདིའི་ཕྱི་ཚེས་ ༡༡ ཉིན་རྒྱ་གཞུང་ཉེན་རྟོག་པས་བོད་རང་སྐྱོང་ལྗོངས་ཟེར་བའི་ཁོངས་གཏོགས་གཞིས་ཀ་རྩེ་གམ་པ་རྫོང་རྒྱལ་རུས་གྲོང་བརྡལ་ནས་བོད་མི་གཞོན་སྐྱེས་པ་སངས་ནོར་བུ་ལགས་འཛིན་བཟུང་བྱས་ནས་ཉིན་ ༣ འགྲོ་བཞིན་ཡོད་ཀྱང་། ད་ལྟ་ད་དུང་ཡང་གཞོན་སྐྱེས་ཁོང་གི་ཨ་མ་ལགས་ཀྱི་གཙོས་ནང་མི་སྤུན་མཆེད་སོགས་ཀྱིས་ཐུག་ཐུབ་ཀྱི་མེད་པ་རེད་འདུག
དེ་ཡང་འདི་གར་གནས་ཚུལ་མཁོ་སྤྲོད་པས་འགྲེལ་བརྗོད་བྱས་པར་གཞིགས་ན། པ་སངས་ནོར་བུ་ལགས་ནི་གམ་པ་རྫོང་རྒྱལ་རུས་གྲོང་བརྡལ་ནས་ཡིན་པ་དང་ནམ་རྒྱུན་གྲོང་མི་ཕན་ཚུན་བར་འབྲེལ་ལམ་དང་ཀུན་སྤྱོད་ཧ་ཅང་ཡག་པོ་ཡོད་སྟབས། མི་ཚང་མའི་སྔགས་བརྗོད་བྱེད་ཡུལ་གྱི་གཞོན་སྐྱེས་ཤིག་ཡིན་པ་དང་། ཁོང་གིས་གམ་པ་རྫོང་དམའ་འབྲིང་སློབ་རིམ་གཉིས་པའི་བར་དུ་སློབ་སྦྱོང་བྱས་ཡོད་ཀྱང་། དེ་རྗེས་ཁོང་གི་པ་ལགས་འདས་གྲོངས་སུ་ཕྱིན་ནས་ནང་མའི་དཀའ་ངལ་གྱི་རྐྱེན་པས་ཁོང་མི་མཐུད་དུ་སློབ་གྲྭར་བསྐྱོད་ཐུབ་མེད་པ་རེད། རྗེས་སུ་ཁོང་གིས་རྐང་འཁོར་ཡུལ་སྐོར་སྣེ་ལེན་ཞབས་ཞུ་ཁང་ཞིག་གསར་འཛུགས་བྱས་ནས་རྐང་འཁོར་ཞོན་ནས་ཡུལ་སྐོར་བ་ཚོ་གནས་སྐོར་སོགས་སུ་ལམ་འཁྲིད་བྱས་ནས་འཚོ་བ་སྐྱེལ་བཞིན་ཡོད་འདུག
གནས་ཚུལ་མཁོ་སྤྲོད་པས་འགྲེལ་བརྗོད་གནང་བ་ལྟར་ན། དེ་སྔོན་ས་གནས་ཉེན་རྟོག་པ་ཐེངས་གཉིས་རིང་པ་སངས་ནོར་བུ་ལགས་ཀྱི་ཡུལ་སྐོར་སྣེ་ལེན་ཞབས་ཞུ་ཁང་དུ་ཡོང་ནས། ཞབས་ཞུ་ཁང་དེ་སྒོ་རྒྱག་དགོས་པའི་སྡུགས་ར་སྐུལ་ཡོད་ནའང་། པ་སངས་ནོར་བུ་ལགས་ཀྱིས་རྒྱ་སྒོར་ ༡༨༠༠༠ སྤྱད་ནས་བོད་རང་སྐྱོང་ལྗོངས་ཡུལ་སྐོར་སྣེ་ལེན་ཞབས་ཞུ་ཁང་དུ་ཐོ་འགོད་བྱས་ནས་ཡུལ་སྐོར་སྣེ་ལེན་གྱི་ཆོག་མཆན་བླངས་ཡོད་པ་དང་། ཉེ་ལམ་པ་སངས་ནོར་བུ་ལགས་ཀྱིས་ཡུལ་སྐོར་སྣེ་ལེན་པའི་ཆོག་མཆན་ཡིག་ཆ་དང་བཅས་པ་ས་གནས་ཉེན་རྟོག་པར་བསྟན་ཡོད་ཀྱང་། ཉེན་རྟོག་པས་རྐང་འཁོར་ཡུལ་སྐོར་སྣེ་འཁྲིད་བྱས་ན་ཁྲིམས་འགལ་ཡིན་པ་དང་བདེ་འཇགས་མེད་ཚུལ་བརྗོད་ནས་པ་སངས་ནོར་བུ་ལགས་སུ་ཉེས་རྡུང་ཚབས་ཆེན་བཏང་རྗེས་འཛིན་བཟུང་བཙན་འཁྲིད་བྱས་པ་དང་། པ་སངས་ནོར་བུ་ལགས་ཀྱི་རྐང་འཁོར་ཚང་མའང་བཙན་འཕྲོད་བྱས་ཡོད་འདུག
པ་སངས་ནོར་བུ་ལགས་སུ་གམ་པ་རྫོང་ལ་མེད་པའི་ལྕགས་རྟ་འཁོར་ལོ་ཁྱོན་བདུན་ཡོད་པ་དང་དེ་དག་ཚང་མ་སྤུས་ཀ་ཧ་ཅང་ཡག་པོ་རྐྱང་ཡིན་འདུག ཡུལ་སྐོར་སྣེ་ཤན་པ་པ་སངས་ནོར་བུ་ལགས་ཀྱི་ཨ་མའི་མིང་ལ་འཚམས་སྐྱིད་དང་། ས་གནས་སུ་སློབ་གྲྭར་བསྐྱོད་བཞིན་པའི་ལོ་ན་ ༡༣ ཅན་གྱི་གཅུང་མོ་ཆོས་སྒྲོན་ཞུ་བ་བཅས་ཡོད་འདུག
ས་གནས་གསར་འགོད་པ།
