དུས་འཁོར་རྒྱུད་འགྲེལ་ཆེན་མོའི་ཕྱག་དཔེ་པོད་ ༩ དབུ་འབྱེད་གནང་།

རྩོམ་པ་པོ་ཤེས་རབ་དར་རྒྱས་ལགས་ཀྱིས་རྩོམ་སྒྲིག་གནང་བའི་པོད་ ༩ ཅན་གྱི་དུས་འཁོར་རྒྱུད་འགྲེལ་ཆེན་མོའི་ཕྱག་དཔེ་དབུ་འབྱེད་གནང་སྐབས་༧གོང་ས་མཆོག་གི་ཐུགས་རྗེ་བཀའ་དྲིན་ཉག་གཅིག་ལ་བརྟེན་ནས་ད་ལྟའང་བུ་སྟོན་རིན་ཆེན་གྲུབ་ནས་བརྒྱུད་པའི་དཔལ་དུས་ཀྱི་འཁོར་ལོའི་བཤད་ལུང་ཆེན་པོ་གནས་མུས་ཡིན་སྐོར་གསུངས་སོང་།

དེ་རིང་དྷ་ས་བོད་ཀྱི་དཔེ་མཛོད་ཁང་གི་ཚོགས་ཁང་དུ། སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་རྣམ་གཉིས། དེ་བཞིན་སྐྱབས་རྗེ་བཀའ་ཟུར་ཀིརྟི་རིན་པོ་ཆེ་མཆོག་དང་། བྱ་དོ་རིན་པོ་ཆེ་མཆོག དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་ལགས་བཅས་ལྷན་འཛོམས་ཐོག  རྩོམ་པ་པོ་ཤེས་རབ་དར་རྒྱས་ལགས་ཀྱིས་འདས་པའི་ལོ་ ༡༥ ལྷག་གི་རིང་རྩོམ་སྒྲིག་གནང་བའི་པོད་ ༩ ཅན་གྱི་དུས་འཁོར་རྒྱུད་འགྲེལ་ཆེན་མོའི་ཕྱག་དཔེ་དབུ་འབྱེད་དང་འབྲེལ་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་རྗེས་དྲན་ཞུས་སོང་།

མཛད་སྒོའི་ཐོག་མཁན་ཟུར་བྱ་དོ་རིན་པོ་ཆེ་མཆོག་གིས་རང་གི་རྩ་བའི་བླ་མ་ཀིརྟི་མཚན་ཞབས་རིན་པོ་ཆེའི་དྲུང་ནས་དུས་འཁོར་རྒྱུད་འགྲེལ་གྱི་བཤད་ལུང་གསན་ཚུལ་དང་། ད་ལྟའི་ཆར་དུས་འཁོར་རྒྱུད་འགྲེལ་གྱི་བཤད་ལུང་གི་རྒྱུན་མ་ཆད་པར་ལྷག་བསྡད་པ་དེ་ཉིད་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེའི་བཀའ་དྲིན་ཉག་གཅིག་ལ་བརྟེན་ནས་བྱུང་བ་ཡིན་སྐོར་དང་། ད་ལྟའི་ཆར་རྒྱ་གར་ནང་དུས་འཁོར་རྒྱུད་འགྲེལ་གྱི་བཤད་ལུང་གི་རྒྱུན་དེ་མི་ ༦༥ ལྷག་ལ་ཡོད་སྐོར་སོགས་གསུངས་ཏེ། སྤྱིར་མང་ཚོགས་ཀྱི་བསམ་བློའི་ནང་དུས་འཁོར་རྒྱུད་འགྲེལ་དེ་ཆོས་ཕྱོགས་ཁོ་ནར་འབྲེལ་བ་ཞིག་ལ་སླེབས་སྲིད་ཀྱང་། དེ་ནི་བོད་ཀྱི་རིག་གཞུང་དང་ཐུན་མོང་མ་ཡིན་པའི་འབྲེལ་བ་ཡོད་སྐོར་གསུངས་སོང་། དེའི་རྗེས་བཀའ་ཟུར་སྐྱབས་རྗེ་རིན་པོ་ཆེ་མཆོག་ནས་ཆད་ལ་ཉེ་བའི་དུས་འཁོར་རྒྱུད་འགྲེལ་གྱི་རྒྱུན་བསྐྱངས་ཏེ་ད་བར་དར་འཕེལ་བྱུང་བ་དེར་བྱ་དོར་རིན་པོ་ཆེ་དང་ཞ་ལུ་དགོན་པར་བསྔགས་བརྗོད་གནང་བ་དང་འབྲེལ། རིན་པོ་ཆེ་རང་ཉིད་དང་ཐད་ཀར་འབྲེལ་བ་ཡོད་པའི་ཀིརྟི་མཚན་ཞབས་རིན་པོ་ཆེ་མཆོག་གི་སྐོར་ནས། ཀིརྟི་མཚན་ཞབས་རིན་པོ་ཆེ་ཞེས་པ་དེ་ཡོངས་གྲགས་ཀྱི་མཚན་ཞིག་ཡིན་པ་དང་། བླ་མའི་མཚན་ངོ་མ་དེ་ཚ་ཕྲུག་དགེ་བཤེས་རིན་པོ་ཆེ་ཡིན་པ་དང་། ཁོང་གིས་སྟག་ཚང་ལྷ་མོ་ཀིརྟི་དགོན་པའི་མཁན་པོ་གནང་བ་ཡིན་སྟབས། རྒྱུན་དུ་ཁོང་ལ་མཁན་པོ་ཚང་ཞེས་འབོད་ཀྱི་ཡོད་སྐོར་དང་། སྤྱིར་ཀིརྟི་རིན་པོ་ཆེ་མཆོག་ཁོང་ཉིད་དང་ཀིརྟི་མཚན་ཞབས་རིན་པོ་དབར་ལ་ཆོས་རར་འགྲོ་རོགས་སོགས་ལས་ཆོས་འབྲེལ་མེད་ནའང་། ཕྱི་ལོ་ ༡༩༨༣ ལོར་༧གོང་ས་རྒྱལ་བ་རིན་པོ་ཆེ་མཆོག་ནས་དུས་འཁོར་རྒྱུད་འགྲེལ་ཞུ་དགོས་པའི་བཀའ་གནང་བ་ལྟར་མཚན་ཞབས་རིན་པོ་ཆེ་མཆོག་ནས་ཞུས་ཡོད་སྐོར་དང་། རིན་པོ་ཆེ་མཆོག་ནས་དུས་ད་ལྟའང་བོད་མདོ་སྨད་ཁུལ་དུ་འཇིགས་མེད་བསམ་གཏན་ཚང་གི་དུས་འཁོར་རྒྱུད་འགྲེལ་གྱི་རྒྱུན་དེ་ལྷག་ཡོད་མེད་རྩད་འཚོལ་གནང་མུས་ཡིན་སྐོར་སོགས་གསུངས་སོང་།

དེ་བཞིན་མཛད་སྒོའི་སྟེང་དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་གི་བླ་ན་མེད་པའི་ཐུགས་བསྐྱེད་ལ་བརྟེན་ནས་བོད་ཀྱི་ནང་བསྟན་སླར་གསོ་རྒྱ་ཆེར་བྱུང་བའི་སྐོར་ནས་གསུང་བཤད་གནང་ཡོད་ཅིང་། གསུང་བཤད་སྐབས་༧གོང་ས་རྒྱལ་བ་རིན་པོ་ཆེ་མཆོག་ནས་བོད་ནང་ཆོས་དོན་འཛུགས་གནང་མཛད་དེ་གཏོང་སྒོ་གཏོང་མི་ཐུབ་པའི་དགེ་བཤེས་རྣམས་ལ་གཞུང་གིས་མཐུན་འགྱུར་གནང་ཚུལ་དང་། རྒྱ་གར་དུ་བཙན་བྱོལ་དུ་ཆིབས་བསྒྱུར་བསྐྱངས་རྗེས་སྤྱིར་བོད་མི་ཡོངས་དང་། ལྷག་པར་དུ་ས་དགེ་བཀའ་རྙིང་བོན་དང་བཅས་པའི་ཆོས་བརྒྱུད་རིས་མེད་ཀྱི་བསྟན་པ་ཉམས་པ་སླར་གསོ་དང་མི་ཉམས་གོང་འཕེལ་ཆེད་དུ་ཐུགས་བསྐྱེད་ཆེན་པོ་མཛད་ཡོད་སྐོར་གསུངས་སོང་།

དེའི་རྗེས་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། བོད་མི་རྣམས་ཐོག་མར་བཙན་བྱོལ་དུ་འབྱོར་སྐབས་ཕྱི་གླིང་པའི་ཁྲོད་ནང་བསྟན་དེ་ཁུངས་ལུང་དེ་ཙམ་མེད་པའི་ཐོག་ནས་བཟོས་པའི་

བླ་མའི་རིང་ལུགས་ཤིག་ལ་ངོས་འཛིན་བྱེད་མཁན་མང་པོ་བྱུང་ཡོད་ནའང་། ༧གོང་ས་མཆོག་ནས་འཛམ་གླིང་གི་ཆོས་ལུགས་མང་པོར་ཐུགས་རྒྱུས་གནང་བ་མ་ཟད། ནང་བསྟན་ལའང་ནང་ཆོས་ཀྱི་ལྟ་གྲུབ་དང་ཚན་རིག ཆོས་ལུགས་བཅས་དོན་ཚན་གསུམ་དུ་ཕྱེས་ཏེ། ཕྱིའི་ཚན་རིག་པ་རྣམས་ཀྱིས་སྒོམ་དང་དྲན་པ་ཉེར་བཞག་སོགས་ཀྱི་ཐོག་ལ་ཞིབ་འཇུག་གནང་སྟེ་གྲུབ་འབྲས་གང་འཚམ་ཐོན་བཞིན་པ་དེར་མགོན་པོ་ཁོང་ཉིད་ཀྱི་བཀའ་དྲིན་ཡིན་སྐོར་སོགས་གསུངས་སོང་།

མཇུག་ཏུ་སྲིད་སྐྱོང་སྤེན་པ་ཚེ་རིང་མཆོག་གིས། ཁོང་བོད་མིའི་ས་གནས་ཁག་གི་དགོན་སྡེ་ཁག་ལ་མཇལ་ཁར་ཕེབས་དུས། ༧གོང་ས་མཆོག་གི་ཐུགས་དགོངས་དང་། ཡང་ན་དངོས་སུ་རོགས་མགོན་མ་གནང་བའི་དགོན་པ་ཞིག་ཕལ་ཆེར་མེད་པ་ལྟ་བུ་ཡིན་སྐོར་དང་། ཕྱི་ལོ་ ༡༩༥༠ ཡི་ནང་༧གོང་ས་རྒྱལ་བ་རིན་པོ་ཆེ་མཆོག་ནས་ཆབ་སྲིད་ཀྱི་གནས་སྟངས་ཛ་དྲག་པོའི་སྐབས་སུའང་འཕྲལ་སེལ་གྱི་དཀའ་ངལ་ཙམ་ལ་མ་གཟིགས་པར། མ་འོངས་ཕུགས་རྒྱང་རིང་པོའི་ཐོག་ལ་དགོངས་པ་རླབས་ཆེན་བཞེས་ཡོད་པ་དང་། སྐབས་རེར་མགོན་པོ་མཆོག་གི་རྒྱ་ཆེ་བའི་དགོངས་བཞེད་དག་ང་ཚོའི་བསམ་བློའི་ནང་མ་ཤོང་བར་དོགས་པ་དང་རྣམ་རྟོག་སླེབས་སྲིད་པ་ཞིག་ཡིན་སྐོར་སོགས་གསུངས་སོང་ལ། བོད་མི་རྣམས་ཀྱིས་འདས་པའི་སྐད་ཆ་རྙིང་པ་རྣམས་གླེང་སློང་མང་པོ་མེད་པར་མདུན་ལ་སྐྱོད་ཐབས་ཇི་ཡོད་ཐོག་ལ་འབད་བརྩོན་གནང་དགོས་སྐོར་གསུངས་སོང་།

རྩོམ་པ་པོ་ཤེས་རབ་དར་རྒྱས་ལགས་ཀྱིས་དུས་འཁོར་རྒྱུད་འགྲེལ་སྐོར་གྱི་དཔེ་དེབ་ངོ་སྤྲོད་གནང་དོན། དུས་འཁོར་རྒྱུད་འགྲེལ་ཆེན་མོ་འདི་གཞུང་ཚན་བདུན་མཉམ་དུ་སྦྲགས་ནས་བསྒྲིགས་ཡོད་པ་དང་། གཞུང་ཚན་དང་པོ་དེ་དུས་འཁོར་ཆོས་བརྒྱུད་གང་འདྲ་བྱུང་ཡོད་མེད་དང་། དེ་དག་གི་རྒྱུད་པའི་བླ་མ་རྣམས་ཀྱི་རྣམ་ཐར་བཅས་བསྒྲིགས་པའི་དུས་འཁོར་ཆོས་འབྱུང་དང་། རིགས་ལྡན་འཇམ་དཔལ་གྲགས་པས་གསུངས་པའི་དུས་འཁོར་བསྡུས་རྒྱུད་ཟེར་བ་དེ་རྩ་བ་ཆགས་ཡོད་པ་དང་། དེའི་འགྲེལ་པ་རིགས་ལྡན་པདྨ་དཀར་པོས་མཛད་པའི་འགྲེལ་ཆེན་དྲི་མེད་འོད་ཟེར་བ་དང། དེ་གཉིས་ལ་བུ་སྟོན་རིན་པོ་ཆེ་མཆོག་གིས་མཆན་འགྲེལ་རེ་རེ་བྲིས་ཡོད་ཅིང་། དེ་བཞིན་བུ་སྟོན་རིན་པོ་ཆེ་མཆོག་གིས་དུས་འཁོར་འགལ་སྤོང་ཞེས་པ་ཞིག་བརྩམས་ཡོད་པ་དེ་དང་། དེའི་ཐོག་དུས་འཁོར་ས་བཅད་བཅས་ཁྱོན་གཞུང་ཚན་བདུན་མཉམ་དུ་སྦྲགས་ཡོད་སྐོར་དང་། པོད་དང་པོ་ནས་ལྔ་པ་བར་དེ་དུས་འཁོར་གྱི་ལེའུ་ལྔ་དེ་ཡིན་པ་དང་། པོད་དྲུག་པ་དེ་ཉིད་ལེའུ་ལྔ་རྣམས་གཅིག་ཏུ་བསྡུས་ཏེ་དམིགས་བསལ་ཆགས་ཀྱི་ཡོད་པ་དང་། པོད་བདུན་པ་དང་བརྒྱད་པ་གཉིས་དེ་རྒྱ་བོད་ཀྱི་གཞུང་ལ་ཞིབ་འཇུག་བྱས་ཏེ་བྲིས་པ་ཞིག་ཡིན་པ་དང། པོད་དགུ་པ་དུས་འཁོར་གྱི་འདོན་པ་འདོན་ཕྱོགས་སྐོར་དེ་ཡིན་སྐོར་འགྲེལ་བརྗོད་གནང་སོང་།

རྩོམ་པ་པོས་དུས་འཁོར་རྒྱུད་འགྲེལ་ཆེན་མོའི་བཤད་ལུང་གི་བྱུང་རིམ་ཐད་ལ། བུ་སྟོན་རིན་ཆེན་གྲུབ་ནས་བརྒྱུད་པའི་དཔལ་དུས་ཀྱི་འཁོར་ལོའི་བཤད་ལུང་ཆེན་པོ་ཞིག་ཤིང་སྦྲུལ་ཕྱི་ལོ་ ༡༧༨༥ ལོར་ཀུན་མཁྱེན་འཇམ་དབྱངས་བཞད་པ་སྐུ་ཕྲེང་གཉིས་པ་འཇིགས་མེད་དབང་པོས་དབུས་གཙང་གི་སྒྲུབ་སྡེ་ཆེན་པོ་ཞ་ལུ་རི་ཕུག་ནས་གསན་ཏེ་ཡུལ་ཆེན་པོ་མདོ་སྨད་དུ་སྤྱན་དྲངས། ལོ་མང་སོང་རྗེས་བོད་ཀྱི་ས་ཁུལ་མང་པོར་བཤད་ལུང་དེ་ཉིད་ཀྱི་བརྒྱུད་པ་ཧ་ཅང་དཀོན་ཞིང་ཉག་ཕྲ་བར་གྱུར་སྟབས། ཕྱི་ལོ་ ༡༩༥༣ ལོ་ཡས་མས་ནས་༸གོང་ས་སྐྱབས་མགོན་ཆེན་པོས་བཀའ་བརྩད་མཛད་ཀྱང་རེ་ཞིག་དགོངས་བཞེད་འགྲུབ་མ་ཐུབ། ཕྱི་ལོ་ ༡༩༥༩ ལོར་བཙན་བྱོལ་དུ་ཕེབས་རྗེས་༸གོང་ས་སྐྱབས་མགོན་ཆེན་པོ་མཆོག་ནས་སྔར་བཞིན་བཤད་ལུང་དེའི་བརྒྱུད་པ་རྒྱ་གར་དུ་ཕེབས་ཡོད་མེད་ལ་བཀའ་བརྩད་མཛད་སྐབས། ཡོངས་འཛིན་གླིང་རིན་པོ་ཆེས་རྒྱ་གར་དུ་ཏན་ཏན་ཕེབས་ཡོད་ཅེས་མངོན་ཤེས་གསུངས་བ་ལྟར། ཡུན་རིང་བཀའ་བརྩད་གནང་མཐར། བཤད་ལུང་དེ་ཉིད་ཀིརྟིའི་མཚན་ཞབས་རིན་པོ་ཆེར་མངའ་བ་མཁྱེན་ཏེ། ༸གོང་ས་མཆོག་གི་བཀའ་དགོངས་ལམ་སྟོན་དང་བླ་ན་མེད་པའི་ཐུགས་འཁུར་འོག་ཀིརྟིའི་མཚན་ཞབས་རིན་པོ་ཆེས། ཕྱི་ལོ་ ༡༩༧༤ ལོར་གསེར་ཀོང་མཚན་ཞབས་རིན་པོ་ཆེར་འབུལ་གནང་མཛད་པ་ནས་ཕྱི་ལོ་ ༢༠༠༠ ལོར་དགའ་ལྡན་ཁྲི་ཟུར་རི་རྫོང་རིན་པོ་ཆེ་དང་མཁན་ཟུར་བྱ་དོ་རིན་པོ་ཆེ་སོགས་ལ་འབུལ་གནང་མཛད་པའི་བར་དུ་ཐེངས་བདུན་ལ་གནང་ཡོད་པ་དང་། ཀིརྟི་མཚན་ཞབས་རིན་པོ་ཆེའི་ཞལ་སློབ་མཁན་ཟུར་བྱ་དོ་རིན་པོ་ཆེས་ཕྱི་ལོ་ ༢༠༡༨ ལོར་དགའ་ལྡན་བྱང་རྩེ་གྲྭ་ཚང་དུ་དུས་འཁོར་རྒྱུད་འགྲེལ་གྱི་བཤད་ལུང་ཐེངས་དང་པོ་གནང་ཞིང་། ཟླ་འདིིའི་ཚེས་ ༤ ཉིན་ནས་བྱེས་ཀྱི་གདན་ས་ཞ་ལུ་དགོན་པར་བཤད་ལུང་ཐེངས་གཉིས་པ་གནང་རྒྱུ་ཡིན་འདུག ཅེས་འཁོད་འདུག

པོད་དགུ་ཅན་གྱི་བུ་སྟོན་རིན་པོ་ཆེ་ལས་བརྒྱུད་པའི་དུས་འཁོར་རྒྱུད་འགྲེལ་ཆེན་མོའི་དཔེ་དེབ་པར་སྐྲུན་ལས་གཞི་དེ་ཉིད། ཕྱི་ལོ་ ༢༠༠༦ ནས་ཨ་རིར་ཡོད་པའི་བུད་མེད་ལོ་རཱན་ཞེས་པ་ཞིག་གིས་ཐོག་མའི་ལོ་དྲུག་རིང་མཐུན་སྦྱོར་ཆ་ཚང་ཞུས་པ་དང་། ཨི་ཊ་ལིའི་བུད་མེད་ཡེ་ཤེས་སྒྲོལ་དཀར་གྱིས་རམ་འདེགས་འོག་ཤེས་རབ་དར་རྒྱས་ལགས་ཀྱིས་ཞུས་སྒྲིག་གནང་བ་ཞིག་ཡིན་ཞིང་། ཞ་ལུ་དགོན་པས་དཔར་སྐྲུན་མཐུན་འགྱུར་གནང་ཡོད་འདུག

གསར་འགོད་པ། པ་སངས་ཚེ་རིང་།