རྒྱ་ནག་གཞུང་གི་གདུག་རྩུབ་ཅན་གྱི་སྲིད་ཇུས་ལ་མཐའ་གཅིག་ཏུ་ངོ་རྒོལ་གནང་མཁན་ཨ་རིའི་སིལ་སྤོལ་རྩེད་འགྲན་པ་གྲགས་ཅན་ཨེ་ནི་སི་ཀན་ཊིར་ལགས་སུ་ཕྱི་ལོ་ ༢༠༢༢ ལོའི་ཇི་ནི་ཝའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སྙིང་སྟོབས་གཟེངས་རྟགས་ཕུལ་ཡོད་འདུག
ཁ་སང་ཕྱི་ཚེས་ ༦ ཉིན་མཉམ་འབྲེལ་རྒྱལ་ཚོགས་ཀྱི་ཇི་ནེ་ཝར་མགོ་འཛུགས་བྱས་པའི་གཞུང་འབྲེལ་མ་ཡིན་པའི་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ཚོགས་པ་ ༢༥ ལས་གྲུབ་པའི་ཇི་ནེ་ཝའི་ལྷན་ཚོགས་ཐེངས་ ༡༤ པའི་(Geneva Summit 2022) ཐོག རྒྱ་ནག་དམར་གཞུང་གི་བཙན་གནོན་འོག་ཡོད་པའི་བོད་དང་ཧོང་ཀོང་། ཡུ་གུར་སོགས་ཀྱི་འགྲོ་བ་མིའི་ཐོབ་ཐང་འཐབ་རྩོད་པ་ཁག་ཅིག་གིས་གཏམ་བཤད་གནང་ཡོད་པ་དང་། ཐེངས་འདིའི་ཚོགས་ཆེན་ཐོག་རྒྱ་ནག་གཞུང་གི་གདུག་རྩུབ་ཅན་གྱི་སྲིད་ཇུས་ལ་མཐའ་གཅིག་ཏུ་ངོ་རྒོལ་གནང་མཁན་བོད་དོན་རྒྱབ་སྐྱོར་བ་ཨེ་ནི་སི་ཀན་ཊིར་ལགས་སུ་འདི་ལོའི་ཇི་ནི་ཝའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སྙིང་སྟོབས་གཟེངས་རྟགས་ཕུལ་ཡོད་འདུག་ལ། གཟེངས་རྟགས་དེ་ཕྱི་ལོ་ ༢༠༡༩ ལོར་བོད་ཀྱི་འཇིགས་བྲལ་གློག་བརྙན་བཟོ་སྐྲུན་པ་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་སུ་གནང་ཡོད་པ་རེད།
དེ་ཡང་ཁ་སང་ཕྱི་ཚེས་ ༦ ཉིན་བོད་དོན་འཐབ་རྩོད་པ་བསྟན་འཛིན་བརྩོན་འགྲུས་ལགས་ཀྱིས་ཇེ་ནི་ཝའི་ཚོགས་ཆེན་དེའི་སྟེང་བོད་ཀྱི་རྒྱལ་དར་འཕྱར་ནས་རྣམ་ཐར་གྱི་དབྱངས་རྟ་རིང་པོ་ཞིག་འཐེན་ནས་ཀི་ཞིག་བཏབ་རྗེས་བོད་ཀྱི་རྒྱལ་དར་སྐོར་ལ་ཁོང་གིས། བོད་ཀྱི་རྒྱལ་དར་འདི་ནི་ཕྱི་ལོ་ ༡༩༡༦ སྟེ་འཛམ་གླིང་དམག་ཆེན་དང་པོའི་དུས་དཀྱིལ་དུ་བཟོས་པ་ཞིག་ཡིན་ཞིང་། སྐབས་དེར་འཛམ་གླིང་གི་ས་ཁུལ་ཕྱེད་ཀར་གཞན་གྱི་བཙན་འཛུལ་བྱས་ཏེ་རང་བཙན་མེད་པ་རེད། ང་རང་ཚོས་ཕན་ཚུན་དགྲ་བོ་དང་གསོད་རེས་བྱ་མི་དགོས་ཤིང་། ང་ཚོས་ཕན་ཚུན་མི་དགའ་བ་བྱ་དགོས་དོན་གཏན་ནས་མེད། མི་ལོ་མང་པོ་ཞིག་གི་ཡར་སྔོན་དུ་རྒྱ་ནག་གཞུང་གིས་ང་རང་བཙོན་འཇུག་བྱས་ཏེ། ཕྱི་ཡི་འབྲེལ་ལམ་རྦད་དེ་བཅད་བྱུང་ལ། ཁྲིམས་རྩོད་པར་ཞུ་གཏུགས་བྱ་མི་ཆོག་ཅིང་། ཁོང་ཚོས་ག་རེ་བྱ་རྒྱུ་ཡིན་མིན་སོགས་ཅི་ཡང་མི་བཤད་པ་རེད། ཁོང་ཚོས་འདྲི་རྩད་མ་བྱས་པའི་གོང་དུ། ངའི་མིག་བཀབ་ནས་ཉེས་རྡུང་དང་མནར་གཅོད་ཚད་མེད་བཏང་བྱུང་། དེ་མ་ཟད་ཁོང་ཚོས་ང་ལ་ཁ་ལག་མི་སྤྲད་ཅིང་། ཐ་ན་གཉིད་ཀྱང་ཁུག་བཅུག་མ་སོང་། ཞེས་བརྗོད་སོང་།
ཡང་ཁོང་གིས། ཕྱི་ལོ ༡༩༤༩ ལོར་རྒྱ་ནག་གཞུང་གིས་བོད་སར་ཐོག་མར་བཙན་འཛུལ་བྱས་ཤིང་། བོད་མི་སྟོང་ཕྲག་མང་པོ་དམར་གསོད་བཏང་ཡོད་ཀྱང་། རྒྱལ་སྤྱིའི་མི་མང་ཕལ་ཆེར་བར་གནད་དོན་དེའི་ཐད་གོ་རྟོགས་མེད་ལ། བོད་དོན་གོ་རྟོགས་ཡོད་མཁན་ཚོས་རྒྱ་ནག་གཞུང་ལ་རྒྱབ་སྐྱོར་བྱེད་ཀྱི་ཡོད་པར་བརྟེན། རྒྱ་ནག་གཞུང་གི་དམག་དོན་དང་། དཔལ་འབྱོར། ཆབ་སྲིད་ཀྱི་སྟོབས་ཤུགས་སོགས་འཕེལ་རྒྱས་འགྲོ་མུས་ཡིན་པས། ཉེ་ལམ་རྒྱ་ནག་གཞུང་གིས་རྒྱལ་ཁབ་ཨང་དང་པོར་ཆགས་རྒྱུར་དམིགས་ཡུལ་བཅངས་ཀྱི་ཡོད་པ་དང་། རྒྱ་ནག་གཞུང་གིས་བོད་དང་། ཤར་ཏུར་ཀི་སི་ཐན། ལྷོ་སོག མན་ཇུ་སོགས་ལ་དུས་གཅིག་ཏུ་བཙན་འཛུལ་བྱས་ཤིང་། རྒྱལ་ཁབ་དེ་དག་གི་ས་ཁྱོན་གྲུ་བཞི་མ་ས་ཡ་ ༩།༦ སྟེ་རྒྱ་ནག་གི་ས་ཁྱོན་བརྒྱ་ཆ་ ༦༠ ཟིན་ཡོད་སྟབས། ད་ལྟའི་རྒྱ་ནག་གི་ས་ཁྱོན་བརྒྱ་ཆ ༦༠ ལྷག་བཙན་འཛུལ་བྱས་ནས་བྱུང་ཡོད་པ་རེད། ཅེས་དང་། འཛམ་གླིང་གི་སྲིད་གཞུང་ཁག་གིས་ཚོང་གི་ཁེ་ཕན་ཁོ་ནའི་ཆེད་དུ་རྒྱ་ནག་ལ་རྒྱབ་སྐྱོར་བྱེད་ཀྱི་ཡོད་སྐོར་བརྗོད་ཡོད་འདུག
དེ་བཞིན་ཚོགས་ཆེན་དེའི་ཐོག་ཧོང་ཀོང་གི་རང་དབང་འཐབ་རྩོད་པ་ཇོ་ཡེ་སུ ( Joey Siu) ལགས་ཀྱིས། ཧོང་ཀོང་དེ་འོས་བསྡུའི་ལམ་ལུགས་ཅན་གྱི་དམངས་གཙོ་ཞིག་ཆགས་ཐུབ་ཀྱི་མེད་ལ། ཁོང་ཚོས་རང་ཉིད་ཀྱི་མགོ་ཁྲིད་འོས་འདེམས་བྱེད་པའི་ཐོབ་ཐང་མེད་ལ། ཐ་ན་རྒྱལ་ཁབ་ཀྱི་ཁྲིམས་སྒྲིག་དག་ཀྱང་རྒྱ་ནག་གཞུང་གིས་འདེམས་བསྐོས་བྱས་པའི་མགོ་ཁྲིད་དེ་དག་གིས་བཟོ་ཡི་ཡོད་སྐོར་དང་། ཧོང་ཀོང་མི་དམངས་ཀྱིས་ད་བར་ཚད་དང་ལྡན་པའི་དམངས་གཙོ་ཐོབ་པར་འཐབ་རྩོད་བྱས་ཡོད་པ་དང་། ཕྱི་ལོ ༢༠༡༩ ཕྱི་ཟླ ༧ ནང་ཧོང་ཀོང་ནང་དུ་གཞི་རྒྱ་ཆེ་བའི་ཡར་ལངས་བྱས་ཏེ། མི་མང་འབུམ་ཕྲག་མང་པོས་རྒྱ་ནག་གཞུང་ལ་ངོ་རྒོལ་བྱས་ཡོད། སྐབས་དེར་རྒྱ་ནག་གཞུང་གི་ཉེན་རྟོག་པས་ཧོང་ཀོང་བ་སྟོང་ཕྲག་མང་པོར་རྡུང་རྡེག་བཏང་བ་དང་བཙོན་འཇུག་སོགས་བྱས་ཡོད་ལུགས་དང་། དེ་བཞིན་རྒྱ་ནག་གཞུང་གིས་ཧོང་ཀོང་གི་དམངས་གཙོ་དོན་གཉེར་བ་ ༤༦ ལ་ལོ་གཅིག་ལྷག་གི་བཙོན་འཇུག་ཁྲིམས་ཐག་བཅད་ཡོད་པ་དང་། རྒྱ་ནག་གཞུང་གིས་ཧོང་ཀོང་མི་མང་རྣམས་ལ་དྲག་གནོན་དང་དམ་དྲག་ཤུགས་ཆེན་བྱས་ཏེ། སློབ་ཕྲུག་ཚོགས་པ་དང་། ལས་འགུལ་ཚོགས་པ། གསར་ཁང་མང་པོ་ཞིག་སྒོ་བརྒྱག་བཅུག་ཡོད་སྐོར་སོགས་བརྗོད་འདུག
དེ་བཞིན་ཡུ་གུར་གྱི་རང་དབང་འཐབ་རྩོད་པ་རུ་ཤི་ཧན་ཨབ་བྷ་སི་ (Rushanabbas ) ལགས་ཀྱིས། རྒྱ་ནག་གཞུང་གིས་ཡུ་གུར་གྱི་མི་མང་སྟོང་ཕྲག་མང་པོར་བཙན་གནོན་ཚད་ལས་འདས་པ་བྱས་ཡོད་ཅིང་། ཡུ་གུར་གྱི་ས་ཚིགས་མང་པོ་ཞིག་ཏུ་ངལ་རྩོལ་ཁང་ཆེད་འཛུགས་ཀྱིས་ཡུ་གུར་མི་མང་རྣམས་བྲན་གཡོག་ཏུ་བཀོལ་བ་དང་། ཡུ་གུར་གྱི་ཤེས་ཡོན་པ་དང་། སྨན་པ་སོགས་འཛིན་བཟུང་བྱས་ཡོད། དེ་བཞིན་ཡུ་གུར་བའི་ས་གནས་མང་པོ་བཙན་འཕྲོག་བྱས་ཏེ། རྒྱ་རིགས་ཚོང་པ་ཚོར་བགོ་འགྲེམས་བྱེད་ཀྱི་ཡོད་སྐོར་དང་། ཡུ་གུར་གྱི་བུད་མེད་མང་པོ་ཞིག་རྒྱ་རིགས་དང་བཙན་གྱིས་གཉེན་སྒྲིག་བྱེད་དུ་འཇུག་གི་ཡོད་པ་མ་ཟད། ཡུ་གུར་བུད་མེད་སྟོང་ཕྲག་མང་པོར་རྒྱ་རིགས་སྐྱེས་པས་བཙན་གཡེམ་དང་མནར་གཅོད་བཏང་ཡོད་སྐོར་སོགས་འགྲེལ་བརྗོད་བྱས་འདུག
གསར་འགོད་པ། དཔལ་ལྡན།
![Ren Quanniu said the Henan Provincial Justice Department revoked his licence over comments he made in court in a 2018 case [File: Leo Ramirez/ AFP]](https://tibettimes.net/wp-content/uploads/2025/07/Untitled-2-360x180.jpg)
