ཏྲི་པུ་རའི་ནང་སྲིད་བློན་ཆེན་མཆོག་དྷ་རམ་ས་ལར་གཟིགས་སྐོར་དུ་ཕེབས།

རྒྱ་གར་གྱི་བྱང་ཤར་མངའ་སྡེ་ཏྲི་པུ་ར་མངའ་སྡེའི་(Tripura)ནང་སྲིད་བློན་ཆེན་སྐུ་ཞབས་རཱམ་པྲ་སཌ་པོལ(Ram Prasad Paul) ལགས་ཀྱིས་གངས་ཅན་སྐྱིད་གཤོངས་ཏུ་གཟིགས་སྐོར་གནང་སྟེ་བོད་མིའི་སྒྲིག་འཛུགས་ཀྱི་ཕྱག་ལས་གནང་ཕྱོགས་སྐོར་ཤེས་རྟོགས་གང་ལེགས་བྱུང་ཡོད་སྐོར་གསུངས་འདུག

ཁ་སང་ཕྱི་ཚེས་ ༡༡ ཉིན་རྒྱ་གར་གྱི་བྱང་ཤར་མངའ་སྡེ་ཏྲི་པུ་ར་མངའ་སྡེའི་(Tripura)ནང་སྲིད་བློན་ཆེན་སྐུ་ཞབས་རཱམ་པྲ་སཌ་པོལ(Ram Prasad Paul) ལགས་བཞུགས་སྒར་དྷ་རམ་ས་ལར་ཕེབས་ཏེ་བོད་མིའི་སྒྲིག་འཛུགས་ཀྱི་ལྟེ་གནས་གངས་ཅན་སྐྱིད་གཤོངས་སུ་རྟེན་གཞི་བྱས་པའི་ཕྱི་དྲིལ་ལས་ཁུངས་དང་བོད་མི་མང་སྤྱི་འཐུས་ལྷན་ཚོགས་སོགས་སུ་གཟིགས་སྐོར་གནང་ཡོད་པ་དང་། བློན་ཆེན་ཁོང་གིས་ད་ལན་༧གོང་ས་རྒྱལ་བ་རིན་པོ་ཆེ་མཆོག་མཛད་བྲེལ་དབང་གིས་མཇལ་ཁ་ཞུ་ཐུབ་མེད་ཀྱང་མ་འོངས་པར་མཇལ་བཅར་ཞུ་ཐུབ་པའི་རེ་ཡོད་སྐོར་གསུངས་འདུག

དེ་ཡང་བོད་མིའི་སྒྲིག་འཛུགས་ཀྱི་གཞུང་འབྲེལ་དྲ་རྒྱའི་ཐོག་སྤེལ་བའི་གནས་ཚུལ་ལྟར་ན། ཁ་སང་སྔ་དྲོའི་ཆུ་ཚོད་ ༡༠།༠༠ ཐོག་སྐུ་ཞབས་རཱམ་པྲ་སཌ་པོལ་ལགས་དང་། རྒྱ་གར་གྱི་བོད་དོན་རྒྱབ་སྐྱོར་ཚོགས་པའི་ (Core Group for Tibetan Cause)  བྱང་ཕྱོགས་ས་གནས་ཀྱི་འབྲེལ་མཐུད་པ་སྐུ་ཞབས་རི་ཤི་ཝ་ལི་ཡ་ (Rishi Walia) ལགས་རྣམ་གཉིས་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཁང་དུ་ཕེབས་ཏེ་སྤྱི་འཐུས་རྒྱུན་ལས་ལྷན་དུ་ཐུག་འཕྲད་གནང་ཡོད་པ་དང་། སྤྱི་འཐུས་རྒྱུན་ལས་རྣམ་པས་སྐུ་ཞབས་ཁོང་ལ་བོད་མིའི་སྒྲིག་འཛུགས་ཀྱི་ལས་དོན་བྱེད་ཕྱོགས་དང་། བོད་རྒྱ་གྲོས་མོལ་སྐོར་ངོ་སྤྲོད་གནང་ཡོད་པ་དང་སྦྲགས། ༧གོང་ས་རྒྱལ་བ་རིན་པོ་ཆེ་མཆོག་གི་ཕྱག་དེབ་ངོས་ཀྱི་ཡུལ་དང་ངོས་ཀྱི་མི་མང་ཞེས་པ་ཕྱག་རྟགས་སུ་གནང་ཡོད་འདུག

དེའི་རྗེས་སྐུ་ཞབས་རྣམ་གཉིས་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་སུ་ཕེབས་ཏེ་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་ཐུག་འཕྲད་གནང་ཡོད་འདུག་ལ། གཟིགས་སྐོར་གྲུབ་རྗེས་སྐུ་ཞབས་རམ་པྲ་སཌ་པོལ་ལགས་ཀྱིས་ཨ་རིའི་རླུང་འཕྲིན་ཁང་གི་གསར་འགོད་པར། དེ་སྔ་རང་ཉིད་ལ་བོད་དོན་ཐད་གོ་རྟོགས་དེ་ཙམ་མེད་ཀྱང་། ད་ལན་བོད་མིའི་སྒྲིག་འཛུགས་ཀྱི་འཛིན་སྐྱོང་དང་ལས་དོན་བྱེད་ཕྱོགས་ཐད་ལ་ཤེས་རྟོགས་བྱུང་བ་མ་ཟད། རྒྱ་གར་དང་བོད་དབར་ལ་ཆོས་དང་རིག་གཞུང་གི་འབྲེལ་ལམ་གཏིང་ཟབ་ཡོད་པ་དང་། བོད་ཀྱི་འཐབ་རྩོད་དང་དཀའ་རྙོག་སེལ་ཐབས། དེ་བཞིན་རྒྱ་གར་གྱི་སྲིད་གཞུང་སྔ་རྗེས་ཚང་མས་བོད་མིར་བཀའ་དྲིན་ཆེན་པོ་གནང་ཡོད་པའི་སྐོར་འགྲེལ་བརྗོད་གནང་བར་དགའ་སྤྲོ་སྐྱེས་ཡོད་པ་དང་། ད་བར་ཁོང་གིས་༧གོང་ས་རྒྱལ་བ་རིན་པོ་ཆེ་མཆོག་དངོས་སུ་མཇལ་མྱོང་མེད་ཀྱང་། ད་ལན་༧གོང་ས་རྒྱལ་བ་རིན་པོ་ཆེ་མཆོག་མཛད་བྲེལ་ཆེ་བའི་རྐྱེན་གྱིས་མཇལ་ཁ་ཐོབ་མེད་པ་དང་། མ་འོངས་པར་མཇལ་རྒྱུའི་རེ་བ་ཡོད་སྐོར་དང་། ད་ཐེངས་གཟིགས་སྐོར་སྐབས་༧གོང་ས་མཆོག་དང་འབྲེལ་བའི་ཕྱག་དཔེ་མང་པོ་གནང་བྱུང་བ་དེ་དག་ལ་ཞིབ་ཀློག་བྱ་རྒྱུ་ཡིན་སྐོར་བརྗོད་ཡོད་འདུག