མཁར་གདོང་ལའི་འཁྱག་རྡོག་ཅིག་༧གོང་ས་མཆོག་ལ་སྤྱན་འབུལ་ཞུས།

དེ་རིང་གོ་ལའི་ཉིན་མོ་དང་བསྟུན་རྒྱ་གར་གྱི་གནམ་གཤིས་འགྱུར་ལྡོག་གི་ལས་འགུལ་བ་དང་སློབ་གསོ་བ་བསོད་ནམས་དབང་ཕྱུག་ལགས་ཀྱིས་ལ་དྭགས་མཁར་གདོང་ལ་ནས་ཁྱེར་ཡོང་བའི་འཁྱག་རྡོག་ཅིག་༧གོང་ས་རྒྱལ་བ་རིན་པོ་ཆེ་མཆོག་ལ་སྤྱན་འབུལ་ཞུས་ཡོད་འདུག

རྒྱ་གར་གྱི་གནམ་གཤིས་འགྱུར་ལྡོག་གི་ལས་འགུལ་བ་དང་སློབ་གསོ་བ་བསོད་ནམས་དབང་ཕྱུག་ལགས་ཀྱིས། འཛམ་གླིང་ཡོངས་ཀྱིས་གནམ་གཤིས་འགྱུར་ལྡོག་གི་གནད་དོན་སྐོར་གོ་རྟོགས་སྤེལ་བའི་ཆེད་དུ་ཧི་མ་ལ་ཡའི་འཁྱག་རོམ་འཁྱེར་ཡོང་བ་ཞིག་རེད། ཧི་མ་ལ་ཡའི་ནང་གི་འཁྱག་རོམ་ཞིག་འཁྱེར་ཡོང་བ་དེས་བོད་མཐོ་སྒང་གི་ཁོར་ཡུག་གི་གནས་སྟངས་ཤེས་ཐུབ་ཀྱི་ཡོད་པ་རེད། གཞོན་སྐྱེས་ ༢༥ ཡིས་ལ་དྭགས་མཁར་གདོང་ལ་བར་དུ་རྐང་འཁོར་བཏང་ནས་ཕྱིན་ཏེ་རིའི་སྒང་ནས་འཁྱག་རྡོག་ཅིག་གཞུང་ལམ་བརྒྱུད་འཁྱེར་ནས་ཡོང་བ་ཡིན། འཁྱག་རྡོག་འདི་བརྒྱུད་ནས་ང་ཚོས་མི་མང་རྣམས་ལ་གྲོང་ཁྱེར་དང་རྒྱལ་སའི་ནང་འཚོ་བ་དཀྱུས་མ་བསྐྱལ་བ་ཡིན་ན། ང་ཚོ་རིའི་སྟེང་དུ་འཚོ་བ་སྐྱེལ་མཁན་རྣམས་ཀྱིས་ཀྱང་མི་ཚེ་དཀྱུས་མ་ཞིག་སྐྱེལ་ཐུབ་པའི་རེ་བ་བྱེད་ཀྱི་ཡོད་ཅེས་བརྡ་ལན་སྤྲོད་འདོད་ཡོད་སྐོར་སོགས་བརྗོད་སོང་།

ཅེག་སྤྱི་མཐུན་རྒྱལ་ཁབ་ཀྱི་ཁོར་ཡུག་བློན་ཆེན་ཟུར་པ་ (Martin Bursik) ལགས་ཀྱིས། དེ་སྔ་ཅེག་སྤྱི་མཐུན་རྒྱལ་ཁབ་ཀྱི་རྒྱལ་ས་ (Prague) ནང་༧གོང་ས་མཆོག་དང་ལྷན་དུ་ཚོགས་འདུ་འཚོགས་སྐབས། ༧གོང་ས་མཆོག་གིས་གནམ་གཤིས་འགྱུར་ལྡོག་དང་ཁོར་ཡུག་སྲུང་སྐྱོབ་ཀྱི་སྐོར་ལ་བགྲོ་གླེང་འཚོག་དགོས་པའི་བཀའ་སློབ་གནང་སོང་། དེར་བརྟེན་ང་ཚོ་བོད་ཀྱི་སྲིད་ཇུས་ཉམས་ཞིབ་ཁང་དང་རྒྱལ་སྤྱིའི་བོད་དོན་ལས་འགུལ་ཁང་། ཅེག་བོད་དོན་རྒྱབ་སྐྱོར་ཚོགས་པ། ཨི་ཊ་ལིའི་ཁོར་ཡུག་སྲུང་སྐྱོབ་ཉམས་ཞིབ་ཁང་ (Eurac Research) བཅས་ཀྱིས་བགྲོ་གླེང་འཚོག་གི་ཡོད་པ་དང་། ཉིན་གཉིས་རིང་མི་སྒེར་ཞིག་གི་གོ་ལའི་གནམ་གཤིས་ཚ་དྲོད་སྲུང་སྐྱོབ་ཀྱི་འོས་འགན་དང་གོ་ལའི་ལམ་སྲོལ་སྲུང་སྐྱོབ། འཕྲུལ་ཆས་དང་ཚོང་། གོ་ལའི་སྣེ་གསུམ་པའི་གལ་གནད་ཀྱི་སྐོར། ད་ལྟའི་ཆར་གོ་ལའི་གནས་སྟངས་ཀྱི་སྐོར་ལ་གླེང་སློང་བྱེད་ཀྱི་ཡོད་པ་དང་། ༧གོང་ས་མཆོག་ལ་དེའི་སྐོར་ཞུས་ཏེ་རྒྱབ་སྐྱོར་མཛད་ཡོད་པ་མ་ཟད། གོ་ལའི་གནམ་གཤིས་སྲུང་སྐྱོབ་བྱེད་པར་ཞི་བདེ་དགོས་གལ་ཆེན་པོ་ཡིན་སྐོར་གསུངས་ཡོད་སྐོར་དང་། ང་ཚོས་གོ་ལའི་གནམ་གཤིས་ཀྱི་དོན་དུ་ཕྱག་ལས་གནང་བར་ཐུགས་མཉེས་པོ་བྱུང་འདུག་ལ། ང་ཚོ་ཚང་མས་མཉམ་རུབ་ཀྱིས་གོ་ལ་སྲུང་སྐྱོབ་བྱེད་དགོས། ཞེས་བརྗོད་སོང་།

བོད་མི་མང་སྤྱི་འཐུས་ཟུར་པ་དང་ཡུ་རོབ་ཀྱི་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བཀྲས་མཐོང་བསྟན་འཛིན་དབང་པོ་ལགས་ཀྱིས། ང་ཚོ་༧གོང་ས་མཆོག་དང་མཇལ་ནས་བསོད་ནམས་དབང་ཕྱུག་ལགས་ཀྱིས་འཁྱག་རོམ་དེ་༧གོང་ས་མཆོག་ལ་སྤྱན་འབུལ་ཞུ་རྒྱུའི་གོ་སྐབས་བྱུང་བ་རེད། ༧གོང་ས་མཆོག་གིས་འཛམ་གླིང་གི་དེང་དུས་ཀྱི་དཀའ་ངལ་ཐོག་ལ་ཐུགས་འཚབ་ཡོད་པའི་བཀའ་མོལ་གནང་སོང་། འཇིག་རྟེན་འདིའི་ནང་ང་ཚོ་ཚང་མ་དང་ང་ཚོའི་སྤྱི་ཚོགས་ལ་འགན་ཡོད་པའི་བཀའ་སློབ་གནང་སོང་། དེ་བཞིན་གནད་དོན་མང་པོའི་ཐོག་ལ་བཀའ་སློབ་གཏིང་ཟབ་པོ་གནང་སོང་། ས་གནས་དང་ཆོས་ལུགས་སོགས་ཀྱི་དབྱེ་བ་མེད་པའི་ཐོག་ནས་མ་འོངས་པའི་མདུན་ལམ་གྱི་ཐོག་ལ་ང་ཚོ་ཚང་མས་མཉམ་རུབ་ཀྱིས་དཀའ་ལས་བརྒྱག་དགོས་པའི་ལམ་སྟོན་གནང་སོང་། ཞེས་བརྗོད་སོང་།

གསར་འགོད་པ། བསྟན་འཛིན་ཕུར་བུ།