དེ་རིང་ཀུན་གཟིགས་༧པཎ་ཆེན་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༣༣ ལ་ཕེབས་པའི་སྐུའི་འཁྲུངས་སྐར་དང་བསྟུན་བོད་མིའི་སྒྲིག་འཛུགས་གཙོས་པའི་འཛམ་གླིང་ས་ཕྱོགས་གང་སར་ཡོད་པའི་བོད་མི་རྣམས་ཀྱིས་ངོ་རྒོལ་སྐད་འབོད་སོགས་བརྒྱུད་རྒྱ་ནག་གཞུང་གིས་རིན་པོ་ཆེ་མཆོག་འཕྲལ་དུ་ཀློད་གྲོལ་གཏོང་དགོས་པའི་འབོད་སྐུལ་གནང་འདུག
དེ་རིང་བོད་མིའི་སྒྲིག་འཛུགས་ཀྱི་དྲ་རྒྱའི་སྟེང་། ཕྱི་དྲིལ་ལས་ཁུངས་ངོས་ནས་༧པཎ་ཆེན་རིན་པོ་ཆེ་མཆོག་གི་འཁྲུངས་སྐར་དང་བསྟུན་ཡོངས་ཁྱབ་གསལ་བསྒྲགས་ཤིག་སྤེལ་བའི་ནང་། ༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༣༣ ལ་ཕེབས་པའི་ཉིན་མོ་འདིར་རྒྱ་ནག་གཞུང་གིས་ཁོང་ལོ་རྒྱུས་ནས་ནག་བསུབ་གཏོང་ཐབས་བྱས་ཀྱང་། ང་ཚོས་རྒྱ་ནག་གཞུང་ལ་རྒྱལ་སྤྱིའི་མི་མང་གིས་ཁོང་དྲན་ཡུལ་ནས་བསྐྱུར་མེད་པའི་བརྡ་ལན་གཏོང་ཆེད་ལས་འགུལ་སྔར་ལྷག་སྤེལ་དགོས་པའི་དུས་ལ་བབ་ཡོད་པ་ཚོར་གྱི་ཡོད། ང་ཚོས་རྒྱ་ནག་གཞུང་ངོས་ནས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་དང་ཁོང་གི་སྐུ་འཁོར་ནང་མི་རྣམས་རྒྱལ་སྤྱིའི་ཁྲིམས་སྒྲིག་ཁག་གི་དགོངས་དོན་བཞིན་རང་དབང་ལྡན་པའི་ངང་འཚོ་གནས་ཆོག་པའི་ཐོབ་ཐང་སྤྲོད་དགོས་པའི་འབོད་སྐུལ་ཞུ་བཞིན་ཡོད། ཅེས་དང་། རྒྱ་ནག་གཞུང་གིས་པཎ་ཆེན་རིན་པོ་ཆེའི་ཡང་སྲིད་རྩད་གཅོད་དང་གར་སོང་ཆ་མེད་གཏོང་བར་ཐེ་གཏོགས་བྱ་རྒྱུའི་ཞེ་ཕུགས་ཀྱི་དམིགས་ཡུལ་ནི་བོད་ལ་དབང་བསྒྱུར་བྱ་རྒྱུ་དང་། ཡོང་འགྱུར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཡང་སྲིད་ངོས་འཛིན་བྱེད་ཕྱོགས་ལ་གཡོ་བྱུས་བཤམ་རྒྱུའི་གཞི་རྟེན་འཛུགས་ཆེད་ཡིན། པཎ་ཆེན་སྐུ་ཕྲེང་ན་རིམ་ནི་བོད་ཀྱི་ཆོས་སྲིད་གཉིས་ཀྱི་མཛད་འགན་ཆེ་བའི་དབུ་ཁྲིད་ཅིག་ཡིན་གཤིས། ཁོང་ལ་ཆབ་སྲིད་ཀྱི་ཤུགས་རྐྱེན་བྲལ་བའི་ཆོས་ཕྱོགས་ཀྱི་སློབ་གཉེར་གནང་རྒྱུའི་གོ་སྐབས་བསྐྲུན་རྒྱུ་ནི་ཤིན་ཏུ་གལ་འགངས་ཆེ། ཅེས་འཁོད་འདུག
གཞན་ཡང་ཡོངས་ཁྱབ་བསྒྲགས་གཏམ་ནང་། ང་ཚོས་སླར་ཡང་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོ་འགྲོ་བ་མིའི་ཐོབ་ཐང་ལྷན་ཚོགས་ཀྱི་འགན་འཛིན་མ་ཧི་ཀལ་བྷེ་ཅེ་ལཊ་ལགས་ལོ་འདིའི་ཟླ་བ་ལྔ་པའི་ནང་ཤར་ཏུར་ཀིསྟན་དུ་ཕེབས་སྐབས་བོད་ནང་གི་འགྲོ་བ་མིའི་ཐོབ་ཐང་གནས་སྟངས་གཟིགས་ཞིབ་གནང་རྒྱུ་སྤྱི་དང་། ཡང་སྒོས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དང་ཁོང་གི་སྐུ་འཁོར་ནང་མིའི་ད་ལྟའི་གནས་སྟངས་དང་གང་དུ་ཡོད་མེད་ཀྱི་གནས་ཚུལ་ཕྱིར་བསྒྲགས་ཡོང་ཆེད་རྒྱ་ནག་གཞུང་ལ་གནོན་ཤུགས་སྤྲད་རྒྱུའི་ཆེད་བོད་ལའང་ཕེབས་དགོས་པའི་ནན་སྐུལ་ཞུ་རྒྱུ་ཡིན། ཞེས་འཁོད་འདུག
ཁེ་ཉིན་ཕྱི་ཚེས་ ༢༣ ཉིན་བྱེས་ཀྱི་གདན་ས་བཀྲ་ཤིས་ལྷུན་པོའི་གོ་སྒྲིག་འོག ཨ་རིའི་གྲོང་ཁྱེར་ནིའུ་ཡོག་ཏུ་༧པཎ་ཆེན་རིན་པོ་ཆེ་མཆོག་གི་སྐུའི་འཁྲུངས་མཛད་སྒོ་རྒྱས་པ་ཞིག་སྐོང་ཚོགས་གནང་ཡོད་པ་དང་། མཛད་སྒོའི་ཐོག་ཉིན་དེའི་མཛད་སྒོའི་ཐོག་གདན་ས་བཀྲ་ཤིས་ལྷུན་པོའི་མཁན་པོ་གཟིག་རྒྱབ་རིན་པོ་ཆེ་མཆོག་དང་། བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་མཆོག་སྒྲུབ་ལགས། དེ་བཞིན་སྲིད་ཟུར་བློ་བཟང་སེང་གེ་ལགས་དང་བཀའ་ཟུར་བསྟན་འཛིན་བཀྲས་མཐོང་ལགས། བོད་མི་མང་སྤྱི་འཐུས་ཚེ་རིང་དོན་གྲུབ་ལགས་དང་མི་མང་བཅས་ལྷན་འཛོམས་གནང་ཡོད་འདུག
སྐུའི་འཁྲུངས་སྐར་མཛད་སྒོ་དེའི་ཐོག་༧གོང་ས་རྒྱལ་བ་རིན་པོ་ཆེ་མཆོག་ནས་བཀའ་ཡིག་ཅིག་སྩལ་གནང་མཛད་པའི་ནང་། གདན་ས་ཆེན་པོ་བཀྲ་ཤིས་ལྷུན་པོ་ནས་ཨ་རིའི་གྲོང་ཁྱེར་ནིའུ་ཡོག་ཏུ་པཎ་ཆེན་སྐུ་ཕྲེང་བཅུ་གཅིག་པའི་འཁྲུངས་སྐར་སྲུང་བརྩི་ཞུས་པར་ཡིད་སྤྲོ་དང་བཅས་བཀའ་དྲིན་ཆེ་ཞུ། རྒྱལ་པཎ་རིམ་བྱོན་བླ་སློབ་ཀྱི་འབྲེལ་བ་ཐུན་མོང་མིན་པ་ཞིག་ཏུ་མ་ཟད། ༧རྒྱལ་མཆོག་དགེ་འདུན་གྲུབ་ཀྱིས་བླ་ལྷའི་ལུང་བཞིན་གདན་ས་བཀྲ་ཤིས་ལྷུན་པོ་ཕྱག་བཏབ་པ་པཎ་ཆེན་རིན་བྱོན་གྱིས་བསྐྱངས་པ་དང་། པཎ་ཆེན་སྐུ་ཕྲེང་བཅུ་པ་སྐུ་ན་ཆུང་དུས་ནས་ངོ་དང་འབྲེལ་འདྲིས་ཟབ་པས་དམིགས་བསལ་གྱི་འབྲེལ་བ་ཡོད། གངས་ལྗོངས་བསྟན་འགྲོར་ཐུགས་བསྐྱེད་དུས་སུ་སྨིན་པའི་པཎ་ཆེན་སྐུ་ཕྲེང་བཅུ་པ་དགོངས་པ་གཞན་དོན་དུ་གཤེགས་པ་ནས་ཡང་སྲིད་རྩད་གཅོད་སོགས་ངོས་ལ་དམ་ཚིག་དང་ལོ་རྒྱུས་ཀྱིས་དཀྲིས་པའི་ལས་འགན་རྣམས་ཧུར་ཐག་གིས་བསྒྲུབས་ཀྱང་། ཆབ་སྲིད་གེགས་བར་གྱི་གཞན་དབང་དུ་སོང་བ་ཕངས་པ་ལྟར་སྣང་ཡང་། སྒོ་གསུམ་གཞན་དོན་དུ་བསྔོས་པའི་རྒྱལ་སྲས་བྱང་ཆུབ་སེམས་དཔའི་མཛད་པ་དཔག་པར་དཀས་བས་ཅི་མཛད་གཞན་དོན་དུ་མ་གྱུར་པ་ག་ལ་མངའ། ད་ལན་ཡང་སྲིད་རིན་པོ་ཆེ་དགུང་གྲངས་སོ་གསུམ་དུ་ཕེབས་པའི་སྐུའི་འཁྲུངས་སྐར་གང་རྒྱས་ཤིག་འབྲེལ་ཡོད་ཁྱེད་རྣམས་ནས་ཨ་རིའི་ནིའུ་ཡོག་ཏུ་ཚོགས་པར་བཀྲ་ཤིས་བདེ་ལེགས་དང་། མཆོག་སྤྲུལ་བསྟན་འཛིན་དགེ་འདུན་ཡེ་ཤེས་འཕྲིན་ལས་ཀྱི་ཞལ་མཇལ་གསུང་ཐོས་མྱུར་དུ་ཡོང་བའི་སྨོན་ལམ་དང་བཅས། ཅེས་གསུངས་འདུག
སྐུའི་འཁྲུངས་སྐར་དང་བསྟུན་་བྱེས་ཀྱི་གདན་ས་བཀྲ་ཤིས་ལྷུན་པོས་ཡོངས་ཁྱབ་བསྒྲགས་གཏམ་ཤིག་སྤེལ་བའི་ནང་། རྒྱ་ནག་གཞུང་གིས་ཉེས་མེད་བཙན་འཁྲིད་བྱས་པའི་ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དང་། ཡབ་ཡུམ་སྐུ་མཆེད་རྣམས་ད་ལྟ་གར་ཡོད་དང་། སྐུ་གཟུགས་ཀྱི་གནས་སྟངས་གང་འདྲ་ཡོད་མེད་གསལ་པོ་བཟོ་དགོས་པ་དང་། ཁོང་རྣམས་འཕྲལ་དུ་གློད་བཀྲོལ་གཏོང་དགོས། ཞེས་དང་། ཉེས་མེད་བཙན་འཁྲིད་བྱས་པའི་གདན་ས་བཀྲ་ཤིས་ལྷུན་པོའི་དབུ་འཛིན་དང་ཡང་སྲིད་འཚོལ་ཞིབ་ཚོགས་ཆུང་གི་འགན་འཛིན་གཅིག་ལྕོགས་སྐུ་ཞབས་བྱ་བྲལ་རིན་པོ་ཆེའི་གནས་སྟངས་ཇི་འདྲ་ཡོད་མེད་གསལ་བཤད་བྱེད་དགོས། མ་ཟད་སྐུ་ན་ཤིན་ཏུ་བགྲེས་པའི་རིན་པོ་ཆེ་ཁོང་འཕྲལ་དུ་གློད་བཀྲོལ་གཏོང་དགོས་པ། གདན་ས་བཀྲ་ཤིས་ལྷུན་པོའི་སྐུ་ཚབ་དང་རྒྱལ་སྤྱིའི་རང་དབང་ཅན་གྱི་སྐུ་ཚབ་ཚོགས་ཆུང་ཞིག་ཀུན་གཟིགས་མཆོག་དང་སྐུ་ཞབས་བྱ་བྲལ་རིན་པོ་ཆེའི་གནས་སྟངས་ངོ་མ་ཤེས་རྟོགས་ཆེད་མཇལ་འཕྲད་བྱེད་པར་གཏོང་དགོས། ཅེས་པའི་དོན་ཚན་གསུམ་ཅན་གྱི་འབོད་སྐུལ་ཞུས་ཡོད་འདུག
དེ་རིང་ཕྱི་རྒྱལ་ཡུལ་གྲུ་ཁག་ཏུ་གནས་སྡོད་བོད་མི་རྣམས་ཀྱིས་རྒྱ་ནག་གི་གཞུང་ཚབ་ཁང་མདུན་དུ་ངོ་རྒོལ་སྐད་འབོད་ཀྱི་ལས་འགུལ་སྤེལ་བཞིན་པ་ལྟར། བཞུགས་སྒར་གྱི་ལྷ་རྒྱལ་རིར་༧པཎ་ཆེན་རིན་པོ་ཆེ་མཆོག་གི་འཁྲུངས་སྐར་སྲུང་གཙི་ཞུས་འདུག་ལ། ཕྱི་དྲོར་བོད་རང་བཙན་སློབ་ཕྲུག་ཚོགས་པས་མེག་གྷན་ཁྲོམ་གཞུང་དུ་འཁྲུངས་སྐར་སྲུང་གཙི་ཞུས་ཡོད་པ་རེད།
གསར་འགོད་པ། པ་སངས་ཚེ་རིང་།
སྐུའི་འཁྲུངས་སྐར་མཛད་སྒོ་དེའི་ཐོག་༧གོང་ས་རྒྱ
