རྒྱ་ནག་གཞུང་གིས་ཇོ་མོ་གླང་མའི་དབུ་རྩེ་ཙམ་ལ་གནམ་གཤིས་བརྟག་དཔྱད་ཀྱི་ས་ཚིགས་འཛུགས་འཆར་ཡོད་འདུག

རྒྱ་ནག་གི་ཚན་རིག་རྟོག་ཞིབ་རུ་ཁག་ལྔ་ལས་གྲུབ་པའི་ཚན་རིག་རྟོག་ཞིབ་ཚོགས་ཆུང་ཞིག་གིས་བོད་དང་བལ་ཡུལ་གྱི་ས་མཚམས་སུ་ཁེལ་བའི་འཛམ་གླིང་གི་རི་བོ་མཐོ་ཤོས་ཇོ་མ་གླང་མའི་དབུ་རྩེར་སྨི་ ༤༠ ལྷག་ལས་མེད་པའི་མཚམས་དེར་རང་འགུལ་གནམ་གཤིས་བརྟག་དཔྱད་ས་ཚིགས་ཤིག་འཛུགས་རྒྱུ་ཡིན་སྐོར་བསྒྲགས་འདུག

Photo taken on April 24, 2022 shows an automatic meteorological station set up at an altitude of about 5,200 meters on Mount Qomolangma. [Photo/Xinhua]

རྒྱ་ནག་ཤིན་ཧྭ་གསར་ཁང་གི་གནས་ཚུལ་ནང་། ཚན་རིག་རྟོག་ཞིབ་ཡན་ལག་རུ་ཁག་ ༥ ནས་ཁྱོན་ཚན་རིག་རྟོག་ཞིབ་མི་སྣ་ ༢༧༠ ལྷག་གིས་གྲུབ་པའི་ཚོགས་ཆུང་ཞིག་གིས་ཇོ་མོ་གླང་མར་ཕྱོགས་བསྡུས་ཚན་རིག་རྟོག་ཞིབ་བྱེད་སྒོ་ཞིག་སྤེལ་བཞིན་ཡོད་པ་དང་། དེ་ནི་ཕྱི་ལོ་ ༢༠༡༧ ལོར་མགོ་བརྩམས་པའི་མཚོ་བོད་ས་མཐོའི་ཕྱོགས་བསྡུས་ཚན་རིག་རྟོག་ཞིབ་བྱེད་སྒོ་ཟེར་བ་དེའི་ཆ་ཤས་ཤིག་ཡིན་འདུག ད་བར་ཚན་རིག་རྟོག་ཞིབ་ཚོགས་ཆུང་དེའི་ངོས་ནས་ཇོ་མོ་གླང་མར་རྒྱ་མཚོའི་ངོས་ལས་མཐོ་ཚད་སྨི་ ༥༢༠༠ ནས་ ༨༣༠༠ བར་གྱི་གནམ་གཤིས་བརྟག་དཔྱད་ས་ཚིགས་ ༧ བསྐྲུན་ཡོད་པ་དང་། དེའི་ཁྲོད་ནས་ས་ཚིགས་ ༣ ནི་རྒྱ་མཚོའི་ངོས་ལས་མཐོ་ཚད་སྨི་ ༧༠༠༠ ཡན་ཡིན་ཞིང་། རིང་མིན་འཛུགས་འཆར་ཡོད་པའི་སྨི་ ༨༨༠༠ ཡི་གནམ་གཤིས་བརྟག་དཔྱད་ས་ཚིགས་དེ་ལེགས་གྲུབ་བྱུང་ཚེ། གོ་ལ་ཧྲིལ་པོའི་རྒྱ་མཚོའི་ངོས་ལས་ཆེས་མཐོ་ཤོས་ཀྱི་རང་འགུལ་གནམ་གཤིས་བརྟག་དཔྱད་ས་ཚིགས་སུ་འགྱུར་རྒྱུ་ཡིན་སྐོར་བརྗོད་འདུག

གཞན་ཡང་། ད་ཐེངས་ཀྱི་ཇོ་མོ་གླང་མའི་ཚན་རིག་རྟོག་ཞིབ་ནང་ཇོ་མོ་གླང་མའི་ས་ཁུལ་གྱི་ཁོར་ཡུག་འགྱུར་ལྡོག་ལ་དམིགས་ཏེ། རླུང་ཁམས་ཆེན་པོ་དང་། ཆུ། སྣོད་བཅུད། ས་ངོས་སོགས་ཀྱི་ཐད་ནས་ཕྱོགས་མང་པོའི་ཐོག་ནས་རྟོག་ཞིབ་བྱ་རྒྱུ་ཡིན་པ་དང་། ཚན་ཞིབ་མི་སྣས་སྔོན་ཐོན་གྱི་ལག་རྩལ་དང་། ཐབས་ཤེས། བྱ་ཐབས་བཅས་སྤྱད་དེ། ནུབ་རླུང་དང་དུས་རླུང་གི་མཐུན་སྦྱོར་ནུས་པ་དང་། ཨེ་ཤེ་ཡའི་ཆུ་གསོག་མཐོ་ལྕོག སྣོད་བཅུད་མ་ལག་དང་སྐྱེ་དངོས་སྣ་མང་རང་བཞིན། མིའི་རིགས་ཀྱི་བྱེད་སྒོ་སོགས་ཚན་རིག་གི་གནད་དོན་གལ་ཆེན་ལ་དམིགས་ནས་ཞིབ་འཇུག་བྱ་རྒྱུ་ཡིན་སྐོར་བཤད་འདུག

གནམ་གཤིས་ས་ཚིགས་དེ་དག་གིས་རི་བོ་ཇོ་མོ་གླང་མའི་རླུང་གི་རྒྱུག་ཚད་དང་ཁ་ཕྱོགས་བཅས་ཀྱི་གནས་ཚུལ་མཁོ་སྒྲུབ་ཡིན་པ་མ་ཟད། ཞ་ཚན་གྱི་གནས་སྟངས་དང་། འཁྱག་པ་བཞུར་ཚད་ཀྱིས་མཚོན་པའི་ཇོ་མོ་གླང་མའི་རང་བྱུང་ཁམས་ཆེན་མོའི་འགྱུར་ལྡོག་གི་གྲངས་གཞི་ཐོབ་རྒྱུར་ནུས་པ་ཆེན་པོ་ཐོན་གྱི་ཡོད་འདུག ཚན་རིག་རྟོག་ཞིབ་བྱེད་སྒོའི་ནང་ཞུགས་པའི་རྒྱ་ནག་གི་ཚན་རིག་པ་ཀྲའོ་ཧུ་པིའོ་ (Zhao Huabiao) ཟེར་བ་ཞིག་གིས། ང་ཚོའི་དམིགས་ཡུལ་ནི་འཛམ་གླིང་ནང་གི་རང་འགུལ་གནམ་གཤིས་ས་ཚིགས་མཐོ་ཤོས་དེ་འཛུགས་རྒྱུ་དང་། དེས་རྒྱ་ནག་ཙམ་དུ་མ་ཟད་འཛམ་གླིང་གི་ས་ཁུལ་མཐོ་ཤོས་ཀྱི་གནམ་གཤིས་འགྱུར་ལྡོག་གི་གནས་ཚུལ་ཤེས་རྟོགས་ཐུབ་རྒྱུའི་སྟོང་ཆ་དེ་ཁ་སྐོང་བྱ་རྒྱུ་རེད། ཅེས་དང་། གནམ་གཤིས་ས་ཚིགས་དེ་དག་ལ་ཉི་གློག་དང་གློག་མཛོད་བཀོལ་སྤྱོད་བྱ་རྒྱུ་ཡིན་ཞིང་། གནམ་གཤིས་ས་ཚིགས་ཀྱིས་རང་འགུལ་ཐོག་ནས་གནམ་གཤིས་འགྱུར་ལྡོག་གི་གནས་ཚུལ་རྣམས་བླངས་ཏེ་ཟུང་སྐར་བརྒྱུད་སྐུར་གྱི་རེད། ཅེས་བརྗོད་འདུག

ད་ལྟའི་ཆར་གནམ་གཤིས་བརྟག་དཔྱད་ས་ཚིགས་འཛུགས་མཁན་གྱི་ཚན་རིག་རྟོག་ཞིབ་མི་སྣ་རྣམས་ཀྱིས་གནམ་གཤིས་རན་འཚམ་ཞིག་ལ་རེ་སྒུག་བྱེད་བཞིན་ཡོད་པ་དང་། ད་ལྟ་རྒྱ་མཚོའི་ངོས་ལས་མཐོ་ཚད་སྨི་ ༨༨༤༨།༨༦ ཡོད་པའི་ཇོ་མོ་གླང་མའི་ལྷོ་ཕྱོགས་ཏེ། བལ་ཡུལ་ཕྱོགས་ཀྱི་མཐོ་ཚད་སྨི་ ༨༤༣༠ ཡི་མཚམས་སུ་དབྱིན་ཇི་དང་ཨ་རིའི་ཚན་རིག་པ་རྣམས་ཀྱིས་ཕྱི་ལོ་ ༢༠༡༩ ལོར་བཙུགས་པའི་གནམ་གཤིས་བརྟག་དཔྱད་ས་ཚིགས་དེ་འཛམ་གླིང་གི་ཆེས་མཐོ་ཤོས་དེ་ཡིན་པ་རེད་འདུག

དེ་སྔ་རྒྱ་ནག་གཞུང་དང་བལ་ཡུལ་ཙམ་དུ་མ་ཟད་འཛམ་གླིང་གི་རྒྱལ་ཁབ་མི་ཉུང་བས་ཇོ་མོ་གླང་མའི་མཐོ་ཚད་ཐད་མི་མཐུན་པ་ཆགས་ཡོད་པ་རེད། དེ་ཡང་ཕྱི་ལོ་ ༢༠༠༥ ལོར་རྒྱ་ནག་གཞུང་གིས་ཇོ་མོ་གླང་མའི་མཐོ་ཚད་དེ་སྨི་ ༨༨༤༤ ཡིན་སྐོར་བསྒྲགས་ཡོད་ཀྱང་། དེར་བལ་ཡུལ་གཞུང་གིས་མོས་མཐུན་མ་བྱས་པར་བརྟེན། རྒྱལ་ཁབ་ཕྱོགས་གཉིས་ཀྱིས་ཇོ་མོ་གླང་མའི་མཐོ་ཚད་དེ། ཕྱི་ལོ་ ༡༩༥༥ ལོར་རྒྱ་གར་གྱིས་བཏོན་པའི་མཐོ་ཚད་སྨི་ ༨༨༤༨ དེར་གཞི་བཅོལ་གྱི་ཡོད་པ་རེད། འོན་ཀྱང་ཕྱི་ལོ་ ༢༠༡༩ ལོར་རྒྱ་ནག་གི་སྲིད་འཛིན་ཞི་ཅིན་ཕིང་གིས་བལ་ཡུལ་དུ་གཞུང་འབྲེལ་སྐོར་སྐྱོད་བྱས་པ་དང་བསྟུན། རྒྱ་ནག་དང་བལ་ཡུལ་གཉིས་ཀྱིས་མཉམ་འབྲེལ་ཐོག་ནས་ཇོ་མོ་གླང་མའི་མཐོ་ཚད་གཞལ་རྒྱུར་མོས་མཐུན་བྱུང་བ་ལྟར། ཕྱི་ལོ་ ༢༠༢༠ ལོར་ཕྱོགས་གཉིས་ངོས་ནས་རྟོག་ཞིབ་བརྒྱུད་ཇོ་མོ་གླང་མའི་མཐོ་ཚད་དེ་རྒྱ་མཚོའི་ངོས་ལས་སྨི་ ༨༨༤༨།༨༦ ཡོད་པ་ཡོངས་ཁྱབ་གསལ་བསྒྲགས་སྤེལ་ཡོད་པ་རེད།

གསར་འགོད་པ། པ་སངས་ཚེ་རིང་།