རྒྱལ་སྤྱིའི་རང་བཞིན་གྱི་ནང་པའི་དྲ་ལམ་ཚོགས་འདུ་བསྡུས།

དེ་རིང་གནས་བརྟན་སྡེ་པའི་ལུགས་ཀྱི་སངས་རྒྱས་བཅོམ་ལྡན་འདས་སྐུ་འཁྲུངས་པ་དང་། སངས་རྒྱས་པ། མྱ་ངན་ལས་འདས་པ་བཅས་དུས་ཚིགས་གསུམ་ལྡན་གྱི་ཉིན་མོ་དང་བསྟུན། རྒྱལ་སྤྱིའི་ནང་པའི་ལྷན་ཚོགས་ཀྱི་གོ་སྒྲིག་དང་རྒྱ་གར་གྱི་རིག་གཞུང་ལྷན་ཁང་གི་རྒྱབ་སྐྱོར་འོག་རྒྱལ་སྤྱིའི་རང་བཞིན་གྱི་དྲ་ལམ་ཚོགས་འདུ་ཞིག་འཚོགས་པའི་ཐོག ༧གོང་ས་རྒྱལ་བ་རིན་པོ་ཆེ་མཆོག་གི་དབུས་པའི་འཛམ་གླིང་གི་ནང་པའི་བླ་ཆེན་མང་པོ་ཞིག་ཕེབས་ཏེ་བཀའ་སློབ་གནང་སོང་།

དེ་ཡང་༧གོང་ས་རྒྱལ་བ་རིན་པོ་ཆེ་མཆོག་ནས་བཞུགས་སྒར་རྒྱལ་བའི་ཕོ་བྲང་ནས་བརྙན་ལམ་བརྒྱུད་བཀའ་སློབ་སྩལ་དོན། ཆོས་གྲོགས་ཚོ། དེ་རིང་ས་ག་ཟླ་བའི་དུས་ཆེན་རེད། ས་ག་ཟླ་བ་ནི་བཅོམ་ལྡན་འདས་ཀྱིས་ལོ་དྲུག་དཀའ་སྤྱད་མཛད་ནས་མངོན་པར་རྫོགས་པ་སངས་རྒྱས་པའི་མཛད་པའི་དུས་ཚིགས་ཁྱད་པར་ཅན་ཆགས་ཀྱི་ཡོད་པ་རེད། བཅོམ་ལྡན་འདས་ཁོང་རང་གི་ཉམས་མྱོང་གི་ཐོག་ནས། དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟགས་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །ཞེས་པ་དེ་བཅོམ་ལྡན་འདས་ཀྱི་ཐུན་མོང་མ་ཡིན་པའི་ཁྱད་ཆོས་རེད་འདུག བཅོམ་ལྡན་འདས་ཁོང་རང་གི་བཀའ་དེ་ལ་བསྲེགས་བཅད་བརྡར་བའི་གསེར་ནང་བཞིན། དཔྱད་པ་བྱོས་ཞེས་གསུངས་འདུག ངས་ཆོས་ལུགས་ཚང་མར་གུས་ཞབས་བྱེད་ཀྱི་ཡོད། ཞེ་དྲགས་ཡག་པོ་རེད། ཚང་མས་སྙིང་རྗེ་གསུང་གི་ཡོད་རེད། ཞེ་དྲགས་ཡག་པོ་རེད། རེད་དེ། བསྲེགས་བཅད་བརྡར་བའི་གསེར་བཞིན་དུ། ཞེས་དཔྱད་པ་བྱོས་ཟེར་བ་དེ་ཆོས་ལུགས་གཞན་པ་ལ་ཕལ་ཆེར་ཡོད་མ་རེད། བཅོམ་ལྡན་འདས་ཀྱི་བཀའ་རེད་འདུག ཅེས་གསུངས་སོང་།

ཡང་མགོན་པོ་མཆོག་གིས། བཅོམ་ལྡན་འདས་རང་གི་བསླབ་བྱ་གཙོ་བོ་ནི། ཐུབ་རྣམས་སྡིག་པ་ཆུ་ཡིས་མི་འཁྲུ་ཞིང་། །འགྲོ་བའི་སྡུག་བསྔལ་ཕྱག་གིས་མི་སེལ་ལ། ཉིད་ཀྱི་རྟོགས་པ་གཞན་ལ་སྤོ་མིན་པས། །ཆོས་ཉིད་བདེན་པ་བསྟན་ནས་གྲོལ་བར་མཛད། །ཅེས་སངས་རྒྱས་བཅོམ་ལྡན་འདས་རྩ་བ་སྙིང་རྗེ་ཡི་བདག་ཉིད་ཅན་འདི་ཡིས། ཁོང་རང་གི་ཐུགས་རྒྱུད་ཀྱི་རྟོགས་པ་མི་ལ་བྱིན་པ་སོགས་གནང་ཡོད་མ་རེད། གནས་ལུགས་འགྲེལ་བཤད་བསྐྱོན་ནས་གདུལ་བྱས་བསམ་བློ་བཏང་སྟེ་ཉམས་སུ་བླང་དགོས་པའི་བཀའ་གནང་ཡོད་རེད། དེར་བརྟེན་བཅོམ་ལྡན་འདས་ཀྱིས་ཆོས་འཁོར་རིམ་པ་གསུམ་དེ་གལ་ཆེན་པོ་མཐོང་གི་འདུག བདེན་བཞིའི་ཆོས་འཁོར་ཟེར་བ་དེ་སྡུག་བསྔལ་བདེན་པ། ཀུན་འབྱུང་བདེན་པ། འགོག་པའི་བདེན་པ། ལམ་གྱི་བདེན་པ་ཟེར་ནས་བདེན་པ་བཞིའི་རྣམ་གཞག་གསུངས། འདི་སངས་རྒྱས་པའི་ཆོས་ཀྱི་སྒྲོམ་གཞི་རེད་འདུག འགོག་པའི་བདེན་པ་ཟེར་བ་དེ་གང་འདྲ་ཡོང་གི་རེད་ཟེར་ནས་དྲི་བ་ཞིག་བསླེབ་ཡོང་གི་རེད། དེ་དུས་སེམས་ཀྱི་ཆོས་ཉིད་བཤད་ཀྱི་ཡོད་རེད། དེར་བརྟེན་ཆགས་སྡང་སོགས་ཉོན་མོངས་ཚང་མའི་རྩ་བ་ནི་བདག་ཏུ་འཛིན་པའི་བདག་འཛིན་ལ་ཐུག་གི་ཡོད་པ་རེད། བཅོམ་ལྡན་འདས་ཀྱིས་གནས་བྱ་རྒོད་ཕུང་པོ་རི་ལ་ཤེར་ཕྱིན་གྱི་ཆོས་འཁོར་གསུངས་ཏེ། གཟུགས་སྟོང་པའོ། །སྟོང་པ་ཉིད་གཟུགས་སོ། །གཟུགས་ལས་སྟོང་པ་ཉིད་གཞན་མ་ཡིན། སྟོང་པ་ཉིད་ལས་ཀྱང་གཟུགས་གཞན་མ་ཡིན་ནོ། །ཟེར་བའི་སྟོང་ཉིད་བཞིའི་སྐོར་གསུངས་འདུག བདག་ཏུ་འཛིན་པ་དེ་ལ་གཉེན་པོ་མཐར་ཐུག་དེ་བདག་ཉིད་རྟོགས་པའི་ཤེས་རབ་ཆགས་ཀྱི་ཡོད་རེད། དེར་བརྟེན་འཁོར་ལོ་དང་པོའི་འགོག་བདེན་ཟེར་བ་དེ་ཡོང་སྲིད་པ་དང་གང་འདྲ་ཡོད་རེད་ཟེར་ན། བདག་ཏུ་འཛིན་པ་དེ་ལ་གཉེན་པོ་ཡོད་དང་མེད། གཉེན་པོ་ཡོད་ན་དེ་གོམས་ཐུབ་རྒྱུ་ཡོད་མེད། འདི་གོམས་པའི་ཐོག་ནས་བདག་ཏུ་འཛིན་པ་སེལ་ཐུབ་པ་ཡོང་གི་ཡོད་རེད། དེ་ལྟར་བྱས་ན་ཚན་རིག་དང་མཐུན་པ་རེད་འདུག དེར་བརྟེན། གནས་བྱ་རྒོད་ཕུང་པོ་རི་ལ་ཤེར་ཕྱིན་གྱི་ཆོས་འཁོར་དེ་དག་གསུངས། ཡང་ཤེར་ཕྱིན་གྱིས་ཆོས་ཐམས་ཅད་ངོ་བོ་ཉིད་ཀྱིས་མ་འགྲུབ་པ་རེད་ཟེར་བ་དེ་ཏོག་ཙམ་རྟོགས་ཁག་པོ་ཆགས་ཀྱི་ཡོད་དུས། འཁོར་ལོ་མཐའ་མས་གདུལ་བྱའི་ཁམས་དང་བསྟུན་ནས། ང་རང་ཚོ་ལ་མཐོང་བསྡད་པའི་གཟུགས་དེ་སྣང་བ་ལྟར་དུ་གྲུབ་ཡོད་མ་རེད་ཟེར་བའི་སྐད་ཆ་བསླེབས་ཡོང་དུས། ནང་སེམས་ཀྱི་བདག་ཉིད་རེད་ཟེར་བའི་གཟུགས་འཛིན་གཉིས་སྟོང་ཟེར་བ་ཞིག་གསུང་གི་ཡོད་རེད། སངས་རྒྱས་བཅོམ་ལྡན་འདས་ཀྱིས་ལྟ་གྲུབ་ཀྱི་ཐོག་ནས་དངོས་གནས་དྲང་གནས་ཞེ་དྲགས་ཟབ་པོ་རེད་འདུག ཅེས་གསུངས།

མུ་མཐུད་༧གོང་ས་མཆོག་གིས་གསུངས་དོན། ངོས་རང་ནི་བཅོམ་ལྡན་འདས་ཀྱི་རྗེས་འབྲང་དང་དགེ་སློང་ཞིག་ཆགས་ཀྱི་ཡོད་རེད། ཞོགས་པ་ལངས་པ་དང་རྟེན་འབྲེལ་བསྟོད་པ་བཏོན་ནས་ཐུབ་དབང་གི་རྟེན་འབྱུང་གི་དེ་ཁོ་ན་ཉིད་གསུངས་པ་དེ་ལ་བསམ་བློ་བཏང་སྟེ། བྱང་ཆུབ་ཀྱི་སེམས་ལ་བསམ་བློ་བཏང་སྟེ་ཉིན་ལྟར་དེ་ལྟར་འགྲོ་ཡི་ཡོད། འདི་ཞེ་དྲགས་སེམས་ལ་ཕན་གྱི་འདུག མགོན་པོ་ཀླུ་སྒྲུབ་ཀྱི་དབུ་མ་རྩ་བ་ཤེས་རབ་ནང་ལོགས་ནས་འདིའི་རིགས་ཀྱི་འགྲེལ་བཤད་བསྐྱོན་ཡོང་དུས། དངོས་གནས་དྲང་གནས་ཀྱིས་རང་དབང་མེད་པར་ཡིད་འཕྲོག་སྟེ། སྟོང་ཉིད་ཀྱི་གོ་བ་ཟབ་ཏུ་ཕྱིན་པའི་ཚོད་ཀྱིས་སྟོང་པ་ཉིད་ཀྱི་དོན་ལ་རྨོངས་ནས་འཛམ་གླིང་འདིའི་སྒང་ལ་ཡོང་བའི་ཆགས་སྡང་དེ་ལ་སྙིང་རྗེ་སྐྱེ་རྒྱུ་དང་། དེ་དག་ལ་ཐབས་གང་གིས་རྨོངས་པ་སེལ་ཐུབ་ན་བསམ་པའི་བློ་གཅིག་བསླེབས་ཡོང་གི་འདུག ཕན་ཐོགས་ཞེ་དྲགས་འདུག སངས་རྒྱས་བཅོམ་ལྡན་འདས་རྩ་ཆེན་པོ་རེད་འདུག་ཟེར་བ་གཅིག་པོ་མིན་པར། སྟོན་པའི་མཛད་པ་བཅུ་གཉིས་ཡོད་རེད་དེ་གསུང་ལ་དཔྱད་པ་བྱས་ནས་བསམ་བློ་གཏོང་རྒྱུ་དེ་བཅོམ་ལྡན་འདས་རང་གི་ཆོས་ལུགས་འདི་ཐུན་མོང་མ་ཡིན་པ་ཞིག་རེད་འདུག ག་ཚོད་ཀྱིས་རིག་པས་དཔྱད་པ་བྱས་ན། དེའི་ཚོད་ཀྱིས་སེམས་ལ་ངེས་པ་རྙེད་རྒྱུ་ཡོད་པ་དང་། མཐར་གཏུག་ཡོང་དུས་རང་རྒྱུད་ཀྱི་བདེན་འཛིན་ལ་གནོད་ཐུབ་པ་ཞིག་ཡོང་གི་ཡོད་རེད། ངོས་རང་གིས་དབུ་མ་འཇུག་པའི་ཚིག་དེ་ཉིན་ལྟར་འདོན་ཀྱི་ཡོད། དེ་ལྟར་བློ་གྲོས་ཟེར་གྱིས་སྣང་བ་གསལ་བྱས་པའི། །རང་གི་ལག་ན་གནས་པའི་སྐྱུ་རུ་ར་བཞིན་དུ། །སྲིད་གསུམ་འདི་དག་མ་ལུས་གདོད་ནས་སྐྱེ་མེད་པར། །རྟོགས་ཏེ་ཐ་སྙད་བདེན་པའི་སྟོབས་ཀྱིས་འགོག་པར་འགྲོ། །རྟག་ཏུ་འགོག་པར་གཏོགས་པའི་བསམ་ལྡན་ཡིན་མོད་ཀྱི། །འགྲོ་བ་མགོན་མེད་པ་ལ་སྙིང་རྗེའང་སྐྱེད་པར་བྱེད། །དེ་གོང་བདེ་གཤེགས་གསུང་སྐྱེས་སངས་རྒྱས་འབྲིང་བཅས་ནི། །མ་ལུས་པ་རྣམས་བློ་ཡིས་ཕམ་པར་བྱེད་པའང་ཡིན། །ཀུན་རྫོབ་དེ་ཉིད་གཤོག་ཡངས་དཀར་པོ་རྒྱས་གྱུར་པ། ངང་པའི་རྒྱལ་པོ་དེ་ནི་སྐྱེ་བོའི་ངང་པ་ཡིས། །མདུན་དུ་བདར་ནས་དགེ་བའི་རླུང་གི་ཤུགས་སྟོབས་ཀྱིས། །རྒྱལ་བའི་ཡོན་ཏན་རྒྱ་མཚོའི་ཕ་རོལ་མཆོག་ཏུ་འགྲོ། །ཟེར་བ་དེ་ལ་ངས་ཉིན་ལྟར་བསམ་བློ་གཏོང་གི་ཡོད། ཅེས་དང་། ཆོས་གྲོགས་རྣམ་པ་ཚོ། དེ་རིང་དུས་ཚིགས་ཁྱད་པར་ཅན་ཡིན་པར་བརྟེན་སྟོན་པའི་གསུང་གི་འཕྲིན་ལས་ལ་དོ་སྣང་ཡག་པོ་བྱེད། དེ་ཡང་སྔོན་ལ་སློབ་སྦྱོང་བྱེད་དགོས་ཀྱི་ཡོད་རེད། སློབ་སྦྱོང་བྱས་ནས་བདེན་བཞིའི་རྣམ་གཞག་གསུངས་པ་དེ་ལ་བསམ་བློ་བཏང་། དེའི་སྒང་ལ་བྱང་ཆུབ་ཀྱི་སེམས་ལ་བསམ་བློ་བཏང་བ་སོགས་དེ་ལྟར་བྱས་ན། དངོས་གནས་དྲང་གནས་ཀྱིས་སེམས་ལ་ཞི་བདེ་དང་ཁོར་ཡུག་ཞི་བདེ་ཡོང་རྒྱུ་འདུག དེར་བརྟེན་ཆོས་གྲོགས་ཚང་མས་འདི་དགོངས་པ་འཇགས་རོགས་གནང་། ཞེས་གསུངས་སོང་།

དེ་བཞིན་ཁེམ་བྷོ་ཌི་ཡ་རྒྱལ་ཁབ་ཀྱི་ནང་པའི་བླ་ཆེན་ཊེབ་ཝོང་ (Samdech Preah Agga Maha Sangharajadhipati Tep Vong ) མཆོག་གིས་ཡིག་ཐོག་འཚམས་འཕྲིན་གནང་བའི་ནང་། ང་ཚོ་ནང་པའི་རྗེས་འབྲང་བ་ཞིག་ཡིན་པའི་ཆ་ནས། སྟོན་པ་བཅོམ་ལྡན་འདས་ཀྱིས་སངས་མ་རྒྱས་ཀྱི་བར་དུ་བྱང་ཆུབ་ཀྱི་སེམས་བསྐྱེད་པ་དང་། མཐར་མྱ་ངན་ལས་མ་འདས་ཀྱི་བར་དུ་འགྲོ་བ་གཞན་རྣམས་སངས་རྒྱས་ཀྱི་ལམ་དུ་འཇུག་རྒྱུར་དཀའ་བ་རྒྱ་ཕྲག་སྟོན་པར་མཛད་པ་ལ་དད་པ་ཆེན་པོ་ཡོད་པ་དང་། དེ་རིང་སྟོན་པ་བཅོམ་ལྡན་འདས་ཀྱི་དུས་ཚིགས་ཁྱད་པར་ཅན་གསུམ་འཛོམས་ཉིན་མོ་འདིར། ང་ཚོ་ཚང་མས་རང་ཉིད་ཀྱི་འཚོ་བའི་ཁྲོད་དུ་སངས་རྒྱས་པའི་ཆོས་ཀྱི་གོ་བ་ལག་ལེན་སྔར་ལྷག་བྱ་རྒྱུ་གལ་ཆེན་ཡིན་པ་རེད། ཅེས་དང་། ནང་པ་ཞིག་ཡིན་པའི་ཆ་ནས་སྤྱི་ཚོགས་ཡར་རྒྱས་ཐད་སྲི་ཞུ་ཞབས་འདེགས་སྒྲུབ་དགོས་པ་དང་། ཕྱི་དངོས་པོ་དང་ནང་སེམས་ཀྱི་གོང་འཕེལ་གཉིས་མཉམ་དུ་འགྲོ་དགོས་པ་གལ་ཆེན་ཡིན་སྐོར་སོགས་གསུངས་ཡོད་འདུག

དེའི་རྗེས་ཀོ་རི་ཡའི་ནང་ཆོས་ཀྱི་ཇེ་གེ་ཆོས་བརྒྱུད་ཀྱི་དབུ་བླ་ཇུང་བོང་སུང་པཱ་ (His Holiness Jungbong Seongpa) མཆོག་གིས། འཛམ་གླིང་གི་ནང་པའི་རྗེས་འབྲང་བ་ཀུན་ལ་དགེ་རྒན་གཅིག་ཡོད་པ་དེ་སྟོན་པ་བཅོམ་ལྡན་འདས་ཡིན་སྟབས། ང་ཚོ་ཚང་མས་ཁོང་གི་བཀའ་ཇི་བཞིན་བསྒྲུབ་ཆེད། ཕན་ཚུན་དབར་འབྲེལ་ལམ་དང་མཉམ་འབྲེལ་ཀྱི་སྒོ་ནས་ནང་བསྟན་ལ་སློབ་སྦྱོང་དང་འཛམ་གླིང་གི་སྐྱེ་འགྲོ་གཞན་ལ་ཕན་ཐོགས་ཆེད་ཁྱབ་སྤེལ་ཤུགས་ཆེར་བྱ་དགོས་པ་ཡིན། འཛམ་གླིང་དུ་རྒྱ་ཁྱབ་ཏུ་སོང་བའི་ཏོག་དབྱིབས་གཉན་རིམས་འདིས་ཀོ་རི་ཡ་དང་རྒྱ་ནག་གི་མི་མང་བར་སྡུག་བསྔལ་ཆེན་བྱིན་ཡོད་ཅིང་། སངས་རྒྱས་བཅོམ་ལྡན་འདས་ཀྱི་བཀའ་ཡོངས་རྫོགས་འགྲོ་བའི་སྡུག་བསྔལ་སེལ་རྒྱུའི་དགོངས་པ་ལས་འཁྲུངས་པ་ཞིག་ཡིན་ཞིང་། སངས་རྒྱས་ཀྱི་གསུང་རེ་རེ་ནི་སྐྱེ་འགྲོའི་སྡུག་བསྔལ་སེལ་བའི་སྨན་ལྟར་ཡིན་ལ། དེས་ཏོག་དབྱིབས་གཉན་རིམས་ཚུད་པའི་སྡུག་བསྔལ་ཡོད་ཚད་ལས་གྲོལ་བར་བྱེད་པ་ཡིན་པས། ང་ཚོས་སངས་རྒྱས་ཀྱི་གོ་འཕང་ཐོབ་པ་དང་འགྲོ་བ་ཐམས་ཅད་སྐྱོབ་པའི་ཆེད་དུ་གང་ནུས་ཅི་ཐུབ་ཀྱིས་ནང་ཆོས་ལ་སློབ་གཉེར་དང་ཉམས་ལེན་བྱ་དགོས་པ་ཡིན། ཞེས་གསུངས་འདུག

དེ་ནས་ཝི་ཊིནམ་རྒྱལ་ཁབ་ཀྱི་ནང་པའི་བླ་ཆེན་ཋིག་ཀྲི་ཁོང་ (His Holiness Prof. Thich Tri Quang) མཆོག་གིས་གནང་བའི་འཚམས་འཕྲིན་ནང་། དེ་རིང་ནི་ང་ཚོས་ངེས་པར་དུ་སྟོན་པ་བཅོམ་ལྡན་འདས་ཀྱི་མཛད་པ་ལ་ཕྱིར་དྲན་གྱིས། ཁོང་གི་བྱམས་སྙིང་རྗེ་དང་ཤེས་རབ་ཀྱི་བཀའ་སློབ་དེ་དག་དང་། འགྲོ་བ་མིའི་རིགས་ལ་མཛད་པའི་ཞབས་འདེགས། དེ་བཞིན་ཁོང་གི་མིའི་རིགས་ཀྱི་ལོ་རྒྱུས་ཁྲོད་འཇོག་གནང་མཛད་པ་བཅས་རྗེས་སུ་དྲན་དགོས་པ་རེད། ཅེས་དང་། ཁྱད་འཕགས་ཅན་གྱི་ཉིན་མོ་འདིར་ཚང་མས་འཛམ་གླིང་འདིར་དམག་འཁྲུག་ཆད་དེ་ཞི་བདེ་ཡོང་རྒྱུ་དང་། ཏོག་དབྱིབས་གཉན་རིམས་འདི་ཉིད་མྱུར་དུ་ཞི་བའི་སྨོན་ལམ་འདེབས་དགོས་སྐོར་གསུངས་སོང་། དེ་བཞིན་ཨུ་རུ་སུའི་ནང་བསྟན་གྱི་དབུ་བླ་མཁན་པོ་བླ་མ་དམ་པ་ཨ་ཡུ་ཤིབ་ (Khambo Lama Damba Ayusheev) མཆོག་གིས། ངས་ཨུ་རུ་སུའི་ནང་པ་ཚུད་པའི་འཛམ་གླིང་གི་སྟོན་པའི་རྗེས་འབྲང་བ་ཀུན་བདེ་སྐྱིད་ལྡན་ཞིང་བསམ་དོན་ལྷུན་གྲུབ། འཛམ་གླིང་ཞི་བདེ་དང་འགྲོ་བ་རྣམས་སངས་རྒྱས་གོ་འཕང་ཐོབ་པའི་སྨོན་ལམ་ཞུ་ཡི་ཡོད། བྱང་ཆུབ་ཤིང་ནི་སངས་རྒྱས་ཀྱི་གསུང་གི་མཚོན་དོན་ཞིག་ཡིན་ལ། དེ་རིང་ངོས་རང་ཤིང་སྡོང་འདིའི་འོག་ནས་གྲོགས་པོ་རྣམ་པ་དང་འཛམ་གླིང་ཁྱོན་དུ་བཞུགས་པའི་ནང་པའི་རྗེས་འབྲང་བ་རྣམས་ལ་ནང་བསྟན་འདི་ཉིད་བྱང་ཆུབ་ཤིང་ལྟར་འཕེལ་དུ་འཇུག་རྒྱུའི་རེ་སྐུལ་ཞུ་ཡི་ཡོད། ཅེས་བཀའ་གནང་ཡོད་འདུག

གཞན་ཡང་། སོག་པོའི་དགའ་ལྡན་ཐེག་ཆེན་གླིང་དགོན་པའི་མཁན་པོ་ (Khamba Nomun Khan Gabju Choijamts Demberel) མཆོག་གིས། ནང་པ་སངས་རྒྱས་པའི་ཆོས་ནི་འགྲོ་བ་མིའི་ཐོབ་ཐང་དང་རང་དབང་། འདྲ་མཉམ། དབྱེ་འབྱེད་མེད་པ། ཕོ་མོ་འདྲ་མཉམ་ཡིན་པ་སོགས་མཚོན་གྱི་ཡོད་པ་རེད། རང་ཉིད་ཀྱི་མི་ཚེ་བདེ་སྐྱིད་ལྡན་པ་ཡོང་བར་ནང་ཆོས་སློབ་གཉེར་བྱ་དགོས་པ་དང་ལོ་ངོ་བརྒྱ་ཕྲག་མང་པོའི་གོང་དུ་རྒྱལ་ཁབ་མང་པོས་ནང་ཆོས་སློབ་གཉེར་བྱེད་བཞིན་ཡོང་པ་རེད། ནང་པ་སངས་རྒྱས་པའི་ཆོས་ཀྱིས་དེང་དུས་ཀྱི་སྤྱི་ཚོགས་འདིའི་ནང་དགོས་མཁོ་ཆེ་བའི་ཚུལ་ཁྲིམས་དང་ཞི་བདེ། བཟོད་པ། སྙིང་རྗེ། ཤེས་རབ་བསླབ་ཀྱི་ཡོད་པ་རེད། དེར་བརྟེན་ནང་ཆོས་ནི་ཤིན་ཏུ་གལ་ཆེན་པོ་ཡིན་པ་དང་མི་མང་ལ་གོ་རྟོགས་སྤེལ་རྒྱུ་ཤིན་ཏུ་གལ་ཆེན་ཡིན་སྐོར་སོགས་གསུངས་འདུག

ད་ལན་གྱི་དྲ་ལམ་ཚོགས་འདུའི་ཐོག་དཔལ་ས་སྐྱའི་ཁྲི་འཛིན་ཞེ་གཉིས་པ་༧སྐྱབས་མགོན་རཏྣ་བཛྲ་རིན་པོ་ཆེ་མཆོག་དང་སི་ཏུ་རིན་པོ་ཆེ་མཆོག གླིང་མཆོག་སྤྲུལ་རིན་པོ་ཆེ་མཆོག སྟག་ལུང་བསྟན་འཛིན་ཀུན་བཟང་འཇིགས་མེད་རིན་པོ་ཆེ་མཆོག དེ་བཞིན་རྒྱལ་འབུམ་སྤྲུལ་སྐུ་རིན་པོ་ཆེ་མཆོག་དང། ལྡི་ལི་བོད་ཁང་གི་འགན་འཛིན་དགེ་བཤེས་རྡོ་རྗེ་དགྲ་འདུལ་ལགས་བཅས་ཀྱིས་ཀྱང་མཉམ་ཞུགས་གནང་ཡོད་འདུག

གསར་འགོད་པ། བསྟན་འཛིན་ཕུར་བུ། པ་སངས་ཚེ་རིང་།