རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པས་ཨ་རིའི་གཞུང་ནས་བོད་དོན་དམིགས་བསལ་འབྲེལ་མཐུད་པ་ཟེར་བ་ཞིག་བསྐོས་ཏེ་རྒྱ་ནག་གི་ནང་སྲིད་ལ་ཐེ་བྱུས་བྱེད་བཞིན་པར་རྒྱ་ནག་ཕྱོགས་ནས་མཐའ་གཅིག་ཏུ་ངོ་རྒོལ་དང་ངོས་ལེན་ནམ་ཡང་མེད་ཅེས་ཡང་རྒོལ་གཏམ་བསྒྲགས་འདུག
ཟླ་འདིའི་ཕྱི་ཚེ ༡༨ ཉིན་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་ཨ་ཛི་ར་ཛེ་ཡ་(Uzra Zeya) མཆོག་གིས་སྣེ་ཁྲིད་པའི་ཨ་རིའི་གཞུང་འབྲེལ་མི་སྣའི་སྐུ་ཚབ་ཚོགས་ཆུང་ཞིག་བཞུགས་སྒར་དྷ་རམ་ས་ལར་འཚམས་གཟིགས་སུ་ཕེབས་ཏེ། ༧གོང་ས་རྒྱལ་བ་རིན་པོ་ཆེ་ལ་མཇལ་བཅར་ཞུས་པ་དང་། བོད་མིའི་སྒྲིག་འཛུགས་ཀྱི་གཞུང་དང་གཞུང་འབྲེལ་མ་ཡིན་པའི་ཚོགས་སྡེ་ཁག་སོགས་སུ་གཟིགས་སྐོར་ལེགས་པར་གྲུབ་ཡོད་པ་དང་བསྟུན། ཁ་སང་ཉིན་རྒྱབ་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཀྲའོ་ལི་ཅན་( Zhao Lijian ) ཟེར་བ་དེས་གཞུང་འབྲེལ་གྱི་རྒྱུན་ལྡན་གསར་འགོད་གསལ་བསྒྲགས་སྟེང་། ཨ་རིའི་གཞུང་ནས་བོད་དོན་དམིགས་བསལ་འབྲེལ་མཐུད་པ་ཟེར་བ་ཞིག་བསྐོས་ཏེ་རྒྱ་ནག་གི་ནང་སྲིད་ལ་ཐེ་བྱུས་བྱེད་བཞིན་པར་རྒྱ་ནག་ཕྱོགས་ནས་མཐའ་གཅིག་ཏུ་ངོ་རྒོལ་དང་ངོས་ལེན་ནམ་ཡང་མེད་ཅེས་རྒོལ་གཏམ་བསྒྲགས་འདུག
ཡང་ཀྲའོ་ལི་ཅན་གྱིས་བཙན་བྱོལ་བོད་མིའི་སྒྲིག་འཛུགས་ནི་ཁ་བྲལ་ཆབ་སྲིད་ཚོགས་པ་ཞིག་དང་རྒྱ་ནག་གཞུང་གི་རྩ་ཁྲིམས་དང་ཁྲིམས་སྒྲིག་ལ་རྩིས་མེད་གཏོང་མཁན་གྱི་ཁྲིམས་མཐུན་མ་ཡིན་པའི་ཚོགས་སྡེ་ཞིག་ཡིན་པས་རྒྱལ་སྤྱིའི་ཐོག་རྒྱལ་ཁབ་སུ་གཅིག་གིས་ཀྱང་ངོས་ལེན་བྱེད་ཀྱི་མེད་སྐོར་དང་། ༧གོང་ས་རྒྱལ་བ་རིན་པོ་ཆེ་མཆོག་ནི་ཆོས་ལུགས་ཀྱི་མི་སྣར་བརྫུས་པའི་ཆབ་སྲིད་ཀྱི་བྲོས་བྱོལ་བ་ཞིག་དང་། མགོན་པོ་གང་ཉིད་ཀྱིས་ཁ་བྲལ་གྱི་ལས་འགུལ་སྤེལ་ཏེ། བོད་རྒྱ་ནག་གི་ཆ་ཤས་ནས་ཐོན་ཐབས་བྱེད་ཀྱི་ཡོད་ཚུལ། ཨ་རིའི་བོད་དོན་དམིགས་བསལ་འབྲེལ་མཐུད་པ་བསྐོ་བཞག་བྱས་པ་དེས། རྒྱ་ནག་གཞུང་གི་ནང་སྲིད་ལ་ཐེ་བྱུས་བྱས་པའི་ཆ་ཤས་སུ་གྱུར་ཡོད་སྟབས། རྒྱ་ནག་གཞུང་གིས་དེའི་ཐད་ལ་ངོ་རྒོལ་དང་ནམ་ཡང་ངོས་ལེན་བྱ་རྒྱུ་མིན་སྐོར་བསྒྲགས་འདུག
གཞན་ཡང་། མགྲིན་ཚབ་པ་དེས། ཨ་རིའི་གཞུང་གིས་བོད་རང་བཙན་ཡིན་པར་རྒྱབ་སྐྱོར་མི་བྱེད་པར་ངེས་པར་དུ་བོད་རྒྱ་ནག་གི་ཆ་ཤས་ཡིན་པར་ངོས་ལེན་བྱ་དགོས་པ་མ་ཟད། ཨ་རིས་བོད་དོན་ལ་ཁ་གཡར་ནས་རྒྱ་ནག་གཞུང་གི་ནང་སྲིད་ལ་ཐེ་བྱུས་བྱེད་བཞིན་པ་མཚམས་འཇོག་དང་། རྒྱ་ནག་གཞུང་ལ་ངོ་རྒོལ་བྱེད་མཁན་དང་༧གོང་ས་རྒྱལ་བ་རིན་པོ་ཆེ་མཆོག་གི་རྗེས་འབྲང་བ་རྣམས་ལ་རྒྱབ་སྐྱོར་བྱེད་མི་ཆོག་སྐོར་སོགས་བརྗོད་འདུག
གསར་འགོད་པ། དཔལ་ལྡན།
