དྲུག་བཞིའི་དམར་གསོད་ཆེན་མོར་རྗེས་དྲན་བྱས།

ཧོང་ཀོང་ནང་དྲུག་བཞིའི་དམར་གསོད་ཆེན་མོར་རྗེས་དྲན་བྱས་ན་བཙོན་འཇུག་བྱ་རྒྱུ་ཡིན་པའི་ཉེན་བརྡ་བཏང་སྟེ་བཀག་སྡོམ་བྱས་ཡོད་ཀྱང་དྷ་རམ་ས་ལ་སོགས་འཛམ་གླིང་ཡུལ་ལུང་གང་སར་རྣམ་པ་འདྲ་མིན་གྱི་ཐོག་ནས་སྲུང་གཙི་བྱེད་བཞིན་འདུག

Students for a free tibet organised a photo action to commemorate 33rd anniversary of Tiananmen Square Massacre. Photo: Tibet Times

དེ་རིང་ཕྱི་ཟླ་ ༦ ཚེས་ ༤ སྟེ་རྒྱ་ནག་གཞུང་གིས་ཕྱི་ལོ་ ༡༩༨༩ ལོར་པེ་ཅིན་གྱི་གནམ་བདེ་སྒོ་མོ་ཆེ་མདུན་ཐང་དུ། དམངས་གཙོ་དོན་གཉེར་མཁན་སློབ་མ་ཚོའི་ཐོག་དམག་དཔུང་བཏང་སྟེ་ལས་འགུལ་བ་སྟོང་ཕྲག་མང་པོ་དམར་གསོད་བཏང་ནས་ལོ་ངོ་ ༣༣ འཁོར་བའི་ཉིན་མོ་འདིར། ཧོང་ཀོང་ནང་གཞུང་གི་དམ་དྲག་གི་རྐྱེན་པས་རྣམ་ཀུན་ལྟར་རྗེས་དྲན་འདུ་འཛོམས་འཚོག་ཐབས་མེད་ནའང་། དྷ་ས་གཙོ་བོར་བྱས་པའི་འཛམ་གླིང་གི་ཡུལ་ལུང་མང་པོའི་ནང་བོད་མི་དང་རྒྱ་རིགས་དམངས་གཙོ་དོན་གཉེར་བ་སོགས་ཀྱིས་རྣམ་པ་འདྲ་མིན་གྱི་ཐོག་ནས་དྲུག་བཞི་དམར་གསོད་དོན་རྐྱེན་ལ་རྗེས་དྲན་ཞུ་བཞིན་ཡོད་པ་རེད།

དྷ་སར་རྟེན་གཞི་བྱས་པའི་བོད་རང་བཙན་སློབ་ཕྲུག་ཚོགས་པས་དུས་དྲན་སྲུང་གཙིའི་ཆེད་དུ། དྲུག་བཞི་དོན་རྐྱེན་གྱི་ཚབ་མཚོན་དུ་གྱུར་བའི་སྒྱོགས་མིའི་ (Tank Man) འཁྲབ་སྟོན་ལས་འགུལ་ཞིག་སྤེལ་ཡོད་ཅིང་། ཚོགས་པའི་ལས་འཆར་འབྲེལ་མཐུད་པ་བསྟན་འཛིན་པ་སངས་ལགས་ཀྱིས། ང་ཚོས་གདུང་སེམས་མཉམ་བསྐྱེད་ཀྱི་ལས་འགུལ་འདིའི་ནང་། རྒྱ་ནག་གཞུང་གིས་གནམ་བདེ་སྒོ་མོ་ཆེར་ལས་འགུལ་བ་རྣམས་དམར་གསོད་གཏོང་སྐབས་དང་། ཕྱི་ལོ་ ༡༩༦༢ ལོའི་རྒྱ་དཀར་ནག་གི་དམག་འཁྲུག་སྐབས་བཀོལ་སྤྱོད་བྱས་པའི་མེ་སྒྱོགས་ཨང་རྟགས་ ༥༩ ཡི་མཚོན་དཔེ་ཞིག་བཟོས་ཏེ་ལས་འགུལ་སྤེལ་ཡོད། ང་ཚོས་ལས་འགུལ་འདི་བརྒྱུད་ནས་རྒྱ་ནག་གིས་ང་ཚོར་དྲག་གནོན་ཇི་ཙམ་བྱས་ཀྱང་སྙིང་སྟོབས་ཞུམ་མེད་ཡིན་པ་དང་། ང་ཚོ་རྩ་འཛུགས་ཤིག་དང་། སྤྱི་ཚོགས་ཤིག ཡང་ན་དམངས་གཙོ་སྲུང་མཁན་དང་མི་སྒེར་ཞིག་ཡིན་པའི་ཆ་ནས་རང་གི་འབོད་སྒྲ་བསྒྲགས་ཏེ། རྒྱ་ནག་ལྟ་བུའི་སྒེར་གཅོད་རིང་ལུགས་པའི་སྲིད་གཞུང་གིས་མུ་མཐུད་ནས་གཞི་རྩའི་འགྲོ་བ་མིའི་ཐོབ་ཐང་རྡོག་རོལ་གཏོང་རྒྱུར་མཚམས་འཇོག་བྱེད་དུ་འཇུག་དགོས་པ་ཡིན། ཞེས་བརྗོད་སོང་། འདི་ལོའི་དུས་དྲན་སྲུང་གཙིའི་ལས་འགུལ་གྱི་བརྗོད་དོན་གཙོ་བོ་ནི་ང་སྒྱོགས་མི་ཡིན་ཞེས་པ་དེ་ཡིན་ཞིང་། ང་སྒྱོགས་མི་ཡིན་ཞེས་པའི་འབོད་ཚིག་འཁོད་པའི་བྱང་བུ་ལག་ཏུ་བཟུང་ནས་ཨང་རྟགས་ ༥༩ ཅན་གྱི་མེ་སྒྱོགས་མཚོན་དཔེའི་མདུན་དུ་ལངས་པའི་པར་རིས་རྣམས་སྤྱི་ཚོགས་དྲ་ལམ་ནང་བརྒྱུད་སྤེལ་བྱེད་ཀྱི་འདུག

འདས་པའི་ལོ་ངོ་བཅུ་ཕྲག་གསུམ་ལྷག་གི་རིང་ཧོང་ཀོང་དེ་དྲུག་བཞི་དོན་རྐྱེན་རྗེས་དྲན་གྱི་ལྟེ་གནས་གཙོ་བོ་ཞིག་ཡིན་ནའང་། ཕྱི་ལོ་ ༢༠༡༩ ལོའི་ཧོང་ཀོང་གི་གཞུང་རྒོལ་ལས་འགུལ་ཆེན་མོ་དེའི་རྗེས་རྒྱ་ནག་གཞུང་གིས་རྒྱལ་ཁབ་བདེ་འཇགས་སོགས་ཁྲིམས་སྒྲིག་ཁག་ལག་བསྟར་བྱས་ཏེ། གྲོང་ཁྱེར་དེའི་དམངས་གཙོའི་རྩ་ལག་ཡོངས་སུ་རྫོགས་པ་རྩ་མེད་བཏང་བ་མ་ཟད། ཕྱི་ལོ་ ༢༠༢༠ ནས་ད་བར་ལོ་གསུམ་བསྟུད་མར་ཏོག་དབྱིབས་གཉན་རིམས་དང་སྤྱི་ཚོགས་ཀྱི་འགྲིག་ལུགས་ལ་ཁག་བཀྲིས་ཏེ། དུས་རྒྱུན་མི་མང་སྟོང་ཕྲག་མང་པོ་འདུ་འཛོམས་བྱ་སའི་ཝིག་ཊོ་རི་ཡ་སྤྱི་གླིང་ (Victoria Park) སྒོ་བརྒྱབ་སྟེ་མང་ཚོགས་འདུ་འཛོམས་མི་ཆོག་པའི་བཀའ་རྒྱ་བཏང་ཡོད་པ་རེད།

The last official, mass Tiananmen vigil in Victoria Park in 2019. Photo: Todd R. Darling/HKFP.

ཕྱི་ལོ་ ༢༠༢༠ ལོའི་དྲུག་བཞི་རྗེས་དྲན་སྐབས་རྒྱལ་ཁབ་བདེ་འཇགས་ཁྲིམས་ཡིག་དེ་དངོས་སུ་ལག་བསྟར་བྱས་མེད་ནའང་། ཧོང་ཀོང་གཞུང་གིས་ཏོག་དབྱིབས་གཉན་རིམས་ལ་ཁ་གཡར་ཏེ་རྗེས་དྲན་འདུ་འཛོམས་ཚོགས་རྒྱུའི་ཆོག་མཆན་སྤྲད་མེད་ནའང་། སྐབས་དེར་ཧོང་ཀོང་གི་ལས་འགུལ་བ་མང་པོས་གཞུང་གི་བཀའ་རྒྱ་ལ་རྩིས་མེད་ཀྱིས་རྗེས་དྲན་ཚོགས་ཡོད་ཅིང་། ད་ལྟ་ཧོང་ཀོང་གི་དམངས་གཙོ་དོན་གཉེར་བའི་ལས་འགུལ་བ་གཙོ་བོའི་གྲས་སུུ་ཡོད་པའི་ལི་ཅུག་ཡན་ (Lee Cheuk-yan) དང་ཨལ་བྷེ་ཊི་ཧོ་ (Albert Ho) གཙོས་པའི་ལས་འགུལ་བ་མང་པོར་འདུ་འཛོམས་དེར་མཉམ་ཞུགས་བྱས་པའམ་གཞན་ལ་ངན་སྐུལ་བྱས་པའི་ཉེས་མིང་ཕོག་སྟེ་ཁྲིམས་ཁང་དུ་གྱོད་གཞི་འགྲོ་མུས་ཡིན་པ་རེད། ཕྱི་ལོ་ ༢༠༢༡ ལོར་རྒྱལ་ཁབ་བདེ་འཇགས་ཁྲིམས་ཡིག་དང་དམ་དྲག་ཆེ་བའི་རྐྱེན་གྱིས་འདུ་འཛོམས་རིགས་བྱུང་མེད་ནའང་། ཧོང་ཀོང་བ་རྣམས་ཀྱིས་ཉིན་དེར་ཕྱི་ལོགས་སུ་སྐྱོད་སྐབས་རང་གི་ཁ་པར་གྱི་གློག་གཞུ་སྤར་ཏེ་དུས་དྲན་སྲུང་གཙི་བྱས་ཡོད་པ་རེད། ཁ་སང་ཧོང་ཀོང་གི་ཉེན་རྟོག་པས་མི་མང་ལ་རྗེས་དྲན་གྱི་འདུ་འཛོམས་རིགས་སྐོང་འཚོག་དང་མཉམ་ཞུགས་མི་ཆོག་པ་དང་། གལ་ཏེ་དེ་ལྟར་བྱས་ཚེ་ལོ་ལྔའི་བཙོན་འཇུག་ཁྲིམས་ཆད་ཕོག་སྲིད་སྐོར་དང་། དྲ་རྒྱའི་ནང་དུ་རྗེས་དྲན་གྱི་པར་རིས་སོགས་བཀོད་ཚེ་གཞན་ལ་ངན་སྐུལ་བྱས་པའི་ཉེས་མིང་ཕོག་སྲིད་པའི་ཉེན་བརྡ་བཏང་ཡོད་འདུག

ཁ་སང་དགོང་མོར་ཉེན་རྟོག་པའི་ཉེན་བརྡ་ལ་མ་འཛེམ་པར། ཧོང་ཀོང་གི་སྒྱུ་རྩལ་བ་སྐྱེས་པ་ཞིག་དང་བུད་མེད་ཅིག་གིས་རྒྱ་ལམ་གྱི་ཟུར་དུ་འཕྲེད་དར་དང་མར་མེ་ཁྱེར་ཏེ་ལས་འགུལ་སྤེལ་ཡོད་ཅིང་། ཕྱིས་སུ་སྐྱེས་པ་དེས་གསར་འགོད་པར་ཁོ་པས་འདས་པའི་ལོ་ ༡༣ རིང་དྲུག་པའི་ཚེས་གསུམ་གྱི་ཉིན་དྲུག་བཞི་དོན་རྐྱེན་རྗེས་དྲན་སྲུང་གཙི་བྱས་ཡོད་ཚུལ་བརྗོད་འདུག གཞན་ཡང་ཧོང་ཀོང་གི་ཉེན་རྟོག་པས་རང་ལོ་ ༤༥ ཡིན་པའི་སྐྱེས་པ་ཞིག་གིས་དྲ་ལམ་ཐོག་མི་མང་ལ་ཝིག་ཊོ་རི་ཡ་སྤྱི་གླིང་དུ་འདུ་འཛོམས་དགོས་པའི་སྐུལ་མ་བྱས་པ་མ་ཟད། ཉེན་རྟོག་པ་གསོད་རྒྱུ་ཡིན་པའི་ཉེན་བརྡ་བཏང་བའི་རྐྱེན་གྱིས་འཛིན་བཟུང་བྱས་ཡོད་པའི་གནས་ཚུལ་ཐོན་འདུག

གསར་འགོད་པ། པ་སངས་ཚེ་རིང་།