མཚམས་པ་དགེ་འདུན་པ་ཞིག་གིས་རྒྱ་ནག་གཞུང་ལ་ངོ་རྒོལ་བྱས་ཏེ་འདས་གྲོངས་སུ་ཕྱིན་འདུག

ཉེ་སྔོན་བོད་ཀན་ལྷོ་ཁུལ་གཙོས་གྲོང་ཁྱེར་གྱི་ཉེ་འཁྲིས་ཁ་གྱའི་མཚམས་པ་དགེ་འདུན་པ་ཞིག་གིས་རྒྱ་ནག་གཞུང་ནས་ས་གནས་དགོན་པ་ཁག་དང་དགེ་འདུན་པ་རྣམས་ལ་དམ་དྲག་འཇིགས་སྐུལ་བྱེད་བཞིན་པར་ངོ་རྒོལ་བྱས་ཏེ་འདས་གྲོངས་སུ་ཕྱིན་ཡོད་འདུག

དེ་རིང་འདི་གའི་གསར་འགོད་པར་བོད་ནང་གི་བོད་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན།  རྒྱ་ནག་གཞུང་གིས་བཅད་བགོས་བྱས་པའི་ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་ཟེར་བའི་ཁུལ་དཔོན་གྱིས་སྣེ་འཁྲིད་དེ་ས་གནས་དགོན་པ་ཁག་ལ་དམ་དྲག་དང་འཇིགས་སྐུལ་བྱས་པར་བརྟེན། ཕྱི་ཟླ་ ༥ པའི་ཟླ་མགོ་ཙམ་ལ་གཙོས་གྲོང་ཁྱེར་དང་ཐག་ཉེའི་ས་ཁུལ་ཁ་གྱའི་མཚམས་པ་དགེ་འདུན་པ་ཞིག་གིས། ༧གོང་ས་མཆོག་གི་སྐུ་པར་གྱི་མདུན་ནས་རང་སྲོག་བཅད་ཡོད་པའི་ཁུངས་ལྡན་གནས་ཚུལ་མཁོ་སྤྲོད་གནང་བྱུང་ལ། གནས་ཚུལ་ཡོང་ཁུངས་རེ་ཟུང་ནས་དགེ་འདུན་པ་དེས་རང་ལུས་མེར་སྲེག་བཏང་ནས་འདས་གྲོངས་སུ་ཕྱིན་ཡོད་སྐོར་བརྗོད་བྱུང་།

ཉིན་ཤས་གོང་འདི་ག་གསར་ཁང་ལ་གནས་ཚུལ་འདི་མཁོ་སྤྲོད་བྱས་པ་ལྟར་རྩད་གཅོད་མང་པོ་བྱས་ཀྱང་།  ཕྱི་ཟླ་ ༥ པའི་ཟླ་མགོ་ཙམ་ནས་བཟུང་རྒྱ་ནག་གཞུང་གིས་ཏོག་དབྱིབས་གཉན་རིམས་འགོས་ཁྱབ་ལ་ཁ་གཡར་ཏེ་བླ་བྲང་དང་གཙོས་སོགས་སུ་འགྲོ་འོང་བྱེད་པར་དམ་དྲག་ཧ་ཅང་ཆེན་པོ་བྱས་དང་བྱེད་བཞིན་ཡོད་པའི་རྐྱེན་གྱིས་མཚམས་པ་དགེ་འདུན་པ་དེའི་མཚན་དང་སྐབས་ཐོག་གི་གནས་ཚུལ་སོགས་ཁ་གསལ་ད་ལྟའང་ཤེས་རྟོགས་ཐུབ་ཀྱི་མི་འདུག

ཟླ་འདིའི་ཕྱི་ཚེས་ ༧ ཉིན་མིང་བརྗོད་འདོད་མེད་པའི་བོད་མི་ཞིག་གིས་འདི་གའི་གསར་འགོད་པར། དང་ཐོག་མཚམས་པ་དགེ་འདུན་པ་དེས་རང་ལུས་མེར་སྲེག་བཏང་བ་སུས་ཀྱང་ཤེས་རྟོགས་བྱུང་མེད་ནའང་། ཁོང་གི་ཁྱིམ་མི་ཚོས་ཤེས་རྟོགས་བྱུང་ཡོད་པ་དང་། རྒྱ་ནག་ནང་ཞོར་ལས་བྱེད་བཞིན་ཡོད་པའི་ནང་མི་ཞིག་མགྱོགས་མྱུར་ངང་ཕྱིར་ཕ་ཡུལ་ལ་ལོག་ཡོང་སྐབས། ས་གནས་གཞུང་གིས་ཁོང་དང་ནང་མི་ཚོ་ལ་ཏོག་ནད་འདུག་ཅེས་གཙོས་ལ་བཙན་འཁྲིད་བྱས་ཡོད་པ་དང་། དེ་ནས་བཟུང་ཁོང་གི་ནང་མི་ཚོ་གོ་ཐོས་མེད་པར་གྱུར་ཡོད་འདུག འདི་གའི་གནས་ཚུལ་མཁོ་སྤྲོད་པས་དགེ་འདུན་པ་དེའི་ཁྱིམ་མི་རྣམས་བཙན་འཁྲིད་བྱས་པ་དེ་གནས་ཚུལ་ཕྱིར་མི་ཤོར་བའི་ཆེད་དུ་ཡིན་པ་ལས་ཏོག་དབྱིབས་འགོས་པའི་རྐྱེན་གྱིས་ཡིན་མི་སྲིད་སྐོར་བརྗོད་བྱུང་།

ཡང་ས་གནས་རང་གི་བོད་མི་གཞན་ཞིག་གིས་འདི་གའི་གསར་འགོད་པར། ཉེ་སྔོན་ཀན་ལྷོ་ཁུལ་གྱི་ཁུལ་དཔོན་སོགས་མགོ་འཁྲིད་ཁག་ཅིག་གིས་མཚམས་པའི་སྡོམ་ཁྲིམས་ལ་རྩིས་མེད་ཀྱིས་མཚམས་པ་དགེ་འདུན་པ་དེའི་མཚམས་ཁང་དུ་བཙན་གྱིས་འཛུལ་ཏེ་དབང་ཡོད་སུན་གཙེར་བཟོས་ཡོད་པ་མ་ཟད། དུས་རྒྱུན་ཁུལ་དཔོན་དེས་ས་གནས་ཀྱི་དགོན་སྡེ་ཁག་ལ་དམ་དྲག་དང་དགེ་འདུན་པ་རྣམས་ལ་སྡང་ཟུག་འཇིགས་སྐུལ་བྱེད་བཞིན་ཡོད་པའི་རྐྱེན་གྱིས། མཚམས་པ་དགེ་འདུན་པ་དེས་ངོ་རྒོལ་བྱས་ཏེ་རང་སྲོག་བཅད་ཡོད་སྐོར་བརྗོད་བྱུང་།

སྤྱིར་ད་ལྟའི་ཆར་རྒྱ་ནག་གཞུང་གིས་བོད་ཁུལ་ཡོངས་ལ་སྔར་ལས་དམ་དྲག་ཧ་ཅང་ཆེན་པོ་བྱེད་བཞིན་པ་འགྲོ་བ་མིའི་ཐོབ་ཐང་དང་ཨ་རིའི་རྒྱལ་སྤྱིའི་ཆོས་དད་རང་དབང་གི་སྙན་ཐོ་སོགས་སུའང་གསལ་ཡོད་ལ། བོད་ནང་གི་སྤྱི་ཚོགས་བརྒྱུད་ལམ་ཚང་མར་བཀག་སྡོམ་ཧ་ཅང་ཆེན་པོ་བྱེད་བཞིན་ཡོད་པའི་རྐྱེན་གྱིས་ཕྱི་ཕྱོགས་སུ་ཡོད་པའི་བོད་མི་ཚོས་སོ་སོའི་ནང་མི་སྤུན་མཆེད་ལའང་འབྲེལ་བ་བྱེད་དཀའ་བའི་གནས་སྟངས་ཡ་ང་བ་ཞིག་ཏུ་ལྷུང་འདུག ཕ་ཡུལ་གཙོས་ཕྱོགས་ཀྱི་བོད་མི་ཞིག་ལ་གོང་གི་གནས་ཚུལ་སྐོར་སྐད་ཆ་འདྲི་སྐབས་ཁོང་གིས། དེང་སང་ཕ་ཡུལ་ལ་འབྲེལ་བ་བྱ་རྒྱུ་ཧ་ཅང་ཁག་པོ་ཆགས་འདུག  དམ་དྲག་ཤུགས་ཆེན་པོ་ཡིན་པ་གསལ་བོ་རེད། སྐད་ཆ་བཤད་དུས་ཁོང་ཚོ་དོགས་མི་བདེ་བ་དང་འཚེར་སྣང་མང་པོ་ཡོང་གི་འདུག དེང་སང་གནས་ཚུལ་ཤེས་ན་བཤད་ཕོད་རྒྱུ་ཁག་པོ་འདུག སྐད་འཕྲིན་བེད་སྤྱོད་བྱེད་སྟངས་ལ་ཁ་གཡར་ནས་འཛིན་བཟུང་འདྲི་རྩད་བྱེད་ཀྱི་ཡོད་ས་རེད། ངའི་ཉེ་འབྲེལ་གྲྭ་པ་ཞིག་ལ་ན་ནིང་དཀའ་ངལ་དེ་འཕྲད་པར་བརྟེན། དེ་ནས་བཟུང་གོ་རྒྱུ་མི་འདུག ཅེས་བརྗོད་བྱུང་།

གནས་ཚུལ་རྩད་ཆོད་རིམ་བཞིན་ཁ་སྣོན་བྱ་རྒྱུ་ཡིན།

གསར་འགོད་པ། སྐལ་བཟང་སྦྱིན་པ།