༧གོང་ས་མཆོག་སྐུ་དངོས་སུ་ཕེབས་མ་དགོས་པར་གསུང་གི་མཛད་པ་འཛམ་གླིང་གང་སར་ཁྱབ་བཞིན་ཡོད་པ་རེད།

༧གོང་ས་མཆོག་ནས་རྒྱ་ནག་གུང་ཁྲན་རིང་ལུགས་མར་ཉམས་རྒུད་དུ་འགྲོ་གི་ཡོད་པ་དང་སངས་རྒྱས་པའི་ལྟ་གྲུབ་དང་ལྷག་པར་དུ་བོད་ཀྱི་ནང་པ་སངས་རྒྱས་པའི་ལྟ་གྲུབ་ཚད་མ་རིག་པ་ལྟ་བུ་འཛམ་གླིང་འདིའི་སྒང་ལ་དོ་སྣང་བྱེད་མཁན་ཇེ་མང་དུ་འགྲོ་བཞིན་ཡོད་པའི་སྐོར་གསུངས་སོང་།

དེ་རིང་ས་ག་ཟླ་བའི་བོད་ཚེས་ ༡༤ ཉིན་གྱི་སྔ་དྲོར་༧གོང་ས་རྒྱལ་བ་རིན་པོ་ཆེ་མཆོག་ནས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ཏཱའི་སི་ཏུ་རིན་པོ་ཆེ་མཆོག་གིས་ཇི་ལྟར་གསོལ་འདེབས་ཞུས་དོན་ལྟར། ཕྱི་ནང་གི་སེར་སྐྱ་མི་མང་ལ་སྤྱས་རས་གཟིགས་རྒྱལ་བ་རྒྱ་མཚོའི་བཀའ་དབང་གི་སྟ་གོན་དང་། ལམ་རིམ་བསྡུས་དོན་གྱི་བཀའ་ཁྲིད་སྩལ་གནང་མཛད་སྐབས། བཀའ་འགྱུར་དང་བསྟན་འགྱུར་མཆོད་གཤོམ་ཐོག་སྒྲིག་རྒྱུ་ཞིག་མིན་པར་སློབ་སྦྱོང་བྱ་དགོས་སྐོར་གསུངས་སོང་།

དེ་ཡང་༧གོང་ས་མཆོག་གིས། དེ་རིང་རྐང་རིན་པོ་ཆེ་(སི་ཏུ་རིན་པོ་ཆེ་)དང་ཁོང་ཚོ་མང་པོ་ཞིག་གིས་སྤྱན་རས་གཟིགས་རྒྱལ་བ་རྒྱ་མཚོའི་དབང་ཞིག་བྱུང་ན་ཞེས་གསུངས་པ་དང་། གསང་སྔགས་རྡོ་རྗེ་ཐེག་པ་ལ་བྱ་རྒྱུད་དང་། སྤྱོད་རྒྱུད། རྣལ་འབྱོར་རྒྱུད། རྣལ་འབྱོར་བླ་ན་མེད་པའི་རྒྱུད་ཟེར་ནས་བཞི་ཡོད་པའི་ནང་ནས། སྤྱན་རས་གཟིགས་སྒྲུབ་ཐབས་ལ་བྱ་རྒྱུད་ལྟར་དུ་སྒྲུབ་རྒྱུ་དང་། སྤྱོད་རྒྱུད་ལྟར་དུ་སྒྲུབ་རྒྱུ། རྣལ་འབྱོར་རྒྱུད་ལྟར་དུ་སྒྲུབ་རྒྱུ་བཅས་ལས། ད་ལྟ་སྤྱན་རས་གཟིགས་རྒྱལ་བ་རྒྱ་མཚོ་དེ་བླ་མེད་ལྟར་དུ་སྒྲུབ་རྒྱུ་ཆགས་ཡོད་པ་རེད། དེ་རིང་ཁྱེད་རང་ཚོས་ཐུགས་འདུན་འདྲ་བོ་གནང་ནས་སྤྱན་རས་གཟིགས་རྒྱལ་བ་རྒྱ་མཚོའི་དབང་འབུལ་རྒྱུ་བྱེད། སྤྱིར་འཕགས་པ་སྤྱན་རས་གཟིགས་སྙིང་རྗེའི་ལྷ་མཆོག་རེད། སྒྲུབ་ཐབས་དེ་བླ་མེད་ལྟར་དུ་སྒྲུབ་རྒྱུ་ཆགས་ཡོང་དུས། དམིགས་བསལ་ཞིག་ཆགས་སྡོད་ཀྱི་འདུག་ག སངས་རྒྱས་ཀུན་གྱིས་རབ་ཏུ་བསྔགས། །ཡོན་ཏན་དམ་པ་ཀུན་བསགས་པ། །སྤྱན་རས་གཟིགས་ཞེས་མཚན་གསོལ་བ། །རྟག་པར་བརྩེ་ལ་ཕྱག་འཚལ་ལོ། །ཞེས་དང་། ཕྱག་སྟོང་འཁོར་ལོས་བསྒྱུར་བའི་རྒྱལ་པོ་སྟོང། །སྤྱན་སྟོང་བསྐལ་པ་བཟང་པོའི་སངས་རྒྱས་སྟོང། །གང་ལ་གང་འདུལ་དེ་ལ་དེར་སྟོན་པ། །བཙུན་པ་སྤྱན་རས་གཟིགས་ལ་ཕྱག་འཚལ་ལོ། །ཞེས་ཇི་ལྟར་བསྟོད་པ་ནང་བཞིན། འཕགས་པ་སྤྱན་རས་གཟིགས་དགེ་ཀུན་སྙིང་རྗེའི་རང་གཟུགས་ཆགས་བསྡད་དུས། འཕགས་པ་སྤྱན་རས་གཟིགས་ཀྱི་ཐུགས་བརྩེ་བས་མ་ཁྱབ་པ་ཁྱོན་ནས་ཡོད་པ་མ་རེད། བྱེ་བྲག་དུ་ང་ཚོ་བོད་གངས་ཅན་ལ་ཆོས་རྒྱལ་གྱི་སྐབས་ནས་བཟུང་འཕགས་པ་སྤྱན་རས་གཟིགས་ཀྱི་ལས་འབྲེལ་ཐུན་མོང་མ་ཡིན་པ་ཡོད་བསྡད་པ་རེད་འདུག དེ་རིང་འདིར་སྤྱན་རས་གཟིགས་ཀྱི་དབང་དང་། དེའི་ནང་ནས་བླ་མེད་ལྟར་དུ་སྒྲུབ་རྒྱུའི་སྤྱན་རས་གཟིགས་རྒྱལ་བ་རྒྱ་མཚོའི་དབང་འབུལ་རྒྱུ་རེད། ཅེས་གསུངས་སོང་ལ། མནྜལ་འདེགས་འབུལ་སྐབས་མགོན་པོ་མཆོག་གིས། རིན་པོ་ཆེ་(སི་ཏུ་རིན་པོ་ཆེ་མཆོག་)ངེད་གཉིས་ངོ་ཤེས་ནས་ཡུན་རིང་པོ་ཕྱིན་པ་རེད། འགྱུར་བ་མེད་པར་ལྷག་བསམ་རྣམ་དག་གནང་སོང་།  ཐུགས་རྗེ་ཆེ་ཨ། ཞེས་གསུངས་སོང་།

དེའི་རྗེས་༧གོང་ས་མཆོག་ནས་ལམ་རིམ་བསྡུས་དོན་གྱི་བཀའ་ཁྲིད་སྩལ་སྐབས། སངས་རྒྱས་བཅོམ་ལྡན་འདས་སྨྲ་བ་ཟླ་མེད་པ་ཞེས་པ་དེ་རེད་བཞག འཛམ་གླིང་འདིའི་སྒང་ལ་ཆོས་ལུགས་མང་པོ་ཡོད་རེད། རང་རང་གི་གདུལ་བྱ་དེ་ཚོ་ལ་ཕན་གྱི་ཡོད་པ་རེད། ཡག་པོ་ཞེ་དྲག་རེད། ང་ཚོ་རྒྱ་གར་ལ་ཆོས་ལུགས་ཚང་མར་གུས་ཞབས་བྱ་རྒྱུ་དེ་གལ་ཆེན་པོ་ཞེ་དྲག་རེད། དཔེ་ཡག་པོ་འདུག ངའི་ངོས་ནས་ཆ་བཞག་ནའང་། ང་རང་ནང་པའི་དགེ་སློང་ཞིག་རེད། ཚད་མ་རིག་པའི་གཞུང་སྦྱངས་ནས། དཔེར་ན་ནང་པའི་གཞུང་ནང་ལ་སེམས་ཙམ་པའི་གཞུང་གི་གཟུགས་འཛིན་གཉིས་མཐོང་གསུངས་བཞག་པ་དེ་ལ་སྐྱོན་ག་རེ་འདུག་བཙལ་ནས། དེ་ལྟར་རིགས་པ་ལྡན་པའི་ཐོག་ནས་འགྲོ་རྒྱུ་འདུག་ག དེར་བརྟེན་དེང་སང་ཚན་རིག་པའི་ནང་ནས་སངས་རྒྱས་པའི་ཆོས་ཀྱི་འགྲོ་སྟངས་དེར་དགའ་པོ་བྱེད་ཀྱི་འདུག་ག ལྷག་དོན་སེམས་ཁམས་རིག་པ་(ལ་དགའ་བོ་འདུག) སྤྱིར་མུ་སྟེགས་པའི་གཞུང་ནང་ལོགས་ལ་སེམས་ཁམས་རིག་པ་གསུངས་ཡོད་རེད་དེ། ཡིན་ནའང་། ནང་པའི་གཞུང་ནང་ལ་སེམས་ཁམས་རིག་པ་གསུངས་པ་དེ་ཞེ་པོ་རྒྱ་ཆེན་པོ་དང་གཏིང་ཟབ་པོ་ཞིག་རེད་བསྡད་བཞག དཔེར་ན་ང་ཚོས་ཆུང་ཆུང་སྐབས་བློ་རིག་སློབ་ཀྱི་ཡོད་པ་རེད། བློ་རིག་ནང་ལ་སེམས་སེམས་བྱུང་དང་། སེམས་བྱུང་ལྔ་བཅུ་རྩ་གཅིག  གཙོ་སེམས་དྲུག་ཟེར་རྒྱུ་དེ་ཚོ་ཆུང་ཆུང་སྐབས་ནས་སློབ་ཀྱི་ཡོད་རེད། དེར་བརྟེན། བཅོམ་ལྡན་འདས་ཀྱི་ཆོས་དང་། ལྷག་པར་དུ་ལེགས་སྦྱར་གྱི་ཆོས་བརྒྱུད་དེ་རྦད་དེ་དཔྱད་པ་བྱས་ནས་འགྲོ་རྒྱུ་དེ་ཞེ་པོ་ཤུགས་ཆེན་པོ་གསུངས་འདུག ཅེས་གསུངས་སོང་།

ཡང་མགོན་པོ་མཆོག་གིས། ང་ཆུང་ཆུང་སྒང་ལ་མངོན་རྟོགས་རྒྱན་དང་དབུ་མ་འཇུག་པ་དེ་ཚོ་བློ་ལ་བཟུང་ནས་ཡོངས་འཛིན་རིན་པོ་ཆེའི་སྐུ་མདུན་ལ་དེ་དག་བསྐྱོར་གྱི་ཡོད་པ་རེད། འཕྲལ་གྱི་འདུ་ཤེས་མ་གཏོགས་དེ་ཙམ་གྱིས་དོ་སྣང་མེད། དེ་ནས་ཚུར་ག་ལེར་ག་ལེར་ན་ཚོད་ལྟ་བུ་ཡར་སླེབས་ཡོང་དུས། གཞུང་དེ་དག་ཞེ་པོ་གལ་ཆེན་པོ་རེད་བཞག དབུ་ཕར་གྱི་གཞུང་དེ་ཞེ་པོ་གལ་ཆེན་པོ་རེད། ད་ང་རང་ཚོས་དཔལ་ན་ལེནྜའི་ཆོས་བརྒྱུད་ཀྱི་ཆོས་དེ་ཉམས་ལེན་བྱེད་ཡོང་དུས་ཟབ་པ་དང་རྒྱ་ཆེ་བ་གཉིས་ཀྱི་སྒོ་ནས་འགྲོ་རྒྱུ་རེད། ཟབ་པ་ཟེར་དུས་སྟོང་ཉིད་སྐོར་བཤད་ཀྱི་ཡོད་པ་རེད། སྟོང་ཉིད་ཀྱི་ལྟ་བ་དང་འབྲེལ་བའི་ཐོག་ནས་དག་པའི་ཞིང་ཞེས་བྱང་ཆུབ་སེམས་ཀྱི་ཉམས་ལེན་ཞེས་དེ་ལྟར་འགྲོ་རྒྱུ་དེ་ཉམས་ལེན་གྱི་གཙོ་བོ་རེད་འདུག་ག རྗེ་རིན་པོ་ཆེས་རྟེན་འབྲེལ་བསྟོད་པའི་གཞུག་གུ་དེར། སྟོན་པའི་རྗེས་སུ་འབྲང་མཁན་གྱི་དགེ་སློང་ཞིག བཅོམ་ལྡན་འདས་ཀྱིས་ལེགས་པར་གསུངས་པའི་ཆོས་ལ་སློབ་སྦྱོང་གང་ལ་གང་འཚམ་བྱེད་མཁན་གྱི་དགེ་སློང་ཞིག་ཡིན་ཞེས་(གསུངས་ཡོད།) དེར་བརྟེན། ང་ཚོ་བོད་ལ་ཡོད་བསྡད་པའི་དཔེ་ཆ་ལ་བལྟས་ནས་ཡར་ཡོང་བཞག་པ་དེ་ཚོ། དངོས་གནས་བསྟན་པའི་ངང་ཚུལ་ཤེས་ནས་སྟོན་པ་ལ། །ཡིད་ཆེས་རྙེད་པས་རྟག་ཏུ་གང་བར་ཤོག །ཅེས་པ་དེ་ཏན་ཏན་ཆགས་བསྡད་ཡོད་པ་རེད། དེ་ནས་ང་ཚོ་བཙན་བྱོལ་ཆགས་ནས་རྒྱ་གར་ལ་བསླེབས། འདིར་ཆོས་ལུགས་འདྲ་མི་འདྲ་ཐུག་གི་ཡོད་པ་རེད། ངས་ཚང་མ་ལ་གུས་ཞབས་ཞུ་ཡི་ཡོད། རྟགས་གསལ་གཏོང་རྒྱུའི་སྐད་ཆ་མ་རེད། ང་ཚོས་རྟགས་གསལ་གཏོང་རྒྱུའི་རིགས་དེ་གལ་ཆེན་པོ་ཞེ་དྲག་ཡིན་དུས། ང་ཚོར་གདན་སའི་དགེ་འདུན་པ་ཧྲག་ཧྲག་ཅིག་ཡོད་པ་དེ་དག་ལྷོ་ཕྱོགས་ཀྱི་འབྲས་སྤུངས་དང་། སེ་ར། དགའ་ལྡན། བཀྲ་ཤིས་ལྷུན་པོར་གང་ལ་གང་འཚམ་ཡོད་པ་རེད། ཐོག་མར་ང་ཚོ་རྒྱ་གར་ལ་བསླེབས་དུས། པནྜི་ཏ་ནེ་རུ་ལ་ང་ཚོར་ཡི་གེ་ཟུར་དུ་ཡོད་རེད། སྐད་ཅིག་ཡོད་རེད། དེར་བརྟེན་ང་ཚོ་བོད་པའི་ཕྲུ་གུ་ལ་བོད་ཡིག་སློབ་རྒྱུ་ཡོད་པའི་སློབ་གྲྭ་ཟུར་དུ་དགོས་ཀྱི་འདུག་ཞུས་ནས། ནེ་རུས་རྒྱབ་སྐྱོར་གཙང་མ་གནང་རྗེས་དེ་ལྟར་ང་ཚོས་སློབ་གྲྭ་བཙུགས་པ་རེད། ཅེས་གསུངས་སོང་།

མགོན་པོ་མཆོག་གིས། བོད་ཀྱི་སངས་རྒྱས་པའི་ཆོས་དེ་རིག་པ་དང་ལྡན་པ་གཏིང་ཟབ་པོ་ཡོད་པར་བརྟེན། བར་སྐབས་རྒྱ་ནག་གུང་ཁྲན་ཏང་གིས་ཆོས་ལུགས་ལ་དགག་བྱ་བྱས་ཏེ་ཆོས་ལུགས་མེད་པར་བཟོ་རྒྱུ་དང་དབང་ཡོད་བཤད་རྒྱུ་དེ་འདྲ་མང་པོ་བྱས་ཡོད་རེད་དེ། བོད་རྒྱ་ཆེ་མི་མང་གི་སེམས་ཀྱི་ནང་ལ་ཆོས་དད་དེ་བརླག་ཐུབ་རྒྱུ་མི་འདུག་ག གང་རེད་ཟེར་ན། རྒྱ་མི་གུང་ཁྲན་གྱི་ལྟ་གྲུབ་འཁྱེར་རྒྱུ་དེ་དང་ང་ཚོ་ལོ་སྟོང་ཕྲག་རིང་གི་ནང་པ་སངས་རྒྱས་པའི་ལྟ་གྲུབ་གཉིས་དེ་བསྡུར་ཡོང་ན། ང་ཚོའི་ལྟ་གྲུབ་དེ་ཞེ་པོ་ཞིག་རྒྱ་ཆེན་པོ་གཏིང་ཟབ་པོ། ཚན་རིག་པའི་མཉམ་དུའང་འབྲེལ་བ་བྱེད་ཐུབ་རྒྱུ་ཡོད་པ་ཞིག་རེད། བཅོམ་ལྡན་འདས་ཀྱི་འདུལ་བའི་འགྲོ་སྟངས་དེ་ཚོ་དམངས་གཙོ་རང་རེད། མང་བ་དེ་གཙོ་ཆེ་བ་བརྩི་རྒྱུ་དེ་རེད། དེ་འདྲ་ཡིན་དུས། གང་ལྟར་ང་ཚོ་བོད་ལ་དཀའ་ངལ་ཞེ་པོ་ཕྲད་ཡོད་རེད་དེ། ཡིན་ནའང་སངས་རྒྱས་པའི་ཆོས་དེ་བརྟན་པོ་ཞེ་པོ་ཞིག་སྡོད་ཀྱི་འདུག་ག དེ་ནས་ང་ཚོ་བཙན་བྱོལ་བ་ཆགས་ནས་སངས་རྒྱས་པའི་ཆོས་ཀྱི་འགྲོ་སྟངས་དེ་བཤད་ཡོང་དུས། མི་ཚང་མས་དགའ་པོ་ཞེ་དྲག་བྱེད་ཀྱི་འདུག་ག ཞེས་གསུངས་སོང་།

ཨ་རིའི་ནང་ཐེངས་དང་པོ་ཆིབས་བསྒྱུར་བཀའ་དྲིན་བསྐྱངས་སྐབས་ཨ་རིའི་གྲོས་ཚོགས་འཐུས་མི་ཞིག་གིས་ལུང་བསྟན་ལྟ་བུ་གསུངས་ཡོད་པའི་སྐོར་ལ་༧གོང་ས་མཆོག་གིས། ་ ཨེ་མི་རི་ཀའི་མི་ཞིག་གིས་གཏམ་བཤད་བྱེད་སྐབས། ༧རྒྱལ་བ་རིན་པོ་ཆེ་མི་གཅིག་རེད། རྒྱ་ནག་བཅིངས་གྲོལ་དམག་མི་ས་ཡ་མང་པོ་ཡོད་རེད། བཅིངས་གྲོལ་དམག་ས་ཡ་མང་པོ་དེ་དག་གིས་མི་གཅིག་གླགས་འཁེལ་གྱི་ཡོད་མ་རེད། དེ་འདྲ་བཤད་སོང་། དེ་གང་འཚམ་བདེན་པ་ཡོད་རེད་ད། གང་ལྟར་གུང་ཁྲན་རིང་ལུགས་མར་རྒུད་འགྲོ་གི་འདུག་ག སངས་རྒྱས་པའི་ལྟ་གྲུབ་དང་ལྷག་པར་དུ་བོད་ཀྱི་ནང་པ་སངས་རྒྱས་པའི་ལྟ་གྲུབ་ཚད་མ་རིག་པ་ལྟ་བུ་འཛམ་གླིང་འདིའི་སྒང་ལ་ཚན་རིག་པས་དོ་སྣང་བྱ་རྒྱུ་ཆགས་པ་རེད། འདི་འདྲ་བསམ་བློ་གཏོང་དུས། ང་རང་བོད་ལ་མུ་མཐུད་ནས་བསྡད་ཡོད་ན། དེ་ཙམ་འགྲོ་དོན་ལྟ་བུ་ཡོང་ཐུབ་རྒྱུ་ཡོད་པ་མ་རེད། འདིར་བཙན་བྱོལ་བ་ཆགས་ནས་རྒྱ་གར་ལ་བསླེབས་རྗེས། བར་སྐབས་ངས་ཆབ་སྲིད་ཀྱི་ལས་ཀ་དེ་ཚོ་བཞག་པ་རེད། དེར་ང་ཚོས་སྤྱི་འཐུས་བསྐོས་ནས་གྲོས་ཚོགས་ཀྱི་སྤྱི་ཁྱབ་དང་སྲིད་སྐྱོང་ཡར་བསྐོས་ཡོད་པ་རེད། ང་འདིར་གཙོ་བོ་ཆོས་ཕྱོགས་ཀྱི་ཐོག་ནས་སྐད་ཆ་བཤད་ནས་འགྲོ་སྡོད་ཀྱི་ཡོད་པ་རེད། བོད་གངས་ཅན་ལྗོངས་ཀྱི་ནང་ལའང་ངས་སྐད་ཆ་བཤད་པ་དེ་ཚོར་དོ་སྣང་བྱས་ནས་ཉན་མཁན་ཇེ་མང་ཇེ་མང་འགྲོ་ཡི་འདུག རྒྱ་མིའི་ནང་ལའང་ཇེ་མང་ཇེ་མང་འགྲོ་ཡི་འདུག ཏཱ་ལའི་བླ་མའི་འགྲོ་དོན་དེ་སྐད་ཆ་བཤད་ནས་འགྲོ་ཡི་ཡོད་པ་རེད། གཟུགས་པོ་དེ་བསླེབས་དགོས་པ་ཡོད་པ་མ་རེད། དེང་སང་འཛམ་གླིང་འཕྲུལ་ཆས་ཡག་པོ་རེད་པཱ། ཏཱ་ལའི་བླ་མ་ཨ་མདོ་ལྷ་མོ་དོན་འགྲུབ་ཟེར་བ་དེ་དྷ་རམ་ས་ལར་ལྷོད་ལྷོད་བྱས་ནས་བསྡད། ཤེས་སོང་ངམ། ངའི་བསམ་བློ་དང་དང་གཏམ་བཤད་དེ་དག་འཛམ་གླིང་གང་ས་གང་ལ་དང་། རྒྱ་ནག བོད་གངས་ཅན་ལྗོངས་ལ་འགྲོ་སྡོད་ཀྱི་འདུག ཅེས་གསུངས་པ་དང་འབྲེལ། རྒྱ་ནག་དང་བོད་ནང་ཡོད་པའི་དད་ལྡན་མི་མང་རྣམས་མགོན་པོ་མཆོག་གི་དམིགས་འོག་ཏུ་བཅུག་གནང་ཡོད་སྐོར་བཀའ་སློབ་སྩལ་སོང་།

གསར་འགོད་པ། པ་སངས་ཚེ་རིང་།