ཇོ་ནང་རིས་མེད་དུས་འཁོར་བགྲོ་གླེང་ཆེན་མོ་ཉིན་གྲངས་གསུམ་རིང་འཚོག་བཞིན་འདུག

ཇོ་ནང་རིས་མེད་དུས་འཁོར་བགྲོ་གླེང་ཆེན་མོའི་ཐོག་༧གོང་ས་མཆོག་གིས་ཇོ་ནང་པར་དང་པོའི་སངས་རྒྱས་ལས་ཕྱུང་བའི་སྦྱོར་དྲུག་གི་རྨང་གཞི་བཟང་པོ་ཡོད་པ་འདི་ཐོས་བསམ་སྒོམ་གསུམ་གྱི་ཉམས་ལེན་རྣམ་པར་དག་པ་མཛད་དེ་དུས་འཁོར་སྦྱོར་དྲུག་གི་སྒོམ་གྲྭ་ཞེས་མིང་ཐོགས་པ་ཇི་བཞིན་རིགས་གཅིག་རྐང་འཛིན་གྱིས་མིང་དོན་མཚུངས་པ་ཞིག་གནང་གལ་ཤིན་ཏུ་ཆེ་བའི་གསུང་འཕྲིན་སྩལ་འདུག

ཁ་སང་ཕྱི་ཚེས་ ༡༤ ནས་ཉིན་གསུམ་རིང་གོ་པལ་པུར་དུ་རྟེན་གཞི་བྱས་ཡོད་པའི་ཇོ་ནང་དུས་འཁོར་སྒྲུབ་ཁང་ཆེན་མོའི་ཚོགས་ཁང་དུ། ཀུན་མཁྱེན་དོལ་པོ་སངས་རྒྱས་རྟོན་པ་བཞི་ལྡན་ཤེས་རབ་རྒྱལ་མཚན་དཔལ་བཟང་པོ་མཆོག་སྐུ་མྱ་ངན་ལས་འདས་ནས་ལོ་ངོ་ ༦༦༠ འཁོར་བའི་བཀའ་དྲིན་རྗེས་དྲན་ཞུ་ཆེད་ཇོ་ནང་རིས་མེད་དུས་འཁོར་བགྲོ་གླེང་ཆེན་མོ་དབུ་འཛུགས་གནང་ཡོད་ཅིང་། མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་དགའ་ལྡན་ཕོ་བྲང་གི་དྲུང་ཆེ་དགེ་བཤེས་ལྷ་རམས་པ་ཡང་སྟེང་སྤྲུལ་སྐུ་བློ་བཟང་བསྟན་པའི་མཚན་མཆོག དེ་བཞིན་མཁན་ལས་ཟུར་དང་བགྲོ་གླེང་གནང་མཁན་ཆོས་བརྒྱུད་ཁག་གི་སྐུ་ཚབ་གཉིས་རེ་བཅས་ཕེབས་ཡོད་འདུག

བགྲོ་གླེང་གོ་སྒྲིག་ཚོགས་པའི་ཚོགས་གཙོ་སློབ་དཔོན་ལྷ་སྐྱབས་ལགས་ཀྱིས་འདི་གའི་གསར་འགོད་པར། འདི་ལོར་གངས་ཅན་ལྗོངས་སུ་མདོ་སྔགས་ཟུང་འབྲེལ་གྱི་དབུ་མ་ཆེན་པོའི་ཤིང་རྟའི་སྲོལ་འབྱེད་ཀུན་མཁྱེན་དོལ་པོ་སངས་རྒྱས་རྟོན་པ་བཞི་ལྡན་ཤེས་རབ་རྒྱལ་མཚན་དཔལ་བཟང་པོ་མཆོག་སྐུ་མྱ་ངན་ལས་འདས་ནས་ལོ་ངོ་ ༦༦༠ འཁོར་བའི་བཀའ་དྲིན་རྗེས་དྲན་ཞུ་ཆེད། ༧སྐྱབས་རྗེ་ཇོ་ནང་༧རྒྱལ་ཚབ་རིན་པོ་ཆེ་མཆོག་གིས་ཐུགས་འགན་ཆེ་བཞེས་འོག  འདི་ག་ཇོ་ནང་དུས་འཁོར་གྲྭ་ཚང་གི་བགྲོ་གླེང་བཀོད་སྒྲིག་ལྷན་ཚོགས་ཀྱིས་འཕགས་བོད་ཀྱི་ཆོས་བརྒྱུད་ཡོངས་རྫོགས་ཀྱིས་ཉམས་བཞེས་ཕྱག་ལེན་གནང་བཞིན་པའི་རྒྱུད་ཀྱི་རྒྱལ་པོར་གྲགས་པའི་བཅོམ་ལྡན་འདས་དཔལ་དུས་ཀྱི་འཁོར་ལོའི་རིས་མེད་མཁས་པའི་བགྲོ་གླེང་ཆེན་མོ་ཉིན་གྲངས་གསུམ་རིང་འཚོགས་བཞིན་ཡོད་སྐོར་གསུངས་བྱུང་།

ཡང་ཁོང་གིས། དཔལ་མཆོག་དུས་ཀྱི་འཁོར་ལོའི་ཕྱི་ནང་གཞན་གསུམ་གང་གི་དབང་དུ་བྱས་ཀྱང་གྲངས་གནས་དྲུག་ཅུ་འདི་ནི་ཆེས་གལ་ཆེ་བའི་གྲངས་གནས་ཤིག་ཡིན་པ་སོགས་ཀྱིས་རྒྱལ་སྤྱིའི་ཇོ་ནང་འགྲོ་ཕན་ལྷན་ཚོགས་ཀྱིས་ལོ་འདི་ཀུན་མཁྱེན་དུས་གསུམ་སངས་རྒྱས་རྗེས་དྲན་གྱི་ལོར་གཏན་ཁེལ་གནང་བ་ཞིག་ཡིན་པ་དང་། ཡང་སྒོས་སུ༸གོང་ས་སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གིས་བཅོམ་ལྡན་འདས་དཔལ་དུས་ཀྱི་འཁོར་ལོའི་བཀའ་དབང་ཐེངས་ ༣༤ བར་སྨིན་སྩོལ་བཀའ་དྲིན་བསྐྱངས་ཤིང་། ཡང་ནས་ཡང་དུ་རྒྱུད་སྡེ་འདི་ཉིད་ཉམས་པ་སླར་གསོ་དང་། མི་ཉམས་གོང་འཕེལ་དགོས་པའི་བཀའ་དགོངས་ཟབ་མོ་སྒྲུབ་པ་སོགས་ཀྱི་ཆེད། ད་ལན་དཔལ་དུས་ཀྱི་འཁོར་ལོའི་རིས་མེད་མཁས་པའི་བགྲོ་གླེང་ཆེན་མོ་འདི་ལྟ་བུ་ཞིག་གོ་སྒྲིག་ཞུ་ཐུབ་པ་ནི། ཀུན་མཁྱེན་དོལ་པོ་སངས་རྒྱས་མ་ཟད་རིས་སུ་མ་ཆད་པའི་དཔལ་དུས་ཀྱི་འཁོར་ལོའི་བསྟན་པར་ཕྱག་རྗེས་རྨད་དུ་བྱུང་བ་འཇོག་གནང་མཁན་གྱི་སྐྱེས་ཆེན་དམ་པ་དེ་དག་ལའང་རང་བཞིན་གྱིས་རྗེས་དྲན་དུ་འགྲོ་བས། དཔལ་དུས་ཀྱི་འཁོར་ལོའི་རིས་མེད་མཁས་པའི་བགྲོ་གླེང་ཆེན་མོ་འདི་ལ་བརྟེན་ནས་སྤྱིར་སངས་རྒྱས་ཀྱི་བསྟན་པ་དང་། བྱེ་བྲག་ཏུ་དཔལ་དུས་ཀྱི་འཁོར་ལོའི་བསྟན་པ་ཕྱོགས་བཅུར་དར་ཞིང་རྒྱས་ལ་ཡུན་རིང་དུ་གནས་པ་དང་། རྒྱུད་སྡེ་འདི་ལ་གསན་བསམ་སྒོམ་གསུམ་དང་། འཆད་རྩོད་རྩོམ་གསུམ་གནང་མཁན་གྱི་སྐྱེས་ཆེན་དམ་པ་རྒྱུན་མི་ཆད་པར་བྱོན་སླད་སོགས་ཀྱི་ཆེད་དུ་དམིགས་ནས་བགྲོ་གླེང་འདི་ཉིད་གོ་སྒྲིག་ཞུས་པ་ཡིན། ཞེས་གསུངས་བྱུང་ལ། མ་འོངས་པར་རིས་མེད་ཀྱི་བགྲོ་གླེང་དང་འབྲེལ་བའི་བོད་ཕྱི་ནང་གི་དཔྱད་རྩོམ་གྱི་དེབ་ཅིག་ཀྱང་པར་སྐྲུན་གནང་འཆར་ཡོད་སྐོར་གསུངས་བྱུང་།

༧ གོང་ས་རྒྱལ་བ་རིན་པོ་མཆོག་གིས་ཇོ་ནང་རིས་མེད་དུས་འཁོར་བགྲོ་གླེང་ཆེན་མོར་སྩལ་བའི་བཀའ་ཡིག་ནང་། ཀུན་མཁྱེན་དོལ་པོ་བ་དགོངས་པ་རྫོགས་ནས་ལོ་ ༦༦༠ འཁོར་བའི་དུས་ཚིགས་བཀའ་དྲིན་རྗེས་དྲན་ཞུ་བའི་ལོ་འདིར། ཕྱི་ནང་གཞན་གསུམ་གྱི་བདག་ཉིད་ཅན་གདོད་མའི་མགོན་པོ་དཔལ་ལྡན་རྒྱུ་སྐར་དཀྱིལ་འཁོར་གྱི་བསྟན་པ་ཉམས་པ་སླར་གསོ་དང་། མི་ཉམས་གོང་འཕེལ་ཆེད་ཆོས་བརྒྱུད་རིས་སུ་མ་ཆད་པའི་དགེ་བའི་བཤེས་གཉེན་མང་པོ་གདན་ཞུས་ཀྱིས་ཉིན་གསུམ་རིང་བགྲོ་གླེང་གནང་འཆར་ལ་ལེགས་སོ་ཡི་རང་གི་བསྔགས་བརྗོད་དང་འབྲེལ་ཚོགས་ཞུགས་པ་ཚང་མར་འཚམས་འདྲི་ཞུ། ད་རེས་ངོས་རང་ངོ་བཅར་མ་ཐུབ་ཀྱང་ཞུ་འདོད་པ་གཅིག་ལ། བདག་ཅག་གི་སྟོན་པ་ཟས་གཙང་སྲས་དགུང་ལོ་སོ་དྲུག་ལ་ཕེབས་སྐབས་འཕགས་ཡུལ་གྱི་ལྷོ་ཕྱོགས་དཔལ་ལྡན་འབྲས་སྤུངས་སུ་ཤམ་བྷ་ལའི་རྒྱལ་པོ་ཟླ་བ་བཟང་པོ་གཙོ་བོར་གྱུར་པའི་དག་པའི་འཁོར་ཐུན་མོང་མ་ཡིན་པ་རྣམས་ཀྱི་ངོར་རྒྱུད་ཀྱི་རྒྱལ་པོ་དཔལ་དུས་ཀྱི་འཁོར་ལོ་ཐོག་མར་གསུངས་ཤིང་། དུས་ཕྱིས་འཕགས་ཡུལ་གྱི་དུས་ཞབས་པ་ཆེན་པོ་འཇམ་དཔལ་རྡོ་རྗེ་ཤམ་བྷ་ལར་བྱོན་ནས་རིགས་ལྡན་དངོས་དང་མཇལ་སྟེ་དུས་ཀྱི་འཁོར་ལོའི་དབང་ལུང་མན་ངག་ཡོངས་སུ་རྫོགས་པ་གསན་པ་དང་། དེ་ཡང་འགའ་ཞིག་ཐུགས་ངོར་བཟུང་ཞིང་། འགའ་ཞིག་གླེགས་བམ་དུ་བྲིས་ཏེ་འཕགས་ཡུལ་དུ་གདན་དྲངས་པ་ནས་བཟུང་དུས་འཁོར་གྱི་བསྟན་པ་དར་མགོ་ཚུགས་པ་དང་། སྤྱིར་ན་དུས་འཁོར་གྱི་རྩ་རྒྱུད་ལ་ཤོ་ལོ་ཀ་སྟོང་ཕྲག་བཅུ་གཉིས་ཡོད་ཀྱང་བོད་དུ་གཅིག་སྟེ་དབང་མདོར་བསྟན་མ་གཏོགས་མ་འགྱུར། འོན་ཀྱང་ས་དགེ་བཀའ་རྙིང་རིས་སུ་མ་མཆིས་པའི་མཁས་གྲུབ་དམ་པ་མང་པོས་དཔལ་དུས་ཀྱི་འཁོར་ལོའི་བཤད་སྒྲུབ་ཉམས་བཞེས་གནང་སྟེ་དར་ཁྱབ་ཆེན་པོ་བྱུང་ཡོད། ཅེས་གསུངས་འདུག

ཡང་མགོན་པོ་གང་ཉིད་ཀྱིས། ལྷག་པར་ཇོ་ནང་པར་དང་པོའི་སངས་རྒྱས་ལས་ཕྱུང་བའི་སྦྱོར་དྲུག་གི་རྨང་གཞི་བཟང་པོ་ཡོད་པ་འདི་ཐོས་བསམ་སྒོམ་གསུམ་གྱི་ཉམས་ལེན་རྣམ་པར་དག་པ་མཛད་དེ། དུས་འཁོར་སྦྱོར་དྲུག་གི་སྒོམ་གྲྭ་ཞེས་མིང་ཐོགས་པ་ཇི་བཞིན་རིགས་གཅིག་རྐང་འཛིན་གྱིས་མིང་དོན་མཚུངས་པ་ཞིག་གནང་གལ་ཤིན་ཏུ་ཆེ་བའི་གཞེན་སྐུལ་དང་། ད་རེས་ཀྱི་བགྲོ་གླེང་འདི་ཐོག་དཀའ་གནད་ཀྱི་མདུད་རྒྱ་ལྷུག་པོར་གྲོལ་ཞིང་སྦྱོར་དྲུག་གི་བསྟན་པ་ཕྱོགས་དུས་ཀུན་ཏུ་རྒྱས་པའི་སྨོན་ལམ་ཞུ། ཞེས་གསུངས་འདུག

གསར་འགོད་པ། བསྟན་འཛིན་ཕུར་བུ།