ཟླ་འདིའི་ཕྱི་ཚེས་ ༢༡ ཉིན་ནས་བཟུང་ཨ་རིས་རྒྱ་ནག་གཞུང་གི་བཙན་གནོན་འོག་ཡུ་གུར་ངལ་རྩོལ་བསྒྱུར་བཀོད་ཁང་ནས་ཐོན་སྐྱེད་བྱས་པའི་ཚོང་ཟོག་གཅིག་ཀྱང་ཉོ་ཚོང་བྱེད་མི་ཆོག་པའི་ཁྲིམས་གཞི་ལག་བསྟར་བྱ་རྒྱུ་ཡིན་འདུག
འདས་ལོའི་ཟླ ༡༢ ནང་ཨ་རིའི་གྲོས་ཚོགས་ནང་ཡུ་གུར་ངལ་རྩོལ་སྲུང་སྐྱོབ་ཅེས་པའི་གྲོས་ཆོད་ཅིག་ལ་མང་མོས་རྒྱབ་སྐྱོར་ཐོབ་ཡོད་པ་དང་། རྒྱལ་སྤྱིའི་ཚོང་གཉེར་ཁང་དག་གིས་རྒྱ་ནག་གཞུང་དང་ལྷན་དུ་ཚོང་འབྲེལ་བྱེད་སྐབས། ཡུ་གུར་ངལ་རྩོལ་སྒྱུར་བཀོད་ཁང་དང་འབྲེལ་བའི་ཚོང་ཟོག་གཅིག་ཀྱང་ཉོ་ཚོང་བྱེད་མི་ཆོག་པའི་ཁྲིམས་གཞི་གཏན་འབེབ་བྱུང་ཡོད་པ་ལྟར། ཟླ་འདིའི་ཕྱི་ཚེས་ ༢༡ ཉིན་ནས་བཟུང་ཁྲིམས་གཞི་དེ་དངོས་སུ་ལག་བསྟར་གྱིས་བཀག་སྡོམ་བྱ་རྒྱུ་ཡིན་འདུག རྒྱ་ནག་གཞུང་གིས་ཡུ་གུར་མི་རིགས་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་མུས་ཡིན་པ་མ་ཟད། ཉེས་མེད་ཡུལ་མི་མང་པོ་བཙན་གྱིས་ངལ་རྩོལ་དུ་བཀོལ་གྱིན་ཡོད་པའི་གནད་དོན་དེར་ཨ་རིས་མཐའ་གཅིག་ཏུ་ངོ་རྒོལ་དང་སྦྲགས། རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་བརྩི་འཇོག་དགོས་པའི་རེ་བ་འདོན་གྱི་ཡོད་པ་རེད།
དེའི་ཐད་ཨ་རིའི་གྲོས་ཚོགས་གོང་མའི་འཐུས་མི་མར་ཁོ་རུ་བྷི་ཡོ་ (Marco Rubio) སོགས་ཀྱིས། ཨ་རིས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བ་དང་། ངལ་རྩོལ་བ་བཀོལ་སྤྱོད་བྱས་པར་ངན་པ་ལག་འབྲེལ་གཏན་ནས་བྱ་རྒྱུ་མིན་སྐོར་གསལ་འདོན་བྱས་ཏེ། ཨ་རིའི་གྲོས་ཚོགས་ཀྱིས་སྲིད་འཛིན་བྷའེ་ཌིན་གྱི་འཛིན་སྐྱོང་དང་། ལོ་རྒྱུས་རང་བཞིན་ལྡན་པའི་ཁྲིམས་སྒྲིག་འདི་ལག་བསྟར་ཚགས་ཚུད་ཡོང་བར་གྲ་སྒྲིག་ཨང་གསར་ཡོད་སྐོར་བརྗོད་འདུག་ལ། དེ་བཞིན་ཨ་རིའི་གཞུང་ཕྱོགས་ནས་ཀྱང་། རྒྱ་ནག་གཞུང་གིས་ཡུ་གུར་གྲངས་ཉུང་མི་རིགས་རྣམས་ངལ་རྩོལ་བསྒྱུར་བཀོད་ཁང་དུ་བཅུག་སྟེ་བཙན་གྱིས་ལས་ཀ་བཀོལ་གྱི་ཡོད་པའི་སྐྱོན་བརྗོད་གཏན་ནས་ངོས་ལེན་བྱེད་ཀྱི་མེད་པ་མ་ཟད། ཉེས་མེད་མི་མང་ལ་ནག་ཉེས་སྣ་ཚོགས་གཡོགས་ནས་བཀག་སྐྱིལ་བྱེད་ཀྱི་ཡོད་སྐོར་བརྗོད་ཡོད་པ་རེད།
ཟླ་འདིའི་ཕྱི་ཚེས་ ༡༩ ཉིན་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ཀྲོ་ལི་ཅན་ (Zhao Lijian) གྱིས། ཨ་རིས་ཤིན་ཅང་གི་སྐོར་ལ་རྫུན་གཏམ་མང་པོ་ཞིག་སྤེལ་མུས་ཡིན་པར་སྐྱོན་བརྗོད་བྱེད་ཀྱི་ཡོད་ལ། གནད་དོན་དེས་ཨ་རི་དང་རྒྱ་ནག་བར་གྱི་ཚོང་འབྲེལ་ལ་བར་ཆད་གཏོང་སྲིད་པས། ཨ་རིས་ཁྲིམས་གསར་དེ་ཕྱིར་འཐེན་བྱས་ནས་ཤིན་ཅང་གི་གནད་དོན་ལ་ཁ་གཡར་ནས་རྒྱ་ནག་གི་ནང་སྲིད་ལ་ཐེ་གཏོགས་བྱེད་མཚམས་བཞག་དགོས་པའི་རྒོལ་གཏམ་བསྒྲགས་འདུག
འདི་ལོའི་ཕྱི་ཟླ་ ༡ ནང་ཨ་རིས་རྒྱ་ནག་གཞུང་གི་ངལ་རྩོལ་བཙན་བཀོལ་གྱི་ལས་གཞིའི་འོག་ནས་ཕྱིར་ཚོང་བྱས་པའི་ལྡུམ་སྒོང་དམར་པོ་(tomato) ཉོ་མཚམས་བཞག་ཡོད་པ་མ་ཟད། ཤིན་ཅང་ནས་བཟོ་སྐྲུན་བྱས་པའི་སྲིན་བལ་ ( cotton )གྱི་ཐོན་རྫས་ཉོ་མཚམས་བཞག་ཡོད་པ་རེད། འོན་ཀྱང་། འདས་ལོ་གཅིག་པུར་ཨ་རིས་ཤིན་ཅང་ནས་ཨ་སྒོར་ཐེར་འབུམ ༩ ཙམ་གྱི་སྲིན་བལ་ནང་འདྲེན་བྱས་ཡོད་འདུག
ཕྱི་ལོ་ ༢༠༡༨ ལོར་རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་རྒྱ་ནག་གཞུང་གིས་ཤིན་ཅང་ཡུ་གུར་མི་རིགས་རང་སྐྱོང་ཁུལ་དུ་སློབ་གསོ་བསྒྱུར་བཀོད་ཁང་ཟེར་བའི་བཀག་ཉར་ཁང་མང་པོ་ཆེད་འཛུགས་ཀྱིས་ཡུ་གུར་མི་མང་ས་ཡ་གཅིག་ཡས་མས་ལ་ཆབ་སྲིད་སློབ་གསོ་སྤེལ་གྱི་ཡོད་པ་མ་ཟད། བཙན་གྱིས་ངལ་རྩོལ་བསྒྱུར་བཀོད་བྱེད་དུ་འཇུག་བཞིན་ཡོད་སྐོར་གྱི་ཤོག་གྲངས་ ༡༡༧ ཅན་གྱི་སྙན་ཐོ་ཞིག་བཏོན་རྗེས། འཛམ་གླིང་ཡུ་གུར་མི་རིགས་མཐུན་ཚོགས་སོགས་ཀྱིས་སྣེ་འཁྲིད་དེ་ངོ་རྒོལ་ཞུ་གཏུག་གི་ལས་འགུལ་གཞི་རྒྱ་ཆེན་པོ་སྤེལ་ཡོད་པ་དང་། ཨ་རི་སོགས་ནུབ་ཕྱོགས་རྒྱལ་ཁབ་ཁག་ནས་རྒྱ་ནག་གཞུང་གིས་ཡུ་གུར་བ་རྣམས་ལ་མི་ཆོས་ལས་འདས་པའི་བཙན་གནོན་དང་མི་རིགས་རྩ་མེད་གཏོང་བའི་སྲིད་ཇུས་ལག་བསྟར་བྱེད་བཞིན་ཡོད་པའི་ངོས་འཛིན་འོག་ཡོངས་ཁྱབ་ཐོག་རྒྱ་ནག་གཞུང་ལ་སྐྱོན་བརྗོད་དྲག་པོ་བྱས་པ་མ་ཟད། འབྲེལ་ཡོད་དཔོན་རིགས་ཁག་ཅིག་ལ་འགྲོ་སྐྱོད་བཀག་སྡོམ་གྱི་ཉེས་ཆད་བཅད་ཡོད་པ་རེད། འདས་ལོའི་ཕྱི་ཟླ་ ༡༢ ཚེས་ ༡༧ ཉིན་ཨ་རིའི་གྲོས་ཚོགས་གོང་མའི་ནང་ཡུ་གུར་ངལ་རྩོལ་སྲུང་སྐྱོབ་ཅེས་པའི་གྲོས་གཞི་དེར་མང་མོས་རྒྱབ་སྐྱོར་ཐོབ་ཡོད་པ་དང་། ཕྱི་ཟླ ༡༢ ཚེས་ ༢༣ ཉིན་སྲིད་འཛིན་བྟའེ་ཌིན་མཆོག་གིས་ཁྲིམས་གཞི་དེར་མཚན་རྟགས་བསྐྱོན་ཡོད་ནའང་། ད་ལྟ་བར་དུ་དངོས་སུ་གྲོས་ཆོད་ནང་གསལ་ལྟར་ལག་བསྟར་ཐུབ་མེད་འདུག
གསར་འགོད་པ། དཔལ་ལྡན།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
