རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆེན་དབུ་འབྱེད་ཐོག་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ནས་ཨ་རིའི་གཞུང་མང་གཉིས་ཀྱིས་བོད་ཀྱི་རྩ་དོན་ལ་རྒྱབ་སྐྱོར་ཤུགས་ཆེན་གནང་བཞིན་པར་རྒྱལ་ཁབ་གཞན་གྱིས་དཔེ་བལྟས་ཏེ་བོད་དོན་ཐོག་སྔར་བས་རྒྱབ་སྐྱོར་ཤུགས་ཆེར་གནང་རྒྱུའི་རེ་སྐུལ་ཞུས་སོང་།
group photo of 8th WCT
ཁ་སང་ཨ་རིའི་རྒྱལ་ས་ཝ་ཤིང་ཊོན་ཌི་སི་ཡི་གྲོས་ཚོགས་གོང་མའི་ཚོགས་ཁང་ཞིག་ཏུ། རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆེན་ཐེངས་ ༨ པའི་དབུ་འབྱེད་མཛད་སྒོ་འཚོགས་ཡོད་ཅིང་། མཛད་སྒོའི་ཐོག་༧གོང་ས་རྒྱལ་བ་རིན་པོ་ཆེ་མཆོག་ནས་བརྙན་ལམ་བརྒྱུད། རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆེན་སྐབས་ཆབ་སྲིད་ཙམ་དུ་མ་ཟད། བོད་ཀྱི་འཚེ་མེད་ཞི་བ་དང་བྱམས་བརྩེའི་རིག་གཞུང་མི་ཉམས་གོང་འཕེལ་ཐད་ཐུགས་འཁུར་བླང་དགོས་པའི་གསུང་འཕྲིན་སྩལ་གནང་འདུག
༧གོང་ས་རྒྱལ་བ་རིན་པོ་ཆེ་མཆོག་ནས་ཚོགས་ཆེན་ལ་མཉམ་ཞུགས་བྱེད་མཁན་ཀུན་ལ་ཐུགས་རྗེ་ཆེ་གསུངས་པ་དང་འབྲེལ། དེ་རིང་རྒྱལ་སྤྱིའི་ཚོགས་འདུ་འཚོགས་པའི་སྐབས་གཙོ་བོ་བོད་ཀྱི་ཆབ་སྲིད་དཀའ་ངལ་རེད་ལ། གཙོ་བོ་བོད་ཀྱི་རིག་གཞུང་འདི་ཉམས་པ་སོར་ཆུད་མི་ཉམས་གོང་འཕེལ་ཡོང་རྒྱུར་ཐུགས་འཁུར་ཤུགས་ཆེ་བཞེས་ཐུབ་ན། འདི་ང་ཚོས་ཆབ་སྲིད་ཀྱི་ཐོག་ནས་རང་བཙན་བྱེད་ཀྱི་ཡིན་ཟེར་གྱི་ཡོད་པ་མ་རེད། སྔོན་མ་ལོ་ཁ་ཤས་གོང་ནས་ངས་གསལ་པོ་ལབ་པ་ཡིན། ང་ཚོས་རང་བཙན་རྩོད་ཀྱི་མེད། བོད་ཀྱི་རིག་གཞུང་དང་སྐད་ཡིག་དེ་སྲུང་སྐྱོབ་བྱེད་རྒྱུ་འདི་ཞེ་པོ་ཞིག་གལ་ཆེན་པོ་འདུག་ཅེས་ངོས་ཀྱིས་བཤད་སྡོད་ཀྱི་ཡོད། ཆབ་སྲིད་ཀྱི་ཐོག་ནས་རྒྱ་ནག་དང་འགལ་ཟླ་འགྲོ་རྒྱུ་མི་འདུག དངོས་ཡོད་གནས་ཚུལ་ལ་དེ་རིང་ཁ་སང་རྒྱ་ནག་ནང་དུ་ནང་པའི་ཆོས་ལ་དོ་སྣང་བྱེད་མཁན་ཇེ་མང་དུ་འགྲོ་བཞིན་འདུག་ག དེ་འདྲའི་གནས་སྟངས་འོག་ནས་ང་ཚོའི་བོད་ཀྱི་ཆོས་དང་རིག་གཞུང་འདི་ཉམས་པ་སོར་ཆུད་མི་ཉམས་གོང་འཕེལ་ཡག་པོ་ཞིག་བྱུང་ཐུབ་ན་བོད་མི་རིགས་ཙམ་མིན་པར་ཧོར་གྱི་སོག་རིགས་ཁག་དེ་དག་དང་། ཆེ་ས་ནས་རྒྱ་ནག་རང་ནང་ལ་ཆ་བཞག་ན་བོད་ཀྱི་རིག་གཞུང་སེམས་པ་བཟང་པོ་དང་ཡ་རབས་བྱེད་རྒྱུའི་རིག་གཞུང་འདི་རྒྱ་ནག་འཛམ་གླིང་གི་མི་འབོར་ཆེ་ཤོས་ཡོད་པའི་རྒྱལ་ཁབ་ནང་དངོས་གནས་དྲང་གནས་ཀྱིས་ཕན་ཐོགས་ཡོང་ཐུབ་པ་ཞིག་ཆགས་འདུག འདི་ཆོས་དང་འབྲེལ་ནས་ཆོས་པ་དང་ནང་པ་བྱེད་དགོས་ཞེས་ཟེར་གྱི་ཡོད་པ་མ་རེད། སོ་སོར་ཆོས་དད་ཡོད་ན་རེད་མེད་ནའང་རེད། མི་བཟང་པོ་ཞིག་བྱེད་རྒྱུ་འདི་སྐྱེས་ཙམ་ཉིད་ནས་ཨ་མས་བྱམས་པོ་བྱེད་བསྡད་པའི་བྱམས་བརྩེའི་རྣམ་འགྱུར་ཞིག་ཡོད་པ་འདི་ཆོས་དང་འབྲེལ་མི་འདུག རང་བཞིན་ལྷན་སྐྱེས་ཀྱི་ཡོང་གི་ཡོད་པ་རེད། ཅེས་དང་། སེམས་པ་བཟང་པོ་བྱེད་རྒྱུའི་མིག་ལྟོས་དེ་བོད་པར་ཡག་པོ་ཞེ་དྲག་ཡོད་པ་འདི་རྒྱ་སྐྱེད་ཐུབ་ན། མི་མང་པོར་ཕན་ཐོགས་ཡོང་གི་རེད་དྲན་གྱི་ཡོད། ང་རང་ངོས་ནས་ཆ་བཞག་ནའང་ངོས་ཀྱིས་མཐའ་གཅིག་ཏུ་ཆོས་སྤེལ་རྒྱུ་དང་ནང་ཆོས་སྤེལ་རྒྱུ་ཟེར་གྱི་མེད། གང་ལྟར་སེམས་པ་བཟང་པོ་བྱེད་དགོས་པ་བཤད་ཀྱི་ཡོད། དེར་བརྟེན་དེ་རིང་གི་ཚོགས་འདུ་འདིའི་སྟེང་ལ་བོད་ཀྱི་རིག་གཞུང་གི་སྙིང་པོ་ནི་སེམས་པ་བཟང་པོ་བྱེད་རྒྱུའི་རིག་གཞུང་འདི་ཉམས་པ་སོར་ཆུད་མི་ཉམས་གོང་འཕེལ་ཡོང་རྒྱུའི་ཐོག་དགོངས་པ་བཞེས་ཏེ། དེང་དུས་ཀྱི་ཤེས་ཡོན་སྡེ་ཚན་ནང་ཆོས་དང་མ་འབྲེལ་བའི་ཡ་རབས་ཀྱི་སྤྱོད་པ་བསླབ་རྒྱུར་ཤུགས་རྒྱག་ཐུབ་ན་ཕན་ཐོགས་ཡོང་གི་རེད་བསམ་པ་དྲན་གྱི་འདུག ཅེས་བཀའ་སློབ་སྩལ་གནང་སོང་།
His Holiness the Dalai Lama video addressing the 8th WPCT. photo by TPiE
ཡང་༧གོང་ས་མཆོག་ནས། བོད་ཀྱི་དོན་དག་འདི་ཕྱོགས་གཅིག་ནས་བདེན་དོན་རེད། གཉིས་ནས་བོད་ཀྱི་དོན་དག་འདི་སེམས་ཁམས་རིག་པའི་སེམས་ཀྱི་ཞི་བདེ་དང་བྱམས་བརྩེའི་ཤེས་ཡོན་གཙོ་བོ་ཡིན་པ་ཆགས་ཡོད་དུས། འདི་ཆབ་སྲིད་གཅིག་པུའི་སྐད་ཆ་མ་རེད། གང་ལྟར་བོད་ཀྱི་རིག་གཞུང་། སེམས་ཀྱི་ཞི་བདེ་བསྒྲུབ་རྒྱུ་དང་ཡིད་ཆེས་གཅིག་པུ་མིན་པར་རྒྱུ་མཚན་ལ་བརྟེན་ནས་སེམས་ཁམས་རིག་པ་དང་འབྲེལ་ནས་སེམས་ཀྱི་ཞི་བདེ་བསྒྲུབ་རྒྱུ་འདི་རྒྱ་གར་གྱི་མཁས་པའི་རིག་གཞུང་སྤུས་དག་ཤོས་ཤིག་དུས་རབས་བརྒྱད་པའི་ནང་། མཁན་ཆེན་ཞི་བ་འཚོ་བོད་ལ་ཕེབས་ནས་ཚུགས་ཡོད་རེད། དེ་རང་བཞིན་གྱིས་བོད་པ་ཆུང་ཆུང་ཞིག་ཡིན་ནའང་འབུ་མ་གསོད་ཟེར་རྒྱུ་ལྟ་བུ་སྙིང་རྗེའི་རྣམ་འགྱུར་ཆུང་ཆུང་སྒང་ནས་ཡོད་བསྡད་པའི་མི་རིགས་ཤིག་ཆགས་ཡོད། ཅེས་དང་། དེ་འདྲའི་མི་རིགས་ལ་བཟང་པོའི་གོམས་གཤིས་ཡོད་པ་འདི་བོད་མི་ཙམ་མ་ཡིན་པར། འཛམ་གླིང་སྟེང་རིམ་པས་བྱམས་བརྩེ་ཟེར་རྒྱུ་འདིར་དོ་སྣང་གསར་པ་བསླེབ་རྒྱུ་དང་། དེའི་ཐོག་བོད་མི་རིགས་ཀྱི་ཤེས་ཡོན་ཡོད་མཁན་ཚོས་ག་ཚོད་ཐུབ་ཐུབ་ཀྱིས་ཞབས་འདེགས་སྒྲུབ་ཐུབ་པའི་འབད་བརྩོན་བྱེད་ཀྱི་ཡོད་རེད་ལ། འབད་བརྩོན་བྱེད་ཀྱི་ཡིན་ན་ང་ཚོར་གོ་སྐབས་ཡག་པོ་ཡོད་པའི་བཟོ་འདྲ་བོ་འདུག འདི་ང་ཚོ་བོད་གཅིག་པུའི་དོན་དག་མ་རེད། འཛམ་གླིང་སྤྱི་ཡོངས་ཁོ་རང་ཞི་བདེ་ལ་དགའ་བ་བྱེད་མཁན་ཞིག་ནི་རེད། ཞི་བདེའི་རྩ་བ་སེམས་པ་བཟང་པོ་བྱ་རྒྱུ་དེ་ཆགས་བསྡད་ཡོད་རེད། སེམས་པ་བཟང་པོ་བྱེད་རྒྱུ་ཞེས་པ་འདི་ང་རང་ཚོ་མངལ་སྐྱེས་ཀྱི་སེམས་ཅན་དུད་འགྲོ་ཚུན་ཆད་སྐྱེས་མ་ཐག་ལ་མའི་བྱམས་བརྩེས་འཚོ་བསྡད་པ་ཆགས་ཀྱི་ཡོད། དེར་བརྟེན་རང་བཞིན་ལྷན་སྐྱེས་ཀྱིས་སྲོག་ཆགས་དུད་འགྲོ་ཚུན་ཆད་བྱམས་བརྩེའི་མའི་ནུ་ཞོ་ཡིས་འཚོ་བསྡད་པ་ཞིག་ཆགས་ཡོད་ཅེས་གསུངས་སོང་།
Speaker Khenpo Sonam Tenphel. photo by TPiE
དེ་བཞིན་མཛད་སྒོའི་ཐོག་མར་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པེ་ལོ་སི་མཆོག་དང་། གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་རྣམ་གཉིས་ཀྱིས་ཚོགས་ཆེན་གོ་སྒྲིག་ཐད་རམ་འདེགས་ཤུགས་ཆེར་གནང་བར་ཐུགས་རྗེ་ཆེ་ཞུས་ཏེ། རྒྱ་ནག་གཞུང་གིས་བོད་ནང་གི་ཆོས་ལུགས་ཀྱི་ལྟེ་གནས་དང་ཁོར་ཡུག་རྣམས་ཡུལ་སྐོར་སྤྲོ་འཆམ་གྱི་ས་ཚིགས་སུ་བཀོལ་སྤྱོད་བྱེད་ཀྱི་ཡོད་ནའང་། ཕྱོགས་གཞན་ནས་བོད་མིའི་ཆོས་དད་ཉམས་ལེན་ལ་དོ་དམ་སྟངས་འཛིན་སྔར་ལྷག་བྱེད་མུས་ཡིན་པ་དང་། ལྷག་པར་དུ་སྐྱེ་བ་སྔ་ཕྱི་ཁས་མི་ལེན་པའི་དམར་ཤོག་གི་མགོ་འཁྲིད་ཚོས་༧གོང་ས་མཆོག་གི་གཙོས་བོད་ཀྱི་སྤྲུལ་སྐུའི་ཡང་སྲིད་ལམ་ལུགས་ལ་ཐེ་བྱུས་བྱེད་ཀྱི་ཡོད་སྐོར་སོགས་བོད་ནང་གི་ཛ་དྲག་གནས་སྟངས་ངོ་སྤྲོད་དང་སྦྲགས། བོད་དེ་དུས་རབས་མང་པོའི་རིང་ནས་རང་བཙན་གྱི་རྒྱལ་ཁབ་ཡིན་ནའང་། བོད་རྒྱའི་དཀའ་རྙོག་སེལ་བའི་ཆེད་དུ་གཉིས་ཕན་དབུ་མའི་ལམ་གྱི་སྲིད་ཇུས་ལག་བསྟར་བྱེད་ཀྱི་ཡོད་པ་དང་། རྒྱ་ནག་གི་མགོ་འཁྲིད་ཚོས་ལོ་རྒྱུས་ཀྱི་འོས་འགན་དང་ཆབ་སྲིད་ཀྱི་གནད་འགག་ཤེས་པའི་ཐོག་ནས་བོད་རྒྱ་གྲོས་མོལ་བསྐྱར་གསོ་ཡོང་ཐབས་བྱ་དགོས་པའི་འབོད་སྐུལ་ཞུས་སོང་། ཡང་ཚོགས་གཙོ་མཆོག་ནས་ཨ་རིའི་གཞུང་མང་གཉིས་ཀྱིས་བོད་ཀྱི་རྩ་དོན་ལ་རྒྱབ་སྐྱོར་ཤུགས་ཆེར་གནང་དང་གནང་བཞིན་པར་ཐུགས་རྗེ་ཆེ་ཞུས་པ་དང་། རྒྱལ་ཁབ་གཞན་གྱི་སྲིད་གཞུང་རྣམས་ཀྱིས་ཨ་རིར་དཔེ་བླངས་ཏེ་བོད་དོན་ཐོག་སྔར་བས་རྒྱབ་སྐྱོར་ཤུགས་ཆེར་གནང་རྒྱུའི་རེ་སྐུལ་ཞུས་སོང་།
Speaker Nancy pelosi photo by TPiE
ད་ཐེངས་ཀྱི་རྒྱལ་སྤྱིིའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆེན་གྱི་དབུ་འབྱེད་མཛད་སྒོའི་སྐུ་མགྲོན་གཙོ་བོ་ལྕམ་ནེན་སི་པེ་ལོ་སི་མཆོག་གིས། ལོ་ངོ་ ༣༥ གོང་ལ་ལྕམ་སྐུ་ཁོང་ཉིད་ཨ་རིའི་གྲོས་ཚོགས་འཐུས་མིར་ཐོག་མར་བདམས་ཐོན་བྱུང་བའི་སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་འཕྲད་ཞུ་རྒྱུ་གོ་སྐབས་བྱུང་ཞིང་། མཇལ་འཕྲད་དེ་ནི་ཆེས་དགའ་སྤོབས་འོས་པ་ཞིག་ཡིན་པས་ཡིད་ཆེས་བྱེད་ཐབས་བྲལ་བ་ཞིག་ཡིན་པ་དང་། སྐབས་དེར་༧གོང་ས་མཆོག་ནས་རང་སྐྱོང་སྐོར་དང་། རང་བྱུང་ཁོར་ཡུག་ལ་བརྩི་བཀུར་བྱེད་དགོས་ཚུལ་སོགས་གསུངས་ཡོད་པ་དང་། ལྕམ་སྐུ་རང་ཉིད་ནས་འདས་པའི་ལོ་ངོ་དེ་དག་གི་རིང་བོད་དོན་ཐོག་ཕྱག་ལས་གནང་རྒྱུའི་གོ་སྐབས་བྱུང་བ་དེ་ནི་དགའ་སྤོབས་ལྡན་པའི་གནད་དོན་ཞིག་ལ་རྩི་བཞིན་ཡོད་སྐོར་གསུངས་སོང་ལ། ཁོང་མོ་རང་ཉིད་ཐེངས་ཤིག་བོད་ཀྱི་རྒྱལ་ས་ལྷ་སར་འཚམས་གཟིགས་སུ་ཕེབས་སྐབས་རྒྱ་ནག་གཞུང་གིས་བོད་ཀྱི་ལོ་རྒྱུས་ལ་འཁྱོག་བཤད་དང་བོད་ནང་གི་བོད་མིིིའི་གནས་སྟངས་ལ་འགྲེལ་བརྗོད་ལོག་པ་བརྒྱབ་པའི་སྐོར་གསུངས་པ་དང་འབྲེལ། རྒྱལ་སྤྱིའི་སྤྱི་ཚོགས་ལ་བཟང་སྤྱོད་ཀྱི་ཐད་ནས་རྒྱ་ནག་གཞུང་གི་དྲག་གནོན་ལ་ངོ་རྒོལ་གྱིས་བོད་མིའི་རྒྱབ་ལ་ལངས་རྒྱུའི་འོས་འགན་ཡོད་པ་དང་། རྒྱུ་མཚན་དེ་ལ་བརྟེན་ནས་ཚོགས་ཆེན་འདི་ལྟ་བུ་ནི། འཛམ་གླིང་རྒྱལ་ཁབ་འདྲ་མིན་གྱི་གྲོས་ཚོགས་འཐུས་མི་རྣམས་བསྐོངས་ཏེ་བོད་ལ་མིང་དོན་མཚུངས་པའི་རང་སྐྱོང་ཐོབ་ཐབས་ཐད་ཤུགས་བརྒྱབ་རྒྱུར་གལ་འགངས་ཆེན་པོ་ཡིན་སྐོར་སོགས་གསུངས་སོང་།
Richard Gere photo by TPiE
གཞན་ཡང་། མཛད་སྒོའི་ཐོག་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་དང་བོད་དོན་རྒྱབ་སྐྱོར་བ་འཛམ་གླིང་གི་གློག་བརྙན་འཁྲབ་སྟོན་པ་གྲགས་ཅན་སྐུ་ཞབས་རི་ཆར་ཌི་གྷེར་ (Richard Gere) ལགས་ཀྱིས་ལྕམ་སྐུ་ནེན་སི་པེ་ལོ་སི་མཆོག་གིས་འདས་པའི་ལོ་ངོ་དུ་མའི་རིང་བོད་དོན་ཆེད་སྐུ་ལས་ཚད་མེད་བསྐྱོན་པར་བསྔགས་བརྗོད་གནང་བ་དང་འབྲེལ། ང་ཚོས་ཕན་ཚུན་ལ་སློབ་སྦྱོང་དང་མཉམ་ལས་བརྒྱུད་ནས་ལེགས་གྲུབ་བྱུང་ཐུབ་ཀྱི་ཡོད་སྐོར་དང་། གནས་སྐབས་འགར་གནད་དོན་གཞན་ལ་དོ་སྣང་ཆེ་བ་ཡོད་ནའང་། སྤྱིའི་ཆ་ནས་བོད་ཀྱི་གནད་དོན་དེ་རྒྱལ་སྤྱིའི་ཐོག་སྔར་བས་ཤུགས་ཇེ་ཆེར་འགྲོ་བཞིན་ཡོད་པ་དང་། འཛམ་གླིང་ནང་གི་སྐྱབས་བཅོལ་བའི་གནད་དོན་ཕལ་མོ་ཆེ་ཐོག་མའི་དུས་སྐབས་སུ་ནུས་པ་ཆེན་པོ་ཡོད་ཀྱང་རིམ་པས་ཉམས་དམས་སུ་ཕྱིན་ཡོད་ནའང་། བོད་ཀྱི་གནད་དོན་དེ་མུ་མཐུད་ནས་གནས་ཐུབ་ཡོད་སྐོར། འཚེ་མེད་ཞི་བས་ནུས་པ་ཐོན་གྱི་ཡོད་པ་དང་། དེར་དུས་ཡུན་རིང་པོ་འགོར་གྱི་ཡོད་ནའང་། མཐའ་མཇུག་དེར་ལེགས་གྲུབ་བྱུང་ངེས་ཡིན་སྐོར་སོགས་གསུངས་སོང་།
Sikyong Penpa Tsering Photo:Tibet TV online Screenshot
ལས་ཉིན་དང་པོའི་ཉིན་རྒྱབ་ཚོགས་ཐུན་སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་ཚོགས་ཆེན་གྱི་ལས་རིམ་ཆ་བགོས་སྐོར་ནས་ངོ་སྤྲོད་དང་སྦྲགས། ཚོགས་ཆེན་འདི་བརྒྱུད་ནས་འཛམ་གླིང་གི་གྲོས་ཚོགས་འཐུས་མི་རྣམས་མཉམ་གཅིག་ཏུ་འཛོམས་ཏེ་བོད་རྒྱའི་དཀའ་རྙོག་ཐད་ཞབས་འདེགས་ཇི་ལྟར་ཞུ་མིན་གོ་བསྡུར་བྱེད་ཐུབ་པ་དང་། ཚོགས་ཆེན་གྱི་ཚོགས་ཐུན་སྔ་མའི་ཐོག་གྲོས་ཚོགས་འཐུས་མི་རྣམས་ཀྱིས་རང་རང་གི་རྒྱལ་ཁབ་ནང་བོད་དོན་ཕྱག་ལས་གནང་ཕྱོགས་ཅི་ཡོད་ཐད་བསམ་ཚུལ་གསུངས་པ་དེར་ཐུགས་རྗེ་ཆེ་ཞུས་སོང་ལ། རྒྱ་ནག་གཞུང་གིས་༧གོང་ས་མཆོག་ལ་བོད་དེ་རྒྱ་ནག་གི་ཆ་ཤས་ཡིན་པར་ཁས་ལེན་བྱ་དགོས་སྐོར་བཤད་སྐབས། ༧གོང་ས་མཆོག་ནས་གང་ཉིད་ལོ་རྒྱུས་སྨྲ་བ་ཞིག་མིན་པ་དང་། ལོ་རྒྱུས་ནི་ལོ་རྒྱུས་སྨྲ་བ་རྣམས་ཀྱི་ལག་ཏུ་འཇོག་དགོས་པ་ལས། ད་ལྟ་མ་འོངས་པའི་ཕྱོགས་ལ་དགོངས་པ་བཞེས་དགོས་སྐོར་གསུངས་པ་ལྟར། ད་ལྟའི་ཆར་འཛམ་གླིང་གི་ལོ་རྒྱུས་སྨྲ་བ་རྣམས་ཀྱིས་ལོ་རྒྱུས་ལ་ཞིབ་འཇུག་བྱས་ཏེ་བོད་དེ་གནའ་སྔ་མོ་ནས་རྒྱ་ནག་གི་ཆ་ཤས་མིན་པ་སྒྲུབ་ཀྱི་ཡོད་སྐོར་སོགས་གསུངས་སོང་། ཡང་སྲིད་སྐྱོང་མཆོག་གིས། རྒྱ་ནག་གི་སྐུལ་འདེད་བྱས་པ་ལྟར་འཛམ་གླིང་གི་རྒྱལ་ཁབ་རྣམས་ཀྱིས་རྒྱ་ནག་ལ་བོད་དེ་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་ཆ་ཤས་ཡིན་ཞེས་མ་ཎི་བགྲངས་བ་ལྟར་བཤད་ཀྱི་ཡོད་ཅིང་། དེ་ནི་དོན་དུ་རྒྱ་ནག་ལ་ཁྱེད་ཚོས་བོད་ནང་ག་རེ་བྱས་ཀྱང་ཆོག ང་ཚོར་དེའི་ཐོག་འབྲེལ་བ་གང་ཡང་མེད་ཅེས་བརྗོད་པ་དང་གཅིག་མཚུངས་ཡིན་པ་མ་ཟད། རྒྱ་ནག་གིས་ཀྱང་དུས་རྒྱུན་དུ་བོད་དོན་དེ་ནང་སྲིད་ཅིག་ཡིན་ཡང་༧གོང་ས་མཆོག་གིས་རྒྱལ་སྤྱིའི་གནད་དོན་ཞིག་ལ་སྒྱུར་བཞིན་ཡོད་སྐོར་རྗོད་ཀྱི་ཡོད་པ་རེད། ཡང་ཕྱོགས་གཞན་ནས་འཛམ་གླིང་གི་རྒྱལ་ཁབ་རྣམས་ཀྱིས་བོད་རྒྱ་གྲོས་མོལ་ལ་རྒྱབ་སྐྱོར་ཡོད་སྐོར་བཤད་ཀྱི་ཡོད་ཀྱང་། དོན་དུ་དེ་གཉིས་ནི་འགལ་ཟླར་འགྲོ་ཡི་ཡོད་སྐོར་དང་། རྒྱུ་མཚན་དེ་ལ་བརྟེན་ནས་བོད་ཀྱི་ལོ་རྒྱུས་ཀྱི་གནས་བབ་གླེང་སློང་བྱ་རྒྱུ་གལ་ཆེན་པོ་ཡིན་སྐོར་སོགས་གསུངས་སོང་།
ད་ལན་གྱི་ཉིན་གྲངས་གཉིས་རིང་གི་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པའི་ཐོག་ངོ་བཅར་ཞུ་མཁན་གྲས་སུ་འཛམ་གླིང་གི་གྲོས་ཚོགས་ ༡༥ ཡི་འཐུས་མི་ཡོད་ཅིང་། ངོ་བཅར་དང་དྲ་ལམ་བརྒྱུད་ནས་ཁྱོན་བསྡོམས་རྒྱལ་ཁབ་ ༢༨ ཀྱི་གྲོས་ཚོགས་འཐུས་མི་དང་ཆེད་མཁས་པ་སོགས་ལྷན་འཛོམས་གནང་ཡོད་འདུག་ལ། ཉིན་གྲངས་གཉིས་རིང་རྒྱལ་ཁབ་འདྲ་མིན་ནས་ཕེབས་པའི་སྐུ་ཚབ་རྣམ་པས་བོད་དོན་དང་འབྲེལ་བའི་མ་འོངས་ལས་དོན་ཐོག་གཏམ་བཤད་གོ་བསྡུར་གནང་སྟེ་གྲོས་ཆོད་འཇོག་རྒྱུ་ཡིན་འདུག
གསར་འགོད་པ། པ་སངས་ཚེ་རིང་།
ད་ལམ་ཨ་རིའི་རྒྱལ་སར་རྒྱལ་སྤྱིའི་བོད་དོན་རྒྱབ་སྐྱོར་ཚོགས་ཆེན་འདི་ལྟབུ་ལྷན་ཚོགས་གནང་ཐུབ་པར་ཆེས་སྤྲོ་བ་འཕེལ་ཞིང་། ཨ་རིའི་གཙོས་ཚོགས་ཕེབས་པ་ཡོངས་དང་བོད་མི་མང་སྤྱི་འཐུས་ལྷན་ཚོགས་ཀྱིས་དབུས་བོད་མིའི་སྒྲིག་འཛུགས་ཀྱི་ཚོགས་ཕེབས་པ་རྣམ་པ་དང་གོ་སྒྲིག་གནང་མཁན་ཡོངས་ལ་ལེགས་བརྗོད་དང་རྗེས་སུ་ཡི་རང་ཞུ།།
ཧ་ཅིང་གི་ཡག་པོ་རེད། བོད་ཀྱི་གནས་སྟངས་ཉག་ཕྲ་བའི་སྐབས་བོད་མི་ཚང་མིས་ནུས་པ་གཅིག་ཏུ་སྤོངས་ནས་འབད་བརྩོན་འདི་འདྲ་གནང་པ་ཡིན་ན་༧གོང་ས་མཆོག་ལྟ་བུའི་ཡང་དག་པའི་དབུ་ཁྲིད་ཤིག་ཡོད་ཙང་འུ་ཅག་ལ་རེ་བ་ཡོད་པ་རེད། གང་ལྟར་དགའ་བོ་བྱུང་། བོད་རྒྱལ་ལོ།