བོད་ཀྱི་རྒྱལ་ས་ལྷ་ས་དང་མངའ་རིས་སོགས་ནས་ཉུང་མཐར་ཏོག་དབྱིབས་ནད་པ་༢༢ བྱུང་ཡོད་པའི་རྐྱེན་གྱིས་བཀག་སྡོམ་ནན་པོ་བྱེད་བཞིན་ཡོད་འདུག
ཉེ་ཆར་བོད་ཀྱི་ས་ཁུལ་ཁག་ཅིག་གི་ནང་ཏོག་དབྱིབས་གཉན་རིམས་འགོས་ཁྱབ་ཏུ་འགྲོ་བཞིན་ཡོད་པའི་གནས་ཚུལ་ཐོན་གྱི་ཡོད་པ་ལྟར། ཁ་སང་ཕྱི་ཚེས་༩ ཉིན་ལྷ་ས་གྲོང་ཁྱེར་ཁུལ་དུ་ཏོག་དབྱིབས་འགོས་པའི་ནད་པ་ ༡༨ བྱུང་ཡོད་པ་དང་། ཁོང་ཚོ་ཕལ་ཆེ་བ་གཞིས་ཀ་རྩེ་ནས་ཡོང་བ་ཡིན་ལུགས་དང་། ལོ་ན་ཆུང་ཤོས་ ༣ དང་ཆེ་ཤོས་ ༧༠ ཡིན་སྐོར་བསྒྲགས་འདུག་ལ། ད་ལྟའི་ཆར་བོད་ཀྱི་རྒྱལ་ས་ལྷ་སའི་ཕོ་བྲང་པོ་ཏ་ལ་དང་གཙུག་ལག་ཁང་། ནོར་བུ་གླིང་ག བོད་ལྗོངས་རྟེན་མཛོད་གླིང་སོགས་སྒོ་བརྒྱབ་སྟེ། མི་མང་གང་བྱུང་འགྲོ་འོང་དང་འདུ་འཛོམས་བྱེད་པར་བཀག་སྡོམ་ནན་པོ་བྱེད་བཞིན་ཡོད་འདུག
ཟླ་འདིའི་ཕྱི་ཚེས་ ༩ ཉིན་བོད་ཀྱི་རྒྱལ་ས་ལྷ་སའི་ཕོ་བྲང་པོ་ཏ་ལའི་དོ་དམ་ཚོགས་ཆུང་ཟེར་བ་དེས། ལྷ་ས་གྲོང་ཁྱེར་ཏོག་དབྱིབས་རིམས་ནད་ལ་ཁ་གཏད་གཅོག་པའི་ལས་དོན་ཚོགས་ཆུང་གི་བཀའ་བཀོད་ལྟར། མང་ཚོགས་ཀྱི་བདེ་འཇགས་ཆེད་གནས་སྐབས་རིང་ཕོ་བྲང་པོ་ཏ་ལའི་སྒོ་བརྒྱག་རྒྱུ་ཡིན་པའི་གནས་ཚུལ་སྤེལ་འདུག
གཞན་ཡང་། ཟླ་འདིའི་ཚེས་ ༧ ཉིན་བོད་མངའ་རིས་སྤུ་ཧྲེང་རྫོང་ཁོངས་སུ་ཏོག་དབྱིབས་ནད་རྟགས་མེད་པའི་ནད་པ་༤ ཐོན་ཡོད་ཅིང་དང་། ཁོ་ཚོ་ཚང་མ་ཕྱི་ནས་ཡོང་བའི་ཡུལ་སྐོར་བ་ཡིན་སྐོར་བསྒྲགས་འདུག་ལ། ད་ལྟའི་ཆར་སྤུ་ཧྲེང་རྫོང་ཁོངས་ཀྱི་གསེར་ར་ལུང་དགོན་དང་། ཁྲུས་སྒོ་དགོན། འཁོར་ཆགས་དགོན། སྤུ་ཧྲེང་རྫོང་ཐང་ག་རྒྱལ་སྤྱིའི་མཐའ་མཚམས་ཉོ་ཚོང་ཁྲོམ་ར། བྱེའུ་དགོན་སོགས་ཉེན་ཁ་འབྲིང་བའི་ཁོངས་སུ་ཚུད་དེ་བཀག་སྡོམ་བྱེད་ཀྱི་ཡོད་འདུག
དེ་བཞིན་ཟླ་འདིའི་ཕྱི་ཚེས་ ༨ ཉིན་གཞིས་རྩེ་གྲོང་ཁྱེར་གྱི་ཏོག་དབྱིབས་ལས་དོན་མགོ་ཁྲིད་ཚོགས་ཆུང་ཟེར་བས་བཀག་སྡོམ་གྱི་གསལ་བསྒྲགས་སྤེལ་བའི་ནང་། གྲོང་ཁྱེར་དེའི་ཆང་ཁང་དང་། གླུ་གར་ཁང་། གློག་བརྙན་ཟློས་གར་ཁང་། དྲ་ཁང་། ལུས་སྦྱོང་ཁང་། རོལ་རྩེད་ཁང་། ཇ་ཁང་། ཟ་ཁང་། འཁྲུས་ཁང་། དངོས་མང་བཤམས་སྟོན་ཁང་། རིག་གནས་ཁང་། དཔེ་མཛོད་ཁང་། མཛེས་རྩལ་ཁང་། ལུས་རྩལ་ཁང་སོགས་ཀྱི་སྒོ་བརྒྱག་དགོས་སྐོར་དང་། དོན་བཟང་ཕྱིར་འགྱང་དུ་གཏོང་པ་དང་འདས་མཆོད་སྟབས་བདེ་བསྒྲུབ་དགོས་པ། དེ་བཞིན་ཁ་རས་གྱོན་ཞིང་ལག་པ་ཡང་ཡང་འཁྲུད་དགོས་པ། མི་དང་མིའི་བར་རྒྱང་ཐག་འཇོག་དགོས་པ་སོགས་བསྒྲགས་འདུག
འདི་ལོའི་ལོ་དཀྱིལ་ཙམ་ནས་བཟུང་རྒྱ་ནག་ཧྲང་ཧྲེ་དང་ཧའེ་ནན་ཞིང་ཆེན་གཙོས་བའི་ས་ཁུལ་ཁ་ཤས་ནང་དུ། ཏོག་དབྱིབས་གཉན་རིམས་འགོས་ཁྱབ་ཆེ་རུ་འགྲོ་མུས་ཡིན་འདུག ཁ་སང་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། རྒྱ་ནག་ཧའེ་ནན་ཞིང་ཆེན་དུ་ཏོག་དབྱིབས་རིམས་པའི་འགོས་པའི་ནད་པ་ཉིན་རེ་བཞིན་ཇེ་མང་དུ་འགྲོ་བཞིན་ཡོད་པ་ལྟར། ཁ་སང་བར་ཞིང་ཆེན་ཡོངས་སུ་ཏོག་དབྱིབས་ནད་པ་ ༡༥༠༠ ལྷག་ཡོད་སྐོར་བསྒྲགས་འདུག
བྱམས་པ་ཚེ་རིང་།
