༸གོང་ས་མཆོག་ལ་དྭགས་ཟངས་དཀར་གྱི་ཁ་ཆེ་ལྷ་ཁང་དུ་ཆིབས་སྒྱུར་མཛད།

དེ་རིང་ཕྱི་ཚེས་ ༡༣ ཉིན་གྱི་སྔ་དྲོ་ཆུ་ཚོད་ ༨།༢༠ སྟེང་གོང་ས་མཆོག་ལ་དྭགས་ཟངས་དཀར་གྱི་སོ་ནེ་ཁ་ཆེ་ལྷ་ཁང་དུ་ཆིབས་བསྒྱུར་བསྐྱངས་ཏེ། འཛམ་གླིང་གི་ཆོས་ལུགས་ཚང་མའི་བསླབ་བྱ་གཙོ་བོ་བྱམས་སྙིང་རྗེ་ཡིན་པ་དང་ང་ཚོ་ཚང་མ་འགྲོ་བ་མི་གཅིག་གྱུར་ཡིན་པའི་འདུ་ཤེས་བཟུང་སྟེ་ཕན་ཚུན་བར་འཆམ་མཐུན་བྱུང་ན་འཛམ་གླིང་ཞི་བདེ་བསྐྲུན་ཐུབ་ཀྱི་ཡོད་སྐོར་གསུངས་སོང་།

སྐབས་དེར་༸མགོན་པོ་གང་ཉིད་མཆོག་གིས། དེ་རིང་འདིར་ཟངས་དཀར་གྱི་ཁ་ཆེ་གྲོགས་ཕོ་མོ་རྒན་གཞོན་ཚང་མར་གུས་ཞབས་དང་དགའ་བསུ་ཞུ་ཡི་ཡོད། ངོས་རང་ནང་པའི་དགེ་སློང་ཞིག་རེད། འོན་ཀྱང་། ངོས་ཀྱི་མི་ཚེ་འདིར་དམ་བཅའ་གཅིག་ནི། ཆོས་ལུགས་ཚང་མར་ལྟ་གྲུབ་མི་འདྲ་བར་ཡོད་ཀྱང་། ཚང་མས་ཡ་རབས་དང་ཕན་སེམས། དེ་བཞིན།་སྤྱི་ཚོགས་ལ་ཞབས་འདེགས་སྒྲུབ་རྒྱུ་གཅིག་གྱུར་རེད། དེར་བརྟེན། ངོས་ནས་རིས་སུ་མ་མཆེད་པའི་ཆོས་ལུགས་ཚང་མར་གུས་ཞབས་ཞུ་ཡི་ཡོད།

དེ་རིང་ཁ་སང་ང་ཚོའི་སྤྱི་ཚོགས་ནང་ཟིང་ངེ་ཟིང་ངུ་མང་པོ་ཞིག་ཡོད་པའི་ཐོག ཆོས་ལུགས་མི་མཐུན་པ་དག་གིས་ཕྱོགས་ཞོལ་འདེགས་བྱས་ཏེ། དཔེར་ན་ཨབ་གྷན་ནང་ཁ་ཆེ་ཆོས་ལུགས་གཅིག་གྱུར་ཡིན་ནའང་། སོ་ནེ་དང་ཤི་ཡའི་བར་ཏོག་ཙམ་མི་མཐུན་པ་བྱུང་གི་ཡོད། གང་ལྟར་ཆོས་ལུགས་འདྲ་མིན་ཡོད་པ་དེ་དག་གིས། མི་བསམ་བློ་རྒྱ་ཆུང་ཆུང་ཡོད་པ་ཚོས་ཆོས་ལུགས་མི་འདྲ་བ་རྒྱུ་མཚན་དུ་བྱས་ཏེ་གཅིག་གིས་གཅིག་ལ་འཐེན་འཁྱེར་བྱེད་བཞིན་ཡོད་པ་ང་ཚོས་མཐོང་བཞིན་པ་དེ་རེད། ཧ་ལས་པའི་སྐྱོ་བོ་རེད།

ང་ཚོའི་ཆོས་ལུགས་ཚང་མར་སོ་སོའི་ལྟ་གྲུབ་མི་འདྲ་བར་ཡོད་ཀྱང་། ཚང་མས་སེམས་པ་བཟང་པོ་དང་མི་ལ་ཕན་ཐོགས་རྒྱུ། བྱམས་པ་དང་བརྩེ་བ་ནི་འཛམ་གླིང་གི་ཆོས་ལུགས་ཚང་མའི་བསླབ་བྱ་གཙོ་བོ་ཆགས་བསྡད་ཡོད། ངོས་རང་འཛམ་གླིང་ས་ཕྱོགས་གང་དུ་ཕྱིན་པ་ཡིན་ན། ཆོས་ལུགས་སོ་སོའི་ལྷ་ཁང་དུ་ཕྱིན་ནས་སྨོན་ལམ་བརྒྱབ་པ་སོགས་བྱེད་ཀྱི་ཡོད། ང་ཚོའི་ཆོས་ལུགས་ཚང་མས་བྱམས་པ་དང་བརྩེ་བ་གསུང་གི་ཡོད། དེ་མིའི་སྤྱི་ཚོགས་ལ་དགོས་མཁོ་ཧ་ཅང་ཆེན་པོ་རེད།

དེ་རིང་ངོས་ཆེད་དུ་ཟངས་དཀར་གྱི་ཁ་ཆེ་ཆོས་དད་བྱེད་མཁན་ཁྱེད་རང་ཚོར་ཐུག་པ་རེད། ངོས་རང་ཆེད་མངགས་ཁྱེད་རང་ཚོར་ཐུག་ག་ཡོང་བ་ཡིན། ཁྱེད་རང་ཚོ་ཚང་མར་འཚམས་འདྲི་དང་གུས་ཞབས་ཡོད། སྤྱིར་རྒྱ་གར་རྒྱལ་ཡོངས་དང་ཡང་སྒོས་ཟངས་དཀར་ཁུལ་དུ་ཕྱིའི་དངོས་པོ་ཡར་རྒྱས་ཡག་ཐག་ཆོད་འགྲོ་བཞིན་པ་འདྲ་པོ་འདུག ངོས་རང་ཟངས་དཀར་ཁུལ་དུ་དེ་སྔ་ཚར་འགའ་ཡོང་བ་རེད། ལོ་རེ་ནས་ལོ་རེར་ཡར་རྒྱས་འགྲོ་བཞིན་པ་མཐོང་སོང་།

འཛམ་གླིང་ཡོངས་རྫོགས་ཀྱིས་ཕྱིའི་དངོས་པོ་ཡར་རྒྱས་འགྲོ་རྒྱུའི་ཐོག་བསམ་བློ་གཏོང་གི་ཡོད་པ་རེད། འོན་ཀྱང་། ང་ཚོས་ག་རེ་ཤུགས་སྣོན་བརྒྱག་དགོས་རེད་ཟེར་ན། ནང་སེམས་ཀྱི་ཞི་བདེ་དང་བྱམས་བརྩེ། སྙིང་རྗེ་སོགས་ལ་དམིགས་བསལ་གྱིས་དོ་སྣང་བྱེད་དགོས་ཀྱི་འདུག ག་བ་ལ་ཡིན་ན་ཚང་མས་ཞི་བདེ་ཞི་བདེ་ཟེར་གྱི་ཡོད། ཞི་བདེ་གནམ་ནས་འབབ་རྒྱུ་མེད། འཁྲུག་པ་ང་རང་ཚོ་མིས་བཟོས་པ་རེད། དེར་བརྟེན། ཞི་བདེ་ཟེར་དུས་ང་ཚོ་མི་རང་ཉིད་ནས་ཕན་ཚུན་བར་མཛའ་མཐུན་དང་གྲོགས་པོའི་འདུ་ཤེས། གཅིག་གིས་གཅིག་ལ་ཕན་གྲོགས་བྱས་ཏེ། ཞི་བདེ་བསྐྲུན་དགོས་པ་ཆགས་ཀྱི་ཡོད། ངོས་རང་དྲི་བ་དྲི་ལན་བྱ་རྒྱུ་དགའ་པོ་ཡོད་ཀྱང་། སྔོན་ལ་འདི་གཅིག་ཟ་རྒྱུ་ཡིན། ཞིམ་མདོག་ཁ་པོ་ཞེ་དྲགས་འདུག ཅེས་བཞད་མོ་བཞེས་སོང་།

ངོས་རང་འཛམ་གླིང་ས་ཕྱོགས་གང་དུ་ཕྱིན་ནའང་། ང་རང་ཚོ་མི་གཅིག་གྱུར་ཡིན་པའི་འདུ་ཤེས་དེ་གཙོ་བོར་འཇོག་གི་ཡོད། ང་ཚོ་ཚང་མ་མི་གཅིག་པ་རེད། ཁ་གཅིག་དང་མིག་གཉིས་ཡོད་པ་གཅིག་པ་རེད་འདུག་ག དཔེར་ན་ཕར་ཚུར་ཕྱིན་སྐབས། མི་མིག་གསུམ་ཡོད་པ་དང་ཁ་ལ་མཆེ་བ་ཡོད་པ་ཞིག་ལ་ཐུག་ཚེ། ངོས་ལ་འདྲོག་མགོ་ལངས་ཀྱི་རེད། འོན་ཀྱང་། དེ་མ་རེད། ང་རང་ཚོ་ཚང་མ་དངོས་གནས་དྲང་གནས་བསམ་བློའི་ཐོག་ནས་ཐག་ཉེ་བོ་བྱུང་བ་ཡིན་ན། ང་ཚོ་འཛུམ་ཞིག་ཞིག་གི་མི་གཅིག་གྱུར་རེད།

མི་ལྷན་སྐྱེས་ཀྱི་གནས་སྟངས་ལ་བལྟས་པ་ཡིན་ན། ང་ཚོ་ཚང་མ་མ་ལས་སྐྱེས་པ་དང་མ་ཡི་ནུ་བཅུད་འཐུང་སྟེ་ལངས་པ་དང་མི་ཚེ་འདི་འདྲ་བྱས་ནས་བསྐྱལ་བ་རེད།  བུ་གུ་ཆུང་ཆུང་ཚོས་ལུང་པ་དང་ཆོས་ལུགས་གང་ཡིན་གྱི་སྐད་ཆ་འདྲི་ཡོ་མ་རེད། ང་ཚོ་མ་ཡི་བརྩེ་བའི་འོག་ནས་ལོན་འདུག དེ་ནས་བྱིས་པ་ཆུང་ཆུང་ཚོས་གཅིག་གིས་གཅིག་ལ། ཁྱེད་ཀྱི་ལུང་པ་དང་ཆོས་ལུགས་གང་ཡིན་གྱི་སྐོར་ནས་སྐད་ཆ་བཤད་ཀྱི་མ་རེད། གཅིག་གིས་གཅིག་ལ་བརྩེ་བའི་བློ་ཡོད་པ་དང་རྩེད་མོ་མཉམ་དུ་རྩེད་ནས་སྡོད་ཀྱི་ཡོད། ང་ཚོ་བྱིས་པ་ཆུང་དུས་སྐབས་སུ། མི་གཅིག་གྱུར་གྱི་འདུ་ཤེས་འདུག

ངོས་རང་ས་ཆ་གང་དུ་ཕྱིན་ནའང་མི་གཅིག་གྱུར་གྱི་འདུ་ཤེས་བཞག་སྟེ། སུ་དང་ཐུག་འཕྲད་བྱུང་བ་ཡིན་ན་འཛུམ་ཞིག་ཞིག་སྡོད་ཀྱི་ཡོད། ཕར་འཛུམ་ཞིག་ཞིག་བསྡད་དུས། ཚུར་ལ་སེམས་ཐག་ཉེ་བའི་དགའ་པོའི་རྣམ་འགྱུར་སྟོན་གྱི་འདུག དཔེར་ན། ང་ཚོ་གཅིག་པོ་ས་སྟོང་ལུང་སྟོང་ཞིག་ལ་ལུས་ཡོད་དུས། ཕ་གི་ནས་མི་ཞིག་ཚུར་ཡོང་གི་ཡོད་པ་མཐོང་དུས། སེམས་ལ་དགའ་ཚོར་ཞེ་དྲགས་སྐྱེས་ཏེ། དེའི་འཁྲིས་སུ་འགྲོ་རྒྱུ་མ་གཏོགས། མི་དེ་ལུང་པ་གང་ནས་ཡིན་པ་དང་ཆོས་ལུགས་གང་ཡིན་སྐོར་འདྲི་ཡི་མ་རེད། མི་གཅིག་གྱུར་ཡིན་པ་ལ་བརྟེན་ནས་ཕར་མི་དེའི་འཁྲིས་ལ་འགྲོ་ཡི་རེད།

དངོས་གནས་བྱས་ན། འཛམ་གླིང་གི་མི་ཚང་མ་སྐྱེས་ཚུལ་དང་ཤི་ཚུལ་གཅིག་མཚུངས་ཡིན། དེ་ནས་གསོན་པའི་རིང་ལ་ཁྱེད་དང་ང་ཞེས་ཐག་རིང་པོ་ཞེ་དྲགས་བྱས་ཏེ། ཆོས་ལུགས་དང་མི་རིགས། རྒྱལ་ཁབ་མི་འདྲ་བ་སོགས་ཀྱི་ཐོག་ནས་ཉེ་བོ་ཡོང་རྒྱུའི་ཚབ་ཏུ། རྒྱང་ཐག་རིང་པོ་བཞག་སྟེ་མི་མཐུན་པའི་ཕྱོགས་དེར་བསམ་བློ་གཙོ་བོ་བཏང་གི་ཡོད་པ་འདྲ་བོ་འདུག  བུ་གུ་ཆུང་ཆུང་ཡིན་དུས་དེ་ཡོད་པ་མ་རེད། ག་ལེར་ལོན་ཡོང་བ་དང་མི་རིགས་དང་ཆོས་ལུགས་གཅིག་པ་ཡིན་ནའང་། དབུལ་པོ་དང་ཕྱུག་པོའི་རྣམ་དབྱེ་ཕྱེས་ཏེ་རང་ཕྱོགས་དང་གཞན་ཕྱོགས་ཟེར་བ་ང་ཚོའི་སེམས་ནང་ཡོང་གི་ཡོད་པ་རེད། དེ་རྙོག་གྲའི་རྩ་བ་རེད་འདུག ཅེས་གསུངས།