བོད་དོན་ལས་འགུལ་བ་སངས་རྒྱས་སྐྱབས་ལགས་ཀྱིས་བོད་དོན་འབོད་སྐུལ་དོན་ཚན་ལྔ་བཏོན་ནས་ཁེ་ན་ཌ་རྒྱལ་ཡོངས་སུ་རྐང་འཁོར་སྐོར་སྐྱོད་ཀྱི་ལས་འགུལ་སྤེལ་མགོ་བཙུགས་གནང་།
བོད་དོན་ལས་འགུལ་བ་སངས་རྒྱས་སྐྱབས།
ཟླ་འདིའི་ཕྱི་ཚེས་༡༦ ཉིན་བོད་དོན་ལས་འགུལ་བ་སངས་རྒྱས་སྐྱབས་ལགས་ཀྱིས་དོན་ཚན་ལྔའི་འོག་ན། ཁེ་ན་ཌའི་ཝེན་ཁུའུ་ཝར་དུ་ (vencouver)ས་གནས་ནས་མགོ་བཙུགས་ཏེ། ཁེ་ན་ཌ་རྒྱལ་ཡོངས་སུ་བོད་ནང་གི་གནས་སྟངས་དྲིལ་བསྒྲགས་དང་། རྒྱལ་སྤྱིའི་ཚོགས་སྡེ་ཁག་ཏུ་བོད་དོན་འབོད་སྐུལ་ཞུ་རྒྱུའི་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་མགོ་བཙུགས་གནང་སོང་ལ། བོད་རིགས་གཞོན་སྐྱེས་སྟོབས་ལྡན་ལགས་ཀྱིས་ཀྱང་ཁེ་ན་ཌའི་ཁཱ་ཀར་(Calgary ) བར་དུ་སངས་རྒྱས་སྐྱབས་ལགས་དང་མཉམ་དུ་ལས་འགུལ་སྤེལ་རྒྱུ་ཡིན་འདུག
དེའི་ཐད་ཟླ་འདིའི་ཕྱི་ཚེས་ ༡༥ ཉིན་སངས་རྒྱས་སྐྱབས་ལགས་ཀྱིས་དྲ་ལམ་བརྒྱུད། འདི་ལོའི་༧གོང་ས་མཆོག་གི་འཁྲུངས་སྐར་ཉིན་མོར། ངའི་ཞི་བའི་གོམ་བགྲོད་གསུམ་པ་མཇུག་སྒྲིལ་བ་དང་། ཁེ་ན་ཌའི་རྒྱལ་ཡོངས་སུ་རྐང་འཁོར་སྐོར་སྐྱོད་ལས་འགུལ་སྤེལ་རྒྱུ་ཡིན་པའི་གསལ་བསྒྲགས་བྱས་པ་ཡིན། ལས་འགུལ་འདི་སྤེལ་དགོས་དོན་གཙོ་བོ་ནི་༧གོང་ས་ཡིད་བཞིན་ནོར་བུ་མཆོག་བོད་དུ་ཕེབས་པ་དང་། བོད་མི་ས་ཡ་དྲུག་གི་དཀའ་ངལ་རྣམས་གོ་རྟོགས་སྤེལ་ཆེད། དེ་བཞིན་ཐེངས་འདིའི་རྐང་འཁོར་སྐོར་སྐྱོད་ནི་ཁེ་ན་ཌའི་མངའ་སྡེ་བཅུ་དང་རང་སྐྱོང་ས་ཁུལ་གསུམ་བརྒྱུད་ནས་ལས་འགུལ་སྤེལ་རྒྱུ་ཡིན། ཁེ་ན་ཌ་ནི་འཛམ་གླིང་གི་རྒྱལ་ཁབ་ཆེ་ཤོས་གཉིས་པ་ཡིན་ཡང་། ཐེངས་འདིར་ཁེ་ན་ཌའི་གྲོང་ཁྱེར་དང་གྲོང་གསེབ་སོགས་ས་ཆ་གང་དུ་སླེབས་ཀྱང་། རྒྱ་ནག་གཞུང་གིས་བོད་ནང་དུ་སྡུག་རྩུབ་ག་འདྲ་གཏོང་བཞིན་ཡོད་པར་ཁྱབ་བསྒྲགས་བྱ་རྒྱུ་ཡིན། ཞེས་འགྲེལ་བརྗོད་བྱས་སོང་།
ཡང་ཁོང་གིས། རང་ཉིད་བོད་མི་ཞིག་ཡིན་པའི་ཆ་ནས་བོད་ཀྱི་རྩ་དོན་གྱི་ཆེད་དུ་ལས་འགུལ་རབ་དང་རིམ་པ་སྤེལ་བཞིན་ཡོད་ལ། བོད་ནང་གི་རྒྱལ་གཅེས་དཔའ་བོ་དཔའ་མོ་ཚོས་བོད་ཀྱི་བསྟན་པ་ཆབ་སྲིད་ཀྱི་ཆེད་དུ་རང་ལུས་མེར་བསྲེགས་པའི་རླབས་ཆེན་གྱི་མཛད་རྗེས་རྣམས་རྒྱལ་སྤྱིའི་སྟེང་དུ་དྲིལ་བསྒྲགས་བྱ་རྒྱུ་ནི་ང་ཚོའི་འོས་འགན་ཡིན་པར་དྲན་པའི་ཐོག་ནས་ལས་འགུལ་སྤེལ་བཞིན་ཡོད། ཐེངས་འདིའི་རྐང་འཁོར་སྐོར་སྐྱོད་ལས་འགུལ་ནི་ཝན་ཁུའུ་ཝར་ས་གནས་ནས་མགོ་བཙུགས་ཀྱིས་བོད་དོན་དྲིལ་བསྒྲགས་བྱ་རྒྱུ་དང་། རྒྱ་ནག་གིས་བོད་ལ་ཁྲིམས་འགལ་གྱིས་བཙན་འཛུལ་བྱེད་པའི་གནས་སྟངས་སོགས་འགྲེལ་བརྗོད་བྱ་རྒྱུ་ཡིན་སྐོར་དང་། ཁོང་གིས། ལམ་ཁར་རྐང་འཁོར་བཏང་ནས་ཤི་སོང་ནའང་སྐྱོན་མི་འདུག ༧གོང་ས་རྒྱལ་བ་རིན་པོ་ཆེ་མཆོག་དང་བོད་མི་ས་ཡ་དྲུག་ང་རང་གི་སེམས་སུ་བཟུང་ནས་འགྲོ་ཡི་ཡོད། ལག་ཏུ་བོད་རྒྱལ་ཁབ་ཆེན་པོའི་རྒྱལ་དར་ཡོད། ཤི་སོང་ནའང་དཔེ་སྐྱིད་པོ་ཡོད་སྐོར་འགྲེལ་བྱས་བརྗོད་བྱས་སོང་།
སངས་རྒྱས་སྐྱབས་ལགས་ཀྱིས་ཕྱི་ལོ་༢༠༡༨ ནས་བཟུང་རེས་གཟའ་ལྷག་པ་རྟག་པར་ཁེ་ན་ཌའི་ཊོ་རོན་ཊོའི་རྒྱ་ནག་གཞུང་ཚབ་ཁང་གི་མདུན་ཐང་དུ་ངོ་རྒོལ་ལས་འགུལ་སྤེལ་གྱིན་ཡོད་ཅིང་། ཁོང་གིས་ ཕྱི་ལོ་༢༠༢༠ ནས་འདི་ལོའི་ཕྱི་ཟླ་༨ བར་དུ་ཞི་བའི་གོམ་བགྲོད་ཐེངས་༣ བྱས་ཏེ་རྒྱལ་སྤྱིའི་ཚོགས་སྡེ་ཁག་ཏུ་བོད་དོན་འབོད་སྐུལ་བྱས་པ་མ་ཟད། ཐེངས་འདིའི་ཁེ་ན་ཌ་རྒྱལ་ཡོངས་བོད་དོན་རྐང་འཁོར་སྐོར་སྐྱོད་ལས་འགུལ་ཟླ་བ་གསུམ་རིང་ལེགས་འགྲུབ་ཡོང་རྒྱུ་འཆར་གཞི་འདུག་ལ། ཐེངས་འདིའི་སྐོར་སྐྱོད་ལས་འགུལ་མཇུག་རྫོགས་མཚམས་སུ་མུ་མཐུད་ནས་བོད་དོན་ལས་འགུལ་རབ་དང་རིམ་པ་སྤེལ་བའི་འཆར་གཞི་ཡོད་འདུག
བྱམས་པ་ཚེ་རིང་།
