སྲིད་སྐྱོང་སྤེན་པ་ཚེ་རིང་མཆོག་གིས་ཅེག་སྤྱི་མཐུན་རྒྱལ་ཁབ་ཀྱི་སྲིད་བློན་མཆོག་དང་མཇལ་མོལ་གནང་།

ཅེག་སྤྱི་མཐུན་རྒྱལ་ཁབ་ཀྱི་རྒྱལ་སར་འཚོག་བཞིན་པའི་འདི་ལོའི་ ༢༠༠༠ ཞི་བདེ་གླེང་སྟེགས་སྐབས་ ༢༦ པའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་ཡུལ་དེའི་སྲིད་བློན་པེ་ཊར་ཧྥིའ་ལ་མཆོག་དང་སྲིད་བློན་ཆེན་སྐུ་ཞབས་ཇན་ལི་བྷ་སི་ཀེ་ལགས་རྣམས་གཉིས་དང་གྲོས་ཚོགས་འོག་མའི་ཚོགས་གཙོ་སོགས་སུ་མཇལ་མོལ་གནང་ཡོད་འདུག

ཁ་སང་ཅེག་སྤྱི་མཐུན་རྒྱལ་ཁབ་ཀྱི་རྒྱལ་ས་པ་རག་(Prague)ཏུ་༢༠༠༠ ཞི་བདེ་གླེང་སྟེགས་སྐབས་ ༢༦ པ་མགོ་འཛུགས་གནང་ཡོད་པ་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གླེང་སྟེགས་དེའི་ཐོག་མཉམ་ཞུགས་གནང་སྟེ། ཡུལ་དེའི་སྲིད་བློན་པེ་ཊར་ཧྥིའ་ལ་ (Petr Fiala) མཆོག་དང་། ཕྱི་སྲིད་བློན་ཆེན་སྐུ་ཞབས་ཇན་ལི་བྷ་སི་ཀེ་ (Jan Lipavský) ལགས་རྣམས་གཉིས་ཀྱི་དབུས་གནད་ཡོད་མི་སྣ་ཁག་ཅིག་ལ་མཇལ་འཕྲད་གནང་ཡོད་པ་དང་། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་དང་འོས་བསྡུའི་ལམ་ནས་བདམས་ཐོན་བྱུང་བའི་ཅེག་སྤྱི་མཐུན་རྒྱལ་ཁབ་ཀྱི་སྲིད་བློན་ཟུར་པ་སྐུ་ཞབས་ཝག་ལེབ་ཧ་ཝེལ་ (Vaclav Havel) མཆོག་གི་དབར་མཛའ་བརྩེ་དམ་ཟབ་ཡོད་པའི་སྐོར་གླེང་སློང་གནང་ཡོད་འདུག

དེ་བཞིན་ཁ་སང་སྲིད་སྐྱོང་མཆོག་ཡུལ་དེའི་གྲོས་ཚོགས་འོག་མའི་ནང་འཚམས་གཟིགས་སུ་ཕེབས་པ་དང་བསྟུན། གྲོས་ཚོགས་འོག་མའི་ཚོགས་གཙོ་ལྕམ་སྐུ་མཱར་ཀེ་ཊ་པེ་ཀ་རོ་ཝ་ ( Markéta Pekarová Adamová) མཆོག་དང་། གྲོས་ཚོགས་འོག་མའི་འཐུས་མི་དང་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཧ་ཡ་ཊོ་ཨོ་ཀ་མུ་ར་ (Hayato Okamura) ལགས་སོགས་ལ་མཇལ་མོལ་གནང་ཡོད་འདུག

གཞན་ཡང་། ཁ་སང་སྲིད་སྐྱོང་སྤེན་པ་ཚེ་རིང་མཆོག་དང་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་སོགས་ཀྱིས། ཅེག་ཏུ་རྟེན་གཞི་བྱས་པའི་རླུང་རྟ་བོད་དོན་རྒྱབ་སྐྱོར་ཚོགས་པ་དང་། ཅེག་བོད་དོན་རྒྱབ་སྐྱོར་ཚོགས་པ། (Czechs Support Tibet /Cesi Tibet podporuji) རྒྱལ་སྤྱིའི་ཉེས་ཡངས་ཚོགས་པ། བོད་དོན་རྒྱབ་སྐྱོར་ཚོགས་པ་(MOST ProTibet) བཅས་ཀྱི་གནད་ཡོད་མི་སྣ་སོགས་དང་མཇལ་འཕྲད་གནང་ནས། བོད་ནང་གི་ཛ་དྲག་གནས་སྟངས་དང་། དབུས་བོད་མིའི་སྒྲིག་འཛུགས་ཀྱི་ལས་དོན་བྱེད་ཕྱོགས་སོགས་ཀྱི་ཐད་གླེང་མོལ་གནང་ཡོད་འདུག

སྲིད་སྐྱོང་སྤེན་པ་ཚེ་རིང་མཆོག་ཕྱི་ཟླ ༨ ཚེས ༣༡ ནས་ཕྱི་ཟླ་ ༩ ཚེས་ ༢ བར་འཚོག་བཞིན་ཡོད་པའི་༢༠༠༠ ཞི་བདེའི་གླེང་སྟེགས་སྐབས་ ༢༦ པའི་མཉམ་ཞུགས་གནང་བཞིན་ཡོད་པ་དང་། ཟླ་འདིའི་ཕྱི་ཚེས་གསུམ་བཞི་ཙམ་ལ་ཕྱིར་དྷ་རམ་ས་ལར་ཕེབས་འབྱོར་གནང་འཆར་ཡོད་འདུག

གསར་འགོད་པ། དཔལ་ལྡན།