དེ་རིང་དགེ་རྒན་གྱི་ཉིན་མོ་དང་བསྟུན་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་བོད་མིའི་སློབ་གྲྭ་ཁག་གི་དགེ་རྒན་ཡོངས་ལ་འཚམས་འདྲི་དང་སྦྲགས་སློབ་ཁྲིད་ཀྱི་ཞོར་དུ་རྒན་ལགས་རྣམ་པས་རང་ཉིད་ཀྱང་ཡར་རྒྱས་གཏོང་ཐབས་གནང་དགོས་སྐོར་གྱི་ཡོངས་ཁྱབ་གསུང་འཕྲིན་ཞིག་གནང་འདུག
ལོ་ལྟར་ཕྱི་ཟླ་ ༩ ཚེས་ ༥ སྟེ། རྒྱ་གར་གྱི་སྲིད་འཛིན་ཟུར་པ་དམ་པ་ཌོག་ཊར་རཱ་དྷཱ་ཁིར་ཤའི་ནན་(Dr Radhakrishnan) མཆོག་གི་འཁྲུངས་སྐར་དང་བསྟུན་དགེ་རྒན་གྱི་ཉིན་མོ་སྲུང་གཙི་བྱེད་ཀྱི་ཡོད་པ་ལྟར། དེ་རིང་དགེ་རྒན་གྱི་ཉིན་མོར་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་བོད་ཀྱི་སློབ་གྲྭ་ཁག་གི་དགེ་རྒན་ཡོངས་ལ་འཚམས་འདྲིའི་གསུང་འཕྲིན་ནང་། རྒྱལ་ཁབ་ཅིག་གི་འཛུགས་སྐྲུན་ནི་མི་མང་གི་ཤེས་རིག་གི་དཔལ་ཡོན་ལ་རག་ལས་ཡོད་ཅིང་། མང་ཚོགས་ཀྱི་ཤེས་རིག་ནི་དགེ་རྒན་ལ་རག་ལས་ཡོད་སྟབས། དགེ་རྒན་ནི་མི་རིགས་ཤིག་གམ་རྒྱལ་ཁབ་ཅིག་གི་འཛུགས་སྐྲུན་གྱི་ཁྲོད་དུ་ཆེས་བླ་ན་མེད་པའི་མི་སྣ་གལ་ཆེན་ཞིག་ཡིན་པ་རེད། གལ་ཏེ་མི་བུ་གང་ཞིག་གིས་དགེ་རྒན་གྱི་ལས་ལ་གཞོལ་ཚེ། ལྷག་བསམ་རྣམ་དག་གིས་འབད་འབུངས་ལྷོད་མེད་བྱ་དགོས་ཤིང་། ཤེས་ཡོན་སྲིད་བྱུས་ནང་ “དགེ་རྒན་རྣམས་ཕྱིའི་མཚན་ཉིད་ཤེས་ཚད་དང་ཉམས་མྱོང་རྣམས་དེང་རབས་ཀྱི་ཤེས་ཡོན་རིག་པའི་གཞུང་ནས་བྱུང་བ་ལྟར་དང་། ནང་གི་མཚན་ཉིད་བསམ་པའི་འཁྱེར་སོ་སོགས་བོད་ཀྱི་སྲོལ་རྒྱུན་རིག་པའི་གཞུང་ནས་བྱུང་བ་ལྟར་ཕྱི་ནང་གཉིས་ཀའི་མཚན་ཉིད་ཚང་བ་” དགོས་ཞེས་གསལ་བ་ལྟར། དགེ་རྒན་ཚོས་ཕྱི་ནང་གཉིས་ཀྱི་ཁྱད་ཆོས་ཚད་ལྡན་ཚང་བར་འབད་བརྩོན་གནང་དགོས་སྐོར་གསུངས་འདུག
ཡང་ཁོང་མོས་“འབར་བཞིན་པའི་སྒྲོན་མེ་ཞིག་གིས་མ་གཏོགས་སྒྲོན་མེ་གཞན་ཞིག་ལ་མེ་སྤར་མི་ཐུབ་པ་བཞིན་དུ་དགེ་རྒན་རང་ཉིད་ཀྱི་ངོས་ནས་སློབ་གཉེར་མུ་མཐུད་མ་གནང་ཚེ་སློབ་ཁྲིད་ཡང་དག་པ་ཞིག་བྱེད་མི་ཐུབ།” ཅེས་པ་ཇི་བཞིན་དགེ་རྒན་ཚོས་ཀྱང་སློབ་ཞོར་དུ་རང་དགོས་ཤེས་བྱའི་གནས་ལ་འབད་འབུངས་བྱས་ཏེ། སློབ་མ་རྣམས་ལ་སློབ་ཁྲིད་བྱས་པའི་གོ་རིམ་གྱི་ཁྲོད་ནས་ཡར་རྒྱས་གཏོང་ཐབས་བྱ་དགོས་པ་དང་། སློབ་སྦྱོང་ཞན་པའི་སློབ་མ་རྣམས་སྣང་མེད་དུ་བཞག་མི་ཉན་པར། དེ་དག་ལ་དམིགས་བསལ་གྱིས་དུས་ཚོད་བཏང་ནས་ཡར་རྒྱས་གཏོང་ཐབས་སུ་ལམ་སྟོན་དང་རོགས་འདེགས་བྱ་དགོས་སྐོར་གསུངས་འདུག
ཡང་ཤེས་རིག་བཀའ་བློན་མཆོག་གིས་དགེ་རྒན་གྱི་ཉིན་མོ་དང་བསྟུན་ནས། བོད་རིགས་དགེ་རྒན་ཚོས་སློབ་ཁྲིད་ཀྱི་རིག་པ་དང་། སློབ་ཁྲིད་ཀྱི་ཐབས་ལམ་ཐད་རྒྱུས་མངའ་གཏིང་ཟབ་དགོས་རྒྱུ། རང་རྒྱུད་ལ་དཔེ་ཀློག་གི་གོམས་གཤིས་འཇགས་ཐབས། དགེ་རྒན་གཞན་དག་ཚོས་སློབ་ཁྲིད་གནང་སྟངས་ལ་གཟིགས་ནས་ལེགས་ཉེས་ཀྱི་ཆ་ཇི་ཡོད་ཤེས་རྟོགས་དགོས་པ། སློབ་ཁྲིད་གནང་སྟངས་ཀྱི་ཐབས་ལམ་འདྲ་མིན་ཐད་བསམ་བློ་གཏོང་དགོས་པ། དཀའ་ངལ་ཅན་གྱི་ཕྲུ་གུ་རྣམས་ངོ་རྟགས་ཆོད་པ་གནང་དགོས་པ། དགེ་རྒན་ཚོས་སློབ་ཕྲུག་རྣམས་ལ་འཕྲོད་བསྟེན་དང་། བཟང་སྤྱོད། སེམས་མྱོང་གོང་འཕེལ་གཏོང་སྟངས་ཐོག་སློབ་སྟོན་གནང་སྟེ། དགེ་སློབ་བར་དུ་འབྲེལ་ལམ་སྲ་བརྟན་བཙུགས་ནས་བོད་རིགས་སློབ་མ་ཚད་ལྡན་སྐྱེད་སྲིང་བྱ་དགོས་པའི་ལམ་སྟོན་གནང་འདུག
གཞན་ཡང་། བཀའ་བློན་མཆོག་ནས་སློབ་མ་རྣམས་ཀྱི་ཤེས་ཡོན་ནི་དཔེ་དེབ་གཅིག་པུ་ནས་ཡོང་ཐབས་བྲལ་བས། དགེ་རྒན་ཚོས་སློབ་མ་རྣམས་ཀྱི་ཀུན་སྤྱོད་སོགས་ལ་དོ་སྣང་དགོས་པ་དང་། སློབ་ཕྲུག་བྱེ་བྲག་པ་རེ་རེའི་ནུས་པ་དེ་དག་ཤེས་པ་བགྱིས་ནས་དེར་མུ་མཐུད་དུ་གཞོལ་དགོས་པའི་སྐུལ་མ་གནང་དགོས་པ་དང་། བོད་ཀྱི་མ་འོངས་པའི་སོན་རྩར་གྱུར་བའི་སློབ་མ་རྣམས་ལ་དེང་རབས་ཀྱི་ཤེས་བྱའི་རིག་པའི་གནས་ལ་ཕྱུག་ཅིང་། ཡ་རབས་བཟང་སྤྱོད་ལྡན་པའི་སློབ་མ་ཚད་ལྡན་ཞིག་ཆགས་རྒྱུར་སྒོ་ཀུན་ནས་འབད་བརྩོན་ཧུར་བརྩོན་བྱ་རྒྱུ་ནི་བོད་མིའི་སློབ་གྲྭ་ཁག་གི་དགེ་རྒན་ཀུན་གྱི་ཟློག་ཐབས་བྲལ་བའི་འགན་འཁྲི་ཞིག་ཡིན་སྐོར་གསུངས་འདུག
གསར་འགོད་པ། དཔལ་ལྡན།
