དབྱིན་ཡུལ་གྱི་རྒྱལ་མོ་མཆོག་དགུང་ལོ་ ༩༦ སྟེང་སྐུ་གྲོངས།

རེས་གཟའ་ཕུར་བུའི་ཉིན་རྒྱབ་ཏུ་དབྱིན་ཡུལ་གྱི་རྒྱལ་སྲིད་ཡུན་རིང་ཤོས་སྐྱོང་མཁན་རྒྱལ་མོ་ཨེ་ལི་ཛ་བེཏ་གཉིས་པ་མཆོག་དགུང་ལོ་ ༩༦ སྟེང་བྷལ་མོ་རཱལ་མཁར་རྗོང་དུ་སྐུ་གྲོངས་ཡོད་འདུག

ཁ་སང་རྒྱལ་སྤྱིའི་གསར་ལམ་ཁག་ཏུ་གནས་ཚུལ་སྤེལ་བ་ལྟར་ན། རེས་གཟའ་ཕུར་བུའི་དགོང་མོའི་ཆུ་ཚོད་ ༡༡།༣༠ ཙམ་ལ་དབྱིན་ཡུལ་གྱི་རྒྱལ་ཁང་ (Buckingham Palace) ངོས་ནས་སེམས་ཚོར་ཆེན་པོའི་ཐོག་དབྱིན་ཡུལ་གྱི་རྒྱལ་མོ་ཨེ་ལི་ཛ་བེཏ་གཉིས་པ་ (Queen Elizabeth II) མཆོག་སྐུ་གྲོངས་ཡོད་སྐོར་གསལ་བསྒྲགས་བྱས་འདུག 

གསལ་བསྒྲགས་ཀྱི་ནང་དུ་རེས་གཟའ་ཕུར་བུའི་ཞོགས་པར་རྒྱལ་མོ་མཆོག་གི་སྐུ་གཟུགས་གནས་སྟངས་ཇེ་སྡུག་ཏུ་སོང་སྟེ། ཉིན་རྒྱབ་ཏུ་བྷལ་མོ་རཱལ་ (Balmoral)མཁར་རྫོང་གི་རང་ཤག་ཏུ་ཞི་བདེའི་ངང་སྐུ་གྲོངས་ཡོད་སྐོར་བསྒྲགས་ཡོད་པ་མ་ཟད། རྒྱལ་སྲས་ཅར་ལེས་ (Prince Charles) ལགས་ཀྱིས་ད་ཆ་དབྱིན་ཡུལ་གྱི་རྒྱལ་པོའི་སྲིད་དབང་འགན་འཁུར་ཞུ་རྒྱུའི་སྐོར་ཡང་འཁོད་ཡོད་འདུག

རྒྱལ་སྲས་ཅར་ལིས་ལགས་ཀྱིས་རང་གི་བརྩེ་ལྡན་གྱི་ཡུམ་ཆེན་སྐུ་གྲོངས་པ་དེ་ནི་ཁོང་དང་ནང་མི་ཡོངས་ལ་ཧ་ཅང་བློ་ཕམ་གྱི་གནས་ཚུལ་ཞིག་ཡིན་པ་མ་ཟད། ཁོང་མོ་སྐུ་གྲོངས་པ་དེས་དབྱིན་ཡུལ་གྱི་ས་ཕྱོགས་ཡོངས་དང་འཛམ་གླིང་གི་མི་མང་གྲངས་མེད་ལ་སྐྱོ་གདུང་བྱིན་ངེས་ཡིན་ཚུལ་གསུངས་འདུག

དབྱིན་ཡུལ་གྱི་གསར་འདེམས་སྲིད་བློན་ལིཛ་ཏ་རུས་ (Liz Truss) ལགས་ཀྱིས་རྒྱལ་མོ་སྐུ་གྲོངས་པ་ནི་དབྱིན་ཡུལ་དང་འཛམ་གླིང་མི་མང་ལ་བློ་ཕམ་ཆེན་པོའི་གནས་ཚུལ་ཞིག་ཡིན། ད་ལྟ་དབྱིན་ཡུལ་གྱི་གནས་སྟངས་གང་ཡོད་པ་དེ་ནི་ཁོང་གི་བཀའ་དྲིན་ཡིན་པ་མ་ཟད། ཁོང་གིས་སོ་སོའི་ལས་འགན་ཐོག་འབད་བརྩོན་གནང་ཕྱོགས་དེ་ནི་ང་ཚོ་ཚང་མས་མིག་དཔེ་ལྟ་ས་ཞིག་ཆགས་ཡོད་ཚུལ་གསུངས་འདུག

ཨ་རིའི་སྲིད་འཛིན་བྷའེ་ཌིན་མཆོག་གིས་རྒྱལ་མོ་ཁོང་གི་རྣམ་དཔྱོད་དང་བྱམས་བརྩེས་ང་ཚོའི་ཡིད་དབང་འཕྲོག་ཡོད་པ་མ་ཟད། ཨ་རི་རྒྱལ་ཁབ་ཀྱི་ཆེས་མུན་ནག་གི་ཉིན་མོ་ ༩།༡༡ དོན་རྐྱེན་བྱུང་སྐབས་ཀྱང་ཁོང་གིས་སྐྱིད་སྡུག་མཉམ་མྱོང་གནང་སྟེ་ང་ཚོའི་རྒྱབ་ཏུ་ལངས་ཡོད་པས། དེ་རིང་ཁོང་གི་བརྩེ་གདུང་ལ་རྗེས་དྲན་གྱི་ཚུལ་དུ་སྐྱོ་གདུང་འབུལ་རྒྱུ་མ་གཏོགས་མེད་ལུགས་གསུངས་འདུག་ལ། དེ་བཞིན་ཧྥ་རན་སི་དང་ཇར་མན་ཎི། ཁེ་ཎ་ཌ་སོགས་འཛམ་གླིང་རྒྱལ་ཁབ་མང་པོའི་དབུ་ཁྲིད་ཚོས་མྱ་ངན་གུས་འདུད་དང་གདུང་སེམས་མཉམ་སྐྱེད་ཞུས་ཡོད་འདུག

རྒྱལ་མོ་ཨི་ལི་ཛ་བེཏ་གཉིས་པ་མཆོག་ནི་ཕྱི་ལོ་ ༡༩༢༦ ལོར་སྐུ་འཁྲུངས་ཤིང་། ཕྱི་ལོ་ ༡༩༥༢ ནས་ ༢༠༢༢ ལོའི་བར་དུ་དབྱིན་ཡུལ་གྱི་རྒྱལ་སྲིད་བཟུང་། ཕྱི་ལོ་ ༡༩༤༧ ལོར་ཨི་དིན་བྷག་ (Edinburgh) རྒྱལ་སྲས་ཕི་ལིབ་ (Philip)དང་གཉེན་སྒྲིག་གནང་སྟེ། སྲས་དང་སྲས་བཞི་ཡོད་པ་རེད། ཁོང་མོས་རྒྱལ་སྲིད་བཟུང་སྐབས་འཛམ་གླིང་གི་ནང་རྩོད་རྙོག་དང་འཛིང་འཁྲུག་ཆེ་ཤོས་ཏེ། འཛམ་གླིང་ནང་སླར་ཡང་དམག་ཆེན་འབྱུང་རྒྱུའི་ཉེན་ཁ་དང་འཇིགས་པ་ཆེས་ཆེར་གྱི་གནས་སྟངས་དང་། གྲང་དམག་ (Cold War) མགོ་བཙུགས་པའི་སྐབས་ཡིན། ཁོང་མོས་དབྱིན་ཡུལ་གྱི་རྒྱལ་སྲིད་ལོ་ངོ་ ༧༣ རིང་བསྐྱངས་ཤིང་། རང་ལོ་ ༩༦ སྟེང་སྐུ་གྲོངས་ཡོད་ཅིང་། ཁོང་མོ་ནི་དབྱིན་ཡུལ་ཙམ་མིན་པར་ཨོས་ཏི་ལི་ཡ་ (Australia) དང་ཁེ་ཎ་ཌ་ (Canada) ཇ་མ་ཡེ་ཀ་ (Jamaica) སོགས་རྒྱལ་ཁབ་བཅུ་བཞིའི་དབུ་འཁྲིད་ཀྱང་ཡིན་འདུག