ཚོགས་གཙོ་མཆོག་གིས་གྲོས་ཚོགས་ནང་དཀའ་ངལ་རིམ་པ་བྱུང་གི་ཡོད་པར་བརྟེན། སྤྱི་འཐུས་ཡོངས་ཀྱིས་ནང་ཁུལ་མཐུན་སྒྲིལ་གྱིས་བོད་སྤྱི་བའི་རྩ་དོན་གྱི་ཆེད་དུ་ནུས་ཤུགས་སྤུངས་ཐུབ་པར་འབད་བརྩོན་བྱ་རྒྱུ་གལ་ཆེ་སྐོར་གསུངས་སོང་།
སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཞི་བའི་ལས་ཉིན་མཐའ་མར་ཚོགས་དྲུང་མཆོག་གིས། ཚོགས་དུས་རིང་སྤྱི་འཐུས་རྣམས་ཀྱི་དགོངས་ཞུའི་གནས་སྟངས་སྙན་སྒྲོན་ཞུས་གྲུབ་མཚམས། ཚོགས་གཙོ་མཁན་པོོ་བསོད་ནམས་བསྟན་འཕེལ་མཆོག་གིས་ཚོགས་གཙོའི་མཇུག་བསྡོམས་གསུང་བཤད་གནང་སྐབས། ཐེངས་འདིའི་ཚོགས་དུས་ཐོག་འཆར་ཅན་གྱི་ལས་རིམ་ཁག་ཕུད་བོད་མིའི་སྒྲིག་འཛུགས་ཀྱི་ལྷན་ཁང་ཁག་བདུན་གྱི་ལས་བསྡོམས་བསྡུས་པ་དང་སྤྱི་འཐུས་རྒྱུན་ལས་ནས་ལྷན་ཁང་ཁག་གི་ལས་བསྡོམས་རྒྱས་པར་གཟིགས་ཞིབ་གནང་བའི་སྙན་ཐོ། དེ་བཞིན་བཙན་བྱོལ་བོད་མིའི་གཞིས་ཆགས་ཁག་གི་ས་ཁང་སྒྲིག་གཞི་བསྐྱར་བཅོས་དང་། གངས་ལྗོངས་དཔལ་འབྱོར་ཞབས་ཞུ་ཁང་མ་འོངས་པར་རང་སྐྱོང་ལྡན་པའི་ཁེ་གཉེར་ཁང་ཞིག་ཏུ་བསྒྱུར་རྒྱུ། གཞན་ཡང་། བོད་སློབ་འཛིན་ཚོགས་ཀྱི་ཁྱབ་ཁོངས་སློབ་གྲྭ་ཁག་ཡོངས་སུ་རྩིས་བཞེས་ཟིན་པ་ལྟར། རྒྱ་གར་གཞུང་མང་གཉིས་དང་ལྷག་པར་དུ་བོད་སློབ་འཛིན་ཚོགས་ཀྱི་དབུ་ལས་ཡོངས་ལ་ཐུགས་རྗེ་ཆེ་ཞུའི་གྲོས་ཆོད་ཅིག་སྤྱི་མོས་གཏན་འབེབས་བཅས་གནང་ཡོད་པ་རེད།
བོད་ཀྱི་རྩ་དོན་རྒྱལ་སྤྱིའི་གནད་དོན་གྱི་སྡིངས་ཆའི་སྟེང་དུ་སླེབས་ཐུབ་པ་བྱ་རྒྱུ་དང་། གཞུང་འབྲེལ་དང་གཞུང་འབྲེལ་མིན་པའི་ཚོགས་པ་ཁག་དང་རྒྱ་ཆེའི་བོད་མི་ཡོངས་ཀྱིས་སྐྱིད་ན་སྐྱིད་མཉམ་དང་། སྡུག་ན་སྡུག་མཉམ་གྱིས་ལས་དོན་བྱེད་ཕྱོགས་འཛིན་རྒྱུ་ལས། གྲོས་ཚོགས་ཀྱི་སྟེང་དུ་དཀའ་ངལ་རབ་དང་རིམ་པའི་བར་ཆད་བྱུང་གི་ཡོད་པར་བརྟེན། སྤྱི་འཐུས་ཡོངས་ཀྱིས་ནང་ཁུལ་མཐུན་སྒྲིལ་གྱིས་བོད་སྤྱི་བའི་རྩ་དོན་གྱི་ཆེད་དུ་ནུས་ཤུགས་སྤུངས་ཐུབ་པར་འབད་བརྩོན་བྱ་རྒྱུ་གལ་ཆེན་ཡིན་སྐོར་དང་། བོད་ནང་གི་གནས་སྟངས་དང་བོད་དོན་ཆབ་སྲིད་ཀྱི་དཀའ་ངལ་གྱི་གནས་སྟངས་ཀྱི་ཐོག་ནས་ཆབ་སྲིད་ཀྱི་ངོ་བོ་དང་སྒྲིག་འཛུགས། འཛིན་སྐྱོང་གིས་བོད་དོན་བདེན་མཐའ་སེལ་ཐབས་དང་། བཙན་བྱོལ་སྤྱི་ཚོགས་ཀྱི་གནས་སྟངས་བདེ་ཐབས་ཀྱི་སྐོར། བོད་ནང་གི་ཆབ་སྲིད་ཀྱི་དཀའ་ངལ་དང་། བོད་ནང་དུ་ཏོག་དབྱིབས་རིམས་ནད་གཙང་སེལ་གྱི་སྲིད་ཇུས་འོག་ནས་སྒོ་རྒྱ་བསྡམས་ཏེ་ཟས་གོས་གནས་མལ་གྱི་དཀའ་ངལ་ཆེན་པོ་འཕྲད་བཞིན་ཡོད་པ་རེད། བཙན་བྱོལ་སྒྲིག་འཛུགས་སོགས་ཀྱིས་བོད་ནང་གི་ཆབ་སྲིད་ཀྱི་དཀའ་ངལ་ལ་དངོས་སུ་རོགས་རམ་བྱ་རྒྱུའི་གོ་སྐབས་མེད་ཀྱང་། ༧གོང་ས་རྒྱལ་བ་རིན་པོ་ཆེ་མཆོག་གིས་བཀའ་སློབ་གཞིར་བཟུང་ང་ཚོས་ཆོས་ཕྱོགས་ནས་དགེ་བ་སྒྲུབ་པ་དང་སྡིག་པ་སྤོང་བའི་ཐོག་ནས། བོད་ནང་གི་བོད་མིིར་སྨོན་ལམ་དང་ཐུགས་སྨོན་གནང་ན་ཕན་གྱི་ཡོད་སྐོར་གསུངས་ཡོད་པ་ལྟར། དེའི་རྒྱ་ཆེ་མང་ཚོགས་དང་སྒྲིག་འཛུགས་སོགས་ཀྱིས་ཐུགས་སྣང་བྱ་དགོས་སྐོར་དང་། རྒྱལ་སྤྱིའི་ནང་ཆབ་སྲིད་འཐབ་རྩོད་ཀྱི་གནས་བབ་དང་། ཏོག་དབྱིབས་རིམས་ནད་ཀྱི་དཀའ་ངལ་འཕྲད་རྗེས་ཀྱི་རྒྱལ་སྤྱིའི་སྲིད་འབྱོར་རིག་གསུམ་གྱི་འགྱུར་འགྲོས་དེ་དག་གི་ཁྲོད་དུ་བོད་དོན་ཚུད་ཐབས་དང་། བོད་ནང་གི་དཀའ་ངལ་སེལ་ཐབས། རྒྱལ་སྤྱིའི་ཆབ་སྲིད་ཀྱི་བགྲོ་གླེང་སོགས་སུ་བོད་ཅེས་པའི་མིང་དེ་ཚུད་ཐབས་ལ་འབད་བརྩོན་བྱ་དགོས་སྐོར་གསུངས་སོང་།
ཡང་སྔ་དྲོའི་ཚོགས་ཐུན་སྐབས། ཕྱི་དྲིལ་ལས་ཁུངས་མ་ལག་དང་བཅས་པའི་ཕྱི་ལོ ༢༠༢༡ ནས་ ༢༠༢༢ ལོའི་ལོ་འཁོར་ལས་བསྡོམས་སྙིང་བསྡུས་ཕྱི་དྲིལ་བཀའ་བློན་མཆོག་ནས་སྙན་སྒྲོན་ཞུས་པ་དང་སྤྱི་འཐུས་ལྷ་རྒྱལ་རི་རྣམ་རྒྱལ་སྒྲོལ་དཀར་གྱིས་རྒྱབ་སྐྱོར་བྱས་རྗེས། ཕྱི་དྲིལ་ལས་ཁུངས་མ་ལག་དང་བཅས་པའི་ལས་བསྡོམས་ཐོག་སྤྱི་ཡོངས་བགྲོ་གླེང་གནང་སོང་། སྐབས་དེར་སྤྱི་འཐུས་བསྟན་པ་ཡར་འཕེལ་ལགས་ཀྱིས། ཕྱི་རྒྱལ་གྱི་ཡུལ་གྲུ་ཁག་ཏུ་བཙན་བྱོལ་བོད་པའི་མི་གྲངས་མང་དུ་འགྲོ་བཞིན་ཡོད་པ་དང་། དེ་བཞིན་དུ་བོད་པའི་བུ་ཕྲུག་རྣམས་བོད་ཀྱི་སྐད་ཡིག་བསླབ་རྒྱུ་གལ་ཆེན་པོ་ཆགས་བསྡད་ཡོད། ད་ལྟའི་ཆར་ཕྱི་རྒྱལ་གྱི་སྐུ་ཚབ་དོན་གཅོད་ཁང་ཁག་གིས་འགན་འཁུར་འོག་གཟའ་མཇུག་བོད་ཀྱི་སྐད་ཡིག་སློབ་གྲྭ་འཚོག་བཞིན་པའི་གོ་སྐབས་ཞིག་ལེན་བཞིན་ཡོད་པ་རེད། གཟའ་མཇུག་གི་བོད་ཡིག་སློབ་གྲྭའི་སྐོར་ལ་སྐུ་ཚབ་དོན་གཅོད་ཁག་གི་ལས་བསྡོམས་ལས་གསལ་བོ་ཅི་ཡང་མཇལ་མ་སོང་ཡང་། སྐུ་ཚབ་དོན་གཅོད་ཁག་གིས་གལ་ཆེའི་འགན་འཁུར་འོག་གཟའ་མཇུག་བོད་ཀྱི་སྐད་ཡིག་སློབ་གྲྭ་ནི་མ་འོངས་བའི་ཕྱི་རྒྱལ་གྱི་བོད་པའི་སྤྱི་ཚོགས་སུ་གལ་ཆེན་ཡིན་པ་མ་ཟད། ཕྱི་རྒྱལ་གྱི་བོད་རིགས་ཚོགས་པ་ཁག་དང་ཕ་མ་རྣམས་ཀྱིས་བོད་ཀྱི་བུ་ཕྲུག་ཚད་ལྡན་ཞིག་ཏུ་འགྱུར་བའི་གལ་ཆེན་འགན་འཁྲི་ཡིན། དེ་ནི་ལས་དོན་གཞན་ཞིག་འཐུས་ཤོར་དུ་སོང་བ་དང་མི་འདྲ་བར་། ད་ལྟའི་ཆར་བོད་ཀྱི་གཞོན་སྐྱེས་རྣམས་ལ་བོད་ཀྱི་སྐད་ཡིག་གི་རྨང་གཞི་བརྟན་པོ་ཞིག་བཟོ་མ་ཐུབ་ན་མ་འོངས་བར་ཁ་གསབ་མི་ཐུབ་པའི་གྱོང་རྒུད་ཆེན་པོ་ཞིག་ཏུ་འགྱུར་རྒྱུ་ཡིན་པ་ལྟར། དོན་གཅོད་ཁང་ཁག་གཙོས་བོད་རིགས་པ་ཁག་དང་ཕ་མ་རྣམས་ཀྱིས་ཐུགས་འགན་བཞེས་པར་རེ་སྐུལ་དང་། དེ་བཞིན་བོད་སྐད་ཡིག་གི་དྲ་ཚིགས་ཀྱང་འཕེལ་རྒྱས་འགྲོ་མུས་ཡིན་པ་ལས། རི་མོ་སོགས་བེད་སྤྱོད་ཀྱིས་བོད་ཡིག་སྦྱོང་ཐབས་སྟབས་བདེའི་བསྐྲུན་ཏེ་འཐུས་ཤོར་མི་འགྲོ་བ་ཞིག་བྱེད་དགོས་འདུག ཞེས་དང་། ཕྱི་དྲིལ་ལས་ཁུངས་ཀྱིས་དེབ་མང་པོ་པར་བཞིན་ཡོད་པ་ལས་རྒྱ་ཡིག་རྒྱ་སྐད་ལ་ལྟ་ཀློག་བྱེད་མཁན་གྱི་མི་གྲངས་མང་ཤོས་ཆགས་པའི་སྙན་ཐོ་མཐོང་དུས། ང་ཚོས་རྒྱ་སྐད་རྒྱ་ཡིག་གི་གསར་འགྱུར་བརྒྱུད་ལམ་གྱི་དྲ་རྒྱའི་འཐུས་སྒོ་ཇེ་ཚང་དུ་བཏང་ནས་བོད་དོན་དང་རིག་གཞུང་སྐོར་མང་ཙམ་སྤེལ་བའི་ཤུགས་རྒྱུ་གལ་ཆེན་ཡིན། ཞེས་འབོད་སྐུལ་སོགས་ཞུས་སོང་།
ཕྱི་དྲིལ་བཀའ་བློན་མཆོག་གིས། ཕྱི་རྒྱལ་གྱི་གཟའ་མཇུག་བོད་ཡིག་སློབ་གྲྭ་དང་འབྲེལ་བའི་སྐོར་ལ་སྙན་ཐོ་ནང་དུ་མངོན་གསལ་མིན་པའི་དགོངས་འཆར་བྱུང་བར། ཕྱི་རྒྱལ་སྐུ་ཚབ་དོན་གཅོད་ཚང་མས་གཟའ་མཇུག་བོད་ཡིག་སློབ་གྲྭ་གལ་ཆེན་དུ་འཛིན་གྱི་ཡོད་པར་བརྩིས་ཀྱི་ཡོད། ཨ་རིའི་ནང་དུ་མཚོན་པ་ཡིན་ན་ཕྱི་ཟླ་༡༠ ཚེས་ ༢༣་དང་ ༢༤ ལ་བོད་རིགས་སྤྱི་མཐུན་པའི་ལོ་འཁོར་ཚོགས་ཆེན་འཚོག་བཞིན་ཡོད་པ་རེད། དེའི་སྐབས་སུ་ནམ་རྒྱུན་གཟའ་མཇུག་སློབ་གྲྭའི་སྐོར་ལ་གལ་ཆེན་དུ་བརྩི་ནས་གྲོས་བསྡུར་དང་བགྲོ་གླེང་བྱེད་བཞིན་འདུག ད་ལན་གྱི་ཚོགས་འདུ་སྐབས་སུ་གཟའ་མཇུག་བོད་ཡིག་སློབ་གྲྭ་ཡར་རྒྱས་གཏོང་བའི་སྐོར་གྲོས་འཆར་དང་གྲོས་མོལ་ཡོང་གི་རེད། རྒྱ་སྐད་རྒྱ་ཡིག་ཐོག་ལྟ་ཀློག་བྱེད་མཁན་གྱི་མི་གྲངས་མང་པོ་ཆགས་ཡོད་པ་དངོས་ཡོད་གནས་ཚུལ་རེད། རྒྱ་སྐད་རྒྱ་ཡིག་ལ་ལྟ་ཀློག་བྱེད་མཁན་གྱི་གྲངས་ཐོ་ས་ཡ་གཅིག་འཕར་འདུག་འཁོད་འདུག་པར། དེའི་ཐོག་ལ་སྤྱི་འཐུས་རྣམ་པས་བསམ་ཚུལ་བཏོན་པ་ལ་ང་ཚོའི་ངོས་ནས་རྒྱ་ཡིག་ཚན་པའི་ཡར་རྒྱས་ཐད་མཐུན་སྦྱོར་བྱེད་ཀྱི་ཡིན། ཞེས་གསུངས་སོང་།
སྤྱི་འཐུས་བློ་བཟང་རྒྱ་མཆོག་སྲི་ཐར་ལགས་ཀྱིས་སོ་སོར་མཚོན་པ་ཡིན་ན་གློག་ཀླད་ཀྱི་བདེ་འཇགས་ནི་གལ་ཆེན་པོར་བརྩི་མཁན་ཞིག་ཡིན་པའི་ཆ་ནས། གློག་ཀླད་སྡེ་ཚན་དང་འབྲེལ་བ་ཡོད་པའི་དོགས་ཟོན་མྱུར་ཞིབ་མ་ལག་(alert system ) གི་ལས་གཞི་རྩོམ་རྒྱུ་ནི་དྲ་རྒྱའི་དཀའ་ངལ་སེལ་བར་གལ་ཆེན་པོ་རེད། བོད་མིའི་སྒྲིག་འཛུགས་དང་སྤྱི་སྒེར་གང་རུང་གི་གློག་ཀླད་ནང་དུ་དྲ་འབུ་འཛུལ་བ་ཡིན་ན་ཡིག་ཆ་སོགས་ཉར་ཚགས་བྱེད་པའི་དཀའ་ངལ་འབྱུང་མུས་ཡིན་པར། དེ་ལ་བསྔགས་བརྗོད་ཡོད་དང་། དེ་དང་འབྲེལ་བའི་ཐོག་ནས་དེང་སྐབས་འཛམ་གླིང་གི་གཞོན་སྐྱེས་མང་པོ་ཞིག་གིས་པོ་བསྒྲགས་(podcast)་བེད་སྤྱོད་ཀྱིས་རྒྱལ་སྤྱིའི་གནས་ཚུལ་ལ་ཉན་ཐུབ་པའི་མཉེན་ཆས་གལ་ཆེན་ཞིག་ཡིན་པར་མཐོང་། དྲིལ་བསྒྲགས་ལས་ཁུངས་ཀྱིས་བོད་མིའི་རང་དབང་གསར་ཁང་གི་གནས་ཚུལ་འགྲེམས་སྤེལ་བྱེད་པའི་རྣམ་པ་ལས་མི་འདུག པོ་བསྒྲགས་མཉེན་ཆས་བེད་སྤྱོད་བྱེད་པའི་འཆར་གཞི་ཞིག་ཡོད་ན། གཞོན་སྐྱེས་ལ་དམིགས་པའི་ཐོག་ནས་སྤེལ་ཐུབ་པ་ཞིག་ཡིན་པ་རེད།
དེ་བཞིན་དུ་སུད་སི་དོན་གཅོད་ཁང་གིས་རྒྱ་ནག་གི་ཁུང་ཙི་སློབ་གླིང་(Confucius) གཅིག་སྒོ་བརྒྱབ་ཐུབ་པ་དང་གཞན་སྒོ་རྒྱག་པའི་འཆར་གཞི་སྒྲིག་པར་བསྔགས་བརྗོད་དང་། བོད་མིའི་སྒྲིག་འཛུགས་ཀྱིས་རྒྱ་ནག་གི་ཁུང་ཙི་སློབ་གླིང་སྒོ་རྒྱག་རྒྱུའི་ལས་གཞི་བརྩམས་པ་དེ་ཧ་ཅང་གལ་ཆེན་རེད། ཁུང་ཙི་སློབ་གླིང་དེ་རྒྱ་ནག་གཞུང་གིས་རྒྱལ་སྤྱིའི་སྟེང་དུ་འགྲེལ་བརྗོད་ལོགས་པར་བེད་སྤྱོད་བྱེད་བཞིན་པ་ཤུགས་ཆེན་འགྲོ་ཡི་ཡོད་པ་རེད། སུད་སི་དོན་གཅོད་ཁང་གི་ལས་གཞི་དེ་བརྩམ་པར་གལ་ཆེན་རེད་ལ། དོན་གཅོད་ཁང་གཞན་རྣམས་ཀྱིས་དེ་འབྲེལ་གྱི་ལས་གཞི་ག་འདྲ་ཡིན་མིན་སྐོར་དང་། སྲིད་བྱུས་ཉམས་ཞིབ་ཁང་གིས་བོད་ཀྱི་ལོ་རྒྱུས་དང་འབྲེལ་བའི་ཉམས་ཞིབ་ཀྱི་ཚོགས་འདུ་འཚོགས་བཞིན་ཡོད་པ་ཡག་པོ་ཡོད་ཀྱང་། ཉམས་ཞིབ་ཁང་གིས་བོད་ཀྱི་བདེན་མཐའ་སེལ་བའི་ཐབས་ལམ་འཚོལ་བའི་ཐབས་ཤེས་བྱེད་ཀྱི་ཡོད་མིན་ཐད་དྲི་བ་དྲིས་སོང་།
ཕྱི་དྲིལ་བཀའ་བློན་མཆོག་གིས། སྤྱི་འཐུས་ལགས་ཀྱིས་གསུངས་བ་བཞིན་དྲིལ་བསྒྲགས་ལས་ཁུངས་ལ་པོ་བསྒྲགས་མཉེན་ཆས་(podcast) ཤིག་ཡོད། ད་ལྟའི་ཆར་གསར་བ་ཡིན་པས་བོད་མིའི་རང་དབང་གསར་ཤོག་ལ་བེད་སྤྱོད་བྱེད་རྒྱུ་མ་གཏོགས་གཞན་མང་པོ་བྱེད་ཐུབ་ཀྱི་མེད། མ་འོངས་བར་ལས་ཀ་བྱེད་པའི་བང་སྒྲིག་གི་ཡིན། དེ་བཞིན་རྒྱ་གཞུང་གི་ཁུང་ཙི་སློབ་གླིང་སྒོ་རྒྱག་པར་སྐུ་ཚབ་དོན་གཅོད་ཁང་གཞན་རྣམས་ཀྱིས་ཀྱང་དེ་འབྲེལ་ལ་ཤུགས་རྒྱག་དང་རྒྱག་མུས་ཡིན། སྲིད་བྱུས་ཉམས་ཞིབ་ཁང་གི་ཉམས་ཞིབ་པ་ཚོས་གནད་དོན་འདྲ་མིན་ཐོག་ཉམས་ཞིབ་བྱེད་བཞིན་ཡོད། བོད་ཀྱི་བདེན་མཐའ་སེལ་བའི་ཆེད་དུ་ཤུགས་རྒྱག་དགོས་ཀྱང་རྒྱག་གི་ཡིན། ཞེས་གསུངས་སོང་།
སྤྱི་འཐུས་ཕུར་བ་རྡོ་རྗེས་ལགས་ཀྱིས། སོ་སོར་མཚོན་པ་ཡིན་ན་གསར་ཁང་དུ་རྒྱ་ཡིག་ཚན་པའི་ནང་དུ་གསར་འགོད་པའི་ལས་ཀ་བྱས་མྱོང་མཁན་ཞིག་ཡིན་ཕྱིན། བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ཀྱི་རྒྱ་ཡིག་ཚན་པའི་ལས་དོན་བྱེད་ཕྱོགས་ཐད་ནམ་རྒྱུན་དོ་སྣང་བྱེད་མཁན་ཞིག་ཆགས་ཡོད། ཕྱི་དྲིལ་ལས་ཁུངས་ཀྱི་ལས་བསྡོམས་དང་རང་ཉིད་ཀྱིས་ནམ་རྒྱུན་ཕྱི་དྲིལ་རྒྱ་ཡིག་ཚན་པའི་ལས་དོན་ལ་དོ་སྣང་བྱས་པའི་གྲུབ་དོན་ལ་ཕྱོགས་ཡོངས་ནས་བལྟས་ན་སྤྱི་ཡོངས་ནས་ཡག་པོ་བྱུང་འདུག ཕྱི་རྒྱལ་གྱི་མཁས་པས་བོད་དོན་ཐོག་བྲིས་པའི་དཔྱད་རྩོམ་ཧ་ཅང་ཡག་པོ་རྒྱ་ཡིག་ཏུ་བསྒྱུར་འདུག གསར་འགྱུར་ཡང་སྔོན་མ་བྲིས་པ་ལས་སྤུས་དག་པོ་བྱུང་འདུག རྒྱ་ཡིག་ཚན་པའི་ལས་བྱེད་རྣམས་ཀྱིས་ལྷག་བསམ་རྣམ་དག་གིས་བྱ་བ་བསྒྲུབ་འདུག དེ་མིན་བོད་ནས་ཡོང་བའི་རྒྱ་ཡིག་ཤེས་མཁན་མང་པོ་རྒྱ་གར་ལྡི་ལི་དང་མུམ་བྷེ་སོགས་སུ་བོད་མིའི་སྒྲིག་འཛུགས་ཀྱི་གླ་ཆ་ལས་ལྡབ་གཉིས་གསུམ་ལེན་གྱི་ཡོད་པར་མ་ལྟོས་སེམས་ཤུགས་ཀྱིས་ཞབས་འདེགས་ཞུ་བཞིན་ཡོད་པར་མི་ཚེའི་སྤོབས་པ་དང་གཟི་བརྗིད་རེད། ང་ཚོའི་འཛིན་སྐྱོང་གི་ངོས་ནས་ཀྱང་དེ་ལྟར་ངོས་འཛིན་ཞུ་དགོས་རེད་བསམ་གྱི་འདུག་བསམ་བྱུང་། དེ་དང་མཉམ་དུ་ཕྱི་དྲིལ་ལས་ཁུངས་རྒྱ་ཡིག་ཚན་པ་རྒྱ་བསྐྱེད་དང་མཐུན་སྦྱོར་བྱེད་པར་དོ་སྣང་མང་ཙམ་བྱེད་དགོས་འདུག ད་ལྟ་ཆར་འཛམ་བུ་གླིང་དུ་རྒྱ་ཡིག་བེད་སྤྱོད་བྱེད་མཁན་གྱི་མི་གྲངས་བརྒྱ་ཆ་ ༡༦ ཆགས་ཡོད། སི་པན་སྐད་ཡིག་གི་བརྒྱ་ཆ ༤.༨༥ ཟིན་ཡོད། དབྱིན་ཡིག་སྐད་ཡིག་༤.༨༣ཙམ་རེད། སྐད་ཡིག་བེད་སྤྱོད་ཐད་ཧེ་བག་མང་པོ་ཡོད་པས། ང་ཚོའི་རྒྱ་ཡིག་གི་བརྒྱུད་ལམ་བེད་སྤྱོད་གཏང་པ་ཡིན་ན་བོད་དོན་དང་འབྲེལ་བའི་ལས་དོན་བརྒྱུད་སྒྲོག་བྱེད་པར་ཧ་ཅང་ཡག་པོ་རེད་བསམ་གྱི་འདུག ཕྱི་དྲིལ་བཀའ་བློན་མཆོག་ནས་རྒྱ་ཡིག་ཚན་པའི་ཐད་སྔར་ལས་ལྷག་པའི་རྒྱ་བསྐྱེད་དང་མཐུན་སྦྱོར་བྱེད་དགོས་ཀྱི་འདུག ཅེས་ཞེས་བཤད་སོང་།
ཕྱི་དྲིལ་བཀའ་བློན་མཆོག་གིས། སྤྱི་འཐུས་ལགས་ཀྱིས་བོད་མི་རྒྱ་ཡིག་ཤེས་མཁན་ཚོ་རྒྱ་གར་གྱི་བཟོ་གྲྭ་དང་ལས་ཁུངས་ནང་དུ་ལས་ཀ་བྱེད་བཞིན་ཡོད་པར་ཚུར་ལེན་ཐུབ་པའི་ལས་གཞི་བརྩམ་ཐུབ་ཡོད་པར་བཤད་པ་ལྟར། ང་ཚོས་ཉམས་ཞིབ་བྱེད་པའི་སྐབས་རྒྱ་ཡིག་ཤེས་མཁན་ལ་ཁྱད་ཆོས་གཅིག་ཡོད་པ་ནི་ཉམས་ཞིབ་བྱེད་པའི་ཁུངས་དང་པོ་དེ་རྒྱ་ཡིག་སྟེང་དུ་ཡོད་པས་རྒྱ་ཡིག་ཤེས་མཁན་དགོས་གནད་འགག་རེད། ང་ཚོས་རྒྱ་གར་ལས་ཁུངས་ནང་བཞིན་གླ་ཆ་ཆེན་པོ་དེ་འདྲ་སྤྲད་ཐུབ་ཀྱི་མེད་ཀྱང་རྒྱ་ཡིག་ཤེས་མཁན་ཆེད་མཐུན་སྦྱོར་བྱེད་རྒྱུ་ཡིན།
གསར་འགོད་པ། དཔལ་ལྡན། བྱམས་པ་ཚེ་རིང་།
རྒྱ་ནག་ང་ཚོའི་ལུང་པ་ཕྲོག་མཁན་གྱི་དགྲ་ཡིན་ན་རྒྱ་མིའི་སྐད་ཡིག་ལ་ང་ཚོ་ག་རེ་བྱས་སྐྱབས་བཅོལ་གྱི་ཡོད་ན་ཧཧཧ