སྲིད་སྐྱོང་སྤེན་པ་ཚེ་རིང་མཆོག་གི་ཉི་ཧོང་ཁུལ་གྱི་གཞུང་འབྲེལ་འཚམས་གཟིགས་ཀྱི་ཉིན་དང་པོར་ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་ཚོགས་མི་རྣམས་ལ་མཇལ་འཕྲད་གནང་སྟེ་བོད་དོན་གླེང་སློང་གནང་ཡོད་འདུག
ཟླ་འདིའི་ཕྱི་ཚེས་ ༢༠ ནས་ ༢༨ བར་ཉིན་གྲངས་བརྒྱད་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཉི་ཧོང་རྒྱལ་ཁབ་ཏུ་གཞུང་འབྲེལ་འཚམས་གཟིགས་སུ་ཕེབས་ནས། ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་སོགས་དང་མཇལ་འཕྲད་གནང་འཆར་ཡོད་པ་ལྟར། ཁ་སང་ཕྱི་ཚེས་ ༢༡ ཉིན་སྲིད་སྐྱོང་སྤེན་པ་ཚེ་རིང་མཆོག་གིས་ཉི་ཧོང་གི་གྲོས་ཚོགས་འཐུས་མིའི་བོད་དོན་རྒྱབ་ཚོགས་ཚོགས་པའི་ཚོགས་མི་རྣམས་དང་མཇལ་འཕྲད་གནང་སྟེ། བོད་ནི་ལོ་རྒྱུས་ཀྱི་ཐོག་ནས་ནམ་ཡང་རྒྱ་ནག་གི་ཆ་ཤས་སུ་འགྱུར་མྱོང་མེད་སྐོར་སོགས་གསུངས་ཡོད་འདུག
སྐབས་དེར་སྲིད་སྐྱོང་སྤེན་པ་ཚེ་རིང་མཆོག་གིས། རྒྱ་ནག་གཞུང་གིས་བོད་ནང་བོད་ཀྱི་སྐད་ཡིག་སོགས་རྩ་གཏོར་གཏོང་ཐབས་ཀྱི་སྲིད་ཇུས་སྤེལ་མུས་ཡིན་སྟབས། རྒྱ་གཞུང་གིས་འཆར་གཞི་ལྡན་པའི་ཐོག་ནས་བོད་ཀྱི་ཆོས་རིག་གཙོས། བོད་ཀྱི་སྐད་ཡིག་དང། བོད་མིའི་ངོ་བོ་སོགས་རྩ་མེད་དུ་བཏང་དང་གཏོང་མུས་ཡིན་པའི་ཁར། རྒྱ་ནག་གཞུང་གིས་བོད་ཕྲུག་བརྒྱ་ཆ་ ༨༠ རྒྱ་ནག་གཞུང་གིས་ཆེད་གཉེར་བྱས་པའི་གཏན་འཇགས་སློབ་གྲྭ་ཁག་ཏུ་བཙན་གྱིས་མངག་གཏོང་བྱས་ཏེ། བོད་ཕྲུག་དེ་དག་ལ་རྒྱ་སྐད་རྒྱ་ཡིག་སྦྱང་དུ་བཅུག་གི་ཡོད་པ་མ་ཟད། བོད་ཀྱི་རང་ལོ་ ༣ ནས་ ༡༨ བར་གྱི་སློབ་མ་གྲངས་ས་ཡ་གཅིག་རྒྱ་ནག་གི་མི་སེར་སྤེལ་བའི་རིང་ལུགས་ཀྱི་གཏན་འཇགས་སློབ་གྲྭ་ཁག་ཏུ་བཏང་ནས། རྒྱ་ནག་དམར་ཤོག་རིང་ལུགས་ཀྱི་ཆབ་སྲིད་ཀྱི་སློབ་གསོ་ཟེར་བ་ཞིག་སྤྲད་དེ། ལོ་ ༡༥ ནས་ ༢༠ བར་གྱི་བོད་རིགས་ན་གཞོན་ཚོར་བོད་རང་གི་མི་རིགས་ཀྱི་ཁྱད་ཆོས་མེད་པ་དང་། བོད་ཀྱི་སྐད་ཡིག ཡུལ་སྲོལ་གོམས་གཤིས་སོགས་གཏིང་བརྗེད་དུ་གཏོང་བའི་སྲིད་ཇུས་ཤིག་ལག་བསྟར་བྱེད་མུས་ཡིན་སྐོར་སོགས་གསུངས་ཡོད་འདུག
སྲིད་སྐྱོང་མཆོག་གིས། རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱིས་ཡུ་གུར་ནང་གི་འགྲོ་བ་མིའི་རིགས་ཀྱི་ཐོབ་ཐང་གི་གནས་བབ་སོགས་ཀྱི་སྐོར་ལ་སྙན་ཐོ་འདོན་སྤེལ་བྱས་ནས། རྒྱ་ནག་གཞུང་གི་མནར་གཅོད་ཀྱི་འོག་ཏུ་ཡོད་པའི་ཡུ་གུར་མི་རིགས་ཀྱི་གནས་སྟངས་གསལ་སྟོན་བྱས་ཡོད་པ་ལྟར། ཉི་ཧོང་གཞུང་དང་གྲོས་ཚོགས་ཀྱིས་རྒྱལ་ཚོགས་ནས་བོད་ནང་གི་དངོས་ཡོད་ཀྱི་གནས་སྟངས་དང་། རྒྱ་ནག་གཞུང་གི་བཙན་གནོན་གྱི་འོག་ཏུ་ཡོད་པའི་བོད་ནང་གི་བོད་མིའི་གནས་བབ་མཚོན་པའི་སྙན་ཐོ་རིགས་འདོན་སྤེལ་བྱ་དགོས་པའི་སྐུལ་མ་གནང་བའི་རེ་སྐུལ་ཞུས་ཡོད་པ་མ་ཟད། ཨེ་ཤ་ཡའི་ཁུལ་དུ་གནས་སྡོད་མི་གྲངས་ཐེར་འབུམ་ ༡། ༨ ལྷག་གིས་བོད་མཐོ་སྒང་ནས་བཞུར་བའི་གཙང་པོ་ཆེན་པོ་བཅུ་ལ་བརྟེན་ནས་འཚོ་བ་རོལ་མུས་ཡིན་ཡང་། རྒྱ་ནག་གཞུང་གིས་བོད་ནང་དུ་གཏེར་ཁ་སྔོག་འདོན་དང་། ཁོར་ཡུག་སྦག་གཙོག་སོགས་བཟོས་པ་ལ་བརྟེན་ནས། བོད་ནང་གི་རང་བྱུང་ཁོར་ཡུག་ལ་གནོད་སྐྱོན་ཚབས་ཆེན་ཐེབས་ཏེ། གནམ་གཤིས་ཀྱི་ཚ་དྲོད་འཕེལ་མུས་ཡིན་སྟབས། ཉི་ཧོང་གཞུང་དང་གྲོས་ཚོགས་སོགས་ཀྱིས་བོད་ནང་གི་གནམ་གཤིས་འགྱུར་ལྡོག་གི་གནས་སྟངས་དེ་དག རྒྱལ་སྤྱིའི་གནམ་གཤིས་འགྱུར་ལྡོག་སྐོར་གྱི་ཚོགས་ཆེན་ ( COP) སོགས་སུ་ཚ་གླེང་བྱ་རྒྱུའི་རེ་སྐུལ་གནང་ཡོད་འདུག
ཡང་ཁོང་གིས། བོད་ནི་ནམ་ཡང་རྒྱ་ནག་གཞུང་གི་ཆ་ཤས་མིན་པར་རང་བཙན་ལྡན་པའི་རྒྱལ་ཁབ་ཅིག་ཡིན་པ་མ་ཟད། རྒྱལ་སྤྱིའི་ཁྲིམས་ལུགས་རིག་པའི་མཁས་དབང་སྐུ་ཞབས་མཱ་ཡེ་ཁལ་ཝན་ཝ་ཌི་ ( Michael Van Walt) ལགས་ཀྱིས་ཉི་ཧོང་ཚུད་པའི་ཨེ་ཤ་ཡའི་མཁས་དབང་ ༧༠ ནས་ ༨༠ ཙམ་ལ་ཐུག་འཕྲད་བྱས་ཏེ། མི་ལོ་བརྒྱད་ཀྱི་རིང་ལ་ཞིབ་འཇུག་མཐིལ་ཕྱིན་པ་བྱས་ནས་འགྲེམས་སྤེལ་བྱས་པའི་དཔེ་དེབ་ (Tibet Brief 20/20) ཏུའང་། ཨེ་ཤ་ཡ་ཁུལ་གྱི་མཁས་དབང་དེ་དག་ལྷན་གོ་བསྡུར་གནང་ནས་བོད་དེ་ནམ་ཡང་རྒྱ་ནག་གཞུང་གི་ཆ་ཤས་མིན་པར་རང་བཙན་ལྡན་པའི་རྒྱལ་ཁབ་ཅིག་ཡིན་པའི་ཞིབ་འཇུག་གི་གྲུབ་དོན་ཚད་ལྡན་རྙེད་ཡོད་ཅིང་། རྒྱ་རིགས་མཁས་དབང་སྐུ་ཞབས་ཧན་ཁྲིན་ (Hon-Shiang Lau) ལགས་ཀྱིས་ཀྱང་རྒྱ་ནག་གི་ཡོན་དང་། ཆིང་། མིང་རྒྱལ་རབས་སོགས་ཀྱི་ཡིག་ཆ་དང་ས་ཁྲ་སོགས་ལ་ཞིབ་འཇུག་ཚད་ལྡན་གནང་ནས། ལོ་རྒྱུས་ཀྱི་ཐོག་ནས་བོད་དེ་ནམ་ཡང་རྒྱ་ནག་གི་ཆ་ཤས་སུ་གྱུར་མྱོང་མེད་པའི་ཁུངས་ལྡན་ར་སྤྲོད་གནང་ཡོད་སྐོར་སོགས་གསུངས་ཡོད་འདུག
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གི་མཛད་འཆར་ལྟར་ན། ཁོང་གིས་ཟླ་འདིའི་ཕྱི་ཚེས་ ༢༠ ནས་ ༢༨ བར་ཉིན་གྲངས་བརྒྱད་རིང་ཉི་ཧོང་ཁུལ་དུ་གཞུང་འབྲེལ་འཚམས་གཟིགས་སུ་ཕེབས་ཏེ། ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་དང་ཚོགས་འདུ་བསྐོང་འཆར་དང་། ཉི་ཧོང་བོད་དོན་རྒྱབ་སྐྱོར་བ་དང་། དེ་བཞིན་གཙུག་ལག་སློབ་གྲྭ་ཁག་ཏུ་བོད་དོན་གོ་རྟོགས་སྤེལ་འཆར་ཡོད་པ་རེད་འདུག
གསར་འགོད་པ། དཔལ་ལྡན།
