དེ་རིང་སྔ་དྲོའི་ཆུ་ཚོད་ ༡༠།༣༠ སྟེང་དྷ་ས་བོད་ཀྱི་ཟློས་གར་ཚོགས་ཁང་དུ་བོད་ཀྱི་གཏམ་བརྗོད་༼པཱ་ལགས་༽ཞེས་པའི་འཁྲབ་སྟོན་པ་དང་ལས་ཀྱི་སྣེ་མོ་བ་མཉམ་འཛོམས་ཀྱིས་གློག་བརྙན་པཱ་ལགས་འདི་ལོའི་ཕྱི་ཟླ་ ༡༠ ནས་བཟུང་བོད་མིའི་སྤྱི་ཚོགས་ནང་གཟིགས་འབུལ་ཞུ་རྒྱུ་ཡིན་པའི་གསར་འགོད་གསལ་བསྒྲགས་བསྐྱངས་སོང་།
སྐབས་དེར་བོད་ཀྱི་ཟློས་གར་ཚོགས་པའི་འགན་འཛིན་དོན་འགྲུབ་ཚེ་རིང་ལགས་ཀྱིས། བོད་ཀྱི་ཟློས་གར་ཚོགས་པ་ནི་དང་ཐོག་༧གོང་ས་མཆོག་གིས་བོད་ཀྱི་སྒྱུ་རྩལ་གཏམ་བརྗོད་ཁང་ཞེས་མཚན་གནང་བའི་ཐོག་ནས་མགོ་བརྩམས་ཏེ། ད་ལྟའི་བར་ཕྱིར་མིག་ཞིག་བལྟས་པ་ཡིན་ན། གཙོ་བོ་བོད་ཀྱི་དངོས་བྱུང་ལོ་རྒྱུས་གཞི་ལ་བཞག་ནས་རྒྱལ་སྤྱིའི་སྡིངས་ཆའི་སྟེང་དང་། བོད་ཀྱི་གཞོན་སྐྱེས་རྣམས་ལ་བརྒྱུད་བསྐུར་བྱེད་པར་ཧུར་བརྩོན་བྱས་ཡོད། པཱ་ལགས་ཞེས་པའི་གཏམ་བརྗོད་འདིའི་རྩོམ་པ་པོ་ནི་རྒྱ་གར་གྱི་གཏམ་བརྗོད་རྩོམ་མཁན་གྲགས་ཅན་ཨ་བྷེ་ཁཱ་ཤཱེ་ཁི་(Abhishek Majumdar)ལགས་ཡིན་ཞིང་། ཁོང་ནི་མི་རིགས་དང་རྒྱལ་ཁབ་འདྲ་མིན་གྱི་ལོ་རྒྱུས་རྒྱབ་ལྗོངས་མ་འདྲ་བའི་ཐོག་གཏམ་བརྗོད་རིགས་མང་པོ་བྲིས་ཡོད་པ་མ་ཟད། ཨེ་ཤ་ཡ་དང་ཡུ་རོབ་སོགས་སུ་གདེང་འཇོག་ཆེན་པོ་ཡོད་མཁན་གྱི་རྩོམ་མཁན་ཞིག་ཀྱང་ཡིན། གཏམ་བརྗོད་འདི་ཕྱི་ལོ་༢༠༡༩ ལོར་དབྱིན་ཡུལ་དུ་འཁྲབ་སྟོན་བྱས་ཡོད་ཀྱང་། འདིའི་ནང་གི་འཁྲབ་སྟོན་བྱེད་མཁན་ཚང་མ་བོད་པ་ཡིན་ན་ཡག་པོ་ཡོད་པའི་བསམ་ཚུལ་ལ་བརྟེན་ནས། དབྱིན་ཡིག་འཁྲབ་གཞུང་བོད་ཡིག་ནང་དུ་བསྒྱུར་མཁན་གཏམ་བརྗོད་ཚན་པའི་འགན་འཛིན་ལྷག་པ་ལགས་ཀྱི་འགན་འཁུར་བའི་ཐོག ཧེ་རི་ལགས་ཀྱི་འཁྲབ་ཁྲིད་རོགས་རམ་བྱས་པ་དང་། ཟློས་གར་ཚོགས་པའི་འཁྲབ་སྟོན་པ་༤ དང་། གཞན་ཚང་མ་བོད་ཀྱི་གཏམ་བརྗོད་ལ་བྱང་ཆུབ་པའི་བོད་མི་རྐྱང་ཡིན། ཕྱི་ཟླ་ ༡༠ ནས་བཟུང་དངོས་སུ་འཁྲབ་སྟོན་བྱེད་པའི་མགོ་ཚུགས་ཏེ་བོད་ཀྱི་གཞིས་ཆགས་ཁག་ནང་དང་རྒྱ་གར་གྲོང་ཁྱེར་ལྡི་ལི་དང་མུམ་བྷེ་སོགས་སུ་གཟིགས་འབུལ་གྱི་ལམ་ནས་བོད་ནང་གི་བོད་མི་ཚོའི་དཀའ་ངལ་དཀྱིལ་སྙིང་དུ་བཟུང་ནས་གཏམ་བརྗོད་ཀྱི་ལམ་ནས་བོད་དོན་གོ་རྟོགས་སྤེལ་བའི་ཆེད་དུ་ཡིན། ཞེས་བརྗོད་སོང་།
གཏམ་བརྗོད་ཚན་པའི་འཁྲབ་ཁྲིད་པ་ལྷག་པ་ལགས་ཀྱིས། བོད་ཀྱི་གཏམ་བརྗོད་ཚན་པ་ནི་ཕྱི་ལོ་ ༢༠༡༡ ལོར་བོད་དོན་འཐབ་རྩོད་ཀྱི་བརྒྱུད་རིམ་འགྲེལ་བརྗོད་ཇི་ལྟར་བྱེད་པའི་འཆར་གཞི་ཞིག་བཟུང་ནས་འབད་བརྩོན་བྱས་པའི་མཐར་སྤྱི་ཚོགས་སྟེང་དུ་སླེབས་ནས་རིམ་པར་མགོ་ཚུགས་པ་ཞིག་ཡིན། གཏམ་བརྗོད་༼པཱ་ལགས༽་་དབྱིན་ཡུལ་ནང་ཐོག་དང་པོ་འཁྲབ་སྟོན་བྱེད་སྐབས། རྩོམ་པ་པོས་འཁྲབ་སྟོན་པ་བོད་མི་མེད་པར་བློ་ཕམ་བྱུང་སྟེ། ང་དང་འབྲེལ་བ་བྱུང་ནས་གཏམ་བརྗོད་ཆ་ཚང་བོད་སྒྱུར་བྱས་པ་ཡིན། ན་ག་སངས་རྒྱས་བསྟན་དར་ལགས་ཀྱིས་དང་བླངས་ཀྱིས་ཞུ་དག་ཞུས་སོང་། གཏམ་བརྗོད་ཀྱི་ལས་གཞི་འདིའི་ཐད་བོད་ཀྱི་ཟློས་གར་ཁང་གིས་གང་ཅི་ཐད་ནས་རྒྱབ་སྐྱོར་ཡག་པོ་བྱས་པར་བརྟེན་ནས་གཟིགས་འབུལ་ཞུ་བའི་གོ་སྐབས་ཐོབ་ཡོད། ཅེས་བརྗོད་སོང་།
ཡང་ཁོང་གིས། གཏམ་བརྗོད་འདིའི་ནང་དོན་གཙོ་བོ་ནི་འཛམ་གླིང་གི་སྡིངས་ཆའི་སྟེང་དུ་འཚེ་མེད་ཞི་བའི་གནས་ཚུལ་ཞིག་ལྷག་ཡོད་ན་བོད་ཡིན་ཞིང་། དེའི་མིག་དཔེ་སྟོན་མཁན་ཞིག་ཡོད་ན་དེ་ནི་བོད་པའི་འཐབ་རྩོད་ཡིན། གཏམ་བརྗོད་འདིའི་བརྒྱུད་རིམ་ནི་བོད་པའི་འཐབ་རྩོད་གཞིར་བཞག་པའི་ཐོག བོད་ནང་གི་དགོན་པ་ཞིག་གི་ནང་དུ་རྒྱ་གཞུང་གིས་ཆོས་དད་རང་དབང་འཕྲོག་པ་དང་རྒྱལ་གཅེས་ཆོས་གཅེས་ཀྱི་སྲིད་ཇུས་སློབ་གསོ་སྤྲད་ནས་སྡུག་རྩུབ་མནར་གཅོད་བཏང་བ། བོད་ཡོངས་སུ་ན་གཞོན་རྣམས་ལ་རང་ཉིད་ཀྱི་སྐད་ཡིག་སྦྱངས་བའི་ཕུགས་བསམ་མེད་པར་གཏོང་བ། བོད་ནང་སྡུག་རྩུབ་ཁྲོད་འཐབ་རྩོད་རྒྱུན་འཁྱོངས་བྱེད་བཞིན་ཡོད་པ། རྒྱ་གཞུང་གིས་བཙན་བྱོལ་གྱི་གནས་སྟངས་འཁྱོག་བཤད་བྱེད་བཞིན་པའི་གནས་ཚུལ་ཐེར་འདོན། སྐུ་ལུས་མེར་བསྲེགས་གཏོང་བའི་རྒྱུ་རྐྱེན་གྱི་རྣམ་པ་མང་པོ་ཞིག་གསལ་སྟོན་བྱས་པའི་ཐོག ཆུ་ཚོད་གཉིས་ཅན་གྱི་གཏམ་བརྗོད་དུ་བསྡུས་ནས་བོད་དོན་འཐབ་རྩོད་ཀྱི་དངོས་ཡོད་གནས་ཚུལ་རྒྱལ་སྤྱིའི་སྡིངས་ཆར་བཤད་ཐུབ་པར་འབད་བརྩོན་བྱས་ཡོད། ཅེས་འགྲེལ་བརྗོད་བྱས་སོང་།
གཏམ་བརྗོད་ཀྱི་འཁྲབ་ཁྲིད་ལས་རོགས་ཧེ་རི་(Harry Fuhrmann)ལགས་ཀྱིས། ང་ནི་འཇར་མན་གྱི་གཏམ་བརྗོད་འཁྲབ་ཁྲིད་པ་ཞིག་ཡིན། ངའི་འོས་འགན་ནི་སྒྱུ་རྩལ་གྱི་ལས་ནས་སྤྱི་ཚོགས་ཀྱི་སྣང་བརྙན་རྒྱལ་སྤྱིའི་མི་མང་ལ་གོ་རྟོགས་སྤེལ་རྒྱུ་དེ་ཡིན། ང་རང་དམངས་གཙོའི་ལུང་པ་ཞིག་ནས་འཚར་ལོངས་བྱུང་ཡོད་ཀྱང་། བོད་ཀྱི་ལུང་པར་རང་དབང་མེད་པའི་གནས་སྟངས་གསལ་བོ་ཤེས་ཡོད། བོད་ནང་དུ་བོད་མི་ཚོར་རང་དབང་མེད་ལ་ཐ་ན་རང་ཉིད་ཀྱི་གཞུང་སྲུང་སྐྱོབ་བྱེད་པའི་ཐོབ་ཐང་སོགས་ཅི་ཡང་མེད། དེ་བས་ང་ཚོས་དངོས་ཡོད་གནས་ཚུལ་མཐོང་ཐོས་བྱུང་བ་རྣམས་གསལ་སྟོན་བྱེད་དགོས་པ་རེད། བོད་མི་རིགས་ནི་འཚེ་མེད་ཞི་བའི་ཐོག་ནས་བོད་དོན་འཐབ་རྩོད་བྱེད་ཀྱི་ཡོད་ཀྱང་། འཛམ་གླིང་མི་མང་གིས་དོ་སྣང་དེ་ཙམ་བྱེད་ཀྱི་མེད་པ་ནི་སྐྱོ་དགོས་པའི་གནས་སྟངས་ཤིག་རེད། ངས་ཀྱང་བོད་ཀྱི་འཚེ་མེད་ཞི་བའི་འཐབ་རྩོད་ཀྱི་ལས་འགུལ་མང་པོ་མཐོང་ནས་རང་ཉིད་ཀྱི་འཁྲབ་ཁྲིད་པའི་ཆེད་ལས་ཀྱིས་བོད་དོན་ལ་རོགས་རམ་ཞུ་འདོད་བྱུང་། པཱ་ལགས་གཏམ་བརྗོད་འཁྲབ་སྟོན་པས་བོད་སྐད་ཀྱི་ལམ་ནས་འཁྲབ་སྟོན་བྱེད་ཐུབ་པར་ཡག་པོ་བྱུང་ལ། བོད་ཀྱི་སྤྱི་ཚོགས་ནང་དང་རྒྱ་གར། རྒྱལ་སྤྱིའི་ཐོག་ཏུ་མུ་མཐུད་དུ་འཁྲབ་སྟོན་འགྲུལ་བཞུད་བྱེད་པའི་རེ་བ་ཆེན་པོ་ཡོད། ཅེས་བརྗོད་སོང་།
ཐེངས་འདིའི་གཏམ་བརྗོད་ནང་གི་འཁྲབ་སྟོན་པ་ཆུང་ཤོས་ཡང་བསྐྱར་སྒྲོལ་མ་ལགས་ཀྱིས། གཏམ་བརྗོད་འདིའི་ནང་དུ་བོད་ནང་གི་བོད་པའི་གནས་སྟངས་དང་རིག་གཞུང་ག་འདྲ་ཡོད་མིན་སྟོན་གྱི་ཡོད་དུས། ཐེངས་འདིའི་གཏམ་བརྗོད་ནང་དུ་འཁྲབ་སྟོན་བྱེད་འདོད་སྐྱེས་བྱུང་། ངའི་འཁྲབ་སྟོན་མི་སྣ་པདྨ་ནི་བོད་ནང་དུ་བསྡད་ཡོད་ཀྱང་བོད་སྐད་མི་ཤེས་མཁན་ཞིག་ཡིན་པ་དང་། སྐད་ཆའི་ནང་དུ་རྒྱ་སྐད་ཀྱི་ཤུགས་རྐྱེན་གྱིས་བོད་རྒྱ་འདྲེས་མ་བཤད་ཀྱི་ཡོད་པས། བོད་ནང་གི་བོད་མི་ཚོར་རང་དབང་མེད་པར་བོད་ཡིག་སྦྱངས་བའི་གོ་སྐབས་མེད་པའི་ཚོར་བ་བྱུང་གི་འདུག བཙན་བྱོལ་ནང་གི་བོད་མི་ཚོས་རིག་གཞུང་བདག་པོ་རྒྱག་དགོས་པར་དྲན་གྱི་འདུག ཅེས་བརྗོད་སོང་།
བྱམས་པ་ཚེ་རིང་།
