བོད་མི་གླ་འཁོར་ཁ་ལོ་བ་ཞིག་ལ་ཉེན་རྟོག་པས་གཅར་རྡུང་བཏང་ནས་བསད།

བོད་དར་རྩེ་མདོ་བརྒྱད་ཟུར་རྫོང་ནས་ཡིན་པའི་གླ་འཁོར་ཁ་ལོ་བ་དངོས་གྲུབ་ཚེ་རིང་ཞེས་པ་ཞིག་ཉེན་རྟོག་པས་འཛིན་བཟུང་བྱས་ཏེ་གཅར་རྡུང་ཚབས་ཆེན་བཏང་རྐྱེན་དེ་རིང་ཕྱི་ཚེས་ ༢༨ ཉིན་ཞོགས་པར་ཉེན་རྟོག་ཁང་དུ་འདས་གྲོངས་སུ་ཕྱིན་ཡོད་འདུག

དེ་རིང་འདི་ག་བོད་ཀྱི་དུས་བབ་གསར་ཁང་ལ་བོད་ནས་ཁུངས་ལྡན་གནས་ཚུལ་འབྱོར་བ་ལྟར་ན། ཁ་སང་ཕྱི་ཚེས་ ༢༧ ཉིན་གྱི་སྔ་དྲོར་བོད་དར་རྩེ་མདོ་བརྒྱད་ཟུར་རྫོང་ནས་ཡིན་པའི་བོད་མི་ན་གཞོན་དངོས་གྲུབ་ཚེ་རིང་ཞེས་པ་ཞིག་ཉེན་རྟོག་པས་འཛིན་བཟུང་བྱས་ཏེ་གཅར་རྡུང་ཚབས་ཆེན་བཏང་བའི་རྐྱེན་གྱིས་དེ་རིང་ཞོགས་པར་ཉེན་རྟོག་ཁང་དུ་འདས་གྲོངས་སུ་ཕྱིན་ཡོད་པ་དང་། ད་ལྟའི་ཆར་ཁོང་གི་སྐུ་ཕུང་ཁྱིམ་མིར་རྩིས་སྤྲོད་བྱས་ཡོད་མེད་སོགས་ཀྱི་གནས་ཚུལ་ཤེས་རྟོགས་ཐུབ་ཀྱི་མི་འདུག

འབྲེལ་ཡོད་བོད་མི་ཞིག་གིས་འདི་གའི་གསར་འགོད་པར་བརྗོད་པ་ལྟར་ན། ཁ་སང་ཞོགས་པར་དངོས་གྲུབ་ཚེ་རིང་ལགས་ཀྱིས་ས་གནས་ཀྱི་རྒན་གསོ་ཁང་དུ་ཟ་འབྲུ་སོགས་བསྐྱལ་ནས་ཕྱིར་ནང་དུ་བསླེབས་སྐབས། གློ་བུར་དུ་ཉེན་རྟོག་པ་འགའ་ཡོང་ནས་ཁོང་ས་གནས་ཉེན་རྟོག་ཁང་དུ་བཙན་འཁྲིད་བྱས་ཡོད་པ་མ་ཟད། རྒན་གསོ་ཁང་ལ་ང་ཚོས་དུས་རྒྱུན་དུ་ཟ་འབྲུ་སོགས་མཁོ་སྤྲོད་བྱེད་ཀྱི་ཡོད་དུས། ཕྱི་མི་གཞན་ཞིག་གིས་ཟ་འབྲུ་བསྐྱལ་དགོས་དོན་གང་ཡང་ཡོད་པ་མ་རེད། ང་ཚོར་མིང་ཆད་བཟོ་ཡི་འདུག ཁྱེད་རང་རྒན་གསོ་ཁང་དུ་ག་རེ་བྱེད་དུ་ཕྱིན་པ་ཡིན་ཞེས་བསྙད་འདོགས་འདྲི་རྩད་བྱས་ཡོད་པ་མ་ཟད། རྣམ་འགྱུར་ལེགས་པོ་མི་འདུག་ཅེས་གཅར་རྡུང་བཏང་ནས་ཡར་ལངས་མི་ཐུབ་པར་གྱུར་ཡོད་ཀྱང་ད་དུང་རྡོག་རྒྱག་སོགས་གཞུས་ནས་གཅར་རྡུང་ཚབས་ཆེན་བཏང་རྐྱེན། དེ་རིང་ཞོགས་པར་ཉེན་རྟོག་ཁང་ནས་འདས་གྲོངས་སུ་ཕྱིན་ཡོད་འདུག

དངོས་གྲུབ་ཚེ་རིང་ལགས་ནི་ས་གནས་ཀྱི་གླ་འཁོར་གཏོང་མཁན་ཞིག་ཡིན་པ་དང་། ཁྱིམ་དུ་ལོ་ན་ ༧༨ ཅན་གྱི་ཨ་མ་ལྷ་སྐྱིད་དང་བཟའ་ཟླ་གཡུ་མཚོ། ད་དུང་བུ་ཕྲུག་ ༢ བཅས་ཡོད་འདུག