ལྷ་ས་གྲོང་ཁྱེར་ཁྲིན་ཀན་ཆུས་ཟེར་བའི་ཁྲོམ་གཞུང་ ༡༠ པ་ཡི་གྲོང་སྡེ་ཁག་ཅིག་ནས་བོད་མི་སེར་སྐྱ་གྲངས་ ༢༢ ལྷག་བཀག་ཉར་བྱས་ཏེ་དྲ་ལམ་བདེ་འཇགས་སྲུང་སྐྱོང་སློབ་གསོ་ཟེར་བ་སྤྲོད་ཀྱི་ཡོད་འདུག
ཟླ་འདིའི་ཕྱི་ཚེས་ ༡༡ ཉིན་ཉེན་རྟོག་པ་མང་པོས་ལྷ་ས་གྲོང་ཁྱེར་ཁྲིན་ཀན་ཆུས་ཟེར་བའི་ཁྲོམ་གཞུང་ ༡༠ པའི་རྟ་མཚོ་གྲོང་སྡེ་དང་སྒང་གྲོང་སྡེ། ཐར་པ་གྲོང་སྡེ་སོགས་ནས་ཡིན་པའི་བོད་མི་སེར་སྐྱ་ ༢༢ ལྷག་ས་གནས་ཀྱི་བཀག་སྐྱིལ་ཁང་ཞིག་ཏུ་འཁྲིད་ཡོད་པ་མ་ཟད། ཁ་པར་སོགས་ཀྱི་ནང་དུ་སྔོག་བཤེར་ནན་པོ་བྱས་རྗེས། ཉིན་གྲངས་ ༡༥ རིང་འཕྲིན་གཏོང་དང་དྲ་ལམ་བདེ་འཇགས་སྲུང་སྐྱོང་ཟེར་བ་དང་འབྲེལ་བའི་སློབ་གསོ་སྤྲོད་ཀྱི་ཡོད་འདུག
བོད་ནང་ཏོག་དབྱིབས་གཉན་རིམས་ཁྱབ་གདལ་ཤུགས་ཆེན་ཕྱིན་ནས་ཟླ་གཉིས་ལྷག་འགྲོ་བཞིན་ཡོད་པ་དང་། རྒྱ་ནག་གཞུང་གི་ནོར་འཁྲུལ་ཅན་གྱི་སྲིད་ཇུས་འོག མི་མང་གི་རྒྱུན་ལྡན་འཚོ་བ་དང་སྨན་བཅོས་མཐུན་རྐྱེན་སོགས་ཀྱི་ཐོག་དཀའ་ངལ་མང་པོ་འཕྲད་ཀྱི་ཡོད་པར་བརྟེན། བོད་ཁུལ་དུ་གནས་སྡོད་རྒྱ་མི་ཚུད་པའི་མི་མང་པོ་ཞིག་སྤྱི་ཚོགས་དྲ་ལམ་དུ་ཐོན་ཏེ། དངོས་ཡོད་གནས་སྟངས་ཕྱིར་བསྒྲགས་དང་ནག་ཉེས་ཐེར་འདོན་བྱས་དང་བྱེད་བཞིན་ཡོད་སྟབས། རྒྱ་ནག་གཞུང་ནས་མི་མང་ལ་སྤྱི་ཚོགས་དྲ་ལམ་དུ་གནས་ཚུལ་འདྲ་མིན་མི་སྤེལ་བ་དང་སྲིད་གཞུང་གིས་བསྒྲགས་པའི་གནས་ཚུལ་ཁག་ལ་ཉན་འཇོག་ལེགས་པོ་བྱེད་དགོས་པའི་སྐུལ་འདེད་གཏོང་བཞིན་ཡོད་པ་རེད།
འདི་ལོའི་ཕྱི་ཟླ་ ༩ ཚེས་ ༡༤ ཉིན་ཀྲུང་གོ་བོད་ཀྱི་དྲ་བ་ཞེས་པའི་ཐོག་དྲ་རྒྱའི་དཀྲོག་གཏམ་ལ་རྡུང་རྡེག་གཏོང་རྒྱུ་རེད་ཅེས་པའི་ཉེན་བརྡ་ཞིག་བསྒྲགས་པའི་ནང་། དྲ་རྒྱའི་དཀྲོག་གཏམ་དང་ཆ་འཕྲིན་རྫུན་མ་ཐག་གཅོད་བྱེད་པའི་ཆད་གཅོད་ཞིབ་སྲོལ་བཟོ་བ་དང་འཐུས་ཚང་དུ་བཏང་སྟེ། ཚབས་ཆེ་ཆུང་དང་སྤེལ་མཁན་དང་པོ་ཡིན་མིན། བརྒྱུད་སྤེལ་གྲངས་སོགས་ལ་གཞིགས་ནས་ཐ་ཚིག་སྒྲོག་པ་དང་གཏམ་གླེང་བཀག་འགོག ཡུན་རིང་བཀག་སྡོམ་སོགས་ཀྱི་བྱེད་ཐབས་ལག་བསྟར་བྱེད་དགོས་ཞེས་སྲིད་གཞུང་གི་གཏན་འབེབ་དོན་ཚན་ཁག་དང་འགལ་བའི་གནས་ཚུལ་ཚང་མ་དཀྲོག་གཏམ་དང་རྫུན་མ་ཡིན་པའི་ཉེས་མིང་གཡོག་གིན་ཡོད་པ་ལྟར། ཏོག་དབྱིབས་གཉན་རིམས་ཁྱབ་གདལ་འགྲོ་བཞིན་པའི་སྐབས་སུ་མི་མང་པོ་ཞིག་ལ་དཀྲོག་གཏམ་སྤེལ་བའི་ཉེས་མིང་གཡོགས་ཏེ་འཛིན་བཟུང་ཉེས་ཆད་བཅད་ཡོད་པ་རེད།
