༧གོང་ས་རྒྱལ་བ་རིན་པོ་ཆེ་མཆོག་གིས་བལ་ཡུལ་གྱི་དད་ལྡན་པ་ཁག་ཅིག་ལ་མཇལ་ཁ་སྩལ།

དེ་རིང་བཞུགས་སྒར་རྒྱལ་བའི་ཕོ་བྲང་དུ་༧གོང་ས་རྒྱལ་བ་རིན་པོ་ཆེ་མཆོག་གིས་བལ་ཡུལ་གྱི་དད་ལྡན་པ་ ༣༥ ཡས་མས་ཤིག་ལ་མཇལ་ཁ་སྩལ་ཡོད་འདུག

༧གོང་ས་རྒྱལ་བ་རིན་པོ་ཆེ་མཆོག་གིས། བལ་བོད་གཉིས་ལ་ཐུན་མོང་མ་ཡིན་པའི་འབྲེལ་བ་ཡོད་པ་རེད། ང་ཚོའི་དབར་དུ་ (བལ་ཡུལ་དང་བོད་) ལོ་ངོ་སྟོང་ཕྲག་རིང་འབྲེལ་བ་ཡོད་པ་དེ་ཁྱེད་ཚོའི་སེམས་ལ་བཞག་ནས་སེམས་ཐག་ཉེ་བོ་བྱེད་ཀྱི་ཡོད་པ་རེད། ཐུགས་རྗེ་ཆེ། ཚེ་རབས་ནས་ཚེ་རབས་ང་ཚོར་དམིགས་བསལ་གྱི་འབྲེལ་བ་ཡོང་བསྡད་པ་ཞིག་ཏན་ཏན་ཡོང་གི་རེད། བློ་བདེ་བོ་བྱོས་ཨ། ལྷ་ས་ཡོད་དུས་འཕགས་པ་ལོ་ཀེ་ཤྭ་ར་དང་། ད་ལྟ་འདིར་འཕགས་པ་ཝ་ཏི་བཟང་པོ། ངོས་འདིར་འཕགས་པ་སྤྱན་རས་གཟིགས་ཀྱི་སྐུ་ཡི་སྐུ་ཚབ་དང་། གསུང་གི་གསུང་ཚབ། ཐུགས་ཀྱི་ཐུགས་ཚབ་བྱས་ནས་བྱེད་ཀྱི་ཡོད་པ་རེད། ཅེས་གསུངས།

མགོན་པོ་མཆོག་གིས། ངོས་རང་འདིར་འཕགས་པ་སྤྱན་རས་གཟིགས་ཀྱི་ཐུན་མོང་མ་ཡིན་པའི་འབྲེལ་བ་ཡོད་པ་བྱས་ནས་ངོས་རང་གི་མགོ་སྒང་ལ་བཅོམ་ལྡན་འདས་དང་རྒྱལ་བ་ཤཱཀྱ་ཐུབ་པ། ཕྲག་གཡས་པར་འཕགས་པ་སྤྱན་རས་གཟིགས། ཕྲག་གཡོན་པར་འཕགས་པ་སྒྲོལ་མ་ཡོད་བསམ་ནས་རྗེས་དེད་བྱས། ཞེས་འཕགས་པ་སྤྱན་རས་གཟིགས་དང་རྗེ་བཙུན་འཇམ་དཔལ་དབྱངས། རྗེ་བཙུན་སྒྲོལ་མའི་གཟུངས་སྔགས་ཀྱི་ལྗགས་ལུང་གནང་ཡོད་པ་དང་། སངས་རྒྱས་བཅོམ་ལྡན་འདས་ཀྱི་མཚན་སྔགས་དང་མ་ཎི་གཟུངས་སྔགས་སོགས་གང་མང་བསགས་དགོས་པའི་བཀའ་སློབ་ལམ་སྟོན་མཛད་འདུག

༧གོང་ས་རྒྱལ་བ་རིན་པོ་ཆེ་མཆོག་གི་མཛད་འཆར་ལྟར་ན། ཟླ་འདིའི་ཕྱི་ཚེས་ ༢༦ ཉིན་གྱི་སྔ་དྲོའི་ཆུ་ཚོད་ ༨ པའི་སྟེང་༧གོང་ས་རྒྱལ་བ་རིན་པོ་ཆེ་མཆོག་ལ་བོད་ཕྲུག་ཁྱིམ་སྡེའི་ལས་སློབ་ངོ་ཟུར་ཡོངས་དང་། བྱང་ཨ་རིའི་བོད་རིགས་སྤྱི་མཐུན་ཚོགས་པ་གཉིས་ཀྱིས་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་བརྟན་བཞུགས་བསྟར་འབུལ་ཞུ་རྒྱུ་དང་། དབུ་མ་རྩ་བ་ཤེས་རབ་ཀྱི་བཀའ་ཆོས་གནང་རྒྱུ་ཡིན་པ་དང་། མགོན་པོ་གང་ཉིད་ཀྱིས་འདི་ལོའི་ཕྱི་ཟླ་ ༡༡ ཚེས་ ༢༥ ནས་ ༢༦ བར་ཉིན་གཉིས་རིང་ལ་ཀོ་རི་ཡའི་ནང་པའི་རྗེས་འཇུག་པ་ཚོར་ཐེག་ཆེན་ཆོས་གླིང་གཙུག་ལག་ཁང་དུ་དབུ་མ་རྩ་བ་ཤེས་རབ་ཀྱི་བཀའ་ཆོས་སྩལ་རྒྱུ་དང་། ཡང་འདི་ལོའིཕྱི་ཟླ་ ༡༢ ཚེས་ ༢༩ ནས་ ༣༡ བར་ཉིན་གསུམ་གྱི་རིང་གནས་མཆོག་རྡོ་རྗེ་གདན་གྱི་དུས་དབང་གསུང་ཆོས་ར་བར་གསུང་ཆོས་སྩལ་རྒྱུ་ཡིན་འདུག

བྱམས་པ་ཚེ་རིང་།